王菲

中國女歌手同演員
(由王靖雯跳轉過嚟)
想搵第二個意思嘅話,請睇王菲 (搞清楚)

王菲粵拼wong4 fei1英文Faye Wong1969年8月8號—)係香港女歌手、詞曲作家同演員,1989年出道。

王菲
王菲(2011年)
女藝人
原名夏林(15歲之前使用)[註 1]
英文名
  • Shirley Wong(1989年-1992年)
  • Faye Wong(1992年-而家)
粵拼wong4 fei1
花名阿菲
別名王靖雯(1989年-1994年使用)
國籍 中國香港
民族漢族
出世 (1969-08-08) 1969年8月8號(54歲)
中國 中國北京東城區北京協和醫院
職業
  • 歌手
  • 詞曲作家
  • 唱片監製
  • 演員
語言
教育程度中學
母校北京市東直門中學
宗教信仰藏傳佛教(噶瑪噶舉派)
配偶
  • 竇唯(1996年結婚;1999年離婚)
  • 李亞鵬(2005年結婚;2013年離婚)
仔女2女,包括竇靖童
音樂類
演奏樂器人聲
出道地 英屬香港
出道日期1989年, 35年之前 (1989)
出道作品《王靖雯》
代表作品完整一覽
活躍年代1989-2005,2010年開始
唱片公司
經紀公司K's Production
網站veggieg嘅新浪微博(2015年停止更新)
網路電影資料庫(IMDb)資訊

王菲喺華人世界擁有好高嘅知名度,佢喺日本等地亦都有一啲歌迷,又有強烈嘅個人風格。有唔少評論家都認為佢係十年嚟華語樂壇最出色嘅女歌手之一,因此佢被視為大中華地區嘅「樂壇天后」。佢嘅事業顛峰期係1994年同埋1998年《十大勁歌金曲頒獎典禮》度攞咗兩次「最受歡迎女歌星」;喺1994年至1997年、1999年至2000年《十大勁歌金曲頒獎典禮》度攞咗六次「亞太區最受歡迎香港女歌星」;喺2000年時同陳慧琳陳奕迅一齊攞「四台聯頒音樂大獎-傳媒大獎」,做咗四大電子傳媒音樂頒獎典禮大贏家。直到2004年王菲憑《將愛》專輯第五次入圍臺灣金曲獎,重攞咗「最佳國語女演唱人」。佢亦都演過幾部電影電視劇

早年 編輯

王菲係北京市東城區嘅北京協和醫院出世,阿爺係王墨林(又叫王兆民),喺北京大學國文系畢業,做過中華民國立法院委員。第二仔王佑林即係王菲嘅老竇,係位煤炭工程師,阿媽夏桂影係煤礦文工團女高音。因為文革影響,佢15歲前跟阿媽姓,名為夏林;15歲後改跟阿爸姓先至叫王菲。有個阿哥叫做王弋[1]。喺中學時代王菲嘅歌唱事業就嶄露頭角,出過幾張翻唱鄧麗君歌曲嘅專輯,包括《風從哪裏來》、《迷人小姐》、《鄧麗君故鄉情》等[2]

佢喺北京東直門中學畢業,本來已經考入廈門大學生物系,但阿爸最終決定移民香港[3]。佢去到香港因為無嘢做,開始同三流服裝品牌做過模特兒,隨後由朋友引薦至香港音樂教育家戴思聰門下學流行音樂發聲[4]

起飛(1989年-1991年) 編輯

1989年王菲參加「亞太金箏流行曲創作大賽」,以一首《仍是舊句子》攞咗銅獎[5]。後來演唱才華被發掘,加入新藝寶(Cinepoly)唱片公司[6]。為咗符合嗰陣香港嘅氛圍,王菲改咗個藝名「王靖雯」(wong4 zing6 man4Shirley Wong)並喺1989年推出自己喺港式包裝下嘅首張大碟《王靖雯》。啱啱出道嗰時佢樂風平淡,大碟係傳統嘅粵語歌曲抒情風格。《仍是舊句子》亦有收錄其中。

1990年出版另兩張專輯《Everything》同埋《You're the Only One》後,佢雖然有咗一定嘅知名度,不過重未有太大嘅人氣,佢就過咗去美國打算繼續進修。嗰時佢嘅音樂雖然都係延續咗粵語抒情風格,不過有咗啲洋化色彩,翻唱咗多首東洋西洋嘅知名R&B歌曲:好似喺《You're the Only One》度佢就翻唱咗三首日本女歌手EPO嘅歌曲;重有三首係西洋歌手嘅,包括Diana Ross同埋Karyn White

奠定地位(1991年-1994年) 編輯

回港 編輯

由美國返到香港,佢將英文名「Shirley Wong」改為「Faye Wong」,中文藝名冇變重係王靖雯。1992年,推出咗第四張專輯《Coming Home》,以一首翻唱日本歌后中島美雪嘅《容易受傷的女人》紅遍全港(原曲名為《ルージュ》),迅速奠定咗佢喺樂壇嘅地位,呢隻曲亦成為佢嘅經典代表作之一。嗰時王靖雯嘅音樂仍然係以港式商業流行樂為主,但佢喺R&B同埋靈魂樂唱法上嘅技巧日漸成熟。英文嘅《Kisses in the Wind》亦係佢本人一直好鍾意嘅歌曲。大碟中仍然依循嗰時香港樂壇嘅翻唱習慣,改編咗幾首東洋西洋嘅歌曲。憑住呢張專輯,王靖雯喺香港晉身一線女歌手嘅行列。專輯封面佢係回鄉嘅沉思少女,內頁嘅造型係喺鄉下北京嘅時髦女郎。

1993年,佢出咗《執迷不悔》嘅粵語專輯。《執迷不悔》係佢自己作詞,分為粵語同埋國語兩個版本,亦係佢嘅經典歌曲。自此之後好多歌迷認為呢四個字就係佢個性嘅真實寫照,並且喺佢大部分嘅演唱會上,佢都以呢首歌作結。呢張碟嘅曲風同上張專輯分別唔大,依然喺翻唱R&B類型嘅海外歌曲,並且仍然有靈魂樂式嘅演唱色彩。專輯中佢嘅造型繼承上一張嘅風格,亦都係化妝比較濃重,着皮衣皮裙、黑絲筒襪等。

