維基百科

詞性

詞語喺句子裡面嘅角色
(由開放字類跳轉過嚟)

詞性（粵拼：ci4 sing3；英文：part of speech，簡稱 POS），又有叫詞類，係語言學術語，指一個字詞響語法上嘅性質分類。喺廿一世紀初，主流語言學問一個字詞屬於邊個詞性，一般都係講緊個字詞「喺句子入便扮演咩角色」嘅，而喺粵語同英文等嘅多種主流語言裡便，字詞都可以分做名詞、代名詞、動詞同形容詞等嘅幾種主要詞性。

英文語句 The dog ate the bone（隻狗食嚿骨，過去式）用分析樹表達嘅樣，當中每個字詞都標咗佢係邊種詞性，例如 dog 係名詞（N）。

例如睇吓以下嘅粵語語句噉，就可以按照每個字詞響語句入便嘅角色，同每個字詞分詞類：

阿妹 想 食 魚蛋 。
名詞 助動詞[1] 動詞 名詞

理論基礎

編輯
内文：句法學同構詞學

響廿一世紀初嘅語言學上，一個字詞嘅詞性係由佢嘅句法同構詞特性反映嘅。

詞性係句法學[e 1]上嘅一個重要概念。句法學有一種常見觀點，主張語句嘅基本組成單位並唔係字詞，而係字詞嘅類型。想像以下嘅粵語語句：

「我食咗冬甩。」

根據一般嘅觀點，如果將句嘢入面嘅冬甩換做（例如）叉燒包、的士或者阿明等嘅字詞，句嘢依然可以啱語法——縱使我食咗的士呢一句嘢意思好怪。不過，粵語咗就淨係可以黐響動詞嘅尾[2]，如果將食換做的士，出咗的士咗噉嘅短語，成句嘢就會變到錯語法。由呢個例子睇得出，攞住一句語句，搵其中一個字詞（X）嚟睇，研究者都梗會響同一隻語言入便搵到大量嘅字詞，就算將呢啲字詞當中是但一個代入去 X 嗰個位[註 1]，成句語句都仲會係合符語法嘅，而唔同 X 屬同一類別嘅字詞換咗入去 X 個位，就會搞到句嘢唔啱語法[3]。呢個就係廿一世紀初語言學上講緊嘅詞性。

除此之外，詞性呢樣嘢亦都可以體現響構詞[e 2]之上。諸如粵語、潮州話、上海話同標準官話等嘅漢語，一般畀人認為係較少詞形變化[e 3]嘅，但係好似英文、法文同葡文等嘅歐洲語言就具有豐富嘅詞形變化。例如響英文裡便，一個字詞可以變眾數（通常係加個 -s 喺尾）表示個字詞指緊嘅物體有多過一件，而眾數呢一種變化淨係得名詞做得，（例如）動詞或者形容詞唔做得。亦可以睇睇英文入便嘅時態（例如由現在式變過去式）變化，係動詞先至做得嘅[4]。

廿世紀嘅語言學家睇勻晒好多種語言，發覺以上噉嘅現象響世界各地嘅語言當中都可以觀察得到——無論係粵語等嘅漢語、英文等嘅歐洲語言、定係日文同韓文等阿爾泰語言聯盟嘅成員，都係有噉嘅情況[5]。

註：詞性嘅定義唔取決於語義

響廿一世紀初嘅語言學上，一個字詞要分做邊個詞性，並唔係按照嗰個字詞嘅語義嚟分嘅。響廿世紀嗰陣，啲人成日都有個諗法，覺得名詞實係指物件、人或者地方，而動詞就實係指動作，但事實表明，指動作嘅字詞好多時都可以攞嚟做名詞。

响英文入便，一個動詞加咗 -ing 就可以攞嚟當名詞噉用（動名詞[e 4]）。例句：

I like dancing .
名詞 動詞 名詞
我 鍾意 跳舞（呢種活動）

例如語言學家兼作家湯馬士·結文提議，名詞同動詞之間嘅差異在於佢哋指嘅嘢「有幾傾向[註 2]穩定或者不變」，當中名詞指嘅嘢或者特性傾向不變而動詞就比較傾向指一啲稍瞬即逝嘅嘢[6]。

常見詞性

編輯

以下一覽式噉列出廿一世紀初嘅主要詞性分類[註 3][7][5]。

名詞

編輯
内文：名詞

名詞[e 5]喺廿世紀嗰陣成日被描述為「指人、地方、物件或者諗法嘅字詞」[8]；正式啲定義嘅話，名詞會有以下嘅特性：

  • 眾數：可以做詞形變化變眾數，除非係不可數名詞；
  • 衍生[e 6]：喺好多語言當中，唔少衍生用嘅詞尾係名詞先用得嘅，例如英文加咗 -er 指做呢樣嘢嘅人（例字：dancer，指跳舞嘅人）正路會係名詞。
  • 掕其他字詞，做名詞短語嘅中心：名詞可以掕住形容詞，由形容詞提供有關佢嘅資訊，形容詞唔一定擺名詞前面——粵語、標準官話、英文同日文傾向將形容詞擺喺名詞前，不過（例如）法文同越南話就好多時都會將形容詞擺喺名詞後便。除咗形容詞，名詞仲可以掕冠詞（想像英文 the 同 a 等）、數詞（想像一個同兩個等）以及處於屬格[e 7]嘅字詞（簡化講就係佢嘅同我嘅等表示「屬於邊個」嘅字詞）。
  • 互相修飾：一個名詞，有可能用嚟修飾第個名詞，粵語口語可以有嘅例子：「木門」、「語言學課堂」... 等等。

