維基百科

新界五大氏族

新界五大氏族，又叫做新界五大族，是指新界原居民中最大嘅五個家族：錦田嘅鄧氏、新田嘅文氏、上水嘅廖氏、上水嘅侯氏、同埋粉嶺嘅彭氏[1]。

新界五大氏族地圖

佢哋主要都是喺宋朝同明朝期間，搬到依家屬於新界嘅漢族氏族[2]，至今已經發展去到新界唔同地方住，以圍頭話為主要嘅溝通語言。呢五族喺幾百年之間，各自喺佢哋嘅地頭起圍村、祠堂、書室同廟宇等等，亦都喺交通嘅主要道路成立咗墟市，逐漸咁發展成為大族。到英國開始統治香港之後，港英政府喺新界登記地權，發現呢五大家族名下嘅地好多，所以叫佢哋做「五大族」（英文：The Five Great Clans）。

錦田鄧氏

編輯
 
屏山鄧氏宗祠係香港最大嘅祠堂

新界嘅鄧氏祖籍江西吉水，係五大族之中最早喺新界定居，亦都係最多人口同地嘅宗族，係新界五大家族之首。先祖鄧漢黻嘅四世孫鄧符協喺北宋初期入元朗錦田[3]，至今新界鄧氏子孫後代嘅人數有多達10萬人。鄧氏嘅五大房之中，有兩房仍然喺新界度住，而其餘嘅房都已經返咗內地。其中元禎房聚居元朗屏山[4]，而元亮房就繼續聚居錦田。

之後，元亮一房又分支到元朗嘅厦村同輞井、屯門嘅紫田村、粉嶺嘅龍躍頭、沙頭角嘅萊洞、同埋大埔嘅大埔頭一帶[5]，為新界鄧氏主要一支，亦都係南宋皇姑趙氏嘅後代[6]。

鄧氏自從北宋搬入新界之後，人口日增，有起咗宗祠同書室，已都喺附近嘅地域建立咗墟市。香港嘅屏山市、錦田市、厦村鄉、元朗墟、同埋大埔舊墟等等嘅墟市，都係鄧氏喺清代嘅時候建立嘅。鄧氏對新界地區嘅發展，係五族之中貢獻最大[7]。

同鄧氏有關嘅香港法定古蹟︰

  •  
    錦田廣瑜鄧公祠
  •  
    屏山聚星樓
  •  
    廈村楊侯宮
  •  
    龍躍頭老圍
  •  
    大埔頭敬羅家塾

新田文氏

編輯

新田文氏祖籍江西吉安，先祖文天瑞係南宋抗元英雄文天祥嘅堂弟，喺南宋尾聲嘅時候，因爲逃避元朝兵而搬咗去東莞。七世孫文世歌喺明朝永樂年間，搬咗入元朗新田立村，當時人數超過5000人，分佈喺仁壽圍、東鎮圍、石湖圍、蕃田村、永平村、安龍村、新龍村、青龍村和洲頭村等嘅九條村落。其他文氏族嘅人分搬咗去新田區內嘅米埔村、壆圍、同屏山欖口村。新田文氏全盛德時期曾經坐擁落馬洲一帶4000萬呎嘅土地[8]，喺新界西北有好大嘅影響力。

同文氏有關嘅香港法定古蹟：

  •  
    麟峯文公祠
  •  
    大夫第
 
新田嘅文天祥紀念公園，係粵港嘅文氏一齊起嘅

上水廖氏

編輯

上水廖氏原籍福建永定。先祖廖仲傑喺元朝尾聲搬去屯門，跟住再搬去福田，到元代末年再第三次搬去雙魚境內[9]，所以廖仲傑嘅仔廖自玉係上水鄉嘅開基祖。

上水鄉一帶原本有簡氏嘅村民，傳說話廖氏看中該地後，通過假扮鬼怪嚟嚇走簡氏族人[10]。簡氏因爲咁而搬咗去松柏塱，而廖氏就落居梧桐河畔依家嘅地方，所以廖氏到今日都仍然會喺村祭儀式之中，感謝簡氏俾地之恩[11]。

