開主選單

新站鎮 (蛟河)

蛟河嘅鎮

座標: 43°52′29.8″N 127°20′3.2″E / 43.874944°N 127.334222°E / 43.874944; 127.334222

新站鎮
新站 - panoramio.jpg
新站村景
統計資料
普通話拼音 Xinzhan
所屬省級政區 吉林
所屬地級政區 吉林
所屬縣級政區 蛟河
政區類別
首長 黃春龍[1]
面積 601[2] km²
社區數目 1[3]
行政村數目 31[3]
人口(2012) 44569人[2]
人口密度 74人/km²
郵政編碼 132000[4]
政區代碼 220281100[5]
網站: 蛟河市新站鎮


新站粵拼san1 zaam6)係位於中國吉林省吉林市蛟河市,喺離蛟河市區以北17公里處[2],西距吉林市110公里、長春200公里[6],北離哈爾濱310公里[4]。東面、北面係舒蘭前進鄉,南面接住拉法,西面靠住天崗[2]。轄區面積601 km²[2],下轄一個社區、31條行政村,再向下分爲10個居委會、122個自然屯[2]。鎮府駐喺新站鎮墟[7],鎮墟面積3.7 km²[4]

新站嘅名源自拉法驛站。喺清中葉時拉法驛站搬來呢度,稱爲拉法新站,於是當地地名嗌做新站[7]

1933年設新站保,1938年設新站街。1954年10月,新站村昇爲新站鎮[8]。後來1958、1959年間公社化運動,新站由鎮變爲公社,直到1979年3月從公社度析置返新站鎮。1983年7月啲公社恢復爲鄉,呢時新站鎮同新站鄉並存[8]。1985年3月,新站鄉併入新站鎮[註 1]

1997年時,新站鎮面積364 km²,人口3.6萬,轄22條村、10個居委會[7]

  • 居委會:躍進、新濱、民主、新酒、民勝、天德、友誼、蓬萊、鐵西、新醫
  • 村:新站、新鮮、文化、河南、仁和、近河、保安、東靠山、珍珠、五家子、吉祥、六家子、朝陽溝、北安、老爺嶺、東溝、養魚、復興、平原、大利、小姑家、民主

2001年,龍鳳鄉併入新站鎮[7]

2018年,新站將轄下嘅兩個社區合併,即新驛同新躍合成咗新毓[9]

呢度打過場拉新戰役,即係拉法新站戰役,因爲主場喺拉法,可以乾脆嗌做拉法戰役。呢場仗係國共內戰時,國共兩軍爲咗爭奪長圖鐵路而打,打喺1946年6月7號夜晚到6月10號上晝,其中喺拉法打嘅時間係七號晚黑到八號朝早,國民政府軍輸咗,敗退新站,之後輪到新站打,到10號朝早,守喺新站嘅國民政府軍覆沒。呢場仗成爲中共嘅東北民主聯軍喺撤退時贏嘅第一場仗[10]

地理

新站地處東經127°09′—127°32′,北緯43°51′—44°07′之間,地形上位於新站盆地,東面係大荒頂子山,西北部係老爺嶺,南部係拉法山,轄區最高峰係西土山,海拔1189.3米[2]。呢個鎮木材資源豐富,有平川、龍鳳、老爺嶺三個大林場[6],泥炭資源亦豐富,儲量達1.3億km³以上[4]。呢帶多山,係長白山嘅餘脈[4]

東面有龍鳳河,西部有老爺嶺河,北部有民主河,喺新站嘅南部滙合成拉法河[2],最後喺蛟河市區滙入松花湖。呢個鎮嘅水資源幾豐富吓,有一座中型水庫、一座細I型水庫、八座細II型水庫、四個長壩,總貯水量102萬km³,水域面積1935畝。所以漁業發達,年產水產品約14.7萬公斤[2]

交通上有榆江公路、204省道蛟榆公路(蛟河─榆樹)穿過[7],另外拉濱鐵路喺度有設新站站,琿烏高速亦有新站嘅出入口[6]

