月餅
月餅（粵拼：jyut6 beng2）係中秋節嘅重要嘢食，意謂團圓。
月餅起源，民間有唔同講法。一個講法係唐太宗八月十五出征突厥，凱旋而歸，得一圓餅。太宗大喜，指住個月笑住講：「應將胡餅邀蟾蜍」。之後就同文武百官一齊食，從此，就有中秋節食月餅嘅習俗。另一講法係唐明皇遊月宮時，食咗嫦娥款待嘅仙餅後，回宮命人製成。
據《洛中見聞》記載，唐僖宗曾經響中秋節叫御膳房用紅綾將餅賞賜新科進士，呢種紅綾將餅應該就係最先嘅月餅。
另外有傳說，元末人民反抗統治，月餅裏面夾紙條傳遞通風報信。
有文獻記載，月餅最早出現響南宋時候，之不過當時月餅同中秋節一啲關係都冇，只不過係一種蒸餅拎來賣咁。月餅真正同中秋節拉上關係喺明代。當時北京城內出現咗一種以果做餡嘅月餅。之後人人響中秋節呢一日自己整月餅，用來自用同送畀親朋戚友，以表達團圓祝賀之意。嗰陣時月餅大小同形狀個個都好唔同，差別好大，製作名堂多兼得意，好似有專供男人食嘅月牙月餅，只限女人食嘅葫蘆月餅，重有特別為細路仔準備嘅「孫悟空」、「兔兒爺」之類嘅月餅等，名目繁多，不一而足。到咗近代，月餅有人手亦用機器幫手整，品種亦日益豐富。
粵廣地區款式
編輯
喺粵廣地區，而家嘅月餅係商品，款式好多，例如有冰皮月餅、雙黃蓮茸、奶黃、金華火腿五仁咁。不過，最正宗都係蓮子茸。舊時月餅會落好多糖同豬油，近年講求健康，轉用植物油，又落少啲糖。
傳統餅皮月餅
編輯傳統餅皮月餅會用麵粉、糖漿、生油同鹼水溝埋搓，為咗令餅皮軟硬度啱，都會將新舊餅皮一齊搓。餅皮之後會包餡，標準大細係直徑三寸二，高一寸六，重四兩，焗出嚟啡黃色。若果餅皮用淨咗，可以整埋豬仔餅。
蓮茸月餅
編輯蓮茸月餅係最常見嘅傳統月餅，多數都加埋鹹蛋黃，最流行嘅係雙黃，即係「雙黃蓮茸月」。蓮茸又分兩種，傳統係黃蓮茸，蓮子無去衣，用黃糖整；近年興白蓮茸，蓮子有去衣，用白糖整，色水比黃蓮茸淺，蓮子味香啲。
五仁月餅
編輯五仁月餅係舊時比較流行嘅傳統月餅，五仁餡通常都係欖仁、合桃、芝麻、瓜子同杏仁，再落玫瑰露酒同糖調味。
有啲五仁月餅會用埋金華火腿做餡，舊時亦會用燒雞取代金華火腿。
荳茸月餅
編輯荳茸月餅亦係舊時比較流行嘅傳統月餅，多數用綠豆茸溝雞油整餡，價錢比蓮茸月餅平。亦有用紅豆茸做餡，叫荳沙月餅。
奶黃月餅
編輯奶黃月餅係近年時興嘅月餅，用傳統餅皮包奶黃餡。不過因為一個餅放得多奶黃餡就好難焗得好，所以奶黃月餅嘅大細要縮細去就，比傳統月餅細個。
冰皮月餅
編輯冰皮月餅喺1989年出現，餅皮用糯米粉同粘米粉整，唔經焗製。餡就好多時都係綠豆茸、芝麻茸、生果茸，近年重有乳酪、朱古力、芝士等等。
銷售
編輯喺香港大型餅鋪賣月餅係用月餅咭為主，嚟啲預繳式消費方便工廠統計，預知月餅銷售數量，有利減少死貨。1970年代之前，香港流行供月餅會，提前一年每月供一次款，第二年就可以攞幾盒月餅送禮。
而家嘅月餅多數用透明膠袋獨立包裝，放入方型或圓形鐵罐入面。舊時包裝無咁講究，只係將幾個月餅疊起用玉扣紙捲成一筒，矜貴啲就用紙盒包裝。