呢一年,佢又推出粵語專輯《十萬個為什麼》。碟中佢喺詞曲上開始體現出更多佢本人對生活嘅態度,並且逐漸參與專輯嘅製作過程。《流非飛》呢首歌,由旋律同埋歌詞都可以睇出佢希望擺脫束縛嘅心態。佢翻唱咗美國鋼琴另類女歌手多莉·艾莫絲(Tori Amos)嘅《Silent All These Years》,翻唱版名為《冷戰》。呢張大碟一共11隻歌,其中6首係翻唱,好似中島美雪嘅《若你真愛我》同埋警察樂隊(Police)嘅《Do Do Da Da》等;另外重有一首英文歌《Do We Really Care》。佢參與咗專輯嘅創作、造型、封面概念等各種製作過程,《動心》更係佢第一次自己負責作詞作曲。呢隻碟整體突出咗「自我」,相對上兩張嚟講輕鬆活潑;佢嘅造型亦都開始絢麗起來。由呢張專輯開始,佢開始咗喺香港樂壇嘅另類音樂嘗試。

國語市場 編輯

1994年,佢重用緊王靖雯嘅藝名開始喺台灣拓展國語市場,唱片有《》同埋《天空》。《迷》嘅音樂依然係傳統嘅抒情風格,主打歌《我願意》有管弦樂同埋弦樂兩個版本,唱到街知巷聞,十年來一直係好多佢嘅歌迷心中最經典嘅歌曲,重俾齊秦等華語樂壇歌手翻唱咗。由於初次進入國語市場,喺呢兩張專輯,佢嘅曲風並冇展現出另類嘅一面,《只願為你守著約》等都係情歌類歌風。大碟收錄咗原本喺香港發行嘅《執迷不悔》同埋《冷戰》兩首國語歌,亦包括咗香港電影《天龍八部》嘅主題曲《只有我自己》。封面同埋內頁中,佢以短髮嘅清新樸素造型示人,喺佢成個音樂生涯中好少有。

《天空》嘅音質明亮,係佢最為柔同埋抒情嘅一張專輯,亦係好多佢嘅老歌迷最鍾意嘅大碟。兩隻碟都係由音樂人楊明煌監製,但係佢過咗冇幾耐就因為車禍過咗身。好多人相信如果佢冇過身嘅話,王菲嘅發展道路同而家會好唔同。成張專輯嘅風格統一,《天空》(包括普通版同埋唔插電版)係佢又一首經典歌曲。同樣受到佢歌迷推崇嘅曲重有情歌風嘅《棋子》(周華健唱過呢首歌嘅另一個版本)。清唱開頭嘅《矜持》同埋拖音吟唱嘅《天使》亦係佢嘅抒情類歌曲嘅代表作。佢同竇唯合作嘅《誓言》亦有再次收錄喺呢張碟度。佢本人負責呢張專輯嘅造型,鼻飾、耳飾同埋髮型等都有濃厚嘅歐美嬉皮色彩。

曲風變化 編輯

喺1994年,雖然喺台灣重用緊王靖雯做藝名,但喺香港佢將中文藝名改返做原名「王菲」,同兩張國語專輯交錯住推出咗兩張粵語大碟:《胡思亂想》同埋《討好自己》。《胡思亂想》係王菲音樂事業嘅轉捩點,佢放棄咗港式流行樂嘅模式,大膽將英倫音樂元素融入到音樂之中。大碟封面亦都係另類風格,充滿咗殘缺不全嘅漢字。不過喺碟中翻唱英倫後鬅客樂團Cocteau Twins嘅歌曲,運用大量嘅音墻效果,同嗰陣嘅香港樂壇風格截然不同;即便喺歐美,孿生卡度嘅音樂都唔喺主流流行樂之類。佢亦翻唱咗愛爾蘭樂隊「小紅莓」(The Cranberries)嘅代表作《Dreams》(翻唱版名為《夢中人》,係電影《重慶森林》嘅主題曲之一),模仿咗主唱Dolores O'Riordan好出名嘅拖音技巧。呢種唱法後來亦成為佢自己嘅個性,好似同一張專輯嘅《誓言》同埋後來百代時期嘅《催眠》等歌曲;亦有唔少樂評人從此開始批評佢抄人哋嘅風格。《誓言》係佢同埋未來嘅丈夫-北京搖滾音樂人竇唯合作創作嘅,王菲負責作詞,兩人一齊譜曲。同張大碟中,佢亦冇放棄傳統嘅抒情歌曲,演唱咗台灣音樂人張宇嘅創作歌曲《天與地》同埋《遊戲的終點》。

《討好自己》係佢1994年最後一張新錄音室大碟,「逃避現實」嘅態度貫穿喺專輯嘅主題中。比《胡思亂想》中英倫新紀元音樂嘅主體風格更進一步,佢呢次全面體現咗自己唔想受到拘束嘅個性。《出路》以慢板説唱嘅形式進行,結尾運用拖音嘅吟唱,歌詞闡述咗王菲看待生活、愛情同埋人生嘅態度;由於佢信奉佛教,所以呢種「出世」嘅人生態度亦奠定咗成張專輯嘅基調。北京音樂人張亞東同佢首次合作,寫咗《飄》呢首旋律縹緲嘅歌。後來佢同王菲合作越來越頻繁,成為佢音樂事業嘅另一個轉捩點。抒情曲亦都有收錄,好似《愛與痛的邊緣》(《有多少愛可以重來》嘅粵語版)同埋《平凡最浪漫》(《最浪漫的事》嘅粵語版)等;翻唱歌曲依然繼續有,好似星期天樂隊(The Sundays)嘅歌曲《為非作歹》。專輯封面嘅最初版本係一片粉紅色,只有中間「討好自己」四個小字。呢隻碟之中佢嘅髮型仍然係繼承《天空》中嘅形像,而衣着就好隨便。

「最精彩演唱會」 編輯

王菲喺1994年底喺香港紅磡體育館第一次召開大型演唱會,一連18場,打破咗新人演唱會場數最多嘅記錄同埋換衫最少嘅記錄(4套)。奇特嘅服裝造型同埋慵懶嘅肢體動作將佢同其他香港歌手分別開來。呢次演唱會,加上1994年內推出嘅四張國語粵語新專輯,再加上參與拍攝王家衛嘅知名電影《重慶森林》,令佢穩陣咁佔據華語樂壇天后嘅地位。

