澳門土話
澳門土話（Patuá）係一種歸融話。佢從公元16世紀起，喺澳門逐步形成，以近世葡萄牙話嚟做基礎，加咗好多馬拉話、粵語、僧伽羅話、英文嘅元素，再溝咗啲荷蘭話、西班牙話、意大利話、日文，同埋一啲南亞地區嘅語言[1]。澳門土話曾經係澳門土生葡人嘅日常用語。之不過呢種語言時至今日，頻臨失傳。
| 用嘅國家、地區 |  中國 |
|---|---|
| 區域 | 澳門、香港、美國（加州）、葡萄牙、澳洲、巴西、加拿大、秘魯、哥斯達黎加 |
| 講嘅人口 | — |
| 系屬 | |
| 語言代碼 | |
| ISO 639-1 | 無 |
| ISO 639-2 | cpp |
| ISO 639-3 | mzs |
澳門自從主權移交之後，就再冇人正式統計過澳門土語嘅使用人口。喺20世紀尾，根據一啲唔正式嘅統計，全世界識講呢種語言嘅人唔夠一千[2]。最後一位澳門土語作家係若瑟·山度士·飛利拉。聯合國教科文組織響2010年出咗新版嘅《世界瀕危語言地圖冊》[3]，話2000年嗰陣，剩係得約莫50個人曉講澳門土語，所以將呢種語言定為「極度瀕危語言」[4]。
名
編輯澳門土話自稱 Papia Cristam di Macau（意：澳門基督徒話），詩人安過一啲美稱畀佢：Dóci Língu di Macau（意：甜美嘅澳門話）、Doci Papiaçam（甜美話）。葡萄牙話叫呢種話做Crioulo macaense（意：澳門歸融話，簡作：Macaense）、Macaista Chapado（意：純正澳門話）或者Patuá di Macau（簡：Patuá，來自法文：patois）。
史
編輯起源
編輯葡萄牙人由16世紀中葉開始，逐漸佔領澳門[5]，將呢笪地方變成葡萄牙響亞洲地區嘅海事、商務同宗教活動嘅樞紐。而澳門土話亦逐漸響呢處形成。
隨住葡萄牙人喺澳門落地生根，澳門土話就開始喺佢哋嘅第二代之間出現。最初，呢班人多數只係同馬六甲人同斯里蘭卡人通婚，唔同華人結婚。所以響呢個階段，澳門土話深受馬拉話同僧伽羅話影響。到咗17世紀，葡萄牙喺南亞同東南亞嘅殖民地（主要係馬六甲、印尼同埋斯里蘭卡），相繼落入荷蘭人手上，令好多人由呢啲地方，移民過去澳門；呢批新移民對澳門土話嘅影響好深遠。
演變
編輯過去幾個世紀以來，澳門嘅人種比例一直有變，唔同人種之間一直互相交往。所以，澳門土話嘅運用、文法、辭彙都有相應嘅變化，就好似其他話咁樣。有語言學家將澳門土話分成新、舊兩個時代：舊澳門土話時代到19世紀初為止，而新澳門土話時代就由19世紀中葉開始。噉分法係因為到咗19世紀後期，土生葡人逐漸開始娶澳門同埋珠江三角洲嘅華人做老婆，為澳門土話添加咗唔少粵語元素，影響非常深。而且響19世紀中葉，香港變成英國殖民地，亦為澳門土話注入唔少英文詞語。呢兩個因素，都令新澳門土話同舊澳門土話截然不同。
澳門土話一直以來都受到其他話影響，混雜咗好多歐洲、亞洲嘅話，有如一張百家被，別樹一格。除咗土生葡人之外，亦有少數華人（多數係葡萄牙人嘅配偶）識澳門土話，所以，澳門土話亦係各族人之間溝通嘅橋樑。
一位熱愛澳門土話嘅律師Miguel Senna Fernandes咁樣講過：「雖然舊澳門土話已死，但係新澳門土話可以睇成係舊澳門土話嘅延續。澳門土話仍然好有生氣。」佢又指出，新澳門土話深受粵語影響，尤其係20世紀打後嘅發展。佢認為澳門土話可以生存四個世紀，依然未俾中文同化，可以算係個奇蹟。為免呢種「甜美」嘅話失傳，佢重話：「我哋要重振呢一段即將消逝嘅回憶。」
沒落
編輯公元16至19世紀，澳門土話一直係澳門土生葡人社群嘅主要語言，對澳門嘅商業同社會發展，舉足輕重。不過，即使係咁，當時講澳門土話嘅人都唔多，大概只有幾千，唔夠一萬。
