維基百科

廣東獨立運動

(由User:Islandlibrary/廣東獨立運動跳轉過嚟)

廣東獨立，又叫做粵獨，講嘅係認為廣東應唔受外界管轄同干擾，建立獨立自治嘅政治實體嘅主張兼運動。 近代包括咗康有為弟子（後同康因主張而反目）歐榘甲在內等，都提出過呢個主張[1]。歐氏喺自己本書《新廣東》度提出咗建立「廣東人之廣東」嘅主張。1911年辛亥革命後10月尾，廣東同盟會會員陳炯明、鄧鏗同彭瑞海等人喺廣東各地組織咗民軍起義。11月9號，陳炯明率部光復惠州，宣佈埋廣東獨立，成立咗中華民國粵省軍政府。1912年1月1號中華民國成立後，廣東成為咗中華民國嘅一個省。喺開初，受聯省自治思想影響，廣東省起草咗《廣東省憲法草案》[2]，並喺1921年12月19號由廣東省議會通過咗。但呢個對廣東未來規劃嘅主張並未獲得足夠嘅支持，並隨著蘇聯勢力介入遠東，以及國共兩黨北伐而流產。

當代坊間運動嘅代表旗幟「木棉花旗」，旗幟比例係1比2
坊間另一個運動嘅代表旗幟「嶺南旗」，旗幟比例係1比2

曆史

編輯

兩廣獨立

編輯

清末中央面對著「內憂外患」，義和團運動嘅發起同席捲，引起咗統治集團內部嘅分裂。慈禧太后喺1900年6月21號，發佈咗招撫義和團兼向八國聯軍宣戰嘅上諭。掌握著地方大權嘅多數督撫就強烈杯葛，撐硬主和派，形成咗地方同滿清中央公開對抗兼分裂嘅局面。清政府宣戰後，時兩廣總督李鴻章、兩江總督劉坤一、湖廣總督張之洞、閩浙總督許應騤、山東巡撫袁世凱呢班總督、巡撫等奉行東南互保，公然違背中央嘅命令，唔同鬼佬開戰。李鴻章仲要對大清帝國向西方十一國宣戰嘅詔書，發出咗極其強硬嘅回應：「此亂命也，粵不奉詔！」。呢陣時東南各省抗拒朝廷嘅外交政策，自行同啲西方國簽埋條約，實際上成咗脫離滿清中央控制嘅自治政體。而廣東人一路有著獨特嘅身份認同，好早受到過現代化洗禮，慢慢出現埋分離嘅訴求[3]。廣東嘅士紳階層仲向李鴻章建議割據兩廣獨立建國，往來粵港嘅商人亦尋求港英政府嘅協助，嗰陣時嘅港英政府亦有意推動，以借此擴張大英帝國喺兩廣嘅利益。

同一時間，革命派已打算趁著清廷勢弱，嶺南建立根據地。早喺五、六月之交清廷仲未同各國宣戰陣，香港定例局非官守議員，同時又係首個華人爵士嘅何啟，就喺請示咗港英政府後，搵咗留守香港嘅興中會黨人陳少白，建議興中會同李鴻章合作，建立個兩廣獨立政府。嗰陣嘅陳少白表示咗贊同，隨即同喺日本度嘅孫文聯絡咗，香港方面亦開始接觸李鴻章。

1900年6月初，李鴻章透過咗機要幕僚廣東士紳劉學詢，接觸過孫文，希望邀請孫到廣州傾下啲合作事宜。劉學詢對呢個計畫亦十分熱衷。隨後，劉學詢向孫文發出咗電文：「因北方拳亂，欲以粵省獨立，思得足下為助，請速來粵協同進行」[4]。孫文當其時正專注準備喺惠州起義，孫對此回覆講：「此舉設有成，亦大局之福，故亦不妨一試」[5]。喺6月15號後，滿清政府迭電諭令李鴻章北上述職，李鴻章心存觀望，藉故拖延。

何啟呢陣主要做嘅係爭取港督卜力嘅支持。何啟先同咗部分興中會成員討論返兩廣獨立後，改造大中華嘅方案《華南志士致港督書》，再由何啟譯成英文交咗畀卜力。何啟起草嘅畀稱做《平治章程》嘅綱領，係支持喺西方大國嘅託管下，重組大中華嘅政治制度，內容包括咗「遷都於適中之地。如南京、漢口等處」，「於各省立一自治政府，以資分理」，將司法、教育制度西化，向外商開放埋大陸市場，以及建立埋議會制：

設立省議會，由各縣貢士若干名以為議員，所有該省之一切政治、徵收、正供皆有全權自理，不受中央政府遙制。惟於年中所入之款，按額撥解中央政府，以為清洋債、供軍餉及宮中府中費用。省內之民兵隊及員警隊部，俱歸自治政府節制，以本省人為本省官，然必由省議會內公舉。至於會內之代議士，本由民間選定；惟新定之始，法未大備，暫由自治政府擇之，俟至若干年始歸民間選舉，以目前各國之總領事為暫時顧問局員。
“
”
——何啟：《平治章程》[6]。

6月11號，孫文偕楊衢雲、鄭士良、宮崎寅藏等人自橫濱啟程，喺17號抵達香港海面，遇到李鴻章派來迎接嘅軍艦。由於孫擔心大清誘捕渠嘅陷阱，開初唔敢貿然登船，就派宮崎等三名享有治外法權嘅日本人代表孫赴會。當晚10點左右，宮崎等人抵達劉學詢喺廣州嘅公館，進行秘密談判，期間劉學詢表示喺西方諸國攻陷北京前，李鴻章「不便有所表示」，暗示獨立問題需待北京易手後進行。宮崎就話返，李鴻章應保障返孫文嘅安全，同興中會借埋咗六萬，當係雙方合作嘅基礎。劉學詢當即請示過李鴻章後，表示咗同意，當面就出咗三萬嘅數。到凌晨三點，先結束咗將近五個鐘嘅會面，宮崎等人即趁夜返去咗香港，孫文亦當日啟程由河內去咗星洲。

為咗維護英國喺珠江流域嘅特殊利益，港英政府對李鴻章同革命派嘅合作亦有唔少興趣，決心盡力阻止李北上，希望李鴻章留喺廣東建國，支持何提出嘅李鴻章同興中會合作實行兩廣獨立嘅計畫。卜力就咁谷著推李鴻章同孫文聯合。卜力同孫文應承過李鴻章，話如果獨立成功咗，就推舉李來做兩廣共和國嘅「總統」。李鴻章為咗穩定華南局勢，對呢個計畫都幾起痰下，就同革命派進行過談判仲畀埋貸款。到咗6月20號，署任港督加士居少將電報咗殖民地部，要求倫敦准許港府介入李鴻章嘅行程。但英國首相梳士巴厘就喺22號下令禁止港府介入。港督卜力結束咗行程喺7月2號返港，即透過何啟接觸興中會，並繼續遊說倫敦。

但隨著戰局嘅惡化，清廷內主和聲音開始出現，李鴻章喺7月8號再次接到咗清廷電報，畀慈禧任命咗做直隸總督兼北洋大臣，李鴻章覺察到朝政有開始向有利於主和派方向發展嘅可能，決定改變態度，於是乎決定咗離粵北上[7]。離開前，李首先搭船由廣州抵達香港，拜會咗港督卜力，當面向港府表咗態[8][9]。但卜力未有放棄，亦得知孫文正由星洲來咁香港，就向倫敦發出埋緊急電報：

