維基百科

圖書館學詞彙表

以下係圖書館學上嘅概念詞彙一覽，亦都包括咗好多資訊科學上嘅概念。

有好多人造物件都可以攞嚟儲起資訊同散佈知識，例如係傳統啲嘅圖書館（上）同埋隨住資訊科技而興起嘅電腦數據庫（下）呀噉。

圖書館學（library science）係研究點樣打理圖書館嘅領域：傳統上，圖書館學研究點樣打理書同書嘅儲藏－包括咗係有關圖書館嘅組織（簡例：啲書要點擺先方便啲用家摷書嚟睇？）同埋保養（簡例：圖書館啲氣溫同濕度要設成點先可以令啲書冇咁易爛？）呀噉；不過隨住資訊科技嘅進步，資訊仲可以用電子形式儲喺電腦數據庫等嘅電子空間嗰度，甚至出咗好多所謂嘅數碼圖書館－即係指儲嗰啲書純以電子形式存在。因為噉，廿一世紀嘅圖書館學經已將「圖書館」呢個概念廣義化咗－响佢哋心目中，「圖書館」一詞包嗮任何扮演到「儲起大量嘅資訊，兼且特登整到容易俾人攞呢啲資訊嚟用」嘅功能嘅嘢[1][2]。

圖書館學同資訊科學（information science）有好密切嘅啦掕：資訊科學泛指研究分析、操控同儲藏資訊嘅科學領域，而圖書館學正正就係研究圖書館－人類社會裏面其中一種最重要嘅資訊儲藏形式；因為噉，兩個領域有幾大嘅重疊，成日都會俾人擺埋一齊嚟講[3]。

資訊儲存

編輯
 
2009 年駱克道公共圖書館入面兩個書架；個架掕咗裝住嗰啲書嘅分類號。
睇埋：資訊系統
  • 圖書館（library）：廣義上，如果一笪地方儲住一大柞嘅資訊（例如係以書或者 DVD 等嘅形式）、而且笪地方啲設施係特登設計到等啲人可以輕易噉攞呢啲資訊嚟用，噉嗰笪地方就可以算係一間圖書館－响廿世紀打前，圖書館基本淨係指一啲以大量藏書嚟儲起一大柞資訊嘅地方，但自從廿世紀中開始，資訊科技開始愈嚟愈發達，令人有得以電子形式儲起啲資訊，甚至仲有咗數碼圖書館（digital library）噉嘅技術－即係間圖書館收藏嗰啲資訊主要（甚至完全）係以電子形式儲起嘅[1]。
  • 分類法（classification）：指將圖書館入面嗰啲資源有系統性噉分類嘅做法；好似係廿世紀嘅香港興用嘅杜威十進制圖書分類法（Dewey Decimal Classification，DDC）噉，喺呢種分類法下，間圖書館會每件資源都同佢俾返個分類號（call number），個分類號會有 3 個位，反映件資源屬邊個學科，例如分類號 500-599 嘅書冚唪唥都係屬社會科學嘅；而除咗 DDC 之外仲有好多種圖書分類法[4]。
  • 中繼資料（metadata）：泛指「描述第件數據嘅數據」[5]。
    • 識別碼（identifier）：指一個用嚟識別一件物件嘅名，而且每件物件都會有一段獨一無二嘅識別碼；例如家陣想摷資料，喺個搜尋器嗰度打作者嘅名會搵到嗮嗰位作者寫嘅出版物，所以作者名唔可以算係識別碼（就算嗰位作者得嗰一份出版物都係噉），而相比之下，一間圖書館正路會每件資源都加返個類似 10.NNNN.NNNN 噉嘅碼，而且每件資源個碼都係獨一無二嘅，所以一响搜尋器打想要嘅識別碼頂櫳淨係會摷到一件資源[6]。
  • 書目（bibliography）：指一份列出一柞文獻嘅列表；呢啲文獻之所以會俾人列嗮一齊，通常係因為佢哋係冚唪唥都同某個課題有關－例如搵條書目列出嗮「近呢 5 年出、講知識論嘅書」－或者冚唪唥都由某位作者寫嘅－例如搵條書目列出嗮歐拔·愛因斯坦寫、有關相對論嘅文獻；一份書目正路會將啲文獻逐份逐份噉列出嚟，而且會講明每份文獻嘅作者、出版年份、標題同埋「由邊間出版社出」等等嘅必要資訊[7]。
  • 檔案（archive）：一個儲住啲歷史文件同第啲紀錄嘅地方，用紙張等嘅實質形式儲起定用電腦等嘅電子形式儲起都可以算；歷史文件係指一啲描述有關某啲人、事或者地方嘅資訊嘅文件，呢啲文件喺社會科學嘅研究上好有用－社會科學想研究社會，成日都想比較同分析唔同時間或者唔同地方嘅社會嘅情況（例如「香港喺 1970 年至 1980 年間嘅經濟係點？」），所以描述人同事嘅檔案就啱嗮攞嚟做呢啲研究；好似經濟學噉，就好興用紀錄經濟嘅檔案嘅數據嚟做研究（檔案研究）[8]。
 
