無綫電視
「無線電視」跳轉到呢度。想搵電視制式，請睇「地面電視」。| Television Broadcasts Limited | |
 無綫電視標誌 | |
| 商業名 | 電視廣播有限公司 |
|---|---|
| 舊名 | 香港電視集團、香港電視廣播 |
| 類型 | 上市公司 |
| 股票代號 | 港交所：511、OTCBB：TVBCY |
| ISIN | HK0000139300 |
| 開檔 | 1965年7月26號 （有限公司註冊） 1967年11月19號 （電視頻道啟播） |
| 創辦人 | 利孝和 邵逸夫爵士 祈德尊爵士 余經緯 （皆已故） |
| 總部地址 | .svg){kind=small} 英屬香港九龍廣播道77號（第一代總部1967年－1988年） 英屬香港→ 香港新界清水灣道清水灣電視城（第二代總部1988年－2003年） 香港新界將軍澳工業邨駿才街77號電視廣播城（第三代總部2003年開始，現址） |
| 緊要人物 | 許濤（董事局主席兼非執行董事） 李寶安（董事局副主席、集團行政總裁兼執行董事） 黎瑞剛（非執行董事，前董事局副主席） 曾志偉、蕭世和（總經理） |
| 產業 | 免費電視廣播、數碼媒體、節目製作及發行同分銷 |
| 產品 | 翡翠台、明珠台、J2、無綫新聞台、無綫財經·資訊台 |
| 服務 | 傳媒、電視、大眾傳播、數碼媒體 |
| 年營業額 | 33.23億港元（2023年） |
| 東主 | 華人文化集團 |
| 員工人數 | 3599名僱員同藝人（2023年） |
| 網址 | www |
| 親建制派同中共 | |
電視廣播有限公司而家嘅總部係位於將軍澳工業邨嘅電視廣播城，舊時嘅總部先後喺九龍塘廣播道77號同清水灣電視城。
喺1990年代至2000年代，由於無綫電視劇收視長期拋離當時嘅亞洲電視，加上公司規模亦大過其他香港電視台，所以有大台及大婆台之稱。
歷史
編輯啟播初期
編輯1965年，香港政府有意發出地面電視牌照，吸引六個財團參與競標，當時中選者係由希慎興業大股東利氏家族、余仁生家族成員余經緯、邵逸夫旗下邵氏兄弟（香港）有限公司等人、機利文洋行（而家嘅太平洋行）等合組嘅香港電視集團[註 1]。
為咗加強宣傳，TVB喺1967年啟播前兩個半月嘅9月4號起，喺尖沙咀海運大廈大堂舉辦為期一個月嘅無線電視機展覽及試播活動。參展嘅電視機來自35個生產商，合其100多具，最平嘅係一部港產9吋黑白電視機，售價395元，最貴嘅係歐洲名廠嘅彩色電視機，售價4800多元。日本生產嘅則屬中等價格。當年政府文員二至十級嘅月薪，由415元至5000元，一般市民嘅月薪都喺1000元以下。雖然嗰陣收睇無線電視節目唔使收費，但係擁有無線電視機，同擁有有線電視機一樣，要每年向政府交36蚊牌照費。直到1972年4月1號，香港政府認為電視機唔再係奢侈品，先取消呢項徵費[1]。
到咗1967年11月19號（星期日）啟播當日，中英文台喺朝早9點就開始現場直播澳門舉行嘅格蘭披治大賽車。直至下午4點，港督戴麟趾乘坐直升機，飛抵位於廣播道嘅TVB新廈，親臨主持啟播儀式。TVB首部電視劇《太平山下》亦喺當日晚上10點播出，係每週半個鐘一集嘅處境喜劇，以都市中產家庭生活為題材[1]。
啟播初期，中文台每日下午4點半開播，星期一至五先係播映粵語長片，6點播《星報青年節目》，由許冠傑及蓮花樂隊主持；6點半係《體育節目》；7點半係新聞報導；8點播映另一套粵語長片；9點半係《歡樂今宵》，10點半播晚間新聞，11點係外國配音片集《愛登士家庭》。 11點半就結束全日節目。星期六、日嘅開播節目分別係配音西片及各類體育比賽[1]。
雖然彩色電視機喺1967年中已經進軍香港市場，但由於早期彩色電視機十分昂貴，黑白電視機較為普及。而TVB啟播初期，因為技術所限，本地製作嘅節目並未能做到彩色播放，所以好多人或許忘記咗香港嘅TVB係全球第一家啟播時就有彩色播映嘅電視台，即係當時用戶只要擁有彩色電視機，就可以收睇嗰啲本身係彩色製作嘅電視節目同電影[1]。