李鴻章曾向美國海軍上將請求帶他北上…我向這位美國海軍上將表示，女皇陛下的政府認為李鴻章現時應該留在廣州…美國海軍上將決定暫緩其行動，（讓）李鴻章留在南方是極其重要的。
“
”
——蔔力[9]

喺談話度，卜力同李鴻章話：「我認為考慮到華北當今的局勢，刻下是兩廣脫離清廷獨立之良好機會。我們應該準備好保護我們的利益[9]。」，並表示獨立嘅兩廣應由李鴻章擔任主權者，而孫文僅任顧問。李鴻章冇任何回應。呢陣時，立法局議員韋玉同咗卜力會面，請求港府不惜以武力挽留李鴻章，但英國外相約瑟夫·張伯倫再三下令禁止卜力採取任何行動，「兩廣獨立」之事就咁流產咗。 喺兩廣獨立計畫失敗咗以後，何啟試著繼續遊說港英，講咗關於改造大陸王朝嘅思想同計畫。7月21號，何啟報導稱，卜力支援華南成立一個共和國。8月1號，何喺英文報章《德臣西報》度發表咗篇以呢個政治綱領做依據嘅文[10]，喺8月10號更進一步喺報刊發表關於喺大陸南部建立個獨立共和國嘅文[11]。8月22號，何啟喺《德臣西報》度用Sinensis做筆名，An Open Letter on the Situation（關於局勢嘅公開信）做題發表公開信總結自己嘅觀點，信嘅收件人是「約翰牛先生」：

不同省份的中國人各自都有幾個與眾不同的特徵，長遠看來，他們更有可能分裂成一些獨立的邦國，而不是聚合為一個龐大的國家。
“
”
——何啟 [12]

何啟認為大中華喺缺乏列強幫助下，終歸會四分五裂，而幫助大中華推行改革同解體係一項「崇高但艱巨嘅事業」，因此希望能得到英國人嘅支持，渠話：「許多有才有智嘅中國子民都對這件事情十分熱心」[12]。有學者認為，呢個正係唔少之前對何啟嘅研究所忽略嘅一面[13]。

廣東獨立協會

編輯

清廷喺多次對外戰爭度，割地賠款並簽訂咗不平等條約。1901年春，傳聞清廷會將廣東割畀法國，留日粵籍學生馮斯欒、鄭貫一、李自重、王寵惠、馮自由及梁仲猷等人發起成立咗廣東獨立協會 [14]，主張廣東向清廷宣告獨立，強調廣東係廣東人嘅廣東，命運應由廣東人決定，而唔係滿清政府[15]。喺日本嘅粵僑有相當多人響應，「參加者二百餘人」[16]。一班發起人當其時亦拜訪過喺橫濱落腳嘅孫文，商討籌商辦法。廣東留日學生同興中會嘅合作，就由呢陣開波[17]。協會嘅成立，推動咗各省自立嘅風潮。由於事出「割讓廣東」嘅傳言，而協會又係同鄉會性質，成立冇耐就唔再有活動。

歐榘甲同《新廣東》

編輯
内文：歐榘甲

清末嘅大陸局勢，引發咗知識份子及社會人士嘅思考。出現咗喺各種立場、各種角度度所提出嘅唔同主張及方案。康有為及其弟子主張通過改革上書嘅方式，建立以中華民族為主體嘅君主立憲制大一統國家。而孫文則帶領同盟會以及其他組織，喺各地宣傳革命，主張「驅逐韃虜，恢復中華」。

清廷喺甲午戰爭戰敗後，同年4月簽訂咗《馬關條約》將臺灣及周邊島嶼割讓畀日本，遭到臺灣住民嘅強烈反對，臺灣部分仕紳因而鼓動前清臺灣巡撫唐景崧喺同年5月25號宣佈建國，成立咗亞洲第一個以「民主國」自稱嘅國家臺灣民主國。臺灣民主國雖係一個短暫存在，卻為後來各省獨立自治嘅主張啟迪咗思路，仲產生咗密切影響[18]。

喺1902年，康有為弟子歐榘甲喺自己做總編輯嘅三藩市《大同日報》度，用筆名「太平洋客」連載咗篇共五六萬字嘅長文《廣東獨立脫離滿清羈絆之說》，分載幾十日，主張廣東獨立及脫離滿清嘅必要，大受讀者歡迎。呢組政論文好快由日本橫濱嘅《新民叢報》轉載，仲由新民叢報社印成題名《新廣東》，又名《廣東人之廣東》嘅單行本發售，卷首有彩色嘅廣東地圖仲附有美國獨立廳圖。2月22號，《新民叢報》刊登咗《廣東人之廣東》嘅出版告白，推介呢本書：

其名曰《新廣東》，則雖未開卷，而其卷中之大略宗旨可以想見矣。著者前在上海《時務報》、橫濱《清議報》主筆，今在美國某報主筆，文名夙著之人也。不欲顯言撰人名氏，讀者亦不必深求撰人名氏，但讀之而覺其咄咄逼人，若有電氣焉刺其腦，而起一種異想者，則此書之性質也。卷首冠以廣東圖一幅，精美鮮彩，尤足為全書生色。
“
”

歐榘甲喺文度解釋咗自己揀嘅標題以及主張：

夫治公事者不如治私事之勇，救他人者不如救其家人親戚之急，愛中國者不如愛其所生省份之親。人情所趨，未如何也。故窺現今之大勢，莫如各省先行自圖自立……吾廣東人，請言自立自廣東始。姑名是議曰“新廣東”，以諗我廣東人欲享新國之福份者。
“
”
——歐榘甲：《新廣東》[19]。

歐榘甲認為「中國人言自立者，以臺灣為起點」，並以譚嗣同、唐才常等創辦嘅《湘報》「為中國各省報言自立者始」。佢喺文度列出咗自己認為嘅四點廣東嘅「自立特質」：「人才之出眾」，「財力之雄厚」，「地方之握要」及「戶口之繁殖」。提出埋「自立報館」，「自立學堂」及「秘密社會」（利用會黨組織）三大促成獨立嘅手段。歐榘甲同時認為廣東嘅三大民系，本地，福佬同客家都係廣東共同體度不可分離嘅一部分：

此三者種族，同出一源，不過因聲音而異……三者種族，智識心思，腦輸角度，形體精神，不相上下。即以其族譜而言，其祖先莫不由中原喪亂，越嶺南遷。故本地之族，多由南雄而至廣肇；客家之族，多由贛州而至；嘉惠福佬之族，多由江浙而至福潮。其聲音之異，亦由所居之地而變遷焉……然則三者同為種族，無可疑也。
“
”
——歐榘甲：《新廣東》[19]。

