九江市

九江
九江
	九江市
	鎖江樓
	----
	簡稱：潯
	舊名：柴桑、潯陽、江州
	九江位置圖
	經緯度北緯29°44′17″東經115°59′14″
國	中華人民共和國
省	江西
地級政區	地級市
轄下一級政區	2區、8縣、3縣級市
設市時間	1949年7月19號
市長	殷美根
市委書記	鐘志生
地理
總面積	1.88萬 km²
市區面積	118 km²
海拔	平均32米; 市區20米 m
人口
總人口(2010年11月1號)	472萬8763人
市區	89.6萬人
人口密度	255人人/km²
民族	漢族
官方語言	普通話
本地語言	淮語、贛語
註	唔計現役軍人、港澳臺籍、外籍
經濟
GDP(2012)	1420億
人均GDP	26572
市區GDP(2011)	576.18億
市區人均GDP	89748元
時間
時區	中國時區（UTC+8）
識別信息
電話區號	0792
郵政編碼	332000
車牌	贛G
象徵
市樹	樟樹
市花	荷花
	網站：中國九江網

29°42′18.2″N 116°00′05.4″E / 29.705056°N 116.001500°E / 29.705056; 116.001500

中華人民共和國 > 江西省 > 九江市

九江（粵拼：gau2 gong1；普通話拼音：Jiǔjiāng）係中國江西省北部一城市，亦係一埠，長江穿過佢市區，係長江重要埠頭。九江家下係地級市，叫九江市。

地理

北面長江，南面高聳住名山廬山（世界遺產），地處東經113°57′到東經116°53′、北緯28°47′到北緯30°6′之間。九江市名最早見於《書經·禹貢》嘅「九江孔殷」，意思係呢度附近有好多條河川匯入長江，水勢好大。呢度係湖北、安徽、江西三省嘅交匯處，係個軍事要衝。

九江地勢東西兩邊高，中部低，南邊稍高而向北傾斜，平均海拔32米（市區海拔20米），修水嘅九嶺山係九江最高峰，海拔1794米，而最低點係廬山區蛤蟆石附近嘅鄱陽湖底，海拔-9.37米。全市山地佔總面積16.4%，丘陵佔44.5%，湖佔18%，耕地有365.22萬畝，俗話講「六山二水分半田，半分道路和莊園」。

九江「途通五嶺、勢拒三江」，有「七省通衢」嘅地位，因爲交通方便，當地物產豐富，九江自古就係重要城邑商埠，曾經係中國四大米市、三大茶市之一。

氣候

九江地處中亞熱帶向北亞熱帶嘅過渡區，年均溫16──17℃，年均降水量1300──1600毫米，其中40%以上集中喺第二季度；年均無霜期239──266日，年均霧日16日以下。呢度季節分明，氣候溫和，雨量充沛，日照充足。

名

九江呢個名，最早嘅記載喺《尚書·禹貢》「九江孔殷」、「過九江至東陵」。而家關於呢個名嘅含義有兩種解法：

「九」係虛指，因爲古人認爲「九」係陽數之極，係最大嘅數，「九江」意思係「眾水匯聚之處」；
「九」係實指，即九條江河匯聚嘅地方，「以爲湖漢九水入彭蠡澤也」，「湖漢九水」即贛江、鄱水、余水、修水、淦水、盱水、蜀水、南水、彭水。

無論如何呢個名都係描繪九江嘅地理水文，長江通過九江境內時，除咗有鄱陽湖匯入，重因爲九江喺三省交界而有呢三省河川匯入，百川歸海嘅景象令呢到水勢浩大、江面開闊。

史

夏商時九江分屬荊州、揚州；喺春秋時九江係吳西楚東之地，因而叫「吳頭楚尾」；到戰國時就歸咗楚國。秦朝時劃天下三十六郡，呢度設咗個九江郡，呢個係「九江」呢個名第一次出現喺政區度，到前漢時呢度係淮南國嘅地頭，之後九江郡分置成柴桑、彭澤二縣。之後又有潯陽、汝南、湓城、德化之類嘅古名，後來定做江州，元朝時呢度設江西行省江州路，明初設江西布政使司隸下嘅九江府，清代設江西省九江府。清末呢度畀太平天國控制咗。

