反切

反切faan1 cit3（反要讀成翻），係古時喺漢字辭典嘅漢字注音方法嘅一種。反切方法用兩隻漢字嚟注一隻漢字（叫反切歸字）嘅音（前提係已知呢兩隻字嘅讀法，一般用通用字嚟切音），將佢哋嘅字音組合起身，合成要注嘅字音。前面嘅字叫反切上字，表示聲母；後面叫反切下字，表示韻母同聲調（舊時係直行寫字方法，前字喺上，後字喺下）。用字母拼音方案之前，反切係華夏舊時最主要、用得最耐嘅注音方法。

《說文》草部，大徐本系嘅一篆一行本。說明之下用細字寫嘅嘢就係反切，個根據係《唐韻》。

反切嘅名嚟自反同切，隋朝以前多半叫「反」或者「翻」，唐代宗時驚叛逆，皇帝就指定「反」呢隻字要避諱，因爲噉，唐代以後就叫做「切」，呢個係反切個名嘅由來。

定義

下面列嘅係反切方法喺下面啲辭典、古今語學作品嘅定義：

• 宋人丁度《禮部韻略》解釋「反切」：

音同韻互相協作叫做反，又叫翻；兩隻字合埋成讀音叫做切，實質只係同一樣嘢。

• 書《形音義綜合大字典》解釋「反切」：

兩個音讀快咗而成嘅一個音，叫做切，又叫反切、切韻。

• 書《文字學纂要》引漢代鄭玄對「反」嘅注釋「反，覆也」（反即係冚），又引漢代高裕對「切」嘅注釋「切，摩也」（切即係夾）。呢本書跟住夾埋鄭玄同高裕嘅注釋嚟講定義：

攞兩個音冚埋合埋成一個音，就叫反切。

• 《辭源》定義「反切」：

攞兩隻字嘅兩個音合埋造成一音：上字係雙聲，叫母音，下字係疊韻，叫字音。

• 《辭海》定義「反切」：

攞兩個字音合成一個字音嘅方法。

• 陸師成《辭彙》定義「反切」：

用兩個字注音一個字：攞聲同韻合成一個音。

• 陶維英《漢越詞典》定義「反切」：

將兩個聲音合成遞個聲音。

簡略總結：反切係用兩個已知讀法嘅字嘅音嚟爲第三隻字注音，具體就係用第一隻字嘅頭輔音同第二隻字嘅韻聯埋，按一定規則讀出第三隻字嘅發音。呢條規則叫做雙聲疊韻。

歷史

因爲漢字基本上唔係表音文字，所以想正確把握第一次見或者初學嘅漢字嘅音幾乎冇可能。因此喺有注音符號、漢語拼音呢啲漢字音標記手段之前，爲咗表示漢字嘅音，必然要假借第隻漢字。而漢字讀法呢門學問，亦喺東漢以降流行。

喺《爾雅》《說文解字》噉樣嘅古代辭典，爲咗標記漢字音，會攞同音字嚟做例。呢陣時一般嘅表示形式係「甲，讀若／讀如／讀爲乙」（甲嘅讀音近似乙），或者「甲，音乙」（甲嘅音就係乙），前者叫「讀若法」，後者叫「直音法」。直音法用同音字直接注音，讀若法用近似音嚟注。當直音法冇同音字時就注唔到音，就算有同音字都幾難有平易嘅字，呢陣時會用讀若法，但有個缺點係注音唔準。

到東漢末年至三國時代，爲咗克服呢啲缺點，諗咗啲方法。首先係譬況法，用諸如「急氣言」之類嘅詞語描述、分析發音嚟說明字音特徵，但呢個方法用咗短期間就廢咗嘞。遞個就係反切嘅方法，雖然複雜過直音，但多數情況用常用字就可以顯示到正確讀音，之後就成爲主要嘅表音手段（直音亦得繼續使用）。所以相比如直音、讀若呢啲有問題嘅注音，反切方法係一大進步。

反切嘅起源仲未明確。有學者認爲反切嘅初創同東漢時代佛教傳入有關，伴隨佛教傳嚟中國嘅仲有印度嘅音韻學知識、同埋佢嘅表音文字，受佢影響開始分析中文音聲。三國時代魏國嘅孫炎寫咗本《爾雅音義》，傳統認爲呢本書最早採擇反切作爲學術嘅表音方法，到魏晉時代反切開始盛行。另外《漢書》嘅服虔、應劭注解亦用咗反切。南北朝時佛敎開始流行，而文人亦都開始玩雙聲疊韻，音韻學問有大發達，但現存著作少。人開始將字嘅聲韻歸類，反切就慢慢形成。個系統到咗《切韻》呢本書面世，切韻系統已經相當完整。

