通貨膨脹

通貨膨脹（粵拼：Tung1 fo3 paang4 zoeng3；英文：Inflation），日常用語就噉簡稱通脹，係指「個經濟體內部啲貨同服務嘅價錢普遍噉升」嘅現象，通常表示個經濟體裏面多經濟活動；通脹率就係指啲反映「通脹發生得幾快」嘅數值，會用「啲嘢嘅價錢喺呢年呢年升咗幾多 %」噉嘅方式表示。

幅圖顯示 1990 年至 2020 年之間聯合王國（藍色線）同美國（紅色線）嘅通脹率。

喺經濟學相關工作上，通脹呢個課題廣受關注：

• 一方面，極快嘅通脹（惡性通脹）會對民生造成龐大嘅負面影響。想像家陣有個人，佢銀行入面儲住咗 100,000 文美金，打後佢身處嗰個經濟體發生通脹（例如政府亂咁印銀紙，搞到銀紙價值跌），而且靠利息賺到嘅錢追唔上通脹，噉等到佢攞返筆錢出嚟嗰陣，筆錢買到嘅貨同服務嘅量就少咗－即係話通脹會導致隻貨幣嘅購買力下降；而如果通脹勁得滯，仲有可能會搞到啲人對隻貨幣冇嗮信心，唔想再揸隻貨幣，最後就出現「隻貨幣冇人要」噉嘅局面，例如津巴布韋元（Z$）就係噉。
• 不過另一方面，慢同輕微嘅通脹畀人覺得係對經濟有利嘅：通脹會搞到隻貨幣嘅購買力慢慢噉跌；簡化講，噉就表示啲人會唔想淨係揸住啲錢，而係會有誘因想攞啲錢去做投資（例如買股票）慢慢轆大自己嚿儲蓄，然後呢啲投資就會刺激經濟（例如企業賣到股票就會多咗資金，有資金就有得擴張業務）；除此之外，慢同輕微嘅通脹仲畀人指可以達致「減低失業率」等嘅正面效果。

因為通脹對經濟同民生咁有影響力，世界各地嘅政府同經濟相關工作者都成日會諗「點樣量度通脹」或者「要用乜政策先可以控制通脹」等嘅問題，想自己管嘅經濟體有慢同輕微嘅通脹，同時又唔會出現惡性通脹。喺學術上，唔少專業嘅經濟學家仲會醉心鑽研通脹，會喺學術期刊等嘅地方撰文，對呢種現象做理論性質嘅研究。

通脹嘅相反係通縮（啲貨同服務嘅價錢普遍噉跌）。

定義

一間超市有一拃貨；每件貨都有個價錢，如果睇勻唔同超市啲貨嘅價錢，發覺啲貨嘅價錢普遍都升緊嘅話，就應該係有通脹。

内文：錢同實際同名目價值

睇埋：通貨緊縮

2022 年嘅不列顛百科全書係噉樣描述通脹呢個概念嘅：

「

粵文翻譯：喺經濟學上，通脹係指貨幣供應、以錢量度嘅收入或者價錢嘅整體上升。

」

－喺個定義裏面，「整體」係隻好重要嘅關鍵詞：

• 想像家陣有位讀經濟學嘅學生，佢想做份有關通脹嘅研究，於是佢就行勻幾間超市，睇吓啲貨品嘅價錢，想知呢啲嘢嘅價喺過去一年內有咩變化；佢發現原來喺過去嗰年有唔少地方爆禽流感，有好多雞都焗住要攞去銷毀，搞到雞相關嘅產品供應大跌，雞肉同雞蛋嘅價都明顯升咗，平均升咗成 10% 咁多；不過同時第啲貨品－包括生果、麵包、芝士同紅酒呀噉－嘅價就冚唪唥都冇升過，有啲甚至係跌咗；嗰位學生觀察到噉嘅情況，並唔表示個經濟體喺過去嗰年實係有通脹。
• 定義上，通脹係涉及成個經濟體入面啲貨品同服務嘅價普遍噉升；淨係睇到其中一兩樣貨品服務嘅價升咗，都唔表示係有通脹；要知「係咪有通脹」，必需要考慮好多種唔同貨品服務嘅價錢，睇吓呢啲價錢「總體上」變咗幾多，先至可以做決定。