喺民國時代，1917年設立九江市，1936年國民黨政府將佢降等爲九江縣，1949年 5月7號解放軍入城，7月19號成立中共政權嘅九江市人民政府。

文革時呢度畀革命委員會把持，1980年變成省轄市，1983年九江地區併入九江市，管轄埋啲縣。1998年受長江洪災水浸。

建置沿革

秦代設九江郡，郡治喺壽春（而家安徽壽縣）。九江郡範圍包括而家嘅九江市，不過無設縣。之後九江郡域縮細咗好多，三國時改名淮南郡，所以從西漢到明朝間一千五百年間「九江」呢個名同而家嘅九江市無關。
漢高祖六年（前201年）呢度設柴桑縣，漢文帝設尋陽縣（尋陽縣治喺江北），呢度開始設縣。
三國時屬東吳，柴桑屬武昌郡，尋陽屬廬江郡。
晉永興元年（304年），原先嘅尋陽縣、柴桑縣劃出設尋陽郡，屬江州，開始郡治喺尋陽縣，咸康時搬去柴桑縣。永嘉三年（309年），尋陽縣城搬去江南，江北部分畀咗蘄春，江北嘅舊縣城改名「潯水城」。咸和時江州嘅州府搬來尋陽縣城，自此江北嘅潯水城沒落，江南嘅尋陽城興起，之後尋陽縣併入柴桑縣，後世都以尋陽郡城爲尋陽城。
南梁分柴桑縣設汝南縣，分豫章郡設豫寧郡屬高州，尋陽郡改屬西江州。
南陳天嘉四年，廢除高州，豫寧郡屬西江州。
隋開皇九年（589年），廢郡設江州，柴桑、汝南兩縣合爲潯陽縣。開皇十九年（599年），潯陽縣改名彭蠡縣。大業二年（606年），彭蠡縣改名彭城縣，好快又改名湓城縣，第二年，江州改爲九江郡。
唐武德四年（621年），恢復江州；天寶元年（742年），江州改名潯陽郡，乾元元年（758年）又恢復爲江州。湓城縣分出部分設潯陽縣、楚城縣，後來湓城、楚城都併入潯陽。
南唐時潯陽縣改名德化縣，廢江州。
宋，又恢復江州。太平興國七年（982年）劃江州嘅星子、都昌同埋洪州嘅建昌三縣設南康軍。
元呢度分屬江州路同南康路。元末陳有諒喺江州稱帝。
明清時爲九江府、南康府。九江呢個名定咗落來。
1981年據《天津條約》同《北京條約》九江定爲對外商埠，城西長江同甘棠湖之間劃爲九江英租界，面積150畝（1927年中國收返）。當時作爲怡和、太古喺江西唯一嘅拍岸碼頭，九江成爲全省貿易嘅樞紐。因爲西人多，後來廬山頂嘅牯嶺畀西人開發成西式避暑區，自此吸引咗好多權貴來避暑，民國時因爲南京作爲火爐夏天時熱過籠，而南京同九江都喺長江邊，又近，一晚船到，於是夏天時中央政府搬來九江辦公，於是九江稱爲夏都。
1912年廢府，縣直屬省；1914年設潯陽道，德化縣因為同福建嘅同名而改名九江縣；1917年設九江市，1936年降爲九江縣，當年將江北部分畀咗黃梅縣。
1949年7月19號，分九江縣城爲九江市，1979年改爲九江地區。1980年九江市升爲地級市，1983年7月27號九江地區併入九江市。

轄下變動年表

九江專區（1949年到1970年）

1949年10月1號，中華人民共和國江西省九江專區成立，轄九江市、九江縣、瑞昌縣、武寧縣、德安縣、星子縣、修水縣、永修縣（1市7縣）
- 10月，贛東北行政區鄱陽專區畀咗都昌縣、彭澤縣、湖口縣過來（1市10縣）
1951年8月18號，分九江市一部分成立廬山管理局（1市10縣1管理局）
- 12月25號，廬山管理局改名廬山特別區，昇爲省直轄嘅縣級政區（1市10縣）
1956年7月20號，湖北省黃岡專區陽新縣畀咗部分去瑞昌（1市10縣）
1960年9月30號，九江縣併入九江市（1市9縣）
1962年10月20號，恢復返九江縣（1市10縣）
1965年11月23號，廬山管理局編返入九江市（1市10縣）
1969年10月，永修畀咗部分同宜春專區新建縣、安義縣各一部分合併爲南昌市梅嶺管理區（1市10縣）
1970年10月7號，九江專區改名爲九江地區