2007 年嘅一堆檔案
  • 數據庫（database）：係指俾電腦有系統性噉儲住啲資料嘅地方；「有系統性」意思即係話個數據庫唔淨只曉儲住啲數據，仲會設計到方便啲用家搵資料；舉個簡單例子，廿一世紀初嘅數據庫最起碼仲會包埋某啲形式嘅搜尋功能，俾用家靠打關鍵字等嘅方法摷資料，而喺實際應用上，（例如）一間企業可以用個數據庫儲住一間佢哋啲員工嘅資料，等間企業嘅管理者可以隨時靠打員工嘅名或者姓嚟搵到有關嗰位員工嘅資料[9][10]。睇埋資訊系統同電腦科學詞彙表。
  • 保養（preservation）：圖書館學上其中一樣最重要嘅工作，指嘗試做各種嘅功夫嚟令儲起咗資訊嘅物體冇咁易爛；例如傳統嘅圖書館學會嘗試保養書，用化學上嘅知識嚟研究點先至可以確保啲書唔會因為同圖書館環境入面嘅嘢起化學反應而爛[11]。
  • 權威控制（authority control）：組織文獻資料用到嘅一個工序，涉及統一一件事物嘅名；攞一件事物嚟睇，件事物可能係一個人、一笪地方或者一個概念，件事物可能有好多個唔同嘅名，例如「戴安娜王妃」同「戴安娜史賓莎」等嘅詞查實都係指緊同一個人，做權威控制嘅人就會由呢幾個名入面揀一個，做戴安娜王妃响間圖書館裏面嘅官方名，而且仲喺搜尋器等嘅地方嗰度將呢幾個名連埋一齊，想由間圖書館摷資料嘅人喺搜尋器嗰度打「戴安娜王妃」會摷到嗌戴安娜王妃做「戴安娜史賓莎」嘅出版物－做咗權威控制，啲人摷起資料上嚟就輕鬆好多[12]。
  • 目錄（catalogue）：館藏有乜嘅紀錄，以前係寫喺咭紙再將咭紙擺喺櫃，而今係擺喺數據庫
  • 機讀目錄（MARC）：一種數碼化，用來記錄某本書或者某項資料嘅書目嘅一種表示法
  • 線上公用目錄（OPAC）：一般大眾可以透過互聯網用到嘅圖書館目錄

文獻

編輯
 
一座書架上面嘅學術期刊
  • 期刊（periodical / journal）：指一啲會定時定候噉出新版嘅出版物，例如係雜誌呀噉。
    • 學術期刊（academic journal / scholarly journal）：指講學術嘢嘅期刊；喺廿一世紀初，每個學術領域－由科學至人文－都會有自己嘅期刊，即係會有例如講進化論嘅期刊、講密碼學嘅期刊或者係講管理學嘅期刊... 呀噉；做學術研究嘅人都會想將自己嘅研究成果喺學術期刊上面發佈（學術文），用呢啲文嚟同同行交流諗頭，而「喺學術期刊上面出過幾多篇文」同埋「有冇喺知名度高嘅期刊上面出文」等嘅嘢就廣泛噉俾人認為係評價一位學者嘅最重要指標之一[13][14]。
  • 索引典（thesaurus）：一本俾人搵隻字嘅同義詞或者反義詞嘅書；索引典可以攞嚟幫手摷資料－一個人喺用搜尋器摷料嗰陣，可以用索引典嚟睇吓自己摷嘅關鍵字有咩同義詞，摷埋啲同義詞，噉就可以搜尋得更加徹底[15]。