通脹通常仲會伴隨住啲人嘅收入（以錢嚟計）跟住一齊升。

2019 年世界各國家同地區嘅通脹率分佈圖；每笪國家或者地區嘅色水反映佢嘅通脹率，笪地方愈深紅就表示通脹率愈高，一笪地方藍色表示佢哋有通縮。

量度

睇埋：經濟指標、經濟測量同平均

原則上，經濟學採用嘅係科學方法，研究一個變數嗰陣，實要有客觀嘅方法量度個變數先得。响廿一世紀初，通脹有多種方法量度：

消費物價指數

蔬菜嘅 CPI：假設上面籃菜準確噉代表到香港一般民眾會買嘅菜；將籃菜入面嘅菜逐種逐種攞嚟睇，嗰種菜嘅價同對上一年比升咗或者跌咗幾多呢？啲菜平均價錢升咗或者跌咗幾多呢？

内文：消費物價指數

消費物價指數（CPI）係廿世紀嘅美國最常用嗰種通脹指標；CPI 最基本個諗頭係「搵一般普羅消費者會買嘅貨品服務，睇吓呢啲嘢嘅價嘅變化，從而量度通脹率」，計 CPI 嘅步驟大致如下：

• 首先，考慮市場籃嘅概念－一個市場籃係指一拃「响個經濟體裏面，啲普羅消費者普通消費嗰陣會買嘅貨品同服務」，正路起碼會包括啲人買餸嗰陣買嘅嘢、各種日用品（例如番梘同廁紙）同埋日常會用嘅服務（例如飛髮同睇醫生）... 等等；
  • 「市場籃包乜」受好多因素影響－首先，唔同國家地區嘅市場籃都唔同，例如香港同英格蘭有文化差異，所以香港人同英格蘭人買餸嗰陣傾向會買嘅嘢都有分別，而唔同年齡層嘅人消費習慣會有異，所以（例如）青少年同老人家嘅市場籃又會唔同；
  • 响實際嘅經濟研究當中，市場籃「有咩响裏面」可以透過「對消費者做問卷調查」等嘅途徑得知。
• 知道市場籃入面有邊啲貨品服務之後，分析師就要郁手計「同舊年（或者對上一次調查通脹率）比起嚟，啲貨品服務嘅價平均變咗幾多」；呢個過程遠遠唔淨只係「攞今年嘅價同舊年嘅價，將兩個數相減或者相除，再計平均」咁簡單－分析師通常起碼要調節吓啲價嘅數值，（例如）考慮埋啲貨品服務嘅質素有乜變化，確保一件貨品服務嘅價升唔係源於件貨品服務嘅質素升咗。
• 做好咗調節之後，分析師就會攞住今年個價（${\text{gaa}}_{1}$）同對上一次計 CPI 嗰時嘅價（${\text{gaa}}_{0}$），用類似下面嗰條式噉嘅式，計出今年嘅 CPI 數值（${\text{CPI}}_{1}$）－「同對上一次調查通脹率比起嚟，啲貨品服務嘅價變咗幾多 %」：

  ${\text{CPI}}_{1}={\frac {{\text{gaa}}_{1}}{{\text{gaa}}_{0}}}\times 100$

CPI 嘅計法响經濟學界相當有爭議性－例如「要點樣先可以準確知消費者日常買乜」同埋「郁手計 CPI 之前，啲價嘅數值要用乜方法調節」都係相當大嘅問題。

平均物價指數

内文：平均物價指數

成因

睇埋：貨幣供應

對於「通脹點解會發生」呢條問題，唔同經濟學派有唔同睇法。

貨幣主義觀點

睇埋：貨幣主義

凱恩斯派觀點

睇埋：凱恩斯經濟學

理性預期觀點

睇埋：理性預期

影響

2021 年一間餐廳掛咗個牌（英文），牌上面同啲客（patron）講，話因為糧食成本上漲（spike of food cost），佢哋焗住要將餐牌上面所有嘢食嘅價提高 $1.00。