經濟

農業上,有12375公頃嘅耕地,其中水田有2263公頃,旱田有10112公頃。林地面積55872公頃,有林地32544公頃,林木覆蓋率58%[2]。主要作物有粟米水稻大豆雲耳[6],其中種咗2700公頃嘅糯粟[2]。主要畜牧有生豬黃牛梅花鹿、家禽[2],有新欣、平川兩大梅花鹿場[6]

工業上,有40幾家企業,有百幾家豆、糧米廠[2]。重要企業有長白山酒業、于氏木業、長白木業[2]

第三產業上有交通、批發、零沽、貿易、飲食等行業。貿易、餐飲單位764家,從業人員1944人,年增長値8620萬元人民幣[2]

人口

2012年,新站有13278戶居民共4萬4569人,其中城鎮人口2萬311人[2]。由於經濟、商業發展,實際住喺鎮墟嘅人口有兩萬兩千人左右[2]

政區

新站轄1個社區、31條村[3]

  • 社區:新毓
  • 村:石門子、寶山、雙旺、長友、雙頂子、基良、富安、龍鳳、冷風口、保安、靠山、珍珠、平原、復興、養魚、東溝、朝陽、六家子、五家子、吉祥、老爺嶺、北安、小姑家、大利、文化、河南、艾河、仁和、新站、蔬菜、新鮮