TVB早期公佈嘅節目表，都會註明邊啲節目係彩色製作。英文台晚上播放嘅節目九成以上都係彩色，啟播日首映嘅彩色節目，係下午6點半播出嘅美國和路迪士尼片集《彩色世界》。中文台方面，首個彩色節目係啟播晚上8點播出嘅外國配音片集《鼠縱隊》（Rat Patrol），隨後喺8點半播出嘅國語長片《楊貴妃》（邵氏兄弟公司1962年出品，李麗華主演），係首套喺香港電視上播放嘅彩色電影。啟播後翌日播出嘅綜藝節目《歡樂今宵》，到咗1971年1月26號農曆大除夕開始，由黑白轉為彩色播映，成為TVB首個本地製作嘅彩色節目[1]。
之後本地製作嘅彩色節目不斷增多，1975年底已經全面彩色製作，為觀眾帶嚟更精彩嘅電視觀感，1976年TVB開始進軍海外，喺海外市場進行節目發行、視頻租賃業務。
1976年，無綫電視仲開拍第一套長篇連續劇《狂潮》，加上1980年香港政府取消進口節目嘅規定，無綫電視嘅本土製作大增，吸納咗大量本土創作人材，建立起香港本土嘅電視文化。
無綫電視開台始創之後多年來都製作咗唔少節目得到香港唔少人關注，例如《香港小姐》、《勁歌金曲》同埋《新秀歌唱大賽》等等，亦有唔少國際知名嘅無綫藝人，都係無綫電視藝員出身，例如：周潤發、劉德華、梁朝偉、周星馳、梅艷芳同埋張曼玉等一眾電視台演員。
合約藝員
編輯慈善籌款
編輯無綫電視每年都有同一啲慈善機構合作舉辦籌款節目，當中會搵唔少藝人參予。
歷任董事局主要成員同管理層
編輯| 姓名 | 時間 | 備註 |
|---|---|---|
| 董事局主席 | ||
| 利孝和 | 1967年11月19號—1980年6月27號 | |
| 邵逸夫 | 1980年6月28號—2009年12月31號 | 行政主席 |
| 邵逸夫 | 2010年1月1號—2012年1月1號 | 非執行董事 |
| 梁乃鵬 | 2012年1月2號—2014年12月31號 | 行政主席 |
| 陳國強 | 2015年1月1號—2020年2月3號 | 非執行董事 |
| 許濤 | 2020年4月29號—2023年3月9號 | 非執行董事 |
| 許濤 | 2023年3月10號— | 行政主席 |
| 董事局副主席 | ||
| 祈德尊 | 1967年11月19號—1981年3月11號 | |
| 郭鶴年 | 1988年—1994年 | |
| 方逸華 | 2000年10月25號—2012年3月25號 | 行政主席（2010年1月1號起） |
| 梁乃鵬 | 2003年9月—2012年1月1號 | 副行政主席 |
| 黎瑞剛 | 2016年10月17號—2020年4月29號 | |
| 李寶安 | 2020年4月29號—2021年5月27號 | |
| 董事總經理 | ||
| 余經緯 | 1969年2月—1976年12月11號 | |
| 費道宜 | 1995年—2006年5月31號 | |
| 方逸華 | 2006年5月31號—2008年12月31號 | 董事局副主席署理 |
| 方逸華 | 2009年1月1號—2012年3月25號 | 董事局副主席兼任 |
| 集團總經理 | ||
| 何定鈞 | 2002年—2005年 | |
| 李寶安 | 2009年9月15號—2014年12月31號 | 改任行政總裁 |
| 集團行政總裁 | ||
| 李寶安 | 2015年1月1號—2021年5月27號 | |
爭議
編輯親中偏頗新聞報導同節目內容爭議
編輯2010年代開始，無綫電視旗下嘅新聞部好多時都被視為親中派媒體，公信力亦好差，喺2019年反修例運動爆發後更加明顯，根據香港中文大學傳播與民意調查中心喺2016年嘅民調，無綫電視嘅公信力評分係5.88，但去到2019年11月就跌到4.45。[2][3]