現存使用反切嘅最早資料係《玉篇》（六世紀中葉）同《經典釋文》（六世紀末），仲有601年寫就嘅韻書《切韻》，呢啲都係唐以前嘅代表著作。喺之後有1716年完成嘅《康熙字典》、以及現代嘅《辭源》、《中文大辭典》，佢哋爲咗標記漢字音都利用咗反切。喺漢語拼音同注音符號登場之前，都係廣泛應用反切。

反切自發明以嚟冇乜大嘅變化，但用唔同文獻可以見到用字上嘅工夫。例如喺慧琳《一切經音義》，反切上字唔淨只表示聲母，韻母嘅一部分（主元音同韻尾）多數同反切下字共有。18世紀清代編纂嘅《音韻闡微》中嘅用字就有大改變，反切上字會用冇韻尾嘅字，反切下字用零聲母嘅字，自然噉發音就可以得到正確嘅讀音。《音韻闡微》嘅反切亦用喺20世紀《辭源》嘅初版（1915年）。

反切由漢到唐，多數叫『反』。唐以後就改用『切』。例如，徒合兩字反切，唐時就叫做徒合反，宋時就叫做徒合切。

同反切相反就係合音，亦都係將兩個音結合。合音喺春秋時就有啦，好似：「不可」為「叵」，「何不」為「盍」，「如是」為「爾」，「而已」為「耳」，「之乎／之於／之歟」為「諸」，「者焉」為「旃」。

現代中國用拼音方法顯示發音，反切呢種古老嘅方法用得好少；但直音呢種音注到而家亦用得盛行。

拼讀方法

反切係《切韻》等古韻書、字書、音義等傳統用嘅發音標記法。古人用兩漢字注一字嘅音，因爲噉，隻字可以有多組反切。第一隻字（反切上字）注聲母（清濁今陣變陰陽），第二隻字（反切下字）注韻母（包等同呼）同聲調平仄。比如《切韻》一例：唐、徒郎反。「徒郎反」就係反切，「徒」叫反切上字，「郎」叫反切下字，要切音嘅字「唐」叫反切歸字。反切嘅第三隻字喺古時寫「反」，唐代後半以降寫「切」，以避諱有謀反之意嘅「反」字。亦有少數文獻用「翻」字。

歸字嘅頭輔音（聲母）去搵上字嘅聲母，呢個叫做雙聲。譬喻東，德紅切，東嘅聲母同德一樣，佢哋就構成雙聲。

歸字嘅韻（韻母）去搵下字嘅韻母，呢個叫做疊韻。譬喻川，昌緣切，川嘅韻母同緣一樣，佢哋就構成疊韻。

聲調亦有一定規則，叫做共等、同類。

• 共等係指切出聲調嘅陰陽同上字一致。譬喻抓，側絞切，抓同側嘅聲調都係陰調，噉就係共等。
• 同類係指切出聲調嘅平仄同下字相同。但有樣要注意係，遇到上字爲陽，下字爲上嘅組合時，聲類可能要改成去，亦即切成陽去。

例如：

• 【唐】徒郎反：
  • 【徒】喺切韻時代嘅音係/do/，攞佢嘅聲母d-。
  • 【郎】喺切韻時代嘅音係/lɑŋ/，攞佢聲母除外嘅部分-ɑŋ。
  • 兩者組合，得出唐嘅發音/dɑŋ/。
• 【酒】子酉切：
  • 【子】聲母為精母，陰；
  • 【酉】韻母為有韻，聲調為上聲；
  • 故【酒】精母有韻陰上聲。
• 【否】方久切：
  • 【方】/fɔŋ⁵⁵/聲母用/f/，【久】/kɐu³⁵/韻母用/ɐu/，【否】＝f＋ɐu＝/fɐu/；
  • 【方】係陰平(⁵⁵)，【久】係陰上(³⁵)，【否】＝陰＋上＝陰上＝³⁵；
  • 所以【否】＝fɐu＋2＝/fɐu³⁵/。
• 【東】德紅切：
  • 【德】tɐk陰入；
  • 【紅】hʊŋ陽平；
  • 【東】tʊŋ陰平。
• 【米】莫禮切：
  • 【莫】mɔk6嘅m（456）
  • 【禮】lɐi5嘅ɐi（25）
  • 所以【米】讀/mɐi¹³/
• 【根】古痕切
  • 【古】ku陰上
  • 【痕】hɐn陽平
  • 【根】kɐn陰平
• 【崩】北滕切
  • 【北】pɐk陰入
  • 【滕】tʰɐŋ陽平
  • 【崩】pɐŋ陰平