九江地區（1970年到1980年）

1978年7月5號，九江市又分出部分成立省直轄嘅縣級政區廬山（1市10縣）
1980年3月28號，九江市昇爲地級市，星子、九江縣各出一部分入九江市廬山區（10縣）

九江地區、九江市（1980年到1983年）

1980年3月28號，九江市從九江地區昇爲地級市，廬山編入九江市、改名爲廬山區、攞咗九江地區星子、九江兩縣嘅一部分，外設潯陽區、郊區（市3區，地區10縣）
1981年5月27號，永修畀咗部分過南昌市灣裏區（地區10縣）
1983年7月27號，九江地區併入九江市

九江市（1983年至今）

1983年7月27號，九江地區併入九江市，九江市多咗九江、彭澤、湖口、都昌、星子、永修、德安、瑞昌、武寧、修水（3區10縣）
1984年12月13號，廬山區畀咗部分去潯陽區（3區10縣）
1987年8月22號，郊區併入廬山區（2區10縣）
1989年12月20號，瑞昌由縣昇爲縣級市做瑞昌市（2區1市9縣）
1990年2月17號，潯陽畀咗部分返廬山（2區1市9縣）
2010年9月10號，德安、永修、星子各出一部分成立共青城市（2區2市9縣）
2016年3月29號，星子同廬山區嘅一部分合併成廬山市，廬山區改名做濂溪區（2區3市8縣）
2017年7月18號，九江縣撤縣改區，變做柴桑區（3區3市7縣）

居民

99.8%係漢族，據統計有25個少數民族，100人以上嘅少數民族有回族、苗族、土家族、畬族。

唔同於江西通用嘅贛語，九江市區（包括柴桑）、瑞昌講嘅係官話中嘅江淮官話黃孝片，其餘市縣先係講江西話。

交通

九江位於長江同京九鐵路嘅交叉位，九江嘅交通水陸空都有，係京九線唯一嘅水陸交通樞紐。九江港係長江十大港之一，年客運量、貨運量分別佔長江各港嘅第二同第四位。鐵路上有京九、武九、合九、銅九；公路有昌九、九景兩條高速，以及105、316兩條國道。航空上有九江廬山機場。

從長江流域嘅格局睇，九江位於長三角、武漢兩個經濟區嘅交接位，亦係贛、鄂、湘、皖四省相鄰地區，而從江西本身睇，佢係唯一出到海嘅外貿港，同時係江西嘅北門。

資源

礦產

發現咗嘅礦種有金屬、非金屬、能源礦產三大類80種，探明儲量嘅有44種，其中金、銻、錫、螢石嘅儲量全省第一，銅全省第二，鎢全省第三，石灰石、石英砂、大理石、花崗石、瓷土嘅藏量亦大，礦產潛在價值達千億元以上，主要礦山有瑞昌洋鷄山、修水土龍山金礦。

植物

森林主要分佈喺西部嘅九嶺、幕阜山脉，面積達85.7萬公頃，森林覆蓋率46.3％，活立木蓄積量2538萬立方米，毛竹6196萬樖，國家重點保護嘅樹種37種，主要有南方紅豆杉、樟、杜仲、銀杏、柳杉。而家有三個國家級森林公園，四個省級森林公園。

動物

候鳥類115種，兩棲類11種，哺乳類20種。鄱陽湖侯鳥自然保護區有過冬候鳥126種，其中白鶴840隻，天鵝3000幾隻，佔世界首位，譽為中國「第二長城」；彭澤桃紅嶺有梅花鹿150隻以上。魚類109種，名貴魚類有中華鱘、鰣魚、銀魚、蝦虎魚、彭澤鯽，中華絨鰲蟹亦係特產之一。

水

地表水136.5億立方米，水資源總量141.8億立方米，開發到嘅水力資源32.9萬千瓦。長江過境長度151公里，年流量8900億立方米，直入長江嘅河涌流域面積3904平方公里，萬畝以上嘅湖有10個，千畝以上嘅有31個，全省最大水庫柘林水庫容量達79.2億立方米。鄱陽湖有53%嘅水域喺九江，面積近300萬畝。