睇埋：投資

通脹會對經濟造成各種嘅影響。以下係啲「畀人覺得未必好未必壞」嘅影響：

• 錢嘅實際價值：首先，通脹最直接嘅影響係會令一隻錢嘅實際價值跌；想像家陣有個人手上揸住 1,000 文港幣銀紙，然後香港出現通脹；雖然筆錢名義上仲係 1,000 文咁多，但因為啲嘢貴嗮，揸住筆錢可以買到嘅貨品服務實際上就少咗－筆錢嘅實際價值跌咗。呢點就自然表示，通脹會令人冇咁肯儲住啲錢，而係會想用自己啲錢換取第啲嘢－例如攞啲錢去買股票或者做第啲投資，嘗試將嚿錢轆大佢；而喺極端嘅情況下，啲人可能會索性放棄隻貨幣，買價值穩定啲嘅貨幣嚟保存自己手上揸嘅價值。
• 收入再分配：通脹能夠達致一定嘅收入再分配效果；想像家陣有人借咗 1,000 文港紙咁多錢，佢同佢債主簽咗份借據，講好咗要還幾多錢同埋利息係幾多，然後個經濟體發生通脹，而且啲人（包括個債仔）嘅人工跟住升埋一份，噉個債仔就著數咗－佢要還嘅錢嘅量（名目價值）冇變，但佢還嗰筆錢喺佢收入裏面佔嘅比例（反映實際價值）低咗；噉講即係，通脹傾向令借錢俾人嘅人財富少咗，同時令問人借錢嘅人財富多咗－收入再分配。

負面影響

内文：惡性通脹

惡性通脹係指極快嘅通脹：喺好多經濟學工作者心目中，通脹率高過 2% 已經有啲高得滯，而定義上如果一個經濟體啲貨品服務嘅價每月升超過 50% 或者每年升超過 1,000% ，就可以算係有惡性通脹，例如據報 2017 年嘅委內瑞拉就出現超過 4,000% 嘅通脹率。

經濟學研究清楚表明咗，高嘅通脹率會對經濟造成各種負面影響：

• 囤積：囤積係指啲人有誘因係噉買或者揸住市場入面某隻產品；高通脹表示錢嘅實際價值係噉跌，啲人一攞到錢（人工或者儲蓄）就會想有咁快得咁快使嗮自己揸住嘅錢，用啲錢換取貨品－簡單嘅有糧食同食水，保存手上嘅實際價值，同時手上揸住啲有實際價值嘅貨品嘅人，就會唔肯賣嘢（賣嘢即係攞啲貨品換取錢）－兩種行為都表示，有好多人都會手上揸住愈嚟愈多嘅貨品，呢種累積貨品嘅行為就係所謂嘅囤積；囤積往往會搞到啲貨品出現短缺，仲成日會加劇高通脹造成嘅社會混亂。
  • 好似係 2022 年嘅阿根廷噉，2022 年嘅阿根廷出現咗一年成 64% 咁高嘅通脹率，於是啲農夫就响度囤積黃豆－阿根廷嘅黃豆農夫見到錢愈嚟愈冇價值，就將佢哋收成當中 54% 嘅收埋，唔肯攞去賣，要黃豆唔要錢，單嘢仲對全球黃豆供應造成咗衝擊。
• 貨幣替代：貨幣替代係指「啲人揸外幣，唔肯揸自己本地貨幣」噉嘅現象；一個經濟體有高通脹，表示個經濟體隻貨幣嘅價值係噉跌，啲人心知假如自己啲人工同儲蓄係以嗰隻貨幣計住嘅話，自己啲收入嘅實際價值就會係噉跌；喺呢種情況下，啲人好多時會索性將自己手上嘅本地貨幣換嗮做（價值穩定啲嘅）外幣－最後就會出現「個經濟體嘅人，個個都係揸住外幣」噉嘅情況；例如非洲南部國家津巴布韋就係噉－喺 2000 年代，津巴布韋元（Z$）因為惡性通脹搞到政府要印驚世嘅面額 100 萬億文銀紙，於是津巴布韋國民個個都寧願揸美金，最後美金取代津巴布韋元，成為津巴布韋用嘅貨幣。