第三個「切」字表示反切呢個方法。

注意，因爲古今音變，有啲反切例切出嘅音會唔符合現代粵音。例如：

• 陳，直珍切。切出嘅粵音會係/tsɐn¹¹/，但古今規律係全濁聲母喺平聲送氣，所以實際音讀/tsʰɐn¹¹/。
• 永，于憬切。切出嘅粵音會係/jɪŋ³⁵/，但于本身係云母字，現代粵語讀成陰聲，所以實際音讀/wɪŋ¹³/。
• 可，枯我切。切出嘅粵音會係/fɔ³⁵/，噉係由於枯係溪母字，溪母合口字喺粵語變成/f/，另外係弱化，呢度係弱化讀音，所以實際音讀/hɔ³⁵/。
• 豆，田侯切。切出嘅粵音會係/tʰɐu²²/，但古今規律係全濁聲母喺去聲唔送氣，所以實際音讀/tɐu²²/。

問題點

亦有反切都冇辦法顯示正確發音嘅音，比如某個韻得一個字就切唔出。《切韻》就有「拯」韻得一個字，結果冇反切，記做「無反語」。

用古書嘅反切去得音時，知道反切時代嘅音韻體系係必要嘅。例如用《切韻》搵「視」得「承旨反」，喺現代粵語「承」＝/sɪŋ¹¹/、「旨」＝/tsi³⁵/，用粵語反切得/si¹³/，得唔到正確嘅/si²²/。

反切下字用脣音開始時，有冇介母/u/嘅曖昧就會發生。例如《切韻》嘅陌韻有「格，古陌反」「虢，古伯反」，佢哋嘅反切下字唔同。將反切下字嘅音調出嚟，「陌」係「莫白反」，「伯」係「博白反」，兩者嘅反切下字同音。但「格」讀krak，「虢」讀kruak，佢哋嘅音唔同。呢個「白（陌、伯）」做反切下字時，rak同ruak兩方嘅意味都得。【切韻指掌圖】有分開合韻，下字係唇聲母就用合口韻。

漢字音變化嘅影響

反切係以中古時代嘅漢字音爲基準嘅嘢，根據複雜嘅法則，漢字音慢慢變成現代噉，結果反切歸字同反切上字、反切下字嘅關係變得唔透明。中古時代係四聲體系，粵語仲算繼承咗呢個體系，而普通話嘅聲調體系同佢好唔同；嗰陣時有全濁音，即係濁障礙音聲母。然後聲母嘅清濁影響咗呢個四聲體系，變咗分陰陽調嘅發聲體系，之後，吳語、湘語除外嘅所有中文方言都將全濁音清音化，然後聲調再影響呢啲聲母，變成全清或者次清。呢個清濁同聲調互相影響變化造成嘅結果，現代中文喺反切中嘅樣變得好複雜。

舉例嚟講，上面嘅例中「東，德紅切」嘅東、德、紅喺普通話嘅發音各自係[tʊŋ⁵⁵]（dōng）、[tɤ³⁵]（dé）、[xʊŋ³⁵]（hóng），東同紅嘅聲調唔一致。東嘅聲母係端母（[t]），係清音，紅嘅聲母係匣母（[ɣ~ɦ]），係濁音，原來都係平聲嘅東同紅佢哋嘅聲調各自分成咗陰平聲同陽平聲。再有一例係「豆，田侯切」，豆、田、侯嘅廣州話發音各自係[tɐu²²]（dau6）、[tʰin¹¹]（tin4）、[hɐu²²]（hau6），豆同田嘅聲母唔一致。噉呢，豆同田嘅聲母原本都係定母（[d]），定母濁音清化，豆嘅聲調係去聲，讀成端母（[t]），田嘅聲調係平聲，讀成透母（[tʰ]）。

又例如，按「上字分陰陽」嘅規則，歸字嘅陰陽調同上字嘅陰陽調一樣，如上字係陰調，歸字都攞陰調，陽調同理；將下字嘅陰陽調誤當做歸字嘅陰陽調係常見誤切，如羥係氫（輕）氧（養）切，要攞「輕」嘅溪母同「養」嘅陽三開韻上聲，讀做溪陽三開上，粵語推導同「響」同音（陰上聲），讀成「強嘅陽上聲」係錯切。

第啲

古代發音唔同北方話（例如而家嘅普通話），唐宋留低嘅反切用例喺普通話冇乜用，要另外再立一套。廣東話留有唔少隋唐中古漢語，反切幾有用。掉番轉頭，現代嘅我哋可以用反切研究隋唐時講嘅中古音，所以係漢語音韻學研究嘅基礎資料之一。

梅州地區嘅下市話就係通過有規律嘅反切而形成嘅一種客家話。

另外中文有啲方言字嘅創製就係出自反切，比如官話嘅「甭」，係「不用」嘅合切，讀bèng；又例如吳語嘅「覅」，係「勿要」嘅合切，讀vio。

變體

反切可延伸到用多過兩字注音。如果用三字來注，上字同樣注聲母；而中字注韻母，下字注聲調，如「東」係「端」母、「東」韻（「東」本身已係韻母代表字）、「平」聲，注成「端東平」。如要再細分，可喺韻母拆出等同呼（或叫口），甚至廣韻未出現嘅攝，注成「攝口等聲韻母（右至左）／母韻聲等口攝（左至右）」（「東」注成「通開一平東端／端東平一開通」）；或按音節嘅音素順序排成「母、韻口等／韻等口（順序毋統一）、攝、聲」（「東」注成「端東開一通平／端東一開通平」）。