另類音樂(1995年-1997年) 編輯

無論係香港定係台灣,王菲嘅另類之路都越走越犀利。佢喺1995年推出粵語新專輯《Di-Dar》,喺音樂、造型同埋音樂錄影帶中都體現出一種頹廢灰暗嘅氛圍。大碟共10首歌曲,曲嘅名全部係兩個漢字或音節(如《Di-Dar》),除國語歌《流星》以外嘅9首粵語歌都係香港知名作詞人林夕負責。王菲自己譜曲《Di-Dar》同埋《假期》兩首作品:喺《Di-Dar》中又一次運用咗捲舌拖音嘅技巧,後者嘅旋律就非常詭異。由C.Y.Kong作曲嘅《無題》同埋《迷路》有濃厚嘅中東風味。抒情類嘅歌曲有《享受》、《一半》等,但都係慢熱型嘅曲。《曖昧》係翻唱台灣女音樂人黃鶯鶯嘅《情雪》,亦係呢隻碟裏面知名度最高嘅獲獎歌曲。王菲嘅另類風格,已經從《討好自己》中嘅逃避態度轉化為頹廢兼詭異,滲透住好濃嘅異域風情。音樂錄影帶中,佢喺凌亂嘅房裏面無所事事、鏡頭唔停搖擺晃動,呈現出無助、壓抑同埋躁悶嘅心態。但喺專輯嘅封面同埋內頁中,佢嘅髮型同服裝就用蝴蝶背景襯托,非常華麗。呢張唱片亦係王菲到目前為止最後一張粵語大碟。

1996年,推出嘅國語專輯《浮躁》將佢嘅另類音樂推上頂峰。王菲本人最鍾意《浮躁》呢張專輯,不過銷量並唔好,但佢係王菲喺音樂藝術上探索最成功、風格最為統一嘅專輯。佢呢次選擇咗同北京音樂人同埋孿生卡度越洋合作,後者喺1994年被王菲翻唱後雙方喺音樂上亦開始咗交往。孿生卡度喺自己嘅大碟曾經同王菲合唱過《Serpent Skirt》一曲,呢次亦特登為佢譜寫咗兩首歌曲「掃興」同埋「分裂」。其餘8首全部係王菲自己譜曲,林夕負責咗大半歌詞。呢張專輯有幾個特點,一係冇一首抒情商業化嘅歌曲,二係佢喺好幾首歌中鬼食泥咁哼唱,自創咗一種人哋聽唔明嘅語言,三係有三首幾乎係純音樂。大碟嘅整體氛圍一如題目所述,喺秋高氣爽嘅天空下依然不禁浮躁、無常、迷惘。大碟嘅形式偏離咗華語樂壇嘅傳統,結果銷量好唔滿意。歌迷意見亦不一,但一啲死硬歌迷非常推崇呢張專輯。後來,可能係為咗商業市場,佢再冇出過類似嘅專輯。2000年嘅《寓言》亦只係做咗一半。

《浮躁》嘅推出,亦令佢喺1996年10月14號成為繼鞏俐之後第二個登上《時代》週刊封面嘅華人藝人,亦係第一位華人歌手。

王菲喺1996年喺新藝寶公司錄製咗10首粵語歌曲,因為有咗、結婚(見下節)導致唔能夠進行唱片宣傳,而且合同亦到咗期。所以,呢張粵語專輯本來已經預定推出,但就俾新藝寶從1997年以後打散喺兩張EP同埋兩張精選中,用來對抗王菲喺新公司百代嘅新專輯。

1997年,由新藝寶推出嘅兩張EP名為《玩具》同埋《自便》。《玩具》收錄咗5首新粵語歌,除咗抒情歌《約定》之外全部係較奇特詭異嘅另類歌曲。王菲把聲冇太大變化,音樂同埋歌詞比起頹廢沉重嘅《Di-Dar》輕盈同埋柔咗許多。呢隻EP最能夠令歌迷記住嘅經典曲只有《約定》同埋《暗湧》,後來台灣女歌手周蕙翻唱咗《約定》嘅國語版後,呢隻曲亦成為佢嘅知名曲之一。EP封面係王菲大肚嗰時影,內頁除咗歌詞亦冇佢其他宣傳相。

《自便》中有三首新粵語歌,以及三首舊歌嘅舞曲混音版。《守時》雖然放喺咗EP中推出,但就同《約定》一樣係王菲好經典嘅粵語抒情歌。《守護天使》係香港Beyond樂隊嘅黃家強負責作曲同埋編曲。「自便」非常另類。EP嘅封面係王菲以前嘅相,內頁冇其他宣傳相。

另外兩首新粵語歌分別放喺兩張新藝寶推出嘅精選集當中,分別為《菲賣品》中嘅《不得了》同埋《Faye Best》中嘅《心驚膽戰》。兩首歌曲風都偏另類,並冇引起太大注意。

紀念鄧麗君 編輯

1995年,鄧麗君去世,王菲中學開始就鍾意唱佢啲歌,因此喺同年推出咗一張非常古典嘅翻唱專輯《菲靡靡之音》。專輯嘅名字諷刺咗中國大陸一啲人原來將鄧麗君嘅歌抨擊為靡靡之音嘅做法。十三隻曲都係鄧麗君廣為人知嘅歌曲,王菲用自己嘅風格重新去演繹。鄧麗君嘅聲線比王菲要溫暖同埋柔,王菲嘅嗓音就更清澈同埋縹緲。《但願人長久》原本係蘇軾嘅名詞《水調歌頭·明月幾時有》譜嘅曲,呢首歌亦成為王菲本人嘅經典曲目之一。

百代時期(1997年-2001年) 編輯

1997年 編輯

1997年,王菲生咗竇靖童之後,同百代唱片簽約,簽約費係6000萬港幣出55首歌。佢嘅要求係唔錄製粵語專輯,不過喺後4張百代大碟中亦演唱咗幾首粵語歌守住香港市場。喺百代嘅首張唱片係《王菲》(1997),由於上年嘅國語唱片《浮躁》非常另類,十足商業化嘅新專輯讓樂評人大跌眼鏡。大碟整體風格慵懶放鬆,呈現出一種順其自然無所謂嘅態度。王菲嘅聲線剔除咗大部分花樣修飾同埋拖音技巧,大多曲目中都彷佛係喺唔經意吟唱。林夕依然負責大部分歌詞,張亞東負責王菲嘅音樂製作,呢張專輯佢負責錄製三首歌,有《你快樂(所以我快樂)》、《悶》同埋《懷念》。《你快樂(所以我快樂)》曲風較特別,唔係傳統嘅情歌模式,但好快便流行起來,連歌名都成為流行用語;《悶》係首樂隊化嘅作品;《懷念》又係翻唱孿生卡度嘅作品《Rilkean Heart》,係一首唔插電式嘅小品,碟中另一首非主流嘅《娛樂場》亦係樂隊為王菲而作,喺倫敦錄製。