正面影響

好多人一聽通脹，就會想起啲錢唔見駛，人工變相貶值咗。的確惡性通脹係好得人驚嘅，但係其實，適當嘅輕微通脹對經濟嚟講係好嘢嚟㗎。大多數經濟學家都認為，溫和嘅通脹，例如1%~3%，對經濟成長有利。當啲人覺得將來嘅商品價格會更加貴，就會早啲買，呢啲消費動力會增加整體需求。需求上升會令到商家賺到多啲錢，亦都令佢哋對將來嘅需求會更加樂觀，咁佢哋就會增加投資，請多啲人，買多啲原材料，最終令到商品嘅產量上升，經濟（GDP）就會變得更好。

穩定勞工市場

研究顯示，失業率同通貨膨脹呈負相關性（negative correlation）。註：但係銀行嘅貸款政策會左右呢個關係，如果通脹嚴重，加上銀行對商家嘅貸款政策收緊，失業率唔單止唔會跌，反而會上升，特別係嗰啲需要大量研發融資嘅公司。

由於經濟情況出現突然嘅意外轉變，名目工資（nominal wages）嘅水平需要調整嘅時候，因為名目工資係無乜彈性嘅，有啲薪水（例如最低工資）好難下調，勞工市場會失去均衡。如果勞工市場長期失衡，失業率就會上升。如果有通脹情況發生，即使名目工資保持不變，通脹亦都會令到實際工資（real wages）下降，所以適度嘅通脹可以令勞工市場更快咁達到均衡，減少失業。

多咗迴旋餘地

控制貨幣供給嘅主要工具係設定貼現率（銀行向中央銀行借錢嘅利率）同埋公開市場操作（中央銀行對債券市場嘅干預），呢啲行動嘅目的係影響貨幣發行量。如果一個經濟體發現自己陷入衰退，減息係最簡單而有效嘅方法，不過如果名目利率已經好低，甚至好似過去嘅日本咁，差唔多係零，咁中央銀行就無得進一步減息（負名目利率係唔可能嘅，因為啲人會將銀行嘅錢攞出嚟，鎖係夾萬嗰度）嚟刺激經濟——呢種情況叫做「流動性陷阱」。

Mundell–Tobin 效應

根據 Mundell-Tobin 效應，通貨膨脹嘅加劇會令商家增加資本投資，從而刺激經濟成長。諾貝爾獎得主羅拔蒙道（Robert Alexander Mundell）認為，溫和嘅通膨會令到啲人減少儲蓄；佢哋將來需要用錢嘅時候，會選擇借錢，而唔係預先儲定啲錢；呢種消費模式嘅改變會令市場嘅實際利率下跌。較低嘅實際利率會令更多商家選擇借錢嚟投資。同樣，諾貝爾獎得主占士托賓（James Tobin）認為，呢種通貨膨脹將令企業用實體資本（廠房、設備同庫存）投資嚟取代資產組合中嘅貨幣餘額；呢種替代意味著選擇實際回報率較低嘅投資。註：回報率比較低，係因為高回報率嘅投資機會，喺之前已經投資咗，所以剩番嘅投資機會嘅回報率會比較低。呢兩種相關嘅效應叫做 Mundell-Tobin 效應。根據經濟成長理論模型，除非某個經濟體已經出現咗過度投資，否則輕微通貨膨脹引發嘅額外投資都係好嘅，對經濟有正面影響。

通縮帶嚟嘅唔穩定

美籍台灣經濟學家蔣碩傑認為，一旦市場預期會出現大幅度嘅通貨緊縮，就會出現兩個重要影響：兩個都係持有貨幣，增加儲蓄，唔借錢嘅結果。

第一個係，因為持續下跌嘅價格同埋因此令到貨幣囤積嘅動機增加，會導致啲人越來越擔心，令到經濟變成好唔穩定；同時呢啲貨幣囤積會增值，而嚟啲增值會面對風險，因為啲人意識到啲人開始用嚟啲貨幣買嘢（消費品同資產），就會推高呢啲嘢嘅價錢。任何花費呢啲囤積嘅錢嘅舉動，「一旦開始咗，都有可能會形成巨大嘅雪崩式消費，喺用盡呢啲錢之前，呢啲消費可能會維持一段相當長嘅時間。」因為呢個原因，長期通貨緊縮好可能會俾週期性嘅通貨緊縮所打斷。