口訣

「上字分陰陽、下字辨平仄」

「上字定聲、下字定韻」

今時應用

反切除咗喺中古時記低當時嘅字音外，喺今日嘅粵語字典重係有用。目前粵語拼音方案有好多種，而每部字典又唔一定用同一種拼法，所以而家嘅粵語字典多係同時用兩種注音法：一套係字典本身採納嘅拼音法，另一套就係反切法。

古書嘅反切上、下字太多，有成四百幾上字，一千幾下字，夾埋五千幾反切字，如東係「德紅切十七」，即係有十七隻同音字。今下用來標示方音時，反切系統可簡化成只喺各反切字組揀一字做代表字，慳返揀字煩惱，大大減少要記嘅字數；如《分韻撮要》為當時粵語各聲韻母揀徂代表字，係噉意改吓就可為現代粵語標音。

另外反切係種跨語種嘅注音方法。漢字係由中國人創造嘅字，然後慢慢變成東亞同東南亞一帶民族嘅共同文字，如朝鮮、日本、越南。過咗咁多個世紀，漢字都睇做正統文字，用喺講課、科舉、行政、創作文學。隨住唔同埞方唔同處，漢字嘅發音都唔同，齋喺中國就有多個讀法，如廣東話、福建話、潮州話、北京話。鄰近各國，如朝鮮有朝鮮人嘅讀法，叫漢朝，日人有日人嘅讀法，叫漢和，越南人有自己嘅讀法，叫漢越。因爲咁多個發音都有共同嘅古代來源，反切就可以同時注曬咁多隻話嘅字音。

今陣嘅拉丁拼音輸入法要將拉丁字母打晒出來，對粵拼迡啲好多二合字母嘅拼音系統來講好麻煩，有人就整唨套用反切原理來打字嘅《粵切輸入法》，粵語聲、韻、調嘅粵拼碼再長都係撳一粒掣，一隻字最多撳三粒掣，快過粵拼。北京話嘅類似輸入法叫雙拼。

反切上下字

《廣韻》寫嘅反切上字同反切下字列喺下面。

反切上字

分類		聲母	反切上字	反切上字數
脣音		幫	方 必 北 伯 博 筆 愽 卑 補 分 百 巴 鄙 府 畀 彼 封 甫 兵 布 并 邊 陂 脯	24
		滂	匹 譬 丕 披 峯 拂 普 撫 孚 妃 滂 芳 敷	13
		並	附 浮 便 毗 婢 符 平 傍 父 扶 薄 皮 馮 房 捕 步 部 防 白 縛 裴 弼 蒲	23
		明	母 摸 無 武 美 明 莫 綿 模 彌 巫 慕 靡 文 亡 謨 眉 矛 望	19
舌音	舌頭音	端	都 冬 當 多 得 德 丁	7
		透	託 湯 土 台 吐 天 通 他	8
		定	墜 堂 徒 唐 田 杜 同 陀 度 特	10
		泥	乃 那 内 奴 諾	5
	舌上音	知	徵 知 張 陟 都 猪 追 中 豬 竹 丁 卓	12
		徹	抽 褚 敕 楮 丑 他 癡 恥	8
		澄	除 直 持 丈 宅 治 池 徒 佇 柱 遟 馳 瑒	13
		娘	穠 拏 妳 女 尼	5
齒音	齒頭音	精	作 祖 則 子 臧 醉 兹 資 將 借 姊 𩛠 即 遵	14
		清	麤 遷 醋 七 取 采 青 雌 此 倉 親 蒼 麁 千	14
		從	疾 秦 才 昨 前 匠 在 漸 藏 徂 慈 自 情	13
		心	私 桑 相 斯 寫 思 須 蘇 悉 素 息 雖 辛 胥 速 先 司	17
		邪	隨 辝 辭 寺 似 夕 祥 詳 徐 旬	10
	正齒音（莊組）	莊	鄒 仄 爭 簪 子 莊 側 阻	8
		初	初 芻 廁 測 創 叉 楚 瘡	8
		崇	士 仕 鶵 豺 崱 鉏 鋤 牀 雛 助 査 崇	12
		生	史 沙 色 數 所 砂 疏 生 踈 山	10
		俟	俟 牀	2
	正齒音（章組）	章	止 煑 珍 旨 脂 章 職 占 支 征 側 之 諸 正	14
		昌	處 姝 叱 尺 赤 昌 充	7
		常	甞 視 是 成 常 植 氏 殖 十 殊 署 承 市 時 臣 寔 蜀	17
		書	失 始 舒 釋 式 賞 傷 書 試 商 矢 施 識 詩	14
		船	實 神 乗 食	4
牙音		見	姑 吉 几 詭 各 格 公 兼 居 佳 紀 過 九 古 俱 谷 規 乖 舉	19
		溪	豈 客 欽 枯 牽 丘 詰 楷 綺 去 區 乞 弃 曲 苦 康 可 空 羌 窺 傾 驅 卿 墟 謙 口 恪 袪 起	29
		群	其 狂 跪 衢 求 奇 具 臼 巨 強 渠 曁	12
		疑	五 吾 魚 宜 俄 牛 危 疑 玉 虞 研 愚 擬 語	14
喉音		曉	荒 火 虚 胡 海 花 虎 許 呵 香 羲 朽 況 馨 興 况 呼 休 黑 喜	20
		匣	獲 何 胡 黃 懷 乎 戸 下 侯	9
		影	伊 依 憶 愛 握 謁 乙 紆 央 哀 鷖 衣 一 安 烟 烏 挹 憂 於	19
		云	永 薳 爲 有 雨 王 于 羽 榮 雲 下 筠 云 韋 洧 委	16
		以	與 羊 以 移 余 于 夷 餘 翼 悅 營 弋	12
半舌音		來	勒 力 賴 里 盧 連 縷 良 洛 郎 離 魯 林 來 呂 落 練	17
半齒音		日	人 而 儒 兒 如 耳 仍 汝	8

