香港邊界

香港邊界 (英文：Boundaries of Hong Kong)，係香港特區同中國大陸之間嘅邊界。陸地上嘅邊界總共係30公里（19英里）長，而海上嘅邊界係 733公里（455英里）長。香港入境處同埋香港海關負責管控呢條邊界。

由深圳市羅湖區影嘅邊界，深圳喺左邊，香港喺右邊，深圳河喺中間

跨越后海灣嘅深圳灣公路大橋，香港元朗喺上面，下面係深圳喺下面。

  提示：呢篇文講嘅唔係香港邊境禁區。

呢條邊界歷史可追溯至中英政府喺1898年簽訂嘅《展拓香港界址專條》，確立咗以深圳河為陸地邊界，全長大約107公里。呢一邊界喺港英時期亦都叫做中英邊界。海上嘅邊界就喺後海灣和大鵬灣嘅海域。因應住50年代嘅大陸逃港，廣東寶安縣喺1951年2月封鎖邊界，而香港政府喺同年6月刊憲沿著香港深圳邊界設立香港邊境禁區。

歷史

封關前

《展拓香港界址專條》入面用深圳河做邊界綫

香港開埠之前，香港同今日嘅深圳市都係屬於廣州府寶安縣嘅轄區。1841-1860年之間，英國陸續佔領香港島同埋九龍。1898年，中英雙方喺北京簽訂咗《展拓香港界址專條》，英國攞到咗新界同埋新九龍。自此之後，英屬香港嘅轄區基本上固定落嚟，到1997年香港回歸都冇變過。

1899年3月19日，中英政府雙方嘅代表喺香港簽定《展拓香港界址專條》，大致規定咗陸地嘅界線：東面向東入海嘅沙河嘅中線為界綫，西面向西入海嘅深圳河北岸為界綫。新安縣同香港嘅陸地邊界：東面由大鵬灣北岸嘅東端開始，西面由赤灣嘅東面開始，全長大約107公里。東西兩灣（即係後海灣同大鵬灣）同埋深圳河嘅水，亦都屬於英國嘅租界，所以，寶安縣嘅漁民如果要喺兩個灣入面釣魚、採生蠔等等，都需要先攞到香港牌照。

1948年12月，英國外交大臣向內閣提交《備忘錄》，分析咗香港未嚟幾種可能嘅前途。1949年1月，英國內閣制定咗《香港緊急防衛計劃》同埋《人民入境控制條例》。1949年3月，英國殖民地大臣亦都向英國國會提交咗《備忘錄》，提出香港需要兩個旅嘅兵力，先至能夠對付目前可能面臨嘅局面。駐港英軍嘅兵力很快就由一個旅，好快咁增加到四個。港英當局於1949年6月制定《緊急狀態條例》，決定封鎖邊界、控制人口、同埋登記所有移民等等嘅措施，終止咗港深邊界過去50幾年嘅自由來往。

封關後

1949年10月1號，中華人民共和國正式建立。駐守深圳嘅中華民國政府稅警同埋護路部隊，喺10月16號宣布向共產黨投降，解放軍跟住就攻佔咗寶安同南頭。3日之後控制埋深圳。東莞縣嘅軍管會主任祁烽調任咗做“沙深寶”（即係沙頭角、深圳、同寶安）嘅軍管會主任，而其他中共嘅官員做咗沙深寶邊界工作委員會書記、寶安縣委書記、珠江地委委員、廣東省邊防第三團政治委員等等嘅職務。面對解放軍臨近嘅情況，港英政府咨詢咗倫敦嘅英國政府，決定咗用鐵絲網嚟封鎖邊界，並且喺解放軍進入香港之後進行抵抗。但係實際上，中華人民共和國政府對香港無進一步嘅軍事行動。反喺日後成為中華人民共和國對外貿易嘅重要通道。

