久邇宮朝融王

久邇宮朝融王（日文：くにのみやあさあきらおう，1901年 2月2號—1959年 12月7號），係日本舊皇族，邦彥王大仔、香淳皇后大佬、上皇明仁嘅舅父，久邇宮第三任當主。佢同時係海軍軍人，最高官位為海軍中將大勳位功三級。響皇籍脫離之後，改名叫久邇朝融。

經歷

朝融王1901年響東京府久邇宮宮邸出世，係邦彥王同妃俔子嘅大仔。佢先後就讀學習阮初等科同埋中等科，1921年海軍兵學校畢業，正式從軍，之後曾經讀過海軍水雷學校。

朝融王

1924年升做海軍中尉，一年後伏見宮博恭王決定將三女知子女王嫁畀朝融，同年結婚。之後佢又讀海軍砲術學校高等科同埋海軍大學校。1929年，老豆死咗，朝融王繼承久邇宮當主一位，1932年升為大勳位。1934年，佢因為支持昭和六年乃至九年事變（即係指發動第二次中日戰爭），而獲勳為從軍記章同埋金杯一個。

1937年升為海軍中佐，兩年後又升做海軍大佐，1940年因為響中日戰爭表現傑出，獲頒做功四級金鷂勳章同埋畀佢六千日圓做禮物。佢響1941年到台灣高雄出征，三年後調返嚟日本，做海軍練習聯合航空總隊司令部同埋第二十聯合航空隊司令。1945年，佢為做海軍中尉，先後做過軍令部同埋海軍省，年尾編入預備役。同年響皇族會議上面，朝融王聯同恆憲王、稔彥王支持日軍無條件投降，因而畀強硬派東條英機同鳩彥王鬧。

1947年，響駐日盟軍總司令要求下，朝融王帶同一家大細皇籍脫離，改名叫久邇朝融，同年接受公職追放（1952年解除）。之後佢曾經開過牧場但失敗，跟住決定開獨家品牌「久邇香水」，之後越做越大，賺咗好多錢，最後佢將久邇宮宮主邸送畀聖心女子大學。不料，之後就生意失敗，為咗填補赤字，又將久邇宮宮別邸賣咗畀人。1959年，因為肝硬化而響東京都死，終年五十八歲。