高圓宮憲仁親王

高圓宮憲仁親王（日文：たかまどのみやのりひとしんのう^{Takamadonomiya Norihi Toshinnō}，1954年 12月29號—2002年 11月21號）係日本前親王，高圓宮初代當主，三笠宮崇仁親王同妃百合子嘅細仔，上皇明仁堂細佬。

由於佢同第八十代天皇高倉天皇撞名（高倉天皇原名都係叫憲仁），為咗避諱，所以唔會直接叫佢個名，只可以叫「高圓宮憲仁親王」。

經歷

早年

1954年，崇仁親王同妃百合子嘅細仔響三笠宮宮邸出世，改名叫憲仁。佢先後入讀松濤幼稚園、學習院初等科同埋學習院中等科，響升讀高等科嘅時侯加入寫真部，從此佢就好鍾意影相。

1978年畢業於學習院大學法學部，同年去英國皇后大學留學，三年之後返嚟日本，到國際交流基金做嘢。

高圓宮家紋

1984年，佢響加拿大駐日本大使館上面識咗生意人鳥取滋治郎大女久子，一個月之後憲仁用英文「Will you marry me?」成功響久子求婚，同年9月行納采之儀，三個月之後正式結婚。響結婚嘅同一日，憲仁由三笠宮分家，另起宮家高圓宮，個名嚟自奈良市三笠山隔離嘅高圓山。

高圓宮時代

由於憲仁一生都係日本天皇繼承順位最後一個，又係屋企細仔，比起大佬寬仁唔使負咁多期望，所以佢思想開放、性格比較隨和，成日上電視台發表個人意見。因此佢話自己係「皇室嘅發言人」。

除此之外，憲仁仲好鍾意足球，成日參加一啲有關足球嘅事務。1987年，佢出任日本足球協會總裁，由於佢識英文，因此佢多數代表協會同外國嘅人接觸。好多日本市民都知道憲仁鍾意足球一事，仲覺得佢係「活躍嘅貴族」。2001年，佢同時出任日本水難救濟協會總裁。

憲仁親王響2002年

2002年，世界盃足球賽正式舉辦，同年5月尾佢帶埋老婆久子出席開幕禮，係第一次日本皇室派官方代表到韓國。佢哋一共睇咗成19場賽事先返嚟日本。

同年11月21號，佢響加拿大駐日本大使館入面準備同人玩壁球期間，突然心室顫動引起心臟衰竭而暈低，即刻送去慶應義塾大學醫院急救。佢曾經一度有生命跡象，但係響半夜突然惡化，最後響老婆久子同意底下取消搞人工心肺裝置，跟住就死咗，終年47歲。佢嘅死令日本足球迷好震驚。同月29號行斂葬之儀，之後到落合斎場火化，最後葬響豐島岡墓地。佢嘅斂葬之儀有好多中小學生出席。