歐榘甲喺文後亦進一步提出內地十八省嘅解體方案，以及廣東同廣西兩地建成聯邦嘅諗法：

廣西之人本粵東流寓而生，疆土既相毘連，情義複相親摯，于聯邦最為易事，此地理人種，關於天然界者也。不獨兩廣為然，既就今中國本部總督所轄之地，而分立為國土，亦人種地理天然界之相合者。如直隸總督所轄直隸、山東、山西、河南四省為一獨立國，兩江總督所轄江蘇、安徽、江西三省為一獨立國，兩湖總督所轄湖北、湖南為一獨立國，雲貴總督所轄雲南、貴州，陝甘總督所轄陝西、甘肅，閩浙總督所轄浙江、福建（昔兼臺灣為三省，今割於日本），皆兩省為一獨立國，四川總督所轄四川一省為一獨立國。置之歐羅巴強國中（除俄不計，除屬地不計），疆域之廣，未有能及之者也。即不然，而活因河流江流海流，分為北中南三大部分：陰山以南，黃河以北，諸省合為一獨立國；黃河以南、揚子江以北，諸省合為一獨立國；揚子江南岸、南洋北岸，諸省合為一獨立國。三大幹並立，固近世非常之雄國也。然而不論南部、中部、北部，亦不論諸省相合為一與否，而苟有獨立之一省，起於其間，則南省必歸於南部，中省必歸於中部，北省必歸於北部，可無疑也。即或因聲音風俗政體之異，北省不歸北部而歸中部，中省不歸中部而歸南部，南省不歸南部而歸中部，而苟能自立，雖任其意之所向可也。
“
”
——歐榘甲：《新廣東》[19]。

歐榘甲嘅文章出街，激起咗廣泛嘅討論同關注。因為本書康有為仲嚴詞斥責埋歐，有話「雲樵離經畔道，應逐出門牆」。康寫信畀歐榘甲講：「得汝書，頭痛不可言，汝等迫吾死地」，「惟有與汝等決絕，分告天下而已」。康有為為竭力反對，接連撰寫文章，斥責咗十八省各自分立嘅主張，論述話印度 「亡國」就係因為「各省自立」。1902年，韓文舉以筆名「憂患餘生生」喺《新民叢報》嘅「捫虱談虎錄」度讚揚咗歐榘甲嘅獨立理論，認為呢個係可以令到中華本土嘅華人達到自立嘅方法，仲主張大陸各地嘅人亦可以加入呢種運動：

吾讀至是，乃大服。吾願楚人謀新楚，蜀人謀新蜀，吳人謀新吳，越人謀新越，甌人謀新甌，乃至燕、齊、秦、晉、滇、黔。
“
”
——韓文舉：評論《新廣東》[20]。

1903年，喺《新廣東》問世後一年，留學日本嘅湖南反清人士楊毓麟（長沙人）仿照《廣東人之廣東》嘅標題，以筆名「湖南人之湖南」發表咗《新湖南》一文。楊毓麟嘅立論深受歐榘甲嘅影響，亦主張中國本部解體。文章開篇即話到：「太平洋客著《新廣東》，三戶之憤民，讀而韙之」，並宣稱「廣東倡之，吾湖南和之；廣東鼓之，吾湖南舞之。吾於廣東，如驂之靳也」[21]。楊氏甚至將大清帝國嘅解體比作羅馬帝國嘅崩潰、將湖南獨立比作歐洲民族國家嘅建構[22]。

1905年5月8號，清廷軍機處致函各省督撫嚴行查禁《新廣東》、《新湖南》及《新民叢報》等宣揚變法或革命嘅「悖逆」書刊[23]。馮自由喺自己嘅回憶錄《革命逸事》度提到，《新湖南》「鼓吹湘省脫離滿清獨立之說甚力，與粵人歐榘甲著之《新廣東》同風行於世」[17]。值得注意嘅係，陳炯明後尾提出咗「聯省自治」嘅主張，好大程度係受到咗歐嘅啟示[24]。

1908年，同康有為早就決裂嘅歐榘甲，同劉士驥等人希望喺廣西等地投資實業。歐到紐約為振華公司招股陣，亦曾同人講：「吾等今號之做振華股，不過欲他日圖兩廣之地步耳。吾蓄謀已十有餘年，振華、廣美兩公司若成，吾之目嘅可達也。」1909年，康有為一派同歐榘甲等人嘅矛盾白熱化，包括劉士驥在內嘅多人被暗殺。歐不得不「出入率以死士相隨」，成日心驚。然而康有為搶先一步，舉報埋歐借商謀亂，圖為兩廣獨立，密謀革命[25]。康有為喺告密信度指歐榘甲「偽託於保黨中，欲以暗移人心，既以反背黨旨，為黨魁所大責不容，則又巧變面目」，「欲謀亂，東西粵、雲南三省遍佈心腹，運購軍夥，非藉招商股籌數十萬不能措辦」，「反心盜據」，「藉巡撫之勢力，以招商劫商，因廣西之荒僻而謀亂，欲據兩粵滇黔而自立」[26]。康有為因此擬請大理院勒令交還股款仲請求滿清當局「立拿亂首歐榘甲」。歐榘甲唯有隱姓埋名直至過身。

 
維基文庫有原文：

辛亥廣東脫清獨立

編輯

1911年湖北武昌起義後，廣東各界「策劃廣東自保」。11月9號，廣東諮議局宣佈咗廣東脫清獨立。廣東嘅士紳階層喺晚清嘅諮議局改革入邊，試過咗現代嘅政治參與，辛亥革命令到士紳有咗主導實踐廣東獨立自主嘅機會[27]。廣東獨立後擔任廣東民團總長嘅劉永福，喺安民公告度話：

夫吾粵，東接閩，西連桂，北枕五嶺，南濱大洋，風俗語言嗜好與中原異，固天然獨立國也。秦之趙佗，隋之馮盎、鄧文進，元之何真，皆乘變亂時代，崛起一方，安輯人民，鞏衛疆圉。今兵力強厚，獨立之局告成矣，所以謀善後者，何止萬端！……廣東省，廣東人之廣東，斯言聞之熟矣。
“
”
——劉永福：《就任廣東省民團總長通告》[28]。

但仲有意見指出，辛亥嘅廣東獨立淨系地方士紳脫離大清帝國嘅一步，渠地仍然非常期望加入未成立嘅共和政權。清末廣東共和派對「中國」，「廣東」有著一種二元嘅效忠關係。例如當其時喺一篇慶祝獨立嘅文度，就區別開咗廣東獨立同美國建國，希臘獨立，以及廣東歷史上嘅南漢國同何真政權嘅建立：

獨立必有其目的。華盛頓之騰驤於美利加，吾所不為，吾非欲離異母國也，爹士亞之奮翼於巴勒幹，吾所不為，吾猶待恢復故都也。惟廣東之目的早定，故不為美利堅希列之獨立，而為廣東之獨立。 獨立必有其組織。劉巖之建國於粵嶠，吾所不為，吾非為割據之霸圖也。何真之保土於韶廣，吾所不為，吾非仍滿清之制度也。惟廣東今日組織既具，故不為昔日廣東之獨立，而為今日廣東之獨立。
“
”
——《興漢紀念廣東獨立全案 — — 廣東獨立記》[29]。

聯省自治思潮

編輯

中華民國初年，受聯省自治思潮嘅影響，政治家同地方實力軍人提出咗聯邦制，做大陸政制改革方案，主張各省自治立憲。當其時主政廣東嘅陳炯明，亦贊同呢種方案，仲推動咗當時嘅廣東議會起草埋《廣東省憲法草案》，規定咗廣東嘅軍事同財政獨立自治制度，以及同中華民國邦聯之間嘅關係。而喺湖南，包括毛澤東等人就發起咗湖南獨立運動，反對「大中華民國」，主張「湖南共和國」以及各省獨立建國，得到咗大陸內外包括胡適同杜威等人士支持[30]：