反切下字

根據一部分學者嘅學說，韻母要分A、B兩類。下面份表，啲反切下字按四聲分，各聲調嘅反切下字分兩欄，分別係《廣韻》中嘅代表字（左欄）同反切下字（右欄），代表字亦會包含喺反切下字嗰欄。

攝	韻目	等	呼	韻母	反切下字
					平聲		上聲		去聲		入聲
通	東	1	開	東1	東1	凍 紅 公 東 空	董1	董 蠓 動 孔 揔	送1	送 凍 弄 貢	屋1	卜 木 禄 谷
		3	開	東3	東3	中 融 弓 終 宮 戎			送3	鳳 衆 仲	屋3	逐 六 菊 竹 宿 福 匊
	冬	1	開	冬	冬	宗 冬	湩	湩 𪁪	宋	宋 統 綜	沃	沃 篤 酷 毒
	鍾	3	開	鍾	鍾	凶 庸 封 容 鍾 恭	腫	宂 勇 踵 隴 冢 拱 奉 悚	用	用 頌	燭	足 蜀 録 欲 玉 曲
江	江	2	開	江	江	江 雙	講	講 項 慃	絳	絳 降 巷	覺	角 覺 岳
止	支A	3	開	支A開	支A開	移 支	紙A開	此 紙 是 婢 氏 帋 爾	寘A開	智 賜 豉 義 企
			合	支A合	支A合	爲 吹 隨 垂 隋 規	紙A合	婢 捶 累 髓 委	寘A合	睡 瑞 恚 僞 避
	支B	3	開	支B開	支B開	知 移 爲 宜 羈 奇 離	紙B開	豸 氏 綺 弭 侈 彼 靡 倚 爾 委	寘B開	義 寄
			合	支B合	支B合	爲 危 支 垂	紙B合	詭 毁 弭 委	寘B合	睡 恚 僞
	脂A	3	開	脂A開	脂A開	私 脂 肌 夷 資 之	旨A開	履 几 矢	至A開	寐 二 至 四 自 利
			合	脂A合	脂A合	綏 隹 追 維 遺	旨A合	水 癸 誄 軌 壘 累	至A合	醉 遂 悸 類 季
	脂B	3	開	脂B開	脂B開	眉 悲 夷 飢 尼	旨B開	視 美 雉 履 几 鄙 姊	至B開	冀 器 兾 備 媚 祕 利
			合	脂B合	脂B合	隹 悲 追	旨B合	美 軌 洧	至B合	萃 愧 位 類
	之	3	開	之	之	甾 其 而 持 兹 之 擬 己	止	止 士 史 里 紀 市	志	吏 置 志 記
	微	3	開	微開	微開	希 依 衣	尾開	豈 狶	未開	旣 豙
			合	微合	微合	非 微 韋 歸	尾合	鬼 匪 偉 尾	未合	未 沸 貴 胃 味 畏
遇	魚	3	開	魚	魚	余 居 魚 諸	語	與 渚 巨 与 吕 許 舉	御	預 洳 慮 署 去 據 倨 御 助 恕
	虞	3	合	虞	虞	無 隅 夫 芻 俞 輸 于 誅 逾 俱 朱	麌	武 矩 雨 庾 禹 羽 甫 主	遇	注 戍 遇 句 具
	模	1	開	模	模	姑 吳 吾 胡 乎 都 孤 烏	姥	補 杜 古 魯 戸	暮	故 路 暮 誤 祚
蟹	齊	4	開	齊開	齊開	臡 稽 低 兮 迷 奚 雞	薺開	米 弟 啓 禮	霽開	戾 計 詣
			合	齊合	齊合	圭 攜			霽合	惠 桂
	祭A	3	開	祭A開					祭A開	祭 制 袂 蔽 例 獘
			合	祭A合					祭A合	歲 銳 芮
	祭B	3	開	祭B開					祭B開	憩 罽 例
			合	祭B合					祭B合	歲 衛 稅 芮
	泰	1	開	泰開					泰開	大 蓋 太 貝 帶 艾
			合	泰合					泰合	外 會 最
	佳	2	開	佳開	佳開	佳 膎	蟹開	蟹 買	卦開	賣 隘 懈 卦
			合	佳合	佳合	媧 緺 娃	蟹合	買 夥 𠁥	卦合	賣 卦
	皆	2	開	皆開	皆開	諧 皆	駭開	駭 楷	怪開	戒 拜 介 怪 界
			合	皆合	皆合	淮 懷 乖 皆			怪合	壞 怪
	夬	2	開	夬開					夬開	犗 夬 話 邁 喝
			合	夬合					夬合	夬 快
	灰	1	合	灰	灰	灰 杯 恢 回	賄	罪 賄 猥	隊	妹 隊 對 輩 佩 昧 繢 内
	咍	1	開	咍	咍	才 哀 開 來 哉	海	改 亥 乃 在 紿 宰 愷	代	耐 愛 代 槩 漑