蔣碩傑指出嘅第二個影響係，當存戶用手上嘅錢，而唔係喺金融市場嗰度借錢嘅話，咁樣金融市場將存戶儲蓄嘅錢轉化做投資資產嘅作用就會削弱咗。啲人對經濟前景負面，無通脹預期，所以即使係喺零利率之下，都寧願將啲錢儲起嚟而唔願意消費或者投資，儲蓄意願嘅增加唔會進一步壓低利率（因為已經無得再低），無得降低利率就無得用降低投資成本嘅方法去刺激投資。呢啲儲蓄意願嘅增加，反而會導致更多嘅資金囤積，結果搞到消費價格進一步下跌，商家無肉食就會生產少啲嘢，投資嘅吸引力又會再降低，經濟就會更差。呢個影響，其實喺1930年代美國大蕭條期間，凱因斯已經提出過，喺經濟體出現流動性陷阱（Liquidity Trap）嘅時候，名目利率接近零，唔能夠用調低名目利率嚟刺激經濟，所以無辦法刺激經濟活動（商業投資同埋消費），貨幣政策對經濟體系嘅作用失效。喺1990年嘅日本，亦都出現過，日本銀行（Bank of Japan，日本嘅中央銀行）應對泡沫經濟嘅方法係零利率政策；佢哋想用減息嘅方法去振興經濟，結果造成咗克魯明（Paul Krugman）所講嘅日本當時已經出現咗流動性陷阱。克魯明建議用增加通脹預期嘅方法去扭轉日本面對嘅流動性陷阱問題，包括：（一）政府喺公開市場回購政府債券嚟增加市場嘅貨幣供給量，（二）大規模擴大政府嘅財政開支，創造需求，製造通脹預期。當市場開始出現通貨膨脹，啲人就會買嘢（遲啲買會貴啲），經濟活動就會增加，經濟就會好翻。

生活補貼

收固定收入嘅人嘅實際購買力會俾通脹侵蝕，除非呢啲係通脹調整（inflation-adjusted）收入，咁先至可以保持實際嘅價值唔變。喺好多國家，打工仔嘅僱傭合約、退休金同埋政府福利（例如香港嘅綜援）都係同生活成本指數（通常係消費者物價指數）掛鉤嘅。 生活成本調整（cost-of-living adjustment，COLA）薪金，會根據生活成本指數嘅變化而調整。 呢種薪金嘅調整方法，唔係為咗控制通貨膨脹，而係想減輕通貨膨脹對固定收入人士嘅影響。喺低通膨經濟體嗰度，薪金通常每年調整一次。喺惡性通貨膨脹期間，需要更加頻繁嘅調整。 有啲公司會將出差或者派去其他國家嘅職員嘅人工同當地嘅生活成本指數掛鉤，減少佢哋因為調派去其他國家而降低咗收入。

僱傭合約裏面嘅年度加薪條款，可能寫明職員嘅加薪率，即係佢哋嘅人工喺未來嘅增長百分比，但係呢啲加薪率通常都係同任何指數無關聯。而嗰啲談判協商嘅加人工，通俗啲講就係生活成本調整（COLA）或者係生活成本增長（cost-of-living increases）調整嘅人工調整，因為呢啲人工嘅增幅係跟住外部指數（例如消費者物價指數）而增加嘅。

政策

• 貨幣政策
• 固定匯率
• 金本位

睇埋

• 惡性通脹
• 通貨緊縮
• 個人理財
• 外匯市場
• 糕昇

詞彙

以下係篇文用咗嘅詞彙嘅粵英對照，啲拼音用嘅係粵拼：

• 通脹率 / tung1 zoeng3 leot2 / inflation rate
• 消費物價指數 / siu1 fai3 mat6 gaa3 zi2 sou3 / consumer price index
• 市場籃 / si5 coeng4 laam2 / market basket
• 惡性通脹 / ok3 sing3 tung1 zoeng3 / hyperinflation
• 囤積 / tyun4 zik1 / hoarding
• 貨幣替代 / fo3 bai6 ceoi2 doi6 / currency substitution

拎

• （英文） Inflation，投資百科講通脹。
• （英文） What Causes Inflation?，投資百科講通脹嘅成因。