我是反對『大中華民國』的，我是主張『湖南共和國』的。有甚麼理由呢？大概從前有一種謬論，就是『在今後世界能夠爭存的國家，必定是大國家』。這種議論的流毒，擴充帝國主義，壓抑自國的小弱民族，在爭海外殖民地，使半開化未開化之民族變成完全奴隸，窒其生存向上，而惟使恭順馴屈於己……中國連『其實沒有成功的成功』都沒收得……十八省中像湖南四川廣東福建浙江湖北一類的省，通變成被征服省，屢踐他人的馬蹄，受害無極。這些果都是誰之罪呢？我敢說，是帝國之罪，是大國之罪，是『在世界能夠爭存的國家必定是大國家』一種謬論的罪。根本的說，是人民的罪……中國呢？也醒覺了（除開政客官僚軍閥）。二九年假共和大戰亂的經驗，迫人不得不醒覺，知道全國的總建設在一個期內完全無望。最好辦法，是索性不謀總建設、索性分裂，去謀各省的分建設，實行『各省人民自決主義』。二十二行省三特區兩藩地，合共二十七個地方，最好分為二十七國。
“
”
——毛澤東：《湖南建設問題的根本問題—湖南共和國》[31]

歷史學者劉仲敬認為，聯省自治立憲嘅實踐若果冇國共兩黨嘅北伐干涉，最尾會慢慢瓦解到中華民國嘅中央政府權力。而列強對唔同地方軍閥事實割據嘅保護，會產生接近西班牙美洲解體嘅效果[32]。劉同時認為，五代時期嘅廣東同越南均由殘唐嘅節度使據守，最終南漢國畀宋消滅咗，而靜海軍節度使變成中央政府嘅藩屬，呢個係兩地後來嘅走向唔同咗嘅原因[33]。

 
維基文庫有原文：

中華人民共和國成立後

編輯

專登研究臺灣同中國嘅認同問題嘅史丹福大學人類學副教授鮑梅立（Melissa J. Brown）喺自己出嘅《臺灣屬於中國嗎？》度話，漢化係大中華文明發展過程入邊嘅根本假設，支撐著「『中國』係一凝聚民族實體」嘅概念。鮑女士提及廣東分離主義嘅可能性，藉此對中國民族主義嘅殖民行為提出咗更深刻嘅質疑，而且鮑認為臺灣獨立將會挑戰包括廣東等地屬於「中國」嘅觀點，造成骨牌效應：

1945年至1991年間，台灣政府將台灣描繪為族群意義上的漢族及國族意義上的中國人，甚至宣稱自己為中國大陸的合法政權。從1987年起，台灣人出於明確的政治目的，為了證明自身與中華人民共和國的距離，愈趨頻繁地主張台灣認同是將近四百年來漢文化與漢人祖先、原住民文化與原住民祖先，以及日本文化（但沒有日本人祖先）創造出來的混和，而且整個20世紀都獨立於中國……是獨立的台灣……這為中國當局統治各族群領土帶來了爭議：倘若台灣人因為族群差異而獲准「脫離」該國族，那麼圖博人或突厥裔穆斯林（如維吾爾人），甚或是廣東人又有何不可？台灣獨立恐怕會造成骨牌效應，導致中華人民共和國分裂，如同蘇聯，或是情況更糟的南斯拉夫。
“
”
——鮑梅立：《臺灣屬於中國嗎？》[34]

喺文革時期喺過廣州街頭貼出大字報批判中共嘅李一哲事件嘅主角，中國民運人士王希哲發表過篇強烈批判臺灣獨立嘅文章[35]，回憶咗喺廣州嘅成長經歷，話作為南下幹部後代嘅渠喺廣東度感受到廣東人強烈嘅排外情緒。因為當時嘅廣東由上到下嘅，幾乎各級統治機構主政者都係外江佬，王同渠啲外省同學，經常會因此同地膽發生啲言語同肢體衝突。王話呢種排外情緒係「粵獨主義」，話到咗文化大革命陣就慢慢消失咗。

生於澳門嘅香港時事評論員譚志強就話，唔認為香港獨立可行，但廣東就有獨立嘅條件。譚重提咗陳炯明嘅聯省自治概念，認為就地理位置講，只要封咗三個分別接壤福建同湖南嘅山口嘅高速路，仲有肇慶嘅水路，廣東即可獨立[36]。

香港遊戲開發者、企業家、政治評論家鄭立憶述喺大陸工作嘅經歷，試過接觸唔少會私下討論廣東獨立嘅內地人，仲描述「『如果我哋嘅故鄉獨立』咁嘅說法，係好易（由內地人口度）聽到嘅」。鄭仲話到，同渠傾到廣東獨立嘅人士往往有著分裂嘅政見，例如又會激烈地主張攻打臺灣。鄭形容呢種分裂嘅思想令渠疑惑[37]。

2018年8月，有自稱係中共體制內嘅公安系統人員，喺網路曝光咗中國當局嘅大數據情報系統嘅信息。其中，公安系統對「極端言論人員」嘅分類入邊包括咗「粵獨」人員，同蒙獨、疆獨、藏獨、台獨，滬獨並列[38]。

對於呢幾年網路上出現嘅「廣東獨立」聲音，有網路評論指，廣東啲本土人士具有「本土優越感」以及「本土危機感」，係屬於「網路部落主義 」，仲認為廣州嘅撐粵語遊行就係矛盾激發嘅例證。呢個評論同時指，歷史上李鴻章同歐榘甲等計畫嘅廣東獨立，目標仍然係為咗恢復大一統，獨立並唔係目的[39]。喬治梅森大學經濟歷史學者Mark Koyama就喺一次訪談度提到，經過同大陸人交談嘅經歷感受，認為大陸人「比想像中更分離主義」，特別係來自「上海地區或粵港地區」嘅人士。Koyama同時指，大中華歷史上每幾百年就會轉入分裂嘅格局，因此如果將來有大災難或崩潰事件，好有可能會再次分裂[40]。

精通中文嘅日本右翼評論人、作家兼記者，日本「南支那海問題思考會」成員宮崎正弘（日文：宮崎正弘）結合自身喺中國嘅經歷，認為唔單止南蒙古、西藏同東突厥斯坦，而仲包括廣東、香港、澳門、福建同上海，因為畀分成唔同嘅經濟圈，都有獨立嘅潛力同可能性[41]。宮崎認為中國民系之間差異極大，廣東人一路有旺盛嘅「反中央、獨立精神」[42]。結合個人對中國其他地區嘅民情分析以及中共內部嘅權力鬥爭，宮崎指出中國實際上面臨著多種分裂嘅可能性，因為中共難以同時應付經濟、邊疆、維穩同資產外流等問題。