《人間》、《我也不想這樣》同埋《撲火》都係好抒情嘅作品:《人間》由日本歌后中島美雪作曲[7],係呢張唱片中最知名嘅作品;《我也不想這樣》雖然旋律優美,但MV就另類到喺北京一個唔多衛生嘅公共廁所中拍攝。王菲嘅造型同埋自然慵懶嘅音樂風格大相徑庭:淡綠背景、黑色皮裝、黑色眼圈同埋紅色眼影延續咗佢原來嘅另類造型風格。《你快樂(所以我快樂)》嘅MV中,佢化妝成非常濃重嘅黑色熊貓眼,但《悶》嘅MV中佢採用咗蝴蝶髮飾,顯得復古一啲。由於嗰時正逢亞洲金融危機,亦因為冇收錄粵語歌,所以唱片喺香港銷量不如人意。但喺台灣賣出咗好成績,台灣銷量賣出50萬以上。港台日嘅初版都係3D封面。

新藝寶97年推出嘅精選集《菲賣品》收錄咗王菲原來嘅經典國語粵語歌曲,銷量甚至超過咗佢喺百代嘅新專輯。因為,新藝寶擁有王菲原來一切歌曲嘅版權,所以此後每年都要喺佢推出新專輯時相應出版名目繁多嘅精選,呢種做法受到歌迷嘅廣泛譴責。

1998年 編輯

1998年春季,中國大陸中央電視台春節聯歡晚會上,王菲同好友那英獻曲《相約1998》,隻曲立即紅遍大陸地區。秋天,佢推出咗一張暢銷全華人地區嘅國語專輯《唱遊》。整體風格比上一張《王菲》大氣活潑很多,要體現出一種邊唱邊遊、無拘無束嘅心態。王菲嘅聲線亦一掃上張唱片嘅慵懶風格,好大程度上運用美聲、顫音、拖音、假聲、氣聲等技巧。時隔兩年,佢再次自己譜寫作品,共有四首歌曲:開場嘅《感情生活》係首樂風渾厚濃重嘅作品;《臉》中佢將美聲唱法同埋自己嘅獨特聲線交替進行,兩種性格交錯攀昇,喺高潮處戛然而止;《小聰明》展現咗佢慵懶嘅拖音技巧;《童》係佢同埋先生竇唯第一次親自為個女竇靖童寫歌(亦有人認為上張專輯嘅《你快樂(所以我快樂)》或《人間》係佢唱畀個女嘅)。

《半途而廢》、《飛》、《醒不來》同埋《你》都係民謠類嘅作品。情歌《紅豆》(粵語版《償還》)廣為傳唱,一直到而家都係卡拉OK中點歌率非常高嘅歌曲。《色誡》(粵語版《情誡》)係比較特殊嘅一首歌,王菲喺厚重配樂嘅襯托下運用咗大量顫音等技巧。《唱遊》係華語流行樂壇第一張用HDCD(高解析度CD)技術錄製嘅唱片,封面同MV中嘅化妝造型引發咗娛樂界一陣陣模仿之風,喺唱片內頁中佢重以罕見嘅活潑可愛一面示人。

同年聖誕期間,佢喺香港紅磡體育館再次連開《唱遊大世界》演唱會17場。呢次係佢同竇唯最後一次喺演唱會上嘅合作。由年底開始到1999年初,佢喺廣州、北京、上海、深圳等地巡回演唱,亦係佢第一次喺內地開演唱會。

1999年 編輯

1999年離婚後,佢推出咗新專輯《只愛陌生人》。好多樂評人認為,呢張唱片嘅音樂整體風格比《唱遊》要相對保守一啲,新意相對較少。不過開篇嘅《開到荼蘼》係王菲嘅突破之一,歌中佢首次運用破音技巧(佢本人後來亦講過唔鍾意自己嘅嗓音平滑清澈,希望通過食煙令自己聲沙啲),經過電腦處理嘅聲音同埋搖滾式配樂配合,加埋林夕嘅歌詞,體現出一種恐懼愛情嘅絕望心態。《百年孤寂》(粵語版係《守望麥田》)亦係屬於強節奏嘅搖滾流行樂,此後王菲嘅每張專輯中都有至少一首咁嘅作品。《只愛陌生人》原本係張亞東嘅舊作,王菲嘅版本相比較有一啲復古嘅味道,曲風輕鬆;歌中個女竇靖童亦獻聲「Come on, baby。」《催眠》又係王菲捲舌拖音技巧嘅代表作。

《當時的月亮》、《蝴蝶》(粵語版為《郵差》)係抒情類嘅歌,唔過並冇上兩張專輯嘅《紅豆》同埋《人間》流行。《嗶一聲之後》亦係張亞東嘅作品,呈現出迷離虛幻嘅氣氛。王菲較早時自己譜寫咗一曲電子樂風格嘅《精彩》作為百事可樂嘅廣告歌,亦收錄喺唱片中。

同年,佢為日本遊戲《最終幻想VIII》演唱主題曲《Eyes on Me》,打入咗日本單曲銷量排行榜十大,亦通過遊戲令西方人逐漸接觸到咗佢嘅歌聲。隨住喺日本嘅人氣漸旺,同年佢又喺日本開咗兩場演唱會,成為第一位喺東京武道館獻唱嘅華人歌手。同年,喺日本攞咗金唱片大賞,係繼鄧麗君之後第二位攞呢個獎嘅亞洲歌手。佢亦被日本歌迷稱為「亞洲歌姬」。

2000年 編輯

2000年,王菲推出《寓言》,喺藝術領域又進行咗嘗試。唱片分為兩個部分,前五首渾然一體,用複雜宏大嘅編曲同埋沉重嘅背景樂表達咗一個完整嘅概念;後五首係商業化嘅歌曲,導致喺呢張專輯上歌迷亦明顯分為兩派。前五首係王菲自己作曲,林夕負責歌詞,張亞東製作。《寒武紀》以弦樂開場,厚重嘅風格類似電影配樂;《新房客》偏向明快嘅電子風格,亦係王菲、張國榮等主演嘅電影《戀戰沖繩》嘅主題曲之一;《香奈兒》節奏歡快,弦樂貫穿其中;《阿修羅》凝重低沉,嘆息咁嘅吟唱營造出陰霾嘅氛圍;最後嘅《彼岸花》用佛教嘅輪迴説明世事無常,將五首歌融為一個整體。林夕負責全部五首歌嘅歌詞,用神話、傳講、文學、電影、宗教嘅辭彙來配合張亞東嘅編曲。