學術文

編輯
 
一個人喺度做研究，一路做一路得出咗好多結果同寫低咗好多內容。
内文：學術文

學術文（academic paper / scholarly paper）：指寫嚟講學術嘢嘅文。

  • 文獻綜述（literature review）：指寫一篇學術文嗰個人响郁手寫之前睇吓打前嘅文獻先；噉做係因為一篇學術文通常實要或多或少噉建基於打前嘅研究，例如係要諗吓打前嗰啲文獻有冇咩甩漏[註 1]，同埋家陣寫緊嗰篇文點樣補救到呢啲甩漏[16]。
  • 綜述文（review article）：學術文嘅一種，指篇文寫嚟係想總括有關某個課題嘅學術文獻嘅；啲人會寫綜述文，通常都係因為佢哋研究緊嗰個課題累積咗好大柞研究－啲學者研究一個課題就會出文獻，出到咁上下就會累積咗一大柞文，呢柞文資訊量大，搞到做呢範研究嘅人覺得係時候要整理吓手上嘅知識，於是就寫篇綜述文，喺文入面講吓研究緊個課題有邊啲主要嘅概念、相關嗰啲實驗大致上搵到啲咩結果、仲有係（基於呢啲結果）覺得做呢範嘅研究者跟住落嚟應該做咩研究... 呀噉。喺學術研究上，綜述文好多時都好受注目[17]。睇埋元分析。
  • 論文（thesis / dissertation）：一篇長（以英文計，閒閒哋萬零二萬字咁長）嘅文獻，通常都係由一位讀緊某啲學位（尤其係博士學位）嘅學生寫，喺篇文入面講吓自己喺讀個學位嘅過程當中學到啲乜；論文正路會分若干個章節，第一個章節會係文獻綜述講吓自己研究緊嗰個課題大致上嘅情況係點，跟住嗰啲章節就可能講自己做過嘅實驗或者觀察，以及係呢啲實驗觀察得到咩結果，最後仲有個章節做總結。論文通常係臨尾先至寫同交嘅[註 2]，而間院校嘅人員睇咗個學生篇論文覺得滿意，就會俾佢畢業[18]。

文獻部份

編輯
  • 作者（author）：一篇出版物嘅作者係指篇出版物嘅創造者。
  • 摘要（abstract）：指一段短短哋嘅字，用嚟大致上講吓一篇出版物（書或者學術文呀噉）嘅內容係乜，通常會擺喺啲人臨睇篇嘢嘅內容之前會睇嘅地方－例如响英文學術文裏面，一篇文嘅摘要通常會係 150-200 字左右咁長，而且會擺响篇文嘅第一頁（臨睇啲內容之前會睇嘅地方）。摘要好有用，可以幫摷文獻嘅人快速噉判斷一份文獻「係咪自己有興趣想詳細睇嘅嘢」[19]。
  • 參考文獻（citation）：指喺篇文裏面註明返話「呢個諗法係由邊個邊個喺邊年邊年講過嘅」；學術研究往往會想將自己嘅諗法建基喺第啲研究者嘅諗法之上，又或者係批判第啲研究者嘅見解，而喺呢啲情況下，寫一篇文嘅人通常要喺篇文入面註明返某個諗法係由某個人講過嘅，例如喺句句子最尾掕返隻類似 Smith (1990) 噉嘅字－意思係話句句子入面嗰個諗法係由 Smith 喺 1990 年嘅一篇文嗰度講過嘅。唔同嘅期刊對參考文獻嘅格式要求都唔同[20]。睇埋抄襲。
  • 總結（conclusion）：指响一本（唔係講故仔嘅）書或者文當中最尾嘅一個段落，通常都用嚟大致噉講返成本出版物入面嘅主要諗頭。
  • 注解（annotation）：出版物入面嘅一種附加資訊，會掕住篇文某一句句子或者某一段落；注解嘅做法係寫咗句句子或者段落之後，喺嗰句側邊加個「注解」或者類似嘅字樣，跟住再喺嗰頁近邊邊嘅位嗰度加一句仔，講返嗰句嘅注解內容係乜[註 3]；一位作者寫嘢會落注解可能覺得有部份讀者可能會對嗰句嘢講嘅內容出現誤解，於是就注解嗰度講返清楚[21]。
  • 附錄（appendix / addendum）：通常係指由作者加添嘅內容，好多時係一份文件編輯好，甚至出咗街之後先至加落去嘅；喺學術上，一篇學術出版物有陣時會加返啲附錄喺最後面嘅頁嗰度，用嚟提供一啲附加性質嘅資訊，例如作者應編輯嘅要求，提供幾幅描繪啲實驗架生嘅相，用嚟幫讀者理解場實驗係點做嘅[22]。