中國流亡異議作家廖亦武認為，中國「最好分裂成十國」[43]，包括雲南、四川、廣東等地，廖認為中國共產黨冇能力「統治這麼大一個國家」，並主張地方分裂嘅前一步應該係地方自治[44]，從而達到前蘇聯解體嘅效果，呢啲言論因此遭到中國親體制學者嘅激烈批判 [45]。歷史學者劉仲敬同樣主張，中國應該解體成唔同嘅民族國家，並將廣東獨立後稱為「坎通尼亞」（Cantonia）。有研究中國當代社會思潮嘅加拿大學者認為劉對區域主義（regionalism）嘅推崇，包括咗對香港，臺灣，西藏等地嘅分裂活動嘅支持，對中國嘅未來係極為危險嘅。而有親中國體制嘅學者就嚴厲批評劉仲敬學說主張對中國嘅分裂 [46][47]。

千禧年後大事記

編輯

2015年，中國國家發改委將廣東省嘅廣州、惠州、東莞及深圳光明新區列入試點，改善外來人口啲福利，估算成本達1490億。此舉激發起網路罵戰。有廣州網民喺微博度宣示不滿，認為呢個計劃未有考慮過原住民感受，仲批評外省人冇決心融入，唔會學習廣州嘅文化，指「無義務將廣州嘅資源分畀外省」，更有人高呼「廣州打響獨立戰爭！一人一票決定我哋嘅未來！」而外省網民就指廣州人唔包容，認為應該允許全國人自由遷徙，更表示「沒有外來人口，廣州經濟將癱瘓」[48]。

2017年1月，廣州五羊小學推出第一本小學校本粵語教材《粵讀羊城》，唔少廣州人盛讚。然而喺中國大陸互聯網掀起嘅討論熱潮，有批評係推廣粵語係對國家標準語言文字教育推廣嘅阻礙，有話「顯然是一種地方主義渲染，極不利於國家穩定與統一」，希望當局出手制止，又質疑此舉係為咗建立學生使用粵語嘅自豪感。安徽一叫做章曉華嘅高中語文老師，甚至喺微博指呢個係鼓吹粵獨，質疑學校違反憲法在內嘅多條法律[49]。章曉華同時認為，中國人應該「維護中央權威、推動國家統一、促進民族融合」，否則會重蹈南斯拉夫解體嘅覆轍。更有網友向教育部舉報五羊小學做法。香港有線電視新聞台為此事試過聯絡章曉華，但對方拒絕回應，事件令五羊小學備受壓力，校方多次婉拒受訪，更指學校教材無存貨，無法向外界借閱[50]。

2018年3月12號，據報廣州多處公共設施畀寫上繁體字「廣州獨立 香港加油」，「廣東獨立」，「Free Cantonia」等口號，遍佈交通工具及行人路上，包括大元帥府巴士站、新鴻花園巴士站、以及多個巴士坐位度。部分反對香港獨立嘅親中媒體，例如香港東網，認為呢啲係香港嘅「獨立歪風」蔓延到內地嘅表現，亦認為喺公共地方胡亂塗鴉有違公德[51]。有維權人士接受外媒採訪陣話，係由於當地民眾不堪忍受中共打壓粵文化，更對民眾訴求置若罔聞，先至採取呢種反抗行動。廣州維權人士廖劍豪受訪陣話，試過喺農講所站附近見過寫著「廣東獨立」嘅街紙，廖認為呢啲出現係一種社會進步。不過廣州坊間知名嘅區伯話反對分裂國家，認為一個國家嘅人民應該團結一致[52]。澳門理工學院嘅政治學家Arnado Gonçalves受訪時話，儘管廣東人有其獨特嘅身份認同，但仲係質疑呢種運動嘅自洽性[53]。

2019年1月1號香港元旦大遊行，支持香港獨立嘅香港民族陣綫有展示支持廣東獨立嘅木棉花旗幟，隊伍度仲包括西藏獨立、臺灣獨立、東突厥斯坦獨立、南蒙古獨立、滿洲獨立、閩越獨立、巴蜀獨立同上海獨立等旗幟[54]。除港獨口號外，示威者亦高叫「廣東、廣西、福建獨立」等口號[55]。

2019年8月23號，由上海民族黨同維吾爾裔美國人協會聯合舉辦嘅反共獨立運動政黨大會，喺美國首都華盛頓特區國會山舉行。參與人士包括香港、東突厥斯坦、南蒙古以及廣東等地獨立運動嘅支持者，以及中國民主運動人士[56][57]。會議一致認為大一統嘅中國轉型做多國體系，有利於東亞大陸嘅人權同自由，同時間譴責咗北京當局呢一年對香港反對逃犯條例修訂草案運動嘅鎮壓[58]。

2019年11月，廣東茂名文樓鎮因起火葬場問題引發當地民眾嘅抗爭，即2019年化州火葬場抗議事件。期間有民眾模仿咗香港運動，公開高叫咗「光復茂名，時代革命」嘅口號[59][60]。後被警方強力鎮壓，但當地居民未有屈服。有評論認為當地政府嘅處理手法反映到中國政府恐懼各地會仿效香港、升級行動到接近獨立嘅訴求[61]。

2020年6月23尾，中國通過咗引起全球關注嘅香港國安法，根據香港警察即時「港版國安法」嘅行新增動指引，提及到違反嘅個例包括公開嘅一啲指定旗幟，列明嘅旗樣當中有包括喺2019年元旦遊行出現嘅廣東獨立旗[62]。

街頭標語事件

編輯

2018年3月12號，據報廣州多處公共設施被人寫上咗「廣州獨立 香港加油」，「广东独立」，「Free Cantonia」等標語，喺交通工具同行人路度，地點有大元帥府巴士站、新鴻花園巴士站同多個巴士坐位挨背，而字體高度一致可能出自同一人手。部分反香港獨立嘅親中媒體，例如香港東網，認為係香港「獨立歪風」嘅蔓延、兼有違公德[63]。據一名有11萬fans嘅Twitter用家話：「香港去年出現『港獨』字眼的橫額及海報後，連廣州（也）出現『廣獨』標句，獨立風潮蔓延中國內地！」仲話「港獨向粵獨致敬，港獨是粵獨天然盟友」。有網民唔信廣州人會寫呢啲字，話佢哋唔曉深筆字，「繁體字的廣州獨立？港獨裝的蠻像的」。亦有網民指廣州獨立唔夠好，認為「應該是廣東獨立還差不多」。有支持港獨嘅網民就有致敬，認為中國嘅民主化唯有一條路，香港、廣州、上海、東北同西藏都應獨立，突破中央嘅控制，先至可以保存到風俗文化，改善生活，中央只需控制返河北同北京就得。有香港網民就發埋文「廣州加油，香港地區市民特發來賀電」[64]。

有維權人士接受外媒採訪時認為，因為當地嘅民眾忍受唔到中共打壓粵文化，對民眾嘅訴求置若罔聞，先至會有呢啲反抗行動。廣州維權人士廖劍豪接受自由亞洲電台採訪時，話試過喺農講所站左近見過一張A4紙寫有「廣東獨立」。廖覺得呢種情況嘅出現係一種社會進步。另外較出名嘅廣州維權人區伯就話，雖然係希望推動到民主進步，但亦反對分裂國家，認為一個國家嘅人民應該係團結一致[65]。澳門理工學院嘅政治學家Arnado Gonçalves接受法廣訪問時話，雖然廣東人係有獨特嘅身份認同，佢本人就疑惑呢個運動嘅自洽度[66]。