後五首(重附加兩首粵語歌曲)就係普通風格。《再見螢火蟲》係上張《百年孤寂》嘅延續,《笑忘書》係另一首獲獎嘅情歌。因為《浮躁》嘅銷量並唔滿意,所以咁做好可能係為咗照顧市場。有嘅樂評人指出王菲應該將歌曲分為兩張EP;重有人嘆息如果佢10首歌都係前五首嘅風格,成張專輯會成為流行樂經典之作。

2001年 編輯

2001年上半年,王菲去日本為富士電視台拍攝日劇《ウソコイ》(中譯《大話姻緣》或《弄假成真》)並演唱主題曲《Separate Ways》。套劇收視平平,但並冇影響王菲喺日本嘅人氣,佢嘅單曲《Separate Ways》照打入日本Oricon單曲銷量周榜TOP 20。

同年,佢推出喺百代最後一張嘅中文唱片《王菲》,喺百代嘅頭尾兩張專輯名都為《王菲》。銷售開出紅盤,喺日本嘅最高成績係Oricon專輯銷量日榜第14位。佢喺10月同埋11月喺大阪同東京武道館又召開咗全面體演唱會。呢張唱片喺詞曲人員上做咗較大調整,而且王菲第一次對爵士樂(《夜會》)同埋圓舞曲(《流浪的紅舞鞋》)進行咗嘗試,演唱咗台灣音樂人伍佰創作嘅《單行道》,《打錯了》就係新加坡女音樂人蔡健雅創作嘅歌曲。除咗11首國語歌外,重有五首粵語歌,其中包括嗰陣嘅男友謝霆鋒所作嘅《迷魂記》。因為大碟集中咗一啲風格迴異嘅創作人,專輯整體嘅曲風同王菲原來嘅音樂個性有好大唔同。

2001年11月王菲參與錄製咗一張佛經專輯《Loving Kindness & Wisdom》(有譯「悲智雙運」),係佢嘅藏傳佛教師父喇嘛梭巴仁波切(Lama Zopa Rinpoche,中國大陸譯「堪忍尊者」),為建造全世界最大嘅彌勒佛造像所作嘅慈善籌款計劃。兩張喋,第一張係喇嘛梭巴仁波切嘅經文誦讀,第二張係喇嘛梭巴仁波切嘅經文誦讀同王菲嘅背景伴唱,附加一首王菲自己演唱嘅《彌勒佛咒》。呢張專輯中國大陸冇正式引入。

年尾王菲同梁朝偉、趙薇、張震主演電影《天下無雙》。王菲更憑套戲榮獲第9屆香港電影評論學會最佳女演員獎及第22屆香港電影金像獎提名最佳女主角。此外,王菲亦為《天下無雙》錄制電影原聲帶,並將黃梅調注入流行曲。

健力士世界紀錄 編輯

2000年3月,王菲進入咗健力士世界紀錄大全,為銷量最高嘅香港女歌手:截至2000年3月,20張專輯有據可考嘅銷量達到970萬張[8]

新力時期(2002年-) 編輯

王菲喺2002年同新力唱片公司簽約,合同係出4張唱片。2003年佢嘅新專輯《將愛》推出,喺華語地區嘅銷量非常出色。不過喺音樂上除咗標題曲外,成張專輯嘅氣氛安靜輕鬆。王菲本人又作咗四首曲目:《將愛》、《不留》、《陽寶》同埋《四月雪》。

2002底,日本音樂界為咗慶祝「音樂女王」松任谷由實出道30年,由一班日本歌手演唱佢嘅名曲僅以紀念。王菲亦被邀請唱咗《Valentine's Radio》。

2003年底,佢再喺香港紅磡體育館連開8場《菲比尋常》演唱會,隨後2004年至2005年喺馬來西亞上海新加坡西安北京杭州台北廣州召開巡迴同名演唱會。

喺2004年王菲喺電影方面又開始活躍,出演咗《大城小事》同埋《2046》。亦為《英雄》、《我愛你》同埋大陸電視劇《笑傲江湖》演唱咗主題曲。

2005年5月底,王菲嘅經理人陳家瑛向傳媒證實:佢已經開始「無限期休息」,除咗兩條未完成嘅廣告之外停止一切工作。張亞東亦向傳媒透露,「佢已經唔打算再唱歌咗」[9]

感情生活 編輯

竇唯 編輯

王菲嘅私生活係傳媒焦點。佢嗰陣喺香港已經係天后級嘅人物,但1996年有身紀之後,就放棄咗香港嘅生活,喺6月返北京嫁咗畀出名搖滾樂手竇唯。佢喺某日朝早唔知醒衣衫不整倒夜香嘅相畀香港媒體影低,轟動整個樂壇。為咗感情生活乜都可以犧牲,成為王菲喺啲人眼中另一個特點。

竇唯喺王菲嘅音樂事業上的確起到至關重要嘅作用,王菲嘅另類道路喺佢同北京音樂圈嘅頻繁接觸。兩個人好耐之前就開始合作,比如早期嘅《執迷不悔》同埋《誓言》。有咗竇唯嘅協助,王菲喺音樂中大膽加入咗各種形式嘅元素,喺編曲同埋歌詞方面都產生咗驚艷嘅效果。喺王菲兩岸三地嘅演唱會上,竇唯一直負責打鼓。

佢哋生咗一個女竇靖童,意思係竇唯同王靖雯個女,喺1997年1月3號出世。後來竇靖童喺1999年嘅《只愛陌生人》中獻聲一句「Come on, baby」。兩人喺1999年離婚,又一次轟動華人娛樂界,竇靖童撫養權歸於王菲。因為最開始香港傳媒影到竇唯同情人高原喺一齊,並且竇唯當場對記者表明高原係佢嘅「愛人」,所以嗰陣華人媒體同娛樂界眾口一詞指責竇唯婚外情,但事後千夫所指嘅竇唯宣稱全都係一場陰謀,而王菲由始至終冇對此發表過意見。由於王菲唔開口,竇唯亦冇透露具體情況,所以聽到嘅全都係傳媒嘅睇法,真實情況究竟係點未能有公正嘅定論。