地名釋義、沿革

  • 新驛(san1 jik6
    之前建置未詳。喺2018年同新躍社區合併成新毓社區。
  • 新躍(san1 joek6
    喺2011年成立,因爲當地有當年嘅躍進委員會而得名。喺2018年同新驛社區合併成新毓社區。
  • 新毓(san1 juk1
    喺2018年成立,合併自原先嘅新驛同新躍兩個社區。
  • 石門子(sek6 mun4 zi2
    因爲呢度東西兩側山對住,個樣似而得名。
    滿洲國時設行政村,1946年屬龍鳳區,1954年撤區,屬雙頂子鄉,1959年屬龍鳳公社嘅寶山管理區,1962年分出做石門子大隊;1983年改成村委會。2001年隨住龍鳳鄉撤銷,併入新站鎮。
  • 寶山(bou2 saan1
    民國十六年(1927年)由謝氏開村,因爲呢度有好多都有螞蟻竇,所以初時地名叫螞蟻稍maa5 ngai5 saau2)。後來定行政地名時,話呢帶要寶字打頭,用「山河林安」跟做名,於是改名叫寶山,所以呢度附近又有寶河寶林寶安嘅地名。
    呢度有寶山北山遺址,喺條村北面座山度出土咗一件石、一件石、三塊片,屬西團山文化,喺2009年第三次文物普查時發現。
    1927年開村,叫螞蟻稍;1936年設行政村,叫寶山;1946年屬龍鳳區;1954年屬雙頂子鄉;1962年設寶山大隊;1983年改成村委會;2001年龍鳳鄉撤銷,併入新站鎮。
  • 雙旺(soeng1 wong6
    民國十九年(1930年)開始有人住,墾荒人姓,初時因爲呢度離寶安屯近,而叫做寶林bou2 lam4)。之後村前有兩笪山地,啲幾肥,種嘅大豐收,兼且種出嘅葉夠厚、味又香,能夠賣個好價錢,令農戶收入幾好,就改地名叫雙旺,意思係「兩笪地都興旺」噉解。
    1930年開始墾荒,1936年開村,叫寶林,1938年改名叫雙旺。1946年屬龍鳳區嘅青梁村,1954年撤區,屬雙頂子鄉,1959年屬龍鳳公社嘅雙頂子管理區,1962年分出雙旺大隊,1983年大隊改成村委會。佢原本屬龍鳳鄉,2001年龍鳳撤銷後,歸新站鎮管。
  • 長友(coeng4 jau5
    民國十一年(1922年)由姜氏開村,當初叫蛤蟆塘gap6/haa4*haa1 maa4*mou1 tong4),因爲呢度有好多蛤乸。1936年設行政村時改名叫長有coeng4 jau5),攞「長久富有」嘅意頭。1949年後國家統計局登記地名時,記成同音嘅長友。
    1922年開始有居民,叫蛤蟆塘,1936年改叫長有。1946年屬龍鳳區,1954年屬龍鳳鄉,1959年屬龍鳳管理區,1962年分出做長友大隊,1983年大隊改成村委會,2001年龍鳳撤銷後,歸新站鎮管。
  • 雙頂子(soeng1 ding2 zi2
    道光十一年(1831年)由袁氏開村,因爲村北五百米處有座山,有兩個山頂並列凸出,因而得名。
    1831年開村,1936年設行政村,1946年屬龍鳳區,1954年屬雙頂子鄉,1959年做咗龍鳳公社嘅雙頂子管理區,1962年改成大隊,1983年改成村委會,2001年龍鳳鄉撤銷,併入新站鎮。
  • 基良(gei1 loeng4
    道光十一年(1831年)由袁氏開村,喺處開設幾個露天木材倉庫,當地話叫呢種倉庫做「楞場」,後來因爲火燭,全部燒晒,所以當時呢度叫火燒楞(楞讀令,fo2 siu1 ling6)。後來因爲個名唔好聽,而改叫基良,意思係「善良」噉解。
    1831年開始有人住,叫火燒楞,1937年設行政村,1947年改名叫基良,屬龍鳳區,1954年上頭嘅區改成鄉,1959年屬富安管理區,1962年設基良大隊,1983年大隊改成村委會,2001年隨住龍鳳鄉撤銷,呢度歸入新站鎮。
  • 富安(fu3 on1
    民國九年(1920年)由張氏開村,因爲隔籬條水產豐富,諸如有蛤乸鯇魚,啲人生活富足,所以初時地名叫富河fu3 ho4)。後來呢帶地名話要跟「安」字尾,於是改成富安,所以富安附近有東安喜安于安呢啲地名。
    1920年開村,叫富河,1936年設行政村,改名叫富安,1946年屬龍鳳區,1954年上頭改成鄉,1959年改成富安管理區,1962年改成大隊,1983年改成村委會,2001年龍鳳鄉撤銷時,呢度歸入新站鎮。
  • 龍鳳(lung4 fung6
    光緒七年(1881年)由王氏開村,初時名叫平安ping4 on1)。後來呢度傳聞話有打交,啲人話係鬥,就改咗呢個名攞個吉祥意頭
    呢度隔籬有龍鳳河流經,因村而得河名。龍鳳河上有龍鳳水庫,1970年始建,1973年12月落成。個水庫之下有相應嘅龍鳳灌區。
