兩文三語英文biliteracy and trilingualism)係香港政府推廣嘅語言政策。兩種文字係中文同埋英文,三種語言係粵語廣東話)、英語同埋普通話

喺赤鱲角嘅高速公路嘅雙文標誌

政策內容

香港政府喺香港主權移交(1997年)後實行「兩文三語」嘅語言政策:書面文係中文同埋英文、口語係粵語、英語同埋普通話。第一語言係粵語,粵語亦係族群母語第二語言係英文同普通話[1]

歷史

香港喺1840年成爲英國嘅殖民地,以自由港嘅身份,成爲大英帝國嘅轉口港。嚟自英國嘅政府官員同商人都講英文。英國政府喺香港繼續用英語嚟做官方語言,但係喺1974年,《法定語文條例》獲得通過,令中文成為另一種官方語言。1984年《中英聯合聲明》附件一規定,喺將來嘅香港特別行政區,英文會係官方語言之一,呢一點喺1990年《香港基本法》第9條入面得到確認。1997年主權移交之後,英文仍然廣泛噉喺法律同商業領域度用緊,而且幼兒園、小學、中學同大學仍然教緊學生英文。亦都有唔少地方用英文命名,尤其喺香港島就更多。

中文方面,喺1974年通過嘅《法定語文條例》度,宣佈中文係香港另一種官方語言。大多數香港居民嘅母語係粵語旗下嘅廣州話(廣東話、廣府話),政府事實上使用嘅官方語言亦都係呢種,但係《法定語文條例》並冇指定中文要講邊一種漢語變體語言。1984年《中英聯合聲明》附件一規定,喺將來嘅香港特別行政區,中文會係官方語言之一;1987年3月,《法定語文條例》經過修訂之後,要求所有新立嘅法例必須以中英文雙語制定。《香港基本法》第9條確認中文同英文兩者喺香港嘅官方地位。2006年,香港人口達到699萬,其中大約95%係華人嘅後裔,當中大部份人講粵語客家話潮州話呢幾種中文語言。[2]至於普通話,作為中國共產黨執政語言,喺1999年,香港教育局已經公開宣傳話長遠要用普通話教中文科,被語言學家包睿舜(Robert Bauer)指責係「收買」學校,但越發引起香港人抗議,反而提升粵語嘅正統地位,甚至促進咗粵語白話文書寫嘅發展。[3]

成效

中文書寫以繁體中文爲主。隨住香港中國大陸交流增多,有啲簡體字俗體字同埋源自中國民間嘅用語亦傳到去香港,少部份香港人書寫時會喺大量繁體中文之間夾雜少量簡體字、俗體字。有啲學校容許學生喺用中文作答嘅功課同考試度寫簡體字。考評局亦都容許學生喺公開考試度,使用合乎中國國家規範(即係由國家語言文字工作委員會喺1986年所頒佈嘅《簡化字總表》)嘅簡化字。喺一啲遊客區,市面上都會間中見到為大陸旅客而製作嘅簡體字標語同指示牌,不過,如果淨係得簡體字版本而冇同時提供繁體字版本,嗰啲店舖、公司或者機構都會惹起爭議,令唔少香港人覺得到本土語文文化冇受到尊重。[4][5]繁體字同英文嘅書寫,仍然係香港絕大多數嘅主流。

另外,早年部份香港作家同埋香港傳媒以粵語用字嚟寫出版讀物嘅內文,成為粵語白話文(粵文)。香港警察同法庭整理口供時,需要將證人原話忠實完整噉紀錄低,防止出現歧意而造成法律上證供無效。不過香港早期用嘅繁體中文電腦系統都嚟自台灣,用大五碼嚟到做內碼,產生咗粵文缺字嘅問題[6],後來這些缺字已經畀香港政府正式收入香港增補字符集入面,成為字集裏面嘅粵語漢字,而且向國際標準化組織補完,作為ISO 10646Unicode標準嘅一部份。而家,粵文缺字嘅問題基本上已經解決。唔只喺日常嘅電腦同網絡通訊度,粵文佔咗主導位置,近年更加有粵文文學雜誌、粵文翻譯等等出現,粵文書寫到而家已經蔚然成風,喺坊間、文藝界同語言學界都大行其道。[7]

使用

粵語係嶺南地區居民一路以嚟嘅主要母語同地區通用語,由香港開埠初期到而家,就一直係香港市區嘅主要語言,亦係今日大多數香港人嘅母語。

香港近九成人口都係以粵語嚟做母語同埋最常用語言。香港由於大部份場合都唔使用普通話,所以好多香港人嘅普通話都只有基本簡單交流嘅水平,從來唔用普通話嘅人亦都好常見。[8]

英語方面,一般受過中學至高中教育嘅人都掌握基本嘅英語,可以簡單溝通。

參考

  1. "[資料庫] 教學語言". www.edb.gov.hk (中文). 喺2021-06-04搵到.
  2. "Hong Kong Statistics – Population and Vital Events". 政府統計處. 原著喺2007-06-09歸檔. 喺2007-02-02搵到.
  3. 劉林(Juliana Liu). "廣東話vs普通話:當香港的語言遇上政治". BBC. 喺2017-06-29搵到.
  4. 林非 (2012-04-08). "咖啡店用簡體字,商家自由,不得妄論 星巴克入紫禁城,世界大同,夫復何言?". 輔仁媒體. 喺2012-04-08搵到.
  5. 外星人 (2012-04-05). "Agnès b. Café 事件過後 我們追求怎樣的語境?". 輔仁媒體. 喺2012-04-05搵到.
  6. 包括香港地名常用嘅「邨」、「埗」、「鰂」、「涌」等字,或者粵語裏面部份副詞、虛詞、語氣詞、名詞、動詞等。
  7. "【專訪】眾籌搞粵語文學期刊 90後總編:我當係生意咁". 立場新聞. 2020-06-15. 原先內容歸檔喺2021-06-04. 喺2021-06-04搵到.
  8. "引數據指9成人口慣用廣東話 沈旭暉:不以粵語為母語 全球大笑話". 立場新聞. 2016-01-11. 原著喺2021-06-04歸檔. 喺2016-01-11搵到.

睇埋