無綫電視亦被指長期對香港嘅非建制派作出唔公平嘅對待。另外，有部份人亦抨擊以時事資訊包裝但非新聞部製作嘅《東張西望》，不時猶如政府上身，為政府政策推銷，對社會問題不時抱有偏頗預設立場，又試過盜用他人短片，甚至發佈假新聞[4][5]。
演員待遇爭議
編輯無綫對旗下演員嘅薪酬同工作安排，不時引起批評，其中「一年一show」係其中一個引起最大爭議嘅手法[6]，又對一啲非一線藝人不斷咁減人工[7][8]，甚至出現過勞死嘅事件[9]。
被批評雙重標準打壓藝員親非建制政治意見表達
編輯有啲無綫旗下藝人，曾經因為表達親非建制嘅政治意見，受到無綫一啲打壓。例如張明偉就曾經因為不滿元朗信義中學打壓學生表達政治意見，喺2021年7月去元朗信義中學門外唱《銀河修理員》，結果被無綫雪藏，之後張明偉決定約滿後離開無線[10]。另外，喺香港反送中運動期間，李綺雯[11][12]同埋歐陽巧瑩[13]都因為政治立場問題被無綫雪藏，最終選擇離巢。
不過，對於親中派藝人表達意見，例如係楊明、陳百祥、莊思敏等，就算係去到人身攻擊嘅地步（例如：莊思敏曾經人身攻擊黃之鋒話佢扮河童），無綫亦冇限制佢哋。
被指封殺競爭對手媒體同埋同佢哋友好嘅藝人
編輯無綫電視亦被指，會封殺同競爭對手媒體（較早期有亞洲電視，之後有香港電視同ViuTV），甚至係友好嘅藝人。例如：
- 喺2009年4月，身為亞視簽約藝人嘅鮑起靜攞到香港電影金像獎影后獎項，佢喺發表得獎感言時提到亞視，但呢一段俾轉播金像獎頒獎禮嘅無綫刪走。當時除咗亞視批評無綫無考慮觀眾感受，亦有網友質疑無綫嘅做法[14]，爾冬陞炮轟無綫話佢唔尊重個節目，金像獎主席陳嘉上亦表示失望，話下年會重新投標[15]。
- 喺2013年11月，有一個由方力申、鄧麗欣、唐寧拍攝，由國際培幼會贊助嘅無綫電視節目準備播出，但當時係香港電視旗下藝人嘅唐寧，佢嘅部分就被剪去[16]。
另外，無綫亦因為喺開放免費電視牌照嘅議題上立場唔同，喺2013年亦將壹傳媒嘅媒體列為不受歡迎媒體，結果被香港記者協會批評干預新聞自由，剝削公眾知情權[17]。
濫用殯葬場地對先人不敬爭議
編輯無綫被指唔只一次喺拍攝劇集拍嘅時候使用殯葬場地當做其他場景，例如：
- 2023年播出嘅劇集《新四十二章》入面取景嘅大學場地原來係位於屯門曾咀靈灰安置所，因而引起網民批評[18][19]。
- 2022年播出嘅劇集《白色強人II》曾經借和合石靈灰安置所同火葬場景扮醫院[18]。
有啲網民就批評，呢啲舉動對先人不敬，亦有人話無綫咁樣係對在生嘅觀眾不敬，當觀眾係傻[18]。
管理商標版權嘅爭議
編輯無綫電視發展多年，製作唔少影視作品，對香港社會發展有一定角色，亦不時成為公眾討論嘅對象。連同佢哋嘅唔同商標，無綫電視因而持有同管理唔少版權。不過，喺涉及第三方使用呢啲商標或者影視作品嘅問題上，無綫嘅做法就俾一啲人批評。有啲人批評，無綫就連坊間非牟利使用佢哋作品做二次創作都打壓，反而自己就唔尊重他人版權[20]。亦有人認為，無綫透過管理呢啲版權商標嘅手段，去打壓外間對無綫嘅批評[21]。
睇埋
編輯參考資料
編輯- ↑ 1.0 1.1 1.2 1.3 1.4 潘惠蓮 (2023-08-27)。〈回顧香港的無綫和彩色電視廣播誕生〉。《不要再錯》。原著喺2023-08-27歸檔。喺2023-08-27搵到。
{{cite web}}: Unknown parameter|dead-url=ignored (|url-status=suggested) (help) - ↑ 〈TVB 直插谷底，大公文滙敬陪末席 — 傳媒公信力啟示〉。《立場新聞》。2019-11-28。原著喺2021-05-15歸檔。喺2021-11-15搵到。
- ↑ 〈蘇鑰機：香港傳媒公信力：低處未必最低〉。《明報》。2019-11-28。喺2021-11-15搵到。
{{cite news}}: CS1 maint: url-status (link) - ↑ 葉天佑 (2017-07-27)。〈【TVB】硬銷一地兩檢《東張西望》無王管，猶如政府上身｜葉天佑｜01博評〉。《香港01》 (香港中文)。喺2021-11-16搵到。