    1881年開村,叫平安;1936年設行政村,叫龍鳳;1938年設村公所;1946年屬龍鳳區;1954年屬龍鳳鄉;公社化時,龍鳳鄉同雙頂子鄉合併成龍鳳公社,而公社駐地搬咗去雙頂子村度,1959年設公社嘅龍鳳管理區;1962年改成大隊;1983年改成村委會;2001年龍鳳鄉撤銷,併入新站鎮。
  • 冷風口(laang5 fung1 hau2
    同治十一年(1872年)由常氏開村,因爲呢度係個風口,四時都打凍風,即使係夏季都照樣有西北風來襲嘅感覺,凍過第啲地方,因而得名。
    1872年開村,1936年設行政村,1959年屬龍鳳管理區,1962年分出做冷風口大隊,1983年改成村委會,2001年龍鳳鄉撤銷,併入新站鎮。
  • 保安(bou2 on1
    光緒二十四年(1844年)開村,舊陣村中少,初時叫大姑娘daai6 gu1 noeng4)。後來以「保證安全,吉祥平安」意思改叫保安。一種講法話設行政地名前呢度冇名,而有個叫侯國清嘅人住响度,花名叫南城王。
    1844年開村,叫大姑娘;1936年設行政村,叫保安,屬新站保大甸子甲;1946年屬新站區;1959年改做管理區,屬幸福之路公社;1962年改成大隊;1983年改成村委會。
  • 靠山(kaau3 saan1
    呢度有東西兩個部分。東靠山dung1 kaau3 saan1)喺清道光二十四年(1844年)開村,佢喺座山嘅東面;西靠山sai1 kaau3 saan1)亦係清道光二十四年開村,開村姓係段氏萬氏龐氏,喺座山嘅西面。
    1844年開村,1936年設行政村,1938年屬新站保嘅大甸子甲;1958年屬幸福之路公社嘅保安管理區;1962年屬保安大隊;1970年分出做靠山大隊;1983年改成村委會。因爲駐地喺東面部分,所以村委會又叫東靠山。
  • 珍珠(zan1 zyu1
    滿洲國時由劉氏開村,初時叫孤山子gu1 saan1 zi2),因爲附近有座山拔地而起,尤其顯眼。後來改名叫雙鳳soeng1 fung6),攞個龍鳳呈祥嘅意頭。公社化時又再改叫珍珠,話條村同珍珠一樣咁寶貴。
    1936年開村,叫孤山子,屬新站保嘅薛家崴子甲;1947年改名叫雙鳳;1958年改名叫珍珠,屬幸福之路公社嘅大吉管理區;1962年屬新站大隊;1977年分出做珍珠大隊;1983年改成村委會。
  • 平原(ping4 jyun4
    民國元年(1912年)開村,嗰時呢度大多係荒地同樹叢,遍地雜草,所以初時叫撂荒地(撂讀略,loek6 fong1 dei6)。呢度所在嘅山坑北趟溝,素稱做「平川」,加之本身地形比較平,所以後來改名叫平原。
    1912年開村,叫撂荒地;1940年設行政村,屬新站保嘅東溝甲;1945年改叫平原;1946年屬龍鳳區嘅民主村;1954年劃歸新站鎮;1959年屬幸福之路公社嘅民主管理區;1962年分出做平原大隊;1983年改成村委會。
  • 復興(fuk6 hing1
    民國元年(1912年)開村,初時未有名,後來因爲呢度笪地屬鮮光銀行所有,所以地名叫鮮光sin1 gwong1),後來改名叫復興,意思係「復興中國」噉解。
    1912年開村,1931年後笪地歸鮮光銀行,1936年設行政村,叫鮮光;1947年改叫復興,屬龍鳳區嘅民主村;1954年劃畀新站鎮;1962年屬民主大隊;1972年分出做大嶺大隊;1977年改叫復興大隊;1983年改成村委會。
  • 養魚(joeng5 jyu4*2
    咸豐十年,呢度有笪埞方叫抽水亭cau1 seoi2 ting4),生住啲細鱗,魚多肉靚,見食,於是有人喺度捉魚、整成魚乾搦去賣,隨之開村,叫晾魚場long6 jyu4 coeng4),又叫過做曬魚場saai3 jyu4 coeng4)。國共內戰期間,條村來咗個于氏嘅山東人,佢喺當地名望好高,出於佢個人原因,對隻晾字避忌,於是啲人就佢,改名叫養魚,兼且隻魚字搭于字同音,即「養于」,亦加之當時村北便條河嘅魚捉到少晒,要靠養魚來開生計。
    1860年開村,叫曬魚場;1936年設行政村,叫晾魚場,屬新站保嘅小東溝甲;1948年改名叫養魚;1950年同復興村合併,叫民主村;1959年改成管理區,屬幸福之路公社;1962年改成大隊;1981年恢復原名;1983年改成村委會。
  • 東溝(dung1 kau1
    1935年由徐氏開村,因爲佢喺三道河東便,又喺個山坑度,因而得名。
    1935年開村,叫東溝,屬新站保東溝甲;1940年屬龍鳳村;1946年屬龍鳳區嘅養魚村;1959年屬幸福之路公社嘅民主管理區;1972年分出做東溝大隊;1983年改成村委會。
  • 朝陽(ciu4 joeng4