第啲概念

編輯
 
一位研究者（企喺度嗰個人）喺研討會上向其他研究者講解自己做緊嘅研究。
睇埋：學術
  • 流通（circulation）：借還圖書館嘅資料
  • 關鍵字（keyword / index term）：指一個捕捉到一份文獻嘅重點嘅字；例如家陣有一柞學術文獻，呢啲文獻冚唪唥都係喺度討論量子力學嘅，噉呢柞文獻嘅關鍵字就係「量子力學」，而想摷資料嚟睇嘅人可以喺搜尋器嗰度打「量子力學」嚟摷[23]。
  • 抄襲（plagiarism）：指一個人攞第個人寫或者講過嘅諗法嚟用，仲要係講到嗰個諗法好似係佢自己原創嘅噉－正常嚟講，參考同運用第啲人嘅諗法係冇問題嘅，但响學術上，想喺自己寫嘅文入面用第啲人嘅諗法就要喺篇文入面註明返話「呢個諗法係由邊個邊個喺邊年邊年講過嘅」，有心唔做呢樣嘢就會俾人當係抄襲；喺現代嘅學術上，抄襲係相當嚴重嘅罪行，一個學者俾人捉到佢抄襲，閒閒哋會冇咗份工[24]。
  • 版權（copyright）：一份原創出版物（例如係一篇學術文）嘅作者會有嘅一種權利，指淨係得位作者有得賣、分發或者決定要重新出版；响正常情況下，如果一個人唔係一份出版物嘅版權持有人，又冇得到版權持有人嘅正式批准，走去賣甚至話份嘢係自己嘅作品，嗰個人就算係犯咗法，版權持有人可以告佢[25]。
  • 研討會（conference）：一種學術性嘅聚會，俾相同領域嘅學者同研究者聚埋一齊討論佢哋做緊嘅研究－
    • 响學術界，每位研究者都梗會有某幾個課題係佢零舍有興趣研究嘅，而一場研討會有個課題，想吸引同嗰個課題相關嘅研究者聚埋一齊，大家傾各自做緊嘅研究同諗緊嘅得意諗頭；
    • 搞一場研討會嘅單位通常會係喺嗰個課題入面富有經驗嘅研究者，佢哋會喺某啲地方嗰度公佈「要搞研討會」，想參加研討會嘅研究者就會去佢哋個網頁嗰度或者用電郵嘅方法，遞交自己做緊嘅研究嘅摘要；
    • 搞研討會嗰方會睇勻嗮遞上嚟嗰啲摘要，跟住決定邊啲研究值得喺場研討會上面傾，最後就會定返個時間表，講明「研討會嗰日有邊幾份研究會做發表同埋每份發表喺咩時間做」噉嘅資訊。一般認為，研討會係做學術研究嘅人交流諗法嘅重要渠道之一[26]。

註釋

編輯
  1. ↑ 喺科學上，文獻最常見嘅甩漏係「現有嗰啲理論解釋唔到某啲現象」。
  2. ↑ 不過，多數學生都會一開始讀嗰陣就起碼諗吓篇論文大致上要寫啲乜。
  3. ↑ 即係好似噉。