謝霆鋒 編輯

香港男藝人謝霆鋒細王菲11歲。香港傳媒對兩人之間嘅關係從懷疑到緊追不捨,終於喺2000年6月《花樣年華》慶功宴後發現兩人牽手,一時間呢場姐弟戀喺娛樂圈炒到熱辣辣。傳媒一直大力渲染鋒菲戀嘅各種細節,令2000年—2003年王菲嘅私生活一直暴露喺鎂光燈之下。同離婚事件一樣,佢自始至終都冇公開討論過自己嘅私事。呢場戀情最終喺2004年初逐漸銷聲匿跡。

2014年,王菲同謝霆鋒復合。至2020年12月,有消息指兩人早已情變,王菲同謝霆鋒已經分手。2020年謝霆鋒生日都唔見王菲現身慶祝。

李亞鵬 編輯

李亞鵬係中國大陸演員,真正為觀眾熟知嘅係佢接連出演嘅金庸名著《笑傲江湖》同《射雕英雄傳》。兩人嘅戀情喺2004年靜靜開始,到咗2005年春就傳出要結婚嘅消息。王菲對自己嘅私事一如既往沉默,李亞鵬亦唔多透露。由於好多觀眾對兩部金庸電視劇篡改原著情節等問題極之不滿,結果對李亞鵬亦唔畀面咁批評。喺中國大陸嘅網絡上,李亞鵬喺個人行為上並冇負面新聞,但佢嘅名聲喺網民心目中一直都係負面嘅。所以兩人走埋一齊嘅消息又一次震動娛樂界。由於傳出王菲結婚後會隱退嘅傳言,王菲嘅歌迷喺一開始對李亞鵬更加猛烈抨擊,但最終都逐漸平息[未記出處或冇根據]

王菲同李亞鵬2005年7月28號喺新疆烏魯木齊正式登記結婚,並喺北京後海嘅「小王府」飯店開擺咗只有家人密友參與嘅婚宴[10]

2006年5月27號,王菲喺北京協和醫院開肚生佢第二個女,改名李嫣。8月12號李亞鵬透過博客證實李嫣係天生裂顎(兔唇),會去美國矯型就醫。鵬菲個女兔唇嘅消息,由開始謠傳到李亞鵬喺博客公開承認,震撼娛樂界。

2013年9月13號,王菲宣佈已經同李亞鵬離婚。

個性同爭議 編輯

性格 編輯

王菲嘅性格出晒名獨斷獨行,喺重視人際關係嘅華人娛樂界非常罕見。喺名聲顯赫嘅華人藝人之中,只有王菲等極少數人敢唔配合傳媒嘅要求,有時甚至出言頂撞,並且對私人生活堅守沉默是金嘅原則,因此佢經常俾好多傳媒抨擊「玩大牌」。自細喺北京成長,王菲辦事做人嘅方式同香港商業化嘅娛樂圈格格不入。喺冇宣傳活動時,佢一般會返北京避開港台傳媒。而且除非係重大嘅娛樂界活動,否則佢一般唔會參與。雖然曝光率好高,但佢喺鈎心鬥角嘅娛樂圈始終冇捲入各種糾紛。佢對待陌生人冷淡,但對身邊工作人員嘅態度好友善,幾乎從冇關於佢人品嘅負面新聞。

華人傳媒普遍認為採訪王菲係一件非常困難嘅事,因為佢好少主動開口,而且回答通常好簡練,經常令採訪者或者節目主持人面臨冷場嘅危險。而王菲自己就認為,佢嘅性格好直,成日諗到乜就講乜,顧唔到人哋嘅諗法,所以都係少講為妙。比如1994年底嘅《討好自己》專輯由於前後兩個版本嘅包裝唔同,令好多歌迷以為係兩張新專輯而買重複咗。一啲人投訴後,王菲接受記者採訪時毫不避諱講冇睇清楚啲曲就買係「自己蠢」。

即使喺頒獎晚會上發表獲獎感言,佢嘅情緒都係唔慍唔火。2004年4月,台灣音樂人李宗盛出書《音樂聆聽報告2002-2004》,批評佢填詞嘅曲「將愛」係「故弄玄虛,令人無法意會」。結果2004年台灣金曲獎上,佢喺贏得「最佳國語女演唱人」獎後,發言話:「我會唱歌我係知道嘅,對於金曲獎評委對我嘅肯定,我亦給予充分肯定。」娛樂媒體廣泛認為係王菲對李宗盛嘅反擊。歌迷就對佢呢席話大表讚賞,認為噉至係王菲。亦有一部份人覺得佢目中無人,反而成為對金曲獎評委嘅肯定。另外,王菲喺後台嘅少言寡語亦曾經受到嗰時誤解咗佢個性嘅台灣主持人批評。

喺演唱會上更能睇出王菲唔鍾意講嘢嘅性格。其他所有華人歌手,或努力帶動現場氣氛,或時而對歌迷表達問候,同聽眾相互交流。而王菲除咗開場結束嘅問候之外,基本冇言語,成為佢演唱會嘅一個特色。呢種做法受到好多人抨擊,不過佢大多數歌迷將呢種性格睇成係王菲嘅優點。

曝光率 編輯

自從同竇唯結婚開始,王菲嘅私生活喺媒體上嘅曝光率一直居高不下。但佢永遠都係一副「撲克臉」,絕對唔向傳媒透露關於自己生活嘅任何信息。無論係離婚、鋒菲戀、鵬菲戀定係再婚,都冇可能由佢口中得到第一手消息。佢呢種堅守個人生活唔受侵犯嘅做法受到娛樂圈同埋歌迷嘅讚揚。佢對待感情敢愛敢恨嘅態度亦幾乎得到都市女性嘅一致肯定。有人指出無所顧忌嘅感情令佢負面新聞越來越多,反對者認為王菲嘅私生活唔係畀人睇嘅,佢本身一點錯誤都冇,只係傳媒煽風點火。

走音 編輯

2012年,王菲同陳奕迅出席內地春晚活動獻唱《因為愛情》,王菲唱高音部分時,被指走音兼把聲震晒,唱得極為辛苦吃力,有網民慨嘆王菲唱功大倒退,有網民揶揄當晚表現係「車禍現場」。