依家上水廖氏分為三大房，喺上水鄉起咗圍內村、門口村、莆上村、大元村、中心村、上北村、下北村、興仁村、同埋文閣村等九條村落，人數係5000幾人[12]。佢哋亦都有分支去到附近嘅華山村、沙田嘅牛皮沙村、烏溪沙一帶（例如樟木頭村）、同埋屯門一帶（例如子田圍）等等。

上水一帶原本係更早建村嘅侯氏所領導，而侯氏亦都曾經建立過墟市，但係到清代嘅時候，廖氏已經取代咗侯氏，成爲咗上水嘅領導村族，並且喺上水鄉嘅南部起咗石湖墟[13]。

因為石湖墟係香港境內最靠近新安縣城深圳墟嘅墟市，所以成爲咗重要嘅貨物流散地，亦都是新界北部主要嘅農產市場，令到廖氏賺到巨額嘅財富，廖氏極盛嘅時所擁有嘅土地最遠去到香港島嘅掃桿埔。喺新界五大族中，上水廖氏對教育嘅投入尤其突出，喺接近100年之間，喺北區先後出錢起咗三間中學、三間小學、同埋一間幼稚園，其中仲包括咗全香港校園面積第二大嘅鳳溪第一中學。

同廖氏有關德香港法定古蹟︰

  •  
    上水鄉廖萬石堂
  •  
    上水圍為廖族核心聚居地

上水侯氏

編輯

侯氏原籍廣東番禺，其先祖侯五郎係北宋嘅進士，而六世孫侯卓峰就係河上鄉侯族嘅始祖[14]。侯卓峰生咗六個仔，其中前四房住喺河上鄉。第五房後人搬咗去金錢同燕崗。第六房嘅後人搬咗去丙崗。侯族喺上水一帶人數有接近2000人，聚居地集中喺上水嘅古洞。侯氏係上水最早發跡嘅大族，曾經喺上水建立過隔圳墟同埋天岡墟兩個墟市，但係因爲勢力到清代已經衰落，俾遲過佢哋搬去梧桐河畔嘅廖氏，取代咗上水嘅領導地位。

1899年，英軍接收新界嘅時候，丙崗侯氏聯同附近嘅氏族共同反抗。到1908年，港英政府同埋香港哥爾夫球會開始同侯氏帶頭嘅村民進行談判，最終得到村民同意，喺金錢村與丙崗村之間嘅侯氏祖墳山地一帶，起粉嶺哥爾夫球場，所以侯族喺新界境內嘅地位絕對唔低[7]。

同侯氏有關嘅香港法定古蹟︰

  •  
    河上鄉居石侯公祠
  •  
    金錢村味峰侯公祠

粉嶺彭氏

編輯
 
粉嶺圍係香港少數古色古香嘅圍村，保留咗別緻嘅風水魚塘同埋戰前古炮

彭氏原籍江西宜春，先祖彭延年係北宋嘅進士。至到彭桂嘅時候搬咗去粉嶺嘅龍躍頭，彭氏直至到元朝尾聲因為人丁比較單薄，所以受外地搬嚟嘅鄧季琇一族欺壓[15]。彭氏再搬咗去粉嶺樓一帶，而龍躍頭就變成咗鄧氏嘅聚居地。

由於彭氏人口繁衍，部份嘅族人搬咗去附近嘅粉嶺圍度立村，建立咗正圍、北邊村、同南邊村三條村落。除此之外，部份嘅族人亦到去咗蕉徑彭屋、上水掃管埔村、同埋大埔汀角村等嘅地方定居[16]。佢哋當時人數有大約4600人[17]，亦都有記載話彭氏嘅族人曾經喺清朝期間，喺香港島掃桿埔一帶建立箒管莆村。[18]