港英政府自從1950年開始，對內地籍嘅人出入香港進行管制，結束雙方人員自由來往。同年4月，港英政府公布嘅《人民入境統制（補充）條例》規定，由5月1號開始，由大陸進入香港嘅內地籍人士需事先攞到大陸政府簽發嘅「旅行證明書」，港英政府亦同時喺邊界地區實行宵禁。5月9號，中國外交部向英國政府對呢件事提出抗議。6月，港英政府頒布《邊界封鎖區命令》，成立咗香港邊境禁區。

1950年12月，寶安縣開始推行土地改革運動，唔少地主同富農都逃去香港，造成咗大陸逃港嘅一部分。因爲呢樣，廣東省人民政府喺1951年2月正式實施邊境管理，中方開始封鎖邊界。同年8月，中國公安部頌布「出入港澳」管理辦法。1952年7月，中國政務院頌布《出入國境治安檢查條例》。深圳公安檢查站改為「中華人民共和國深圳邊防檢查站」。

由1954年4月開始，沿住深圳河嘅南岸起咗鐵絲網，由東面嘅沙頭角到西面嘅沙尾，港深嘅陸地邊界沿線鋪滿咗鐵籬笆、碉堡、警署等等嘅軍用設施。60年代中期，經過雙方喺沙頭角發生咗激烈槍戰後，為咗避免發生直接嘅沖突，英警停止咗喺中英街嘅巡邏，改為喺鎮內嘅英方巷入面巡邏，到中英街口停留一陣之後就走。

警方海灣衝突

中共建政初期，港英嘅軍警人員有去到中國岸邊扣捕漁船等等嘅情況；解放軍同民兵一旦發現有武裝英兵喺沙頭角和鹽田登岸，即刻將佢拉咗或者踢返佢去香港。對於成日駛近北岸進行偵察活動嘅英炮艇同埋水警輪，邊防部隊會以開槍射擊嚟做警告。1959年曾經發生英國水警輪喺離北岸大約500公尺，跟住俾民兵開槍射中嘅事，但係英方對於呢件事從嚟冇提出過交涉或者抗議。邊防部隊喺呢一帶海面入面，定警戒線為距離北岸200公尺，一有英國嘅水警輪迫近，就會警告佢離開。1970年之後,中方嘅海上公安艇會以南澳同鹽田做據點，喺大鵬灣執行巡邏同埋搜捕偷渡人員嘅任務。佢哋嘅活動路線一般由南澳去到鹽田，距離北岸最遠處有大約2,000幾公尺，有時甚至駛近香港嘅坪洲碼頭附近。港英嘅水警輪雖然成日後面有人跟住嚟追蹤，但亦都從嚟冇提出任何異議。

大鵬灣入面嘅中方漁船喺1955年以前，大部分都仲會有香港牌照，但係自從1956年實行人民公社化之後，中方嘅漁民已經唔再攞香港牌照。雖然中方嘅漁民喺屬於英國嘅海灣入面釣魚，但係英方一般都唔會干涉。當時，深圳河經深圳灣有航線可以去東莞、廣州、同香港等地方，而中國船只會喺深圳河至深圳灣河道之間通行，而英方亦都同樣唔會干預。由1965年開始，蛇口嘅海上公安（簡稱「海公」）艇喺深圳灣附近進行海面巡邏，有時會越過主航道嘅南邊，英國嘅水警輪有時亦都會跟住尾，不過都唔會敢太近公安路綫嘅北面，亦都冇異議過公安嘅活動。水警輪嘅活動一般去到元朗嘅河口為止，而有時亦都會駛近深圳河嘅河口。1962-63年，港英嘅水警輪曾經以試探方式，逐漸咁深入漁農村以南嘅河面，不過之後俾附近嘅漁民驅逐出返去河口，因爲覺得佢哋破壞漁蠔嘅生產。跟住之後一再有水警輪嚟，中國嘅民兵就會提出警告，跟住水警輪就離開。