名詞仲可以再細分。例如分做專有名詞[e 8]同普通名詞[e 9]：如果話一個名詞係專有名詞，意思係指隻名詞指緊一件特定嘅物體，例如歐洲（指緊一笪地方）、阿莊（指緊一個人）或者微軟（指緊一間企業）都係固有名詞。相比之下，一個普通名詞會係指緊一類嘅物體，例如大陸、人類同企業都係普通名詞。

其他

編輯

開放定封閉

編輯

字類可以分做開放同封閉兩種，所謂嘅開放字類[e 10]係指呢啲字類隨時都可以有新字詞加入，而封閉字類[e 11]就指好少可會有新字詞成功噉加入，例如喺英文入面，名詞、動詞、形容詞同副詞係開放字類，而淨低嗰啲詞類就一般認為係封閉字類，好似代名詞就係噉[9]。

睇埋

編輯
  • 詞類轉換[e 12]：某啲語言入面有嘅一種現象，講緊一隻語言嘅使用者創造新字詞，期間攞咗一隻既有嘅字詞嚟用，但係隻既有字詞同隻新字詞喺詞性上唔同。例如英文啲字詞要變名詞往往要加 -ing、-ness、-ion 等嘅詞尾，而詞類轉換就係指唔做呢啲變化就（例如）直接攞咗一隻形容詞當係名詞噉用[10]。
  • 詞性標注
  • 語序
  • 字詞

文獻

編輯

註釋

編輯
  1. ↑ 假設撇除咗詞形變化：例如英文 an apple 可接受但 an apples 唔可以，因為後者做咗詞形變化變眾數而 a 呢隻非指定冠詞只可以掕單數嘅名詞。
  2. ↑ 可以睇返原型理論。
  3. ↑ 以下嘅分類法建基於歐美嗰套語言學。有關呢套分類法係咪適用於漢語，廿一世紀初嘅學界有些少爭議。

引咗

編輯

文中用咗嘅詞彙嘅外語（主要係英文）版本：

  1. ↑ syntax；語言學當中嘅一個學科，專門研究語句。
  2. ↑ morphology
  3. ↑ inflection
  4. ↑ gerund
  5. ↑ noun
  6. ↑ derivation
  7. ↑ genitive
  8. ↑ proper noun
  9. ↑ common noun
  10. ↑ open classes
  11. ↑ closed classes
  12. ↑ null derivation

文中引用咗嘅學術文獻或者網頁：

  1. ↑ Yip, V., & Matthews, S. (2017). Basic Cantonese: A grammar and workbook. Routledge. Unit 20: Auxiliary verbs.
  2. ↑ （英文） 粵語動詞
  3. ↑ Koeneman, O., & Zeijlstra, H. (2017). Introducing syntax. Cambridge University Press. 1.2.1
  4. ↑ Parts of Speech, Lexical Categories, and Word Classes in Morphology. Oxford Research Encyclopedia，佢講咗以下呢段："A morphological test for nouns in English and many other languages is whether they can bear plural morphemes. Verbs can bear morphology for tense, aspect, and mood, as well as voice morphemes such as passive, causative, or reflexive, that is, morphemes that alter the argument structure of the verbal root."
  5. ↑ 5.0 5.1 The Major Parts of Speech (PDF).
  6. ↑ Givon, T. 1984, Syntax, vol. I. Amsterdam: Benjamins.
  7. ↑ （大陸簡體） 造成不同漢語詞類觀的根本原因 (PDF)，高名凱：「高先生的三段論——詞類分別得根據詞的形態；漢語實詞沒有足以分詞類的形態；所以漢語實詞沒有詞類的分別。」
  8. ↑ Weaver, Constance. 1996. Teaching Grammar in Context. Portsmouth, NH: Boynton/Cook Heinemann.
  9. ↑ Carter, Ronald; McCarthy, Michael (2006), Cambridge Grammar of English: A Comprehensive Guide, Cambridge University Press, p. 296, 297.
  10. ↑ Bauer, Hernández (2005). Approaches to Conversion / Zero-Derivation. Waxmann Münster. p. 131.

文獻

編輯
由「https://zh-yue.wikipedia.org/w/index.php?title=詞性&oldid=2200885#開放字類」收