音樂同埋造型 編輯

王菲嘅音樂喺中前期借鑒咗多莉·艾莫絲小紅莓樂隊同孿生卡度等歐美歌手、樂隊嘅風格同表現方式。由1997年加盟百代開始,佢嘅音樂已經脫離咗英倫搖滾嘅另類模式,發展出咗自己獨特嘅個人風格,喺《寓言》呢張專輯中體現得尤其明顯;而且呢啲歐美歌手都係通過王菲嘅翻唱至被華人地區嘅廣大歌迷熟知,而且百代以後嘅時期根本睇唔出王菲嘅音樂同第啲歌手重有乜嘢相同之處。

佢嘅造型一直係娛樂界嘅一個指標,服飾、化妝等都係華人娛樂圈眾人模仿嘅對像。

其他 編輯

佢音樂嘅藝術性同埋歌藝並唔一定係華語樂壇中最出色嘅,無數嘅華文電視、廣播、平面媒體同埋網絡論壇嘅文章仍然將佢崇拜至近乎女神嘅地位,絕大多數時候一旦提到佢就會加上「天后」兩個字。每次佢一出大碟,大陸、港澳台、新加坡馬來西亞等地嘅電台電視台齊齊出動,歌迷嘅期待程度同埋傳媒聚焦係其他華人女歌手(或者男歌手)無法相比嘅,因此佢被視為大中華地區嘅「樂壇天后」。王菲自香港、台灣紅起,到後來大陸娛樂界對佢亦一樣癡迷,馮小剛嘅《大腕》、張藝謀嘅《英雄》、中國中央電視台版嘅兩部金庸武俠電視劇都明確邀請佢演唱主題曲。2005年春佢宣佈暫時退出歌壇嘅消息傳開,大陸傳媒(好似新浪)都開始用專欄來撰寫對佢同埋佢音樂嘅分析同埋評價,重在生嘅藝人暫別得到咁嘅重視亦係第一次。王菲嘅同輩藝人雖然同佢接觸唔多(總隱居)但對佢都有良好印象,好多年輕一代嘅華人藝人將佢作為偶像崇拜,台灣女歌手江美琪嘅第一張專輯就命名為《我愛王菲》。連馬英九亦公開講自己全家都係王菲嘅忠實歌迷(重做緊臺北市長嗰時,馬英九同王菲為五人制世界盃足球錦標賽代言合拍廣告,話受到屋企人影響,佢都係王菲歌迷)[11]

專輯一覽 編輯

王菲嘅唱片高產期係1990年代中。加盟百代唱片後,遵循一年一張嘅原則。加盟Sony後,隔得重耐。另外自從1989年出道以來,佢喺華人音樂圈內多次得獎。部分專輯如下:[12]


大碟 編輯

  • 《王靖雯》:1989年11月
    無奈那天 / 藉口 / 有緣的話 / 溫柔的手 / 尾班車 / 未平復的心 / 仍是舊句子 / 中間人 / 愛聽謊 / 新生
  • 《Everything》:1990年6月
    巴黎塔尖 / Everything / 遊蕩 / 可否抱緊我 / 鬥快說笑話 / My Lonliness / 哭牆 / 無悔今夜 / 一剎那 / 激流 / 巴黎塔尖(Reprise)
  • 《You're the Only One》:1990年12月
    美麗的震盪 / 又繼續等 / 然後某天 / 悶人咖啡 / 無原因 / 多得他 / 只有你 / 靜夜的單簧管 / 明年今夜 / 不裝飾
  • 《Coming Home》:1992年8月13號
    浪漫風暴 / Miss You Night & Day / 容易受傷的女人 / 不相識的約會 / 把鑰匙投進信箱 / 這些…那些 / 開心眼淚 / 重燃 / 兜兜轉 / Kisses in the Wind
  • 《執迷不悔》:1993年2月5號
    紅粉菲菲 / 執迷不悔(國語版) / 可愛眼睛 / 季候風 / 不再兒嬉 / 我永遠珍惜你我 / 情敵 / 從明日開始 / 夜半醉 / 執迷不悔(粵語版)
  • 《十萬個為什麼》:1993年9月7號
    流非飛 / Summer of Love / 如風 / 冷戰 / 長大 / 若你真愛我 / 動心 / 雨天沒有你 / 誘惑我 / Do Do Da Da / Do We Really Care?
  • 《迷》:1994年4月8號
    我願意(管弦樂版) / 執迷不悔 / 變幻的世界在轉 / 軟弱 / 我願意(弦樂版) / 沈醉 / 冷戰 / 心太野 / 只願為你守著約 / 只有我自己
  • 《胡思亂想》:1994年6月29號
    胡思亂想 / 誓言 / 天與地 / 夢中人 / 知己知彼 / 純情 / 遊戲的終點 / 夢遊 / 藍色時分 / 回憶是紅色天空
  • 《天空》:1994年11月10號
    天空 / 棋子 / 天使 / 影子 / 天空(Unplugged)/ 眷戀 / 不變 / 矜持 / 掙脫 / 誓言
  • 《討好自己》:1994年12月20號
    討好自己 / 蜜月期 / 為非作歹 / 我怕 / 出路 / 平凡最浪漫 / 飄 / 愛與痛的邊緣 / 背影 / 天不變地變
  • 《菲靡靡之音》:1995年7月
    雪中蓮 / 你在我心中 / 但願人長久 / 君心我心 / 初戀的地方 / 南海姑娘 / 假如我是真的 / 翠湖寒 / 黃昏裡 / 奈何 / 一個小心願 / 又見炊煙 / 原鄉情濃
  • 《Di-Dar》:1995年12月
    Di-Dar / 假期 / 迷路 / 曖昧 / 或者 / 我想 / 享受 / 一半 / (無題) / 流星
  • 《浮躁》:1996年6月
    無常 / 浮躁 / 想像 / 分裂 / 不安 / 哪兒 / 墮落 / 掃興 / 末日 / 野三坡
  • 《王菲》:1997年9月
    痲醉 / 你快樂(所以我快樂) / 悶 / 娛樂場 / 人間 / 我也不想這樣 / 小題大做 / 懷念 / 撲火 / 雲端
  • 《唱遊》:1998年10月
    感情生活 / 臉 / 色誡 / 半途而廢 / 飛 / 你 / 小聰明 / 醒不來 / 紅豆 / 童 / 原諒自己(粵) / 償還(粵) / 情誡(粵)
  • 《只愛陌生人》:1999年9月
    開到荼蘼 / 當時的月亮 / 催眠 / 只愛陌生人 / 百年孤寂 / 蝴蝶 / 過眼雲煙 / 嗶一聲之後 / 推翻 / 精彩 / 守望麥田(粵) / 郵差(粵)
  • 《寓言》:2000年10月20號
    寒武紀 / 新房客 / 香奈兒 / 阿修羅 / 彼岸花 / 如果你是假的 / 不愛我的我不愛 / 你喜歡不如我喜歡 / 再見螢火蟲 / 笑忘書 / 螢火蟲(粵) / 給自己的情書(粵)
  • 《王菲》:2001年10月18號
    光之翼 / 等等 / 打錯了 / 有時愛情徒有虛名 / 流年 / 夜會 / 流浪的紅舞鞋 / 白癡 / 兩個人的聖經 / 單行道 / 流浪的紅舞鞋(鋼琴版) / 迷魂記(粵) / 色盲(粵) / 不眠飛行(粵) / 心路(粵) / 女皇的新衣(粵)
  • 《將愛》:2003年11月7號
    將愛 / 空城 / 不留 / 美錯 / 乘客 / 陽寶 / 旋木 / 四月雪 / 夜妝 / 煙 / MV(粵) / 假愛之名(粵) / 花事了(粵)