	廢	3	開	廢開					廢開	肺
			合	廢合					廢合	穢 廢 吠 肺
臻	眞A	3	開	眞A	眞A	珍 賓 鄰 人 眞	軫A	引 忍 腎 軫 盡	震A	印 晉 振 遴 刃	質A	必 吉 畢 日 七 質 悉 栗
	眞B	3	開	眞B開	眞B開	珍 巾 鄰 人 銀	軫B開	引 忍 紖 殞	震B開	覲 遴 刃	質B開	密 筆 畢 乙 質 悉 一
			合	眞B合	眞B合	倫 筠 贇	軫B合	敏 殞			質B合	筆
	諄	3	合	諄	諄	倫 綸 勻 迍 脣 旬 遵	準	允 尹 準	稕	順 閏 峻	術	聿 律 卹
	臻	3	合	臻	臻	臻 詵					櫛	瑟 櫛 叱
	文	3	合	文	文	分 文 云	吻	粉 吻	問	運 問	物	弗 勿 物
	欣	3	開	欣	欣	斤 欣	隱	謹 隱	焮	焮 靳	迄	迄
	元	3	開	元開	元開	言 軒	阮開	偃 幰	願開	建 万	月開	訐 歇 謁
			合	元合	元合	袁 煩 元	阮合	遠 晚 阮	願合	販 願 万 怨	月合	越 發 月 厥 伐
	魂	1	合	魂	魂	魂 尊 渾 昆 奔	混	衮 本 忖 損	慁	悶 困 寸	沒	忽 没 勃 骨
	痕	1	開	痕	痕	痕 根 恩	很	墾 很	恨	恨 艮
山	寒	1	開	寒	寒	寒 干 安	旱	旱 笴 但	翰	案 賛 旰 按 旦	曷	割 葛 達 曷
	桓	1	合	桓	桓	丸 潘 端 官	緩	緩 滿 旱 伴 管 纂	換	筭 段 換 貫 半 玩 喚 慢 亂	末	括 割 撥 栝 活 末
	刪	2	開	刪開	刪開	班 姦 顔 還	潸開	板 綰 赧	諫開	晏 鴈 澗 諫 患	黠開	八 拔 黠
			合	刪合	刪合	頑 還 關	潸合	鯇 板	諫合	慣 患	黠合	八 滑
	山	2	開	山開	山開	閑 山 閒	產開	簡 限	襇開	莧 幻 襇	鎋開	轄 鎋 瞎
			合	山合	山合	頑 鰥	產合	辨 綰	襇合	幻	鎋合	䫄 刮
	先	4	開	先開	先開	年 前 煙 田 先 玄 賢 顚 堅	銑開	殄 峴 泫 典 繭	霰開	見 麵 佃 電 甸 練	屑開	蔑 屑 結
			合	先合	先合	玄 涓	銑合	畎 泫	霰合	縣 練	屑合	穴 決
	仙A	3	開	仙A開	仙A開	然 仙 連 延	獮A開	兖 演 翦 淺 善 展 緬	線A開	箭 扇 戰 線 賤 面 膳 彦	薛A開	辥 熱 列 滅
			合	仙A合	仙A合	專 泉 緣 員 川 宣	獮A合	兖 轉	線A合	卷 釧 眷 絹 掾 囀 戀	薛A合	輟 雪 絕 爇 劣 悅
	仙B	3	開	仙B開	仙B開	乾 焉 連 延	獮B開	演 免 善 辨 展 蹇 輦	線B開	箭 變 扇 碾 眷	薛B開	列 竭 別
			合	仙B合	仙B合	緣 攣 圓 權 員 全	獮B合	兖 篆 轉 免	線B合	倦 卷 眷 戀	薛B合	劣 悅
效	蕭	4	開	蕭	蕭	幺 堯 蕭 聊 彫	篠	皎 鳥 了 皛	嘯	弔 叫 嘯
	宵A	3	開	宵A	宵A	焦 邀 霄 消 招 昭 遙	小A	小 少 沼	笑A	要 兆 肖 召 笑 照 妙
	宵B	3	開	宵B	宵B	嬌 宵 瀌 遙 嚻 喬	小B	兆 小 矯 夭 表	笑B	召 照 廟
	肴	2	開	肴	肴	交 茅 嘲 肴	巧	絞 飽 爪 巧	效	孝 稍 皃 敎
	豪	1	開	豪	豪	袍 毛 曹 遭 刀 襃 勞	晧	浩 老 早 抱 道 晧	号	報 耗 倒 導 到
果	歌	1	開	歌	歌	河 何 歌 俄	哿	可 我	箇	箇 个 賀 邏 佐
	戈	1	合	戈1合	戈1合	婆 禾 戈 和 波	果1合	可 火 果	過	貨 卧 過 唾 臥
		3	開	戈3開	戈3開	伽 迦
			合	戈3合	戈3合	𩨷 靴 𩨭 伽 𦚢
假	麻	2	開	麻2開	麻2開	加 巴 霞 牙	馬2開	賈 雅 疋 下	禡2開	訝 嫁 亞 駕