到2019年8月尾，廣州街頭再出現咗噴塗粵獨標語嘅個案。多次實名喺Twitter留言聲援香港反修例運動嘅廣州自由職業人士楊旭彬，由24到26號喺廣州河南小洲村一帶，到唔少位置度塗噴咗「廣東獨立」、「時代革命」、「光復廣州」、「支持HK」、「自由」、「民主」等字標語，26號就俾差人拉咗。差人仲去埋楊嘅住所，搜獲咗防毒面具、頭盔、噴油等物。跟著楊係被控尋釁滋事罪。廣州市海珠區人民法院喺2020年1月13號，就案件召開咗視像聆訊，楊旭彬出庭時承認咗寫過啲標語，自願認罪。一個禮拜後法院就出咗書面判詞，話有物證兼楊對控罪未有異議，所以裁定佢構成咗尋釁滋事罪，判刑9個月，刑期係到2020年5月25號。原起訴狀就話楊寫啲標語喺街度，造成群眾圍觀，係無視國家法律；又話楊喺公共場所起哄鬧事，擾亂社會秩序[67]。

異見作家野渡向媒體話，由於判刑嘅時候，同楊獲釋時間間相距得返三個月，估計楊上訴嘅可能唔高。據報有粵獨政黨就喺社交網站強烈譴責法院判決，批評係「再一次展現出中國政權對基本人權的蔑視和對粵人的壓迫」，要求中國當局係即刻放返楊，仲呼籲國際社會關注楊案[68]。

建制人士嘅關注

編輯

2019年8月，香港建制派議員、工聯會成員陸頌雄喺Facebook發文，指反送中運動嘅示威者提出五大訴求，係美帝國主義「獨霸全球」計劃其中一部分。而佢個人分析嘅路線圖度，指「美國計劃」包括「策動香港獨立」，「煽動廣東的獨立叛亂，以及對中國的肢解」。陸頌雄嘅言論引起咗支持示威嘅網民熱議，反認為佢咁想法啟發咗港獨運動嘅方向。[69]

假想情況

編輯

1979年4月中共中央工作會議度，時任廣東省委第一書記嘅習仲勳提出，希望中央放權畀廣東省。主持會議嘅華國鋒疑惑習仲勳想要啲乜權力。習仲勳當堂話：「如果廣東是一個『獨立的國家』，可能幾年就搞上去了，但是在現在的體制下，就不容易上去。」呢番發言喺會上引起大反響[70]。

祖籍湖南嘅澳大利亞華人經濟學家楊小凱試過自己寫書，多次探討中國同歐洲經濟制度同歷史嘅差異，設想咗東亞解體成多國體系，廣東等地變成主權國家，將會對自由貿易造成嘅積極影響。「今天如果湖南與廣東是兩個國家，他們之間的人均收入差別已在一倍左右，競爭壓力當會非常強。但湖南廣東由於不是主權國家，它們也沒有能力對此競爭壓力作強有力的反應[71] 。」楊同時認為，中國嘅解體有利於政治自由同埋憲政：「中國的規模很大﹐周圍沒有國家可以與之抗衡﹐因此中國不能形成回饋圈……促進憲政改革的政治力量﹑政治條件就不存在。……中國人沒有地方跑。如果中國現在分成七個國家﹐中國早就會接受憲政主義。因為哪個國家不符合憲政主義的話﹐那個國家的居民就會跑掉。比如山東人全跑到廣東去﹐山東政府就會被跑垮﹐就象東德[72]。」

2008年9月11號，《南方都市報》發表以《假如廣東是一個獨立經濟體》為題嘅整版報導，文話：「讓我們想像一下，假如廣東是一個國家……我們將試從局外人角度，以一種新的方式來觀察中國」，計出咗若將中國各省當成獨立嘅國家，廣東將成為世界第十四大嘅經濟體[73]。

流行文化

編輯

1902到04年間，歐榘甲喺過《新小說》度以「新廣東武生」做筆名，發表咗改良粵劇劇本《黃蕭養回頭》（全名《新串班本黃蕭養回頭全套》）。劇中旗幟鮮明地宣揚咗《新廣東》入邊嘅廣東獨立思想，仲將歐氏喺《新廣東》提出過嘅獨立策略加以戲劇化演繹。喺歐榘甲設置嘅橋段度，主人公黃種強係明代廣東農民起義領袖黃蕭養轉世。劇名度過所謂「回頭」即再世嘅意思。歐榘甲利用咗廣東民間「九牛浮水面，蕭養轉回頭」「大石沉底，白鵝浮游，三十年後，蕭養回頭」呢啲民謠，達到宣傳目的。本劇劇情就係黃種強率領諸人帶領廣東獨立嘅古仔，而黃種強仲主張「將來廣東獨立，全靠斯人。」歐榘甲甚至乎喺劇度呼應咗當時嘅菲律賓獨立戰爭，戲中，阿奎納多最終決定埋「我非律賓保中國廣東獨立自治」嘅國策[18][23]。

日本右翼作家宮崎正弘喺1999年出嘅軍事小說《中國廣東軍起義》入邊，就構想咗中日衝突下華南分裂嘅情節：鄧小平過身後，中國嘅動盪令繼任嘅李炳章政權決定對臺灣，南中國海同印度等地進行擴張以轉移矛盾，而美軍撤出咗日本，亦導致咗日本嘅全面危機。小說主角係一名日本女畫家，喺前往喀什米爾陣見識到一個同黑社會合作嘅支持廣東、西藏獨立嘅秘密組織。中國陷入大亂，使得世紀末嘅東亞戰雲密佈[74]。

日本暢銷軍事題材小說家森詠（日文：森詠）就有兩部作品，均有提及廣東獨立嘅情節。其中1995-2003年出版嘅軍事小說《新日本中國戰爭》，森詠虛構一個鄧小平離世後中國發生內部權力鬥爭導致地區衝突嘅古仔。因為對李登輝領導下嘅臺灣獨立嘅態度分歧，廣東當局宣佈咗獨立。中國內戰由此爆發[75]。而喺後來寫嘅以虛構嘅2020年代做背景，軍事小說《新編日本中國戰爭—怒濤的世紀》入邊，廣東喺中國同日本美國嘅軍事衝突後期亦宣佈咗獨立[76]。兩部小說嘅結尾，「廣東共和國」軍隊都係加入咗美國、日本同臺灣對中國作戰嘅一方。

而中國異議作家王力雄嘅小說《黃禍》度，描繪咗因為中華人民共和國內部權力鬥爭嘅緣故，包括廣東在內嘅東南沿海諸省為維護自身利益﹐宣告實行「一國多制」脫離北京當局。此舉最終引發咗最後擴散成全球性戰爭嘅中國南北戰爭[77]。

電腦遊戲方面，一個以中華民國做背景嘅回合制策略遊戲民國無雙，畀玩家有得揀包括粵系、西藏、滿洲國及東突厥斯坦第二共和國等在內嘅大中華近代各勢力。遊戲時間設定係1925年、1935年、1946年嘅東亞，玩家進入可以揀任何勢力。其中1925年嘅劇本，係同歷史一樣，國民政府快會同粵東陳炯明嘅粵系爆發戰爭。遊戲設計者允許揀咗粵系嘅玩家，進行改變歷史嘅操作，例如統一東亞、統一中國、聯省自治、達致金融壟斷，或者建立獨立嘅「廣東共和國」。若玩家揀咗建國做勝利目標，最終「廣東共和國」戰後將會加入聯合國。呢個遊戲發佈先得一個月，中華人民共和國文化部就以「嚴重影響國家文化安全」為由查禁[78]。