    光緒三十年(1904年)有李氏喺度開舖,因爲佢耳仔生得大,所以初時地名叫李大耳朵店lei5 daai6 ji5 doe2 dim3。後來因爲呢度地勢向南朝陽,因而改名。
    1904年開村,叫李大耳朵店;1936年設行政村;呢度有朝陽河流經,因村名得河名。
  • 六家子(luk6 gaa1 zi2
    同治三年(1864年)開村,有五姓六戶:劉氏(兩戶)、馬氏李氏房氏常氏。按呢六戶人而叫六家子。1935年時呢度經常畀蘿蔔頭騷擾,啲人自組民團,改名叫治安zi6 on1)。後來先至恢復原名。
    呢度有六家子隧道,係拉濱鐵路行經嘅山隧,喺1935年落成,2003年7月翻修過。當地亦有啲古蹟:喺條村東面座山度有六家子東山山城,係高句麗修築嘅軍事城堡,喺1985年第二次文物普查時發現;而山城嘅東坡又有六家子東山遺物散佈點,採集到兩嚿灰陶殘片,時期上則係屬渤海國,亦係1985年第二次文物普查時發現。
    1864年開村,叫六家子;1935年設行政村,叫治安,屬新站保嘅六家子甲;1942年併入龍鳳村;1946年再次設村,屬龍鳳區;1954年屬新站區嘅大吉村;1962年分出做六家子大隊;1983年改做村委會。
  • 五家子(ng5 gaa1 zi2
    咸豐年間開村,有五戶四姓:劉氏馬氏楊氏張氏,因而得名。呢度有五家子攔河,有對應嘅灌區
    約喺1851年~1861年間開村,叫五家子;1936年設行政村,屬新站保嘅薛家崴子甲;光復後屬大吉村;1977年分出做五家子大隊;1983年改成村委會。
  • 吉祥(gat1 coeng4
    清咸豐年間由薛氏開村,初時叫薛家崴子sit3 gaa1 wai1 zi2);後來以「大吉大利」嘅意頭改名叫大吉daai6 gat1);之後又改叫吉祥。
    約喺1851年~1861年間開村,叫薛家崴子;1936年設行政村,叫大吉,屬新站保嘅薛家崴子甲;1946年屬新站區;1958年改叫吉祥;1959年屬幸福之路公社嘅大吉管理區;1962年改叫吉祥大隊;1983年改成村委會。
  • 老爺嶺(lou5 je4 ling5*leng5
    光緒十年(1884年)開始有人住,人多之後,喺老爺嶺山上同山下各開一村,分別叫老爺嶺上lou5 je4 ling5 soeng6)同老爺嶺下lou5 je4 ling5 haa6),兩村合一後就叫老爺嶺村。
    呢度有老爺嶺戰跡地,係國共內戰拉法-新站戰役嘅其中一場戰鬥所在地,開打喺1946年。
    1884年有戶,1936年設上下兩條行政村,屬新站保嘅小姑家甲;1947年屬新站區;1959年屬幸福之路公社嘅北安管理區;1962年分出做老爺嶺大隊;1983年改成村委會;2005年上下兩條村合一。
  • 北安(bak1 on1
    咸豐元年(1851年)開村,當初呢度四圍嘅山都係生晒雜草矮木,方圓幾公里冇大樹,所以初時地名叫亂柴頂子lyun6 caai4 ding2 zi2)。後來呢度出過兩次火燭、一次瘟疫,爲咗求平安,而起咗現時地名。
    呢度附近曾經有條北安河,現已乾水。喺呢條村度,出土咗4件石斧、1件敲㳫器,屬西團山文化,喺1985年第二次文物普查時發現,考古遺址名叫「北安屯團山子遺址」。
    1851年開村,叫亂柴頂子;1936年設行政村,叫北安,屬新站保嘅小姑家甲;1946年屬新站區;1959年設北安管理區,屬幸福之路公社;1962年改成大隊;1983年改成村委會。
  • 小姑家(siu2 gu1 gaa1
    1935年由谷氏開村,初時由於佢喺中間座山度,而叫做腰崗jiu1 gong1)。1990年代時,北崗、南崗、車站三條行政村都併入腰崗,再改名叫小姑家。呢個名出於呢度住嘅人少,兼且全部都係姓谷嘅,官話中「谷」同「孤」諧音(唔計聲調都係讀gu),所以叫小孤家,後來寫成咗同音嘅「小姑家」。
    呢度有小姑家水庫,1958年始建,1979年落成。個水庫有對應嘅灌區。
    1935年開村,叫腰崗,第個名叫小孤家;1938年設行政村,屬新站保嘅小姑家甲;1942年行政上併入拉法村;1948年重設行政村,屬拉法區;1959年屬幸福之路公社嘅北安管理區;1968年分出做大隊;1983年改成村委會;1990年改叫小姑家。
  • 大利(daai6 lei6
    光緒元年(1875年)由狄氏孫氏開村。滿洲國期間,呢度係日本人養奶牛、耕地嘅埞方,起咗幾間帶,因而得名白房子baak6 fong4 zi2)。東北光復後,呢度改名叫大利,亦即「大吉大利」噉解。
    1875年開村;1935年設行政村,叫白房子,屬新站保嘅小姑家甲;1945年改叫大利。1959年屬幸福之路公社嘅北安管理區;1962年分出做大利大隊;1983年改成村委會。