到咗19世紀至20世紀初，澳門土話仍然有幾千人曉講，主要住響香港同澳門。雖然當時澳葡政府嘅法定語言係標準葡萄牙話，但係呢幾千人始終堅持講澳門土話。20世紀初期，佢哋重會用澳門土話來譏諷澳葡政府。亦有一啲作家，揀用澳門土話來寫作，其中一個典範，係詩人若瑟·山度士·飛利拉（筆名：Adé）。
但係，澳門土話響澳門並無法定地位，亦唔喺學校正統課程之內。19世紀後期起，葡萄牙政府推出一連串教育改革，旨在統一全國上下嘅口語，包埋好似澳門呢啲殖民地在內。所以，澳葡政府力推標準葡萄牙話，令澳門土話日漸式微。結果呢場改革好成功，講澳門土話嘅人大幅下滑，澳門土話作為華人、葡人溝通橋樑呢個角色，亦逐漸淡化。到咗20世紀初，澳門嘅上流社會已經淘汰咗澳門土話，因為澳門土話俾人睇低，睇成係落後、低級嘅俗話。想學外語嘅人，都唔會學澳門土話，改為學標準葡萄牙話。
現況
編輯早喺澳門重係葡萄牙殖民地嘅時候，澳門土話已經踏入衰落之路。主權移交之後，澳門變咗中國嘅一部分，令呢個情況雪上加霜。
澳門土話雖然有佢獨特嘅語言特徵，又有幾百年歷史，但係就一直得唔到語言學家關注。文字學家Graciete Nogueira Batalha（1925–1992）曾經出過幾篇關於澳門土話嘅文。
即使澳門土話已經風光不再，講呢種話嘅人，依然以澳門土話為榮，因為澳門土話係澳門土產嘅話，係澳門有、香港冇嘅嘢。澳門土話係16世紀以來東、西方文化響澳門交融而成嘅結晶，舉世無雙，重榮獲聯合國教科文組織納入《世界瀕危語言地圖冊》[3]。現時，澳門有一啲文化組織同土生葡人團體，致力搶救澳門土話，例如：Grupo de Teatro Dóci Papiáçam di Macau。為咗保存呢種咁有澳門特色嘅話，佢哋用澳門土話搞話劇同音樂，響2001年出咗一本葡萄牙話對澳門土話嘅字典，重想聯合國教科文組織將澳門土話列入人類非物質文化遺產名單添。
分佈
編輯講澳門土話嘅人，主要係土生葡人，係澳門嘅歐亞混種人。土生葡人現時嘅人口之中，大概有8000人住喺澳門（佔澳門人口約莫2%），另外有大約20000人移咗民，搬咗去香港、美國加州、加拿大、秘魯、巴西、哥斯達黎加、澳洲、葡萄牙、英國、委內瑞拉Paria半島。
雖然土生葡人嘅人口接近三萬，但係就唔係個個都識講澳門土話。經常講澳門土話嘅，只有幾十個老人家，多數都係住響香港或者澳門嘅阿婆，已經八、九十歲。響海外，曉澳門土話嘅就只有聚居喺美國加州嘅幾百人。
特點
編輯語系
編輯澳門土話係一種歸融話，係集合幾種語言融匯而成嘅。所以佢擁有多個語系嘅特點，難以歸入單一語系。
澳門土話嘅形成同發展過程，令佢好似其他響東南亞嗰邊以葡萄牙話或者馬拉話為基礎嘅歸融話，尤其係馬六甲嘅papiá kristáng，重有印度、斯里蘭卡嗰邊溝咗葡萄牙話嘅歸融話，同埋響印尼Flores島嗰邊已經失傳嘅歸融話。
辭彙
編輯澳門土話大部分詞語來自葡萄牙話（尤其係葡萄牙南部嘅方言），亦有唔少來自馬拉話。另一組主要嘅詞源，係嗰啲以葡萄牙話為基礎嘅歸融話，例如：馬六甲嘅papiá kristáng、印尼Flores島嘅歸融話。另外，重有一啲詞語，可以追溯到僧伽羅話同印度嘅話，係經斯里蘭卡、印度嗰邊以葡萄牙話為基礎嘅歸融話傳入來嘅。此外，澳門土話亦有由粵語、英文借入詞語。下面係一堆例子：
- 來自葡萄牙話嘅詞：Macau（意：澳門）、casa（葡：casa；意：屋）、mae（葡：mãe；意：媽）、filho（葡：filho；意：仔）
- 來自馬拉話嘅詞：sapeca（意：硬幣）、copo-copo（意：崩紗）
- 來自僧伽羅話同印度話嘅詞：fula（意：花）、lacassa（意：米粉）
