竹田恆德

竹田宮恆德王（日文：たけだのみやつねよしおう，1909年 3月4號—1992年 5月11號），係日本舊皇族，竹田宮第二代當主，恆久王大仔、明治天皇第一個外孫，同時係陸軍軍人，最高官位係陸軍中佐。1947年響駐日盟軍總司令指示下佢皇籍脫離，改名叫竹田恆德（日文：たけだつねよし），後嚟做咗國際奧林匹克委員會榮譽委員。

經歷

恆德王1909年響東京府出世，係恆久王大仔，同時係明治天皇第一個外孫，所以啲長輩都好鍾意佢。而跟住出世嘅係表弟永久王，所以佢同永久王感情好好。

後生個陣嘅恆德王

之後佢跟隨老豆嘅志向，所以佢先後就讀陸軍幼年學校同埋陸軍士官學校預科，1930年畢業於陸軍士官學校騎兵科，同前朝鮮王國王子李鍵（李堈個仔，後嚟改名叫桃山虔一）係同期畢業生。恆德王同好多皇室成員一樣，都著上新派軍服。

恆德王鍾意馬術，仲曾經響陸軍騎兵學校做先生。1938年佢畢業於陸軍大學校，正值中日戰爭時期，所以佢就畀人派去海拉爾騎兵第14連隊第3中隊長，呢一次係佢第一次上戰場。不過佢一啲都唔開心，仲話唔鍾意見到子彈。

竹田宮恆德王著住和服

1940年，全日本慶祝紀元二千六百年記念行事，佢奉昭和天皇命令去「比叡」當兵。當佢響橫濱落船之後，大仔恆正王出世。

響太平洋戰爭期間，佢用假名宮田參謀，先後參加菲律賓戰役同埋瓜達康納爾島戰役。因為佢真係好想到前線打仗，所以就夾硬到拉包爾視察。1943年，佢升為陸軍中佐，同年8月升為關東軍參謀。期間，佢曾經同滿州國皇帝溥儀交流。1945年7月，佢升任第一總軍參謀。一個月之後日本宣佈無條件投降，而恆德王代表昭和天皇向關東軍講有關投降嘅事，之後宣佈解散關東軍。

1947年響駐日盟軍總司令指示之下，恆德王帶埋一家大細皇籍脫離，改名叫竹田恆德。1950年佢受到邀請出任日本滑冰聯盟會長，正式加入體育界。因為鍾意馬術，所以佢好想參加奧運會。佢仲曾經響1936年夏季奧林匹克運動會其中一個參賽馬嘅馬主。

之後佢做過唔少有關體育嘅職務，就好似日本體育協會専務理事、日本奧林匹克委員會委員長、國際奧林匹克委員會理事（後嚟成為榮譽委員）、日本馬術連盟會長同埋全國體操協會會長等等，而佢加加埋埋有響十五個體育組織入面做過野。另外，佢仲係1964年夏季奧林匹克運動會同埋1972年冬季奧林匹克運動會嘅頭號搞手。

1992年5月11號，恆德王死咗，終年八十三歲，死後由大仔竹田恆正繼承竹田家。