- ↑ 〈當 Spin 變成屎片 | 輔仁文誌〉。www.vjmedia.com.hk。原著喺2021-11-16歸檔。喺2021-11-16搵到。
- ↑ 董欣琪 (2022-01-02)。〈無綫爆離巢潮一個月連走7人 細龜黃一山：演員缺乏係TVB一手造成〉。《香港01》 (香港中文)。喺2022-01-02搵到。
- ↑ 李星慧 (2020-07-03)。〈林師傑離巢感激妻 女追男不被看好 零驚喜求婚卻最貼心 網民讚絕世好老公〉。《香港01》 (香港中文)。喺2021-11-18搵到。
- ↑ 吳子生 (2020-06-28)。〈林師傑拒簽一年萬二蚊6騷憤然離巢 陳智燊：我面對同一情況〉。《香港01》 (香港中文)。喺2021-11-18搵到。
- ↑ 〈一周捱逾69小時 月入6萬 陳鴻烈工作過勞奪命〉。星島日報。2009-11-26。原著喺2009-11-28歸檔。喺2009-11-27搵到。
- ↑ 《張明偉專訪丨唱銀河修理員遭TVB雪藏 捱十年底薪僅數千 彈TVB未醒覺：離棄咗香港觀眾（#張明偉 #專訪 #娛壹）》 (英國英文)，喺2021-11-11搵到
- ↑ 陳芷穎 (2020-03-17)。〈【開心速遞】𡃁妹李綺雯4月離巢：政見問題雪咗半年〉。《香港01》 (香港中文)。喺2021-11-15搵到。
- ↑ 李星慧 (2020-05-21)。〈李綺雯政見分歧離巢不後悔 願與港人同行不平則鳴：看到不對的事我一定發聲〉。《香港01》 (香港中文)。喺2021-11-15搵到。
- ↑ 李星慧 (2020-07-03)。〈林師傑離巢感激妻 女追男不被看好 零驚喜求婚卻最貼心 網民讚絕世好老公〉。《香港01》 (香港中文)。喺2021-11-18搵到。
- ↑ 〈鲍起静感言遭删剪 金像奖凸显无线亚视"暗战"_影音娱乐_新浪网〉。ent.sina.com.cn。喺2021-11-17搵到。
- ↑ 〈鮑姐致謝被剪爾冬陞轟奴才所為 - 東方日報〉。orientaldaily.on.cc。喺2021-11-17搵到。
- ↑ 〈港視員工爆料 唐寧越南山區慈善訪無綫抽起唔播〉。《蘋果日報》。2013-11-29。
{{cite news}}: CS1 maint: url-status (link) - ↑ https://www.facebook.com/ETtoday。〈香港無線電視TVB下封殺令 批壹傳媒「製造白色恐怖」 | ETtoday大陸新聞 | ETtoday新聞雲〉。www.ettoday.net (繁體中文)。喺2021-11-15搵到。
{{cite web}}:|last=has generic name (help); External link in|last= - ↑ 18.0 18.1 18.2 HK, Channel C. (2023-02-02)。〈TVB劇借靈灰場扮大學取景 網民踢爆非首次 曾用火葬場當醫院 | Channel C〉。channelchk.com (繁體中文)。喺2023-02-02搵到。
- ↑ 黃欣華 (2023-02-01)。〈新四十二章｜陳豪任教大學用靈灰龕取景 網民質疑對先人不敬〉。《香港01》 (香港中文)。喺2023-02-02搵到。
- ↑ HK, Channel C. (2022-02-26)。〈TVB投訴民間電視大獎侵權 方以文多Post被刪 《東張西望》卻擅自駁片拎嚟賣廣告 疑雙重標準？ | Channel C〉。channelchk.com (繁體中文)。喺2022-04-12搵到。
- ↑ HK, Channel C. (2022-04-09)。〈fb專頁「思思TVB的二三事」被罰停po僅十日再遭封殺！ 疑因用TVB節目截圖被投訴侵權 | Channel C〉。channelchk.com (繁體中文)。喺2022-04-12搵到。