- 來自粵語嘅詞：amui（粵：「阿妹」；意：女傭）、laissi（利是）
- 來自英文嘅詞：adap（英：hard-up；意：乾塘、唔夠錢）、afet（英：fat；意：肥）
文法
編輯有系統噉研究過澳門土話嘅人，可以話係絕無僅有；而研究佢喺16世紀至20世紀期間嘅發展歷程嘅人，就猶如鳳毛麟角。
同大部份亞洲語言一樣，澳門土話並無定冠詞，動詞冇活用變化（例如：io sam表示「我係」；ele sam表示「佢係」），代詞無變格（例如：io可以表示「我」、「我嘅」），代名詞有特別嘅砌法（例如：ilotro-sua表示「佢哋嘅」）。
動詞方面，加上助詞ta（來自葡萄牙話está，意思係「正係」）可以表示動作進行緊，就好似粵語嘅「緊」字咁。要表示動作已經完成，就要加助詞ja（來自葡萄牙話já，意思係「已經」），就好似粵語嘅「咗」字咁。
另外，澳門土話亦有用疊詞，用法同馬拉話差唔多。相疊嘅名詞或者形容詞表示眾數，例如：casa-casa表示幾間屋（casa只係一間屋）。副詞疊起來，可以加強程度，例如：cedo-cedo，表示「好早」（cedo只係「早」咁解）。
文字
編輯澳門土話並無標準嘅書寫系統（正字法）。
例句
編輯呢一首係澳門土話嘅詩：
澳門土話 葡萄牙話翻譯 英文翻譯 Nhonha na jinela A moça na janela Young lady in the window Co fula mogarim Com uma flor de jasmim With a jasmine flower Sua mae tancarera Sua mãe é uma Chinesa pescadora Her mother is a Chinese fisherwoman Seu pai canarim Seu pai é um Indiano Português Her father is a Portuguese Indian
重有另一首：
澳門土話 葡萄牙話翻譯 Língu di gente antigo di Macau A língua da gente antiga de Macau Lô disparecê tamên. Qui saiám! Vai desaparecer também. Que pena! Nga dia, mas quanto áno, Um dia daqui a alguns anos Quiança lô priguntá co pai-mai A criança perguntará aos pais Qui cuza sä afinal O que é afinal Dóci papiaçam di Macau? A "língua doce" de Macau?
參考
編輯- ↑ 《澳門語言研究》黃翊著 商務印書館出版 ISBN 9787100054171
- ↑ 王白石 (2005-03-16)。〈藝術節支持土生土語劇場〉。澳門藝術網。喺2011-02-14搵到。
- ↑ 3.0 3.1 《世界瀕危語言地圖冊》：澳門 （英文版：ISBN 978-92-3-104096-2）
- ↑ vitality: critically endangered
- ↑ 《澳門基本法》 互聯網檔案館嘅歸檔，歸檔日期2010年10月19號，.：序言 互聯網檔案館嘅歸檔，歸檔日期2008年6月10號，.
出面網頁
編輯- Description of language
- Macanese: ethnologue report on Macanese.
- Projecto Memória Macaense