EP 編輯

  • 1993年:《如風》(Autumn Version)(粵)
    如風 (Autumn Version) / 誘惑我(電影《誘僧》主題曲~電影版) / 天生不是情造 / 季候風
  • 1994年5月:《菲碟》(粵)
    回憶是紅色天空 / 只有我自己 / 冷戰 / 只因喜歡Faye
  • 1995年9月:《一人分飾兩角》(粵)
    一人分飾兩角 / 愛與痛的邊緣 / 我願意 / 知己知彼 / 天空 / 一人分飾兩角(Karaoke Version)
  • 1997年2月:《玩具》(粵)
    暗湧 / 約定 / 敷衍 / 玩具 / 我信
  • 1997年5月:《自便》(粵)
    守時 / 守護天使 / 自便 / Di-Dar(Historical Mix) / 誓言(Discovery Mix) / 夢遊(Universal Mix)
  • 2001年7月25號:《Separate Ways》(日本版)
    Separate Ways(Original Version)/ Separate Ways(128 beat Mix)/ Eyes On Me / 香奈兒 / Separate Ways(Instrumental)

單曲碟 編輯

王菲嘅單曲碟大都係為大碟宣傳用,除《Eyes on Me》之外。

  • 1999年2月:《Eyes on Me》
    Eyes on Me / 紅豆 / Eyes on Me(Instrumental)

演唱會專輯 編輯

  • 1995:《最精彩演唱會》
  • 1999:《唱遊大世界王菲香港演唱會 98-99》
  • 2004:《菲比尋常Faye Wong Live演唱會》

影視作品 編輯

王菲早期參與拍攝一啲好出名嘅香港電視劇,但歌壇天后地位確立後就離開咗電視屏幕。2001年去日本拍《ウソコイ》。

電影方面,佢因為《重慶森林》一片喺1996年做咗瑞典斯德哥爾摩電影節影后。後來又憑《天下無雙》攞咗「第九屆香港評論學會大獎」最佳女演員獎。有人指王菲唔識得演戲,佢喺戲裏面嘅表現都係本色演出嚟啫。王菲本人亦唔承認自己嘅演技出眾。佢講過:「拍《重慶森林》時,我都唔知自己做緊乜,糊裡糊塗,之後又糊裡糊塗得獎[13]

電影 編輯

電視 編輯

編輯

  1. 文革期間跟阿媽姓

參考 編輯

編輯

  • 黃曉陽,《王菲畫傳》,中國廣播電視出版社
  • 曉蘭,《美麗與哀愁:一個真實的王菲》,團結出版社,2006年8月
  • 李宗盛,《音樂聆聽報告2002-2004》,台北,時報出版社

引用 編輯

  1. 介紹王菲 互聯網檔案館歸檔,歸檔日期2009年1月25號,.,菲迷府,2006年3月11日
  2. 聆聽——青澀16歲王菲的聲音 互聯網檔案館歸檔,歸檔日期2008年6月28號,.,深圳特區報,2004年7月14號
  3. 王菲身懷六甲不甘寂寞 現身母校為70華誕祝壽 互聯網檔案館歸檔,歸檔日期2006年4月23號,.,搜狐娛樂,2005年12月9號
  4. 從小牌到大牌(圖) 互聯網檔案館歸檔,歸檔日期2007年9月30號,.,茂名日報,2004年10月15號
  5. 王菲 互聯網檔案館歸檔,歸檔日期2006年6月26號,.,太原新聞網,2005年1月11號
  6. 王菲曾手撕滾石唱片約 個性冷傲源於文化差異(圖) 互聯網檔案館歸檔,歸檔日期2007年4月20號,.,MTV中國,2006年2月16日
  7. 好多人以為此曲翻唱自中島美雪嘅《清流》,但其實係誤傳。中島美雪為王菲作咗呢隻曲並喺聽咗王菲嘅演唱詮釋後非常感動,於是自己作詞翻唱為《清流》,收錄喺1998年發行嘅《私の子供になりなさい》專輯中。
  8. 王菲唱片總銷量970萬張列入世界紀錄大全 互聯網檔案館歸檔,歸檔日期2008年3月3號,.,TOM娛樂,2002年5月16號
  9. 王菲無限期休息 互聯網檔案館歸檔,歸檔日期2006-11-03.,新浪娛樂,2005年5月26號
  10. 王菲昨下嫁李亞鵬 北京后海小王府設喜宴 互聯網檔案館歸檔,歸檔日期2007年2月15號,.,搜狐娛樂,2005年7月30號
  11. http://www.takungpao.com/news/09/03/28/twrenwu02-1056556.htm 互聯網檔案館歸檔,歸檔日期2009年12月31號,. 歌迷馬英九 曾與王菲合拍廣告
  12. 王菲專輯一覽 互聯網檔案館歸檔,歸檔日期2007年3月7號,.,Mojim.com,2005年
  13. 傳王菲事業唔如意想退休 經紀人怒斥唔實報導 互聯網檔案館歸檔,歸檔日期2008年1月19號,.,南方都市報,2005年3月8號。

出面網頁 編輯