景點

主要景點有金斗宮、長白山地下酒窖、龍鳳山莊[2]、國共美三方談判遺址[4]、龍鳳水庫、愛河水庫、黃泥河水庫、前紅陽羅鍋地、遼代界壕、拉新戰役談判舊址、革命烈士陵園、河南村百年古榆[11]。其中金斗宮係清光緒年間嘅道宮,而龍鳳有漂流,漂流河道全長8.5公里,落差35米[6]

  1. 此外,有講話新站喺1946年設新站區,建鎮之後喺1958年改成幸福之路公社[7]。但係同另一個講法有出入,呢個講法話,喺1945年蛟河就已經有12個縣轄區,區下再轄村。經過同週邊啲縣嘅政區變動後,1950年各縣轄區重新按數字起名排序爲16個區。1954年9月12號有14個區撤銷咗,保留一、三區,啲區劃成42條村。而公社化運動時,係1958年10月1號先改曬啲鄉鎮爲18個作業區,再喺1959年4月改成18個公社。而呢個講法亦無話公社名叫做幸福之路,反而話係叫新站公社,然後1979年公社析置出新站鎮,1983年新站公社變成新站鄉,1985年鄉鎮合併[8]。所以僅作參攷。

  1. "新站鎮領導分工". 新站鎮. 2012年10月25號. 喺2015年3月9號搵到. 
  2. 2.00 2.01 2.02 2.03 2.04 2.05 2.06 2.07 2.08 2.09 2.10 2.11 2.12 2.13 2.14 2.15 2.16 2.17 "新站鎮概況". 新站鎮. 2012年10月26號. 喺2015年3月9號搵到. 
  3. 3.0 3.1 3.2 "2018年統計用區劃代碼和城鄉劃分代碼:新站鎮". 中華人民共和國國家統計局. 喺2019年2月20號搵到. 
  4. 4.0 4.1 4.2 4.3 4.4 4.5 "吉林吉林市蛟河市新站鎮". 博雅地名網. 喺2015年3月9號搵到. 
  5. "2013年統計用區劃代碼和城鄉劃分代碼:蛟河市". 中華人民共和國國家統計局. 喺2015年3月9號搵到. 
  6. 6.0 6.1 6.2 6.3 6.4 6.5 "新站鎮投資優勢". 新站鎮. 2012年10月26號. 喺2015年3月9號搵到. 
  7. 7.0 7.1 7.2 7.3 7.4 7.5 "新站鎮". 行政區劃網. 2011年3月22號. 喺2015年3月9號搵到. 
  8. 8.0 8.1 8.2 "蛟河市歷史沿革". 行政區劃網. 2011年5月19號. (原先內容喺2016年3月10號歸檔). 喺2015年3月9號搵到. 
  9. 可對比2017年2018年嘅政區代碼變動。
  10. "拉法「六七」戰鬥烈士紀念碑". 松花江網. 2014年9月24號. 喺2015年3月9號搵到. 
  11. "新站鎮交通地圖". 中國電子地圖. 喺2015年3月9號搵到. 

出面網頁