睇埋

編輯

攷

編輯
  1. ↑ 1.0 1.1 Bates, M.J. & Maack, M.N. (eds.). (2010). Encyclopedia of Library and Information Sciences. Vol. 1-7. CRC Press, Boca Raton, USA.
  2. ↑ Rubin, Richard E (2010). Foundations of Library and Information Science. New York: Neal-Schuman Publishers. p. 1.
  3. ↑ Yan, Xue-Shan (2011-07-23). "Information Science: Its Past, Present and Future". Information. 2 (3): 510–527.
  4. ↑ Chan, L. M. (1994). Cataloging and Classification: An Introduction. New York: McGraw-Hill.
  5. ↑ National Information Standards Organization (NISO) (2001). Understanding Metadata (PDF). NISO Press. p. 1.
  6. ↑ Witten, Ian H.; Bainbridge, David & Nichols, David M. (2010). How to Build a Digital Library (2nd ed.). Morgan Kaufmann. pp. 352-253.
  7. ↑ Bowers, Fredson. (1995). Principles of Bibliographical Description, Oak Knoll Press.
  8. ↑ Procter, Margaret (2010). "What's an 'archivist'? Some nineteenth-century perspectives". Journal of the Society of Archivists. 31 (1): 15–27.
  9. ↑ Kroenke, David M. and David J. Auer (2007). Database Concepts. 3rd ed. New York: Prentice.
  10. ↑ Post, G. V. (1999). Database management systems: designing and building business applications. Irwin/McGraw-Hill.
  11. ↑ Conway, Paul (2010). "Preservation in the Age of Google: Digitization, Digital Preservation, and Dilemmas". Library Quarterly. 80 (1): 73.
  12. ↑ Block, R. (1999). Authority control: What it is and why it matters. Retrieved on 27 October 2006.
  13. ↑ Gary Blake; Robert W. Bly (1993). The Elements of Technical Writing. Macmillan Publishers. p. 113.
  14. ↑ Waller, A.C. (2001). Editorial Peer Review Its Strengths and Weaknesses. ASIST monograph series. Information Today.
  15. ↑ Roget, Peter. 1852. Thesaurus of English Language Words and Phrases.
  16. ↑ Cooper, Harris M. (1998). Synthesizing Research: A Guide for Literature Reviews. Applied Social Research Methods (3rd ed.). Thousand Oaks, California: SAGE Publications.
  17. ↑ "What's a "Review Article?"". The University of Texas.
  18. ↑ Thomas, Gary (2009) Your Research Project. Thousand Oaks: Sage.
  19. ↑ Gary Blake and Robert W. Bly, The Elements of Technical Writing, pg. 117. New York: Macmillan Publishers, 1993.
  20. ↑ Association of Legal Writing Directors & Darby Dickerson, ALWD Citation Manual: A Professional System of Citation, 4th ed. (New York: Aspen, 2010),
  21. ↑ Greetham, David C. (28 October 2015) [1992]. Textual Scholarship: An Introduction. Garland Reference Library of the Humanities. 1417. Routledge.
  22. ↑ How to create an APA Style appendix. Scribbr.
  23. ↑ Ferris, Anna M. (2018). "Birth of a Subject Heading". Library Resources & Technical Services. 62 (1): 16–27.
  24. ↑ Eaton, Sarah Elaine (August 2017). "Comparative Analysis of Institutional Policy Definitions of Plagiarism: A Pan-Canadian University Study". Interchange. 48 (3): 271-281.
  25. ↑ Dowd, Raymond J. (2006). Copyright Litigation Handbook (1st ed.). Thomson West.
  26. ↑ Parncutt, Richard; Meyer-Kahlen, Nils; Sattmann, Sabrina (2019-12-20). Iles, Alastair (ed.). "Live-streaming at international academic conferences: Technical and organizational options for single- and multiple-location formats". Elementa: Science of the Anthropocene. 7 (54).
由「https://zh-yue.wikipedia.org/w/index.php?title=圖書館學詞彙表&oldid=2150004」收