			合	麻2合	麻2合	花 華 瓜	馬2合	寡 瓦	禡2合	罵 化 霸 㕦
		3	開	麻2合	麻3開	車 嗟 遮 奢 邪 賒	馬3開	冶 也 姐 者 野	禡3開	謝 夜
宕	陽	3	開	陽開	陽開	羊 章 陽 莊 良	養開	㢡 掌 丈 兩	漾開	向 亮 樣 讓	藥開	雀 灼 略 約 虐 若 爵 勺 藥
			合	陽合	陽合	方 王 良	養合	昉 兩 養 网 往	漾合	訪 況 亮 放 妄	藥合	籰 钁 縛
	唐	1	開	唐開	唐開	旁 當 光 岡 郎	蕩開	黨 朗	宕開	浪 宕 曠	鐸開	各 落
			合	唐合	唐合	黃 光	蕩合	晃 廣	宕合	謗 浪 曠	鐸合	穫 各 博 郭
梗	庚	2	開	庚2開	庚2開	庚 行 盲	梗2開	幸 杏 梗 冷 打 猛	映2開	更 孟 敬	陌2開	格 伯 陌 白
			合	庚2合	庚2合	橫 盲	梗2合	礦 䁝 猛	映2合	孟	陌2合	伯 白 擭
		3	開	庚3開	庚3開	庚 明 京 驚 卿 兵	梗3開	永 影 丙 景	映3開	病 慶 敬 命	陌3開	劇 逆 戟 郤
			合	庚3合	庚3合	榮 兵	梗3合	永 憬	映3合	命	陌3合	虢
	耕	2	開	耕開	耕開	莖 萌 耕	耿開	幸 耿	諍開	爭 諍 迸	麥開	摘 革 厄 麥 核 獲 責 戹
			合	耕合	耕合	宏 萌			諍合	迸	麥合	麥 摑 獲
	清	3	開	清開	清開	貞 成 盈 征 情 并	靜開	靜 井 整 郢	勁開	令 姓 正 盛 政 鄭	昔開	昔 辟 積 隻 易 石 炙 益 迹 亦
			合	清合	清合	傾 營	靜合	頃 潁	勁合	正	昔合	隻 役
	青	4	開	青開	青開	經 靈 刑 丁	迥開	鼎 迥 涬 醒 頂 挺 剄	徑開	定 徑 佞	錫開	歷 擊 狄 激
			合	青合	青合	螢 扃	迥合	迥 頂			錫合	闃 鶪 狊
曾	蒸	3	開	蒸開	蒸開	蒸 冰 升 陵 兢 乗 仍 矜 膺	拯開	拯 庱	證開	證 應 甑 孕 𩜁	職開	直 逼 力 職 側 極 翼 即
			合	蒸合							職合	逼
	登	1	開	登開	登開	崩 滕 恒 楞 增 登 朋	等開	肯 等	嶝開	鄧 贈 隥 亘	德開	則 得 勒 黑 墨 德 北
			合	登合	登合	肱 弘					德合	或 國
流	尤	3	開	尤	尤	周 浮 州 秋 鳩 尤 謀 由 流 求	有	久 婦 柳 酉 否 九 有	宥	佑 富 僦 副 呪 溜 救 又 祐
	侯	1	開	侯	侯	侯 婁 鉤	厚	后 垢 苟 厚 斗 口	候	漏 遘 豆 候 奏
	幽	3	開	幽	幽	烋 彪 虯 幽	黝	糾 黝	幼	謬 幼
深	侵A	3	開	侵A	侵A	針 心 深 尋 林 淫	寑A	枕 甚 朕 稔 荏	沁A	禁 任 鴆	緝A	執 入 立 汁
	侵B	3	開	侵B	侵B	今 金 針 吟 簪 心 深 林	寑B	㾕 甚 錦 朕 凜 飲 稔	沁B	禁 譖 蔭 鴆	緝B	戢 入 及 立 汲 急
咸	覃	1	開	覃	覃	南 含 男	感	禫 唵 感	勘	暗 紺	合	沓 閤 荅 合
	談	1	開	談	談	談 甘 三 酣	敢	覽 敢	闞	瞰 蹔 𣊟 暫 濫	盍	盍 榼 雜 臘
	鹽A	3	開	鹽A	鹽A	鹽 廉 占	琰A	染 漸 冉 琰	豔A	驗 豔 贍	葉A	涉 接 葉 攝
	鹽B	3	開	鹽B	鹽B	淹 廉 炎	琰A	檢 險 儉 琰 斂 奄	豔A	驗 窆 豔	葉B	葉 輒
	添	4	開	添	添	兼 甜	忝	玷 忝 簟	㮇	店 念	怗	頰 愜 牒 協
	咸	2	開	咸	咸	讒 咸	豏	豏 斬 減	陷	賺 陷 韽	洽	洽 夾 㘝
	銜	2	開	銜	銜	銜 監	檻	黤 檻	鑑	鑑 懺	狎	甲 狎
	嚴	3	開	嚴	嚴	嚴 𩏩	儼	广 掩	釅	劔 欠 釅	業	劫 業 怯
	凡	3	合	凡	凡	凡 咸	范	錽 犯 范	梵	泛 劔 梵	乏	乏 法