睇埋

編輯

參考文

編輯
  1. ↑ 宋德华、刘雪琴。〈辛亥前期欧榘甲革命自立主张探析——以《新广东》为中心〉。《南方职业教育学刊》: 40–47。 {{cite journal}}: |access-date= requires |url= (help)
  2. ↑ 《《自下而上的立宪尝试：省宪评论》》 (中國中文)。武汉市：武汉大学出版社。2010年。ISBN 9787307075603。
  3. ↑ 《《民初的地方主義與聯省自治》》 (臺灣中文)。正中書局。1983年。
  4. ↑ 董叢林。〈李鴻章對"兩廣獨立"的態度與庚子政局〉。《河北師院學報》。 {{cite journal}}: |access-date= requires |url= (help); Check date values in: |access-date= (help)
  5. ↑ 《《孫中山年譜長編》》 (中國中文)。中華書局。1991年。
  6. ↑ 《《歷史的本色——晚清民國的政治、社會與文化》》 (中國中文)。廣西師範大學出版社。2016年。
  7. ↑ 沈曉敏 倪俊明／著 (2006年)。《《喋血南國：辛亥革命在廣東》》。廣州：廣東人民出版社。頁 頁數：237頁。ISBN 978-7-218-07223-4。
  8. ↑ China, Britain and Hong Kong, 1895-1945 (英文). Chinese University Press. 1990年.
  9. ↑ 9.0 9.1 9.2 Chinese Business Groups in Hong Kong and Political Change in South China, 1900-25 (英文). Palgrave Macmillan. 1998年.
  10. ↑ 《《中華民國革命秘史》》 (中國中文)。廣東人民出版社。1981年。
  11. ↑ 《《民權與民族主義 近代中國民權思想研究》》 (中國中文)。中國政法大學出版社。2016年。
  12. ↑ 12.0 12.1 The Life and Times of Sir Kai Ho Kai. A Prominent Figure in Nineteenth-Century Hong Kong (英文). The Chinese University Press. 1981年.
  13. ↑ 《《勾結共謀的殖民權力》》 (香港中文)。牛津大學出版社。2015年。
  14. ↑ 《《中國近代史詞典》》 (中國中文)。上海市：上海辭書出版社。1982年。頁 34。
  15. ↑ 祝曙光。《《法官外交家王寵惠》》 (中國中文)。福建教育出版社。
  16. ↑ 馮自由。《《華僑革命開國史》》 (中國中文)。
  17. ↑ 17.0 17.1 馮自由 (1939年)。《《革命逸史》》 (中國中文)。上海：商務印書館。
  18. ↑ 18.0 18.1 孫柏。〈《黃蕭養回頭》作者為歐榘甲考―兼論歐榘甲在前期《新小說》作者群中的重要地位〉。《戲劇藝術》: 29–35。 {{cite journal}}: |access-date= requires |url= (help)
  19. ↑ 19.0 19.1 19.2 《《辛亥革命前十年間時論選集》》 (中國中文)。北京市：生活·讀書·新知三聯書店。1960年。
  20. ↑ 憂患餘生生 (1902-8-18)。〈捫虱談虎錄：評論《新廣東》〉。《新民叢報》。14: 55–56。 {{cite journal}}: Check date values in: |date= (help)
  21. ↑ 《《楊毓麟集》》 (中國中文)。長沙：嶽麓書社。2008年。頁 26。ISBN 9787807611097。
  22. ↑ 《《蹈海志士：楊毓麟傳》》 (中國中文)。長沙：嶽麓書社。2011年。ISBN 9787807617594。
  23. ↑ 23.0 23.1 夏曉虹。〈《新廣東》：從政治到文學〉。《學術月刊》: 108–126。 {{cite journal}}: |access-date= requires |url= (help)
  24. ↑ 羅更曉，劉中國，余俊傑。《《家國之光：歐榘甲與光祖中學》》 (中國中文)。花城出版社。頁 4。
  25. ↑ 桑兵。《《庚子勤王與晚清政局》》 (中國中文)。北京大學出版社。頁 381。
  26. ↑ 上海市文物保管委員會。《《康有為與保皇會》》 (中國中文)。頁 337。
  27. ↑ 徐承恩 (2017年)。《《香港，鬱躁的家邦：本土觀點的香港源流史》》 (中國中文)。左岸文化。頁 237。
  28. ↑ 《《劉永福歷史草》》 (中國中文)。中正書局。1936年。
  29. ↑ 《《興漢紀念廣東獨立全案——廣東獨立記》》 (中國中文)。1911年。
  30. ↑ 〈練乙錚：毛澤東曾提倡湖南獨立建國 港獨非大逆不道〉。立場新聞。2015-05-07。原著喺2019-08-17歸檔。喺2022-01-10搵到。
  31. ↑ 《《湖南自治運動史》》 (中國中文)。太東圖書局。1920年。
  32. ↑ 劉仲敬 (2017年)。《《遠東的線索：西方秩序的輸入與中國的演變》》 (中國中文)。八旗文化。
  33. ↑ 帝國、邦國與民族國家的想像，鳳凰網，2015-9-20
  34. ↑ 〈倘若台灣獲准「脫離」，那麼圖博或新疆，甚或是廣東又有何不可？〉。The News Lens。2018-06-20。喺2018-06-20搵到。
  35. ↑ 王希哲。〈我為什麼那樣極端憎惡台獨 ---少年時代的痛〉。原著喺2013-01-23歸檔。喺2018-10-4搵到。 {{cite news}}: Check date values in: |accessdate= (help); Cite has empty unknown parameter: |1= (help)
  36. ↑ 〈譚志強：封四條路廣東即可獨立，港獨不可行︱壹殼花生〉。香港花生。2016-08-18。原著喺2018-12-19歸檔。喺2018-12-19搵到。
  37. ↑ 〈為什麼很多中國人聽到「獨立」就會爆氣?〉。聚言時報。2019-02-16。原著喺2019-02-17歸檔。喺2020-01-04搵到。
  38. ↑ 〈體制內員警自爆中共大資料大情報黑幕〉。大紀元。2018-08-31。
  39. ↑ 〈"滬獨"、"粵獨"思潮與網路部落主義〉。多維新聞。2018-12-13。原著喺2019-01-29歸檔。喺2020-01-04搵到。
  40. ↑ "Noel Johnson and Mark Koyama on *Persecution and Toleration*". Mercatus Center. 2019-1-30. {{cite web}}: Check date values in: |date= (help)
  41. ↑ 宮崎正弘 (2009)。〈たとえば上海獨立、広東獨立という獨立経済圏のシナリオ〉. 《《中國分裂 七つの理由》》 (日文)。CCCメディアハウス。ISBN 978-4484092348。
  42. ↑ 宮崎正弘 (2006)。《《出身地でわかる中國人》》 (日文)。PHP研究所。ISBN 978-4569646206。
  43. ↑ 〈中國流亡作家廖亦武：中國最好分裂成10國〉 (=zh-tw)。自由時報。2019-4-1。 {{cite web}}: Check date values in: |date= (help)CS1 maint: extra punctuation (link) CS1 maint: unrecognized language (link)