自從英國租借咗新界之後，由於彭氏嘅定居地喺九廣鐵路隔籬，而港英政府更加喺當地總共起咗粉嶺站、沙頭角支線、同沙頭角公路，令到彭氏迅速崛起。1940年代尾，爲咗抗衡上水廖氏控制嘅石湖墟定價唔公平，彭氏聯合咗沙頭角、打鼓嶺、同大埔一帶嘅村落，喺粉嶺樓東北面起咗現今嘅墟市聯和墟[19]。至到70年代，港英政府發展粉嶺及上水新市鎮，彭氏定居地又係位處新市鎮嘅中心點，所以彭氏能夠賣出大量嘅土地，好快咁令佢哋有錢。

其他氏族

編輯

其實除咗呢五大族之外，新界各地亦都有好多個清朝或者更早，去到香港而建立嘅氏族[20]。

攷

編輯
  1. ↑ David Faure, "The Lineage as a Cultural Invention:the case of the Pearl River Delta", Modern China vol.15, no. 1 (1989), 2-36
  2. ↑ 葉子林《新界·舊事—遺跡、建築與風俗》2007:130
  3. ↑ 〈口頭傳統和表現形式 - 宗族口述傳說（錦田鄧氏）〉。原先內容歸檔喺2019-09-17。喺2015-05-23搵到。
  4. ↑ 〈口頭傳統和表現形式 - 宗族口述傳說（屏山鄧氏）〉。原先內容歸檔喺2019-06-06。喺2015-05-23搵到。
  5. ↑ 〈口頭傳統和表現形式 - 宗族口述傳說（龍躍頭鄧氏）〉。原先內容歸檔喺2019-08-24。喺2015-05-23搵到。
  6. ↑ 〈【港古佬】粉嶺人娶宋代皇姑勁威 屋企仲有護城河包圍〉。原先內容歸檔喺2021-06-21。喺2020-12-01搵到。
  7. ↑ 7.0 7.1 〈香港的先民宗族〉。原先內容歸檔喺2019-09-27。喺2015-05-19搵到。
  8. ↑ 〈新田文氏擁地2000萬呎 打游擊密集搜購發展商化零為整〉。原先內容歸檔喺2020-12-06。喺2020-11-28搵到。
  9. ↑ 口頭傳統和表現形式 - 宗族口述傳說（上水廖氏）
  10. ↑ 周樹佳：《香港傳說》
  11. ↑ 〈鄭澄、梁浩宜、蔡俊傑：《香港新界上水廖氏春祭考察報告》〉 (PDF)。原先內容歸檔 (PDF)喺2017-08-18。喺2017-08-17搵到。
  12. ↑ 〈廖萬石堂〉。原先內容歸檔喺2019-01-29。喺2020-12-15搵到。
  13. ↑ 〈追溯香港人的根〉。原先內容歸檔喺2019-06-11。喺2015-05-23搵到。
  14. ↑ 〈口頭傳統和表現形式 - 宗族口述傳說（河上鄉侯氏）〉。原先內容歸檔喺2019-06-13。喺2015-05-23搵到。
  15. ↑ 《香港地區史研究之三：粉嶺》，陳國成主編，三聯書店(香港)出版，2006年
  16. ↑ 〈口頭傳統和表現形式 - 宗族口述傳說（粉嶺彭氏）〉。原先內容歸檔喺2019-06-13。喺2015-05-23搵到。
  17. ↑ 〈粉嶺圍村彭氏 潮州祭先祖〉。原先內容歸檔喺2020-12-07。喺2020-11-28搵到。
  18. ↑ 《新安縣志》卷二十三<藝文>中所收錄由新安知縣段巘生於雍正二年（1724年）所寫的〈創建文岡書院社學社田記〉中有記載此事。
  19. ↑ 〈聯和墟市說粉嶺〉。原先內容歸檔喺2019-07-02。喺2015-05-23搵到。
  20. ↑ 《百載鑪峰》1982年第二集〈早期居民：祠堂〉

睇多啲

編輯
由「https://zh-yue.wikipedia.org/w/index.php?title=新界五大氏族&oldid=2053265」收