意義同界限

反切係將音節拆分嚟認識，並將佢嘅表現體系化，呢點嚟講佢係科學嘅進步嘅表音方式。反切用嘅反切上下字避開咗要注音嘅字，只要知道反切上下字嘅音，就能知道原先好難認嘅字嘅讀音。喺呢方面，反切同以前用嘅讀若法、直音法等方法比較，佢明顯係進化嘅方法。但同漢語拼音、注音符號比較，反切有點唔好就係佢標記用到嘅上下字太過多（反切上字約400字，反切下字約1000字，組合約5000種），而且啲字讀啲唔讀啲，各自引用一部分組合來讀，呢點嚟講亦唔方便，呢啲都係佢嘅限制。另外容易字嘅音標記佢反而用咗複雜字嘅組合，呢啲表現都係受指責嘅問題點。例如「一」係於悉切，「八」係博撥切。

中國以外嘅影響

日本亦學咗反切嚟注音。五十音圖就係理解咗反切後而發展出嚟。另外，喺江戶時代盛行用反切嚟解釋日文語源。例如喺貝原益軒《日本釋名》解「雪」（ゆき）嘅語源做「やすくきゆる」，「やす」反切出嚟就係「ゆ」。

諺文最基本嘅十四個初聲字同十個中聲字組合，得出一佰四十字嘅音節表，稱呼做「反切本文」，又叫「反切表」。

越南人亦用反切法嚟表示相應嘅漢越音，叫做漢越反切（越南文：phiên thiết Hán-Việt／反切漢越）。

睇埋

• 漢語拼音

引用資料

• Casacchia,G. (2006年). 〈Chinese Linguistic Tradition〉, Brown, Keith, 《Encyclopedia of Language and Linguistics》 第二版. 倫敦: Elsevier. p. 358~362. ISBN 978-0-08-035943-4.
• 竺家寧 (1990年)。《《聲韻學》》。臺北：五南圖書。（呢本書指出反切最早出現喺東漢）
• 蒲立本 (1984年). 《Middle Chinese: a study in historical phonology》. 溫哥華: 卑詩大學. ISBN 978-0-7748-0192-8.
• 白一平 (1992年). 《A Handbook of Old Chinese Phonology》. 柏林: Mouton de Gruyter. ISBN 978-3-11-012324-1.
• 羅傑瑞 (1988年)。《《Chinese》》。劍橋：劍橋大學。ISBN 978-0-521-29653-3。
• 陶維英。《Hán Việt Từ điển／漢越辭典》。 {{cite book}}: templatestyles stripmarker in |title= at position 2 (help)
• 丁度。《《禮部韻略》》。
• 陸師成。《《辭彙》》。
• 《形音義綜合大字典》
• 《文字學纂要》
• 《辭源》
• 《辭海》

外面連結

• 廣韻反切上字表