  44. ↑ 〈廖亦武訪談錄（三）：中國"這個帝國必須分裂"〉 (=zh-cn)。自由亞洲電臺。2019-4-1。 {{cite web}}: Check date values in: |date= (help)CS1 maint: extra punctuation (link) CS1 maint: unrecognized language (link)
  45. ↑ 〈一個叫囂"中國必須分裂"的"民運人士"的醜陋嘴臉〉 (=zh-cn)。紅色文化網。2019-4-1。 {{cite web}}: Check date values in: |date= (help)CS1 maint: extra punctuation (link) CS1 maint: unrecognized language (link)
  46. ↑ "China's Intellectual Dark Web And Its Most Active Fanatic" (=en). SupChina. 2019-3-13. 原著喺2019-03-15歸檔. 喺2020-01-04搵到. {{cite web}}: Check date values in: |date= (help)CS1 maint: extra punctuation (link) CS1 maint: unrecognized language (link)
  47. ↑ 〈劉仲敬 一個沐猴而冠的渣滓〉。長江雜談。2018-7。 {{cite web}}: Check date values in: |date= (help)CS1 maint: url-status (link)
  48. ↑ 〈廣州將改善外來人福利　當地網民不滿高呼要獨立〉。熱血時報。2015-02-12。喺2015-2-12搵到。 {{cite web}}: Check date values in: |accessdate= (help)
  49. ↑ 〈廣州小學編廣東話教材　網民斥「不利國家統一」　向教育部舉報〉。立場新聞。2017-01-17。原著喺2018-01-16歸檔。喺2018-01-16搵到。
  50. ↑ 〈廣州一小學推廣粵語課本被指違法〉。有線新聞。2017-01-16。喺2018-01-16搵到。{{cite web}}: CS1 maint: url-status (link)
  51. ↑ 〈獨立歪風蔓延　廣州多處現「廣獨」字句〉。香港東網。2018-03-12。原著喺2018-03-12歸檔。喺2018-03-12搵到。
  52. ↑ 〈廣州出現獨立標語　並稱與香港同行〉。自由亞洲電臺。2018-03-12。
  53. ↑ "China: independentistas em Cantão ?" (葡萄牙文). RFI. 2018-03-13.
  54. ↑ 〈數十人參與港獨遊行　要求解放西藏　釋放被關押新疆維族人〉。立場新聞。2019-01-01。原著喺2019-01-02歸檔。喺2020-01-04搵到。
  55. ↑ 〈元旦遊行又現港獨旗　梁頌恆憂被捕拒入政總〉。香港東網。2019-01-01。
  56. ↑ 〈獨派人士下月聚首華府　向中國霸權說不〉。自由亞洲電臺。2019-07-31。
  57. ↑ 〈首屆反共獨立運動政黨會議在華盛頓召開〉。中央廣播電臺。2019-09-18。原著喺2019-12-19歸檔。喺2020-01-04搵到。
  58. ↑ 〈2019華盛頓獨派大會紀行〉。Matters。2019-12-10。{{cite web}}: CS1 maint: url-status (link)
  59. ↑ 〈新影片曝光！不滿蓋火葬場 廣東示威者高喊：光復茂名，時代革命｜蘋果新聞網｜蘋果日報〉。《蘋果新聞網》 (臺灣中文)。原先內容歸檔喺2019-12-02。喺2019-12-09搵到。
  60. ↑ 〈廣東民眾高喊「時代革命」大規模抗爭視頻曝光〉。www.ntdtv.com (臺灣中文)。2019-11-30。原先內容歸檔喺2019-12-09。喺2019-12-09搵到。
  61. ↑ 〈中共惧抗争蔓延全国 茂名"时代革命"成功 - 大纪元〉。《大纪元 www.epochtimes.com》 (中國中文)。2019-12-04。原先內容歸檔喺2019-12-09。喺2019-12-09搵到。
  62. ↑ 〈【港版國安法】警首因港獨旗作拘捕 大律師：只藏有無展示不構成罪行〉。《蘋果日報》 (中國中文)。2020-07-01。原先內容歸檔喺2020-07-02。喺2020-07-01搵到。
  63. ↑ 〈獨立歪風蔓延　廣州多處現「廣獨」字句〉。香港东网。2018-03-12。原著喺2018-03-12歸檔。喺2018-03-12搵到。
  64. ↑ 〈穗公交车站赫然出现"广东独立""广州独立""香港加油"涂鸦〉。RFI。2018-03-13。原先內容歸檔喺2020-03-01。喺2020-03-01搵到。
  65. ↑ 〈广州出现独立标语　并称与香港同行〉。自由亚洲电台。2018-03-12。原先內容歸檔喺2019-01-29。喺2019-01-29搵到。
  66. ↑ "China: independentistas em Cantão ?" (葡萄牙文). RFI. 2018-03-13. 原著喺2019-01-29歸檔. 喺2019-01-29搵到.
  67. ↑ 引用錯誤 無效嘅<ref>標籤；無文字提供畀叫做xubin嘅參照
  68. ↑ 〈噴「時代革命」撐港　穗男囚9月〉。香港苹果日报。2020-02-25。原先內容歸檔喺2020-02-28。喺2020-02-28搵到。
  69. ↑ 〈陸頌雄推「美國獨霸天下」路線圖：港獨只係其中一步〉。香港蘋果日报。原著喺2021-03-04歸檔。喺2019-08-23搵到。
  70. ↑ 〈習仲勳：如果廣東是個"獨立國家"早就搞上去了〉。四月網。2013-01-31。原著喺2017-08-31歸檔。喺2017-08-31搵到。
  71. ↑ 楊小凱 (1999-10)。〈中國統一之利弊〉。《北京之春》: 84-88。 {{cite journal}}: |access-date= requires |url= (help); Check date values in: |access-date= (help)
  72. ↑ 〈楊小凱：中國憲政的發展〉。愛思想。喺2004-07-20搵到。
  73. ↑ 〈假如廣東是獨立經濟體 經濟總量位列世界第14〉。南方網。原著喺2019-01-30歸檔。喺2008-09-11搵到。
  74. ↑ 宮崎正弘 (1995年)。《《中國広東軍、叛亂す!》》 (日文)。二見書房。ISBN 978-4576950846。
  75. ↑ 森詠 (1996年)。《《新・日本中國戦爭〈第4部〉中國分裂》》 (日文)。學習研究社。ISBN 9784054006805。
  76. ↑ 森詠 (2017年)。《《新編 日本中國戦爭 怒濤の世紀 第十一部 中國崩壊》》 (日文)。文芸社。ISBN 9784286183930。
  77. ↑ 王力雄 (2016年)。《《黃禍》》 (中國中文)。Locus Publishing Company。
  78. ↑ 〈粵系-民國無雙官方網站〉。ChengLap。原著喺2019年3月25號歸檔。喺2020年1月4號搵到。

出面網頁

編輯

］

由「https://zh-yue.wikipedia.org/w/index.php?title=廣東獨立運動&oldid=2203930」收