學術寫作

學術寫作hok6 seot6 se2 zok3（英文：academic writing）係一種冇虛構性質嘅寫作，泛指寫嚟講學術嘢嘅文字作品。學術寫作有得細分做好多類－包括係寫嚟做理論型探究嘅文、寫嚟匯報一份實驗嘅結果嘅文、或者係攞檔案嚟做分析嘅文... 呀噉。呢啲咁多唔同嘅文字作品組成咗所謂嘅學術文獻－學術文獻嘅存在令到學術工作者有得彼此交流自己嘅諗頭，係學術研究不可或缺嘅一環。

一個人喺度做研究，一路得出咗好多結果同寫低咗好多內容。

對於從事學術工作嘅人嚟講，學術寫作係一樣好緊要嘅技能：

• 科學領域嘅研究者（科學家）需要例如寫報告，同人解釋自己做嘅實驗或者提倡嘅理論；
• 工程學領域嘅研究者都要寫文，同人解釋例如自己件發明係點運作嘅，或者件發明可以攞嚟有咩用；
• 人文學領域嘅研究者都係要寫文，例如分析某一份文學作品或者一首樂曲（人文學成日做啲噉嘅研究）呀噉。

因為學術寫作咁緊要，有啲學術工作者甚至仲撰文，同啲同行傾點樣先可以有效噉做學術寫作同埋教學生做學術寫作。亦都有學術工作者會對學術文獻做社科研究，剖析「唔同領域嘅學者寫起嘢上嚟有咩分別」以及「邊啲寫作方式能夠更有效噉促進諗頭嘅交流」噉嘅問題。

定位

一座書架上面嘅學術期刊；呢啲期刊喺出版前會俾編輯以及同儕評者好詳細噉評鑑，覺得啲文夠好先至會登。

學術寫作泛指寫嚟講學術（指有經過組織嘅知識）嘢嘅文字作品，最重要嘅功用係交流一啲學術上嘅諗頭，最理想係達致喺思考上啟發讀者，促進知識嘅發展。例如喺 2017 年就有管理學者撰文，喺篇文入面噉樣描述學術寫作做嘅嘢：

「

粵文翻譯：我主張學術寫作係一場溝通嘅舉動，建基於一拃既定嘅慣例，涉及好多方唔同嘅行動者（作者、編輯、同儕評者同埋第啲學者），並且目的係想要傳達一個核心信息（貢獻）俾一班... 由學者同應用工作者組成嘅讀者睇。

」

學術寫作係一樣艱鉅嘅工作：喺廿一世紀初嘅學界，一位學者寫好咗一篇文之後就要將篇文遞交上去睇啱嘅期刊或者出版者度；而出版方第一時間經已會簡略噉睇吓篇文啲行文係咪啱攞去出版，唔啱嘅就會俾人檯面拒絕－據估計喺 2010 年代，有超過 50% 嘅文都係俾人檯面拒絕咗嘅；過到第一輪嘅審視之後，一篇文就會俾人攞去做同儕互評－即係出版方會聯絡啲對篇文個研究課題有返咁上下熟嘅學者，叫呢啲學者幫手詳細噉評，評吓篇文係咪適合攞去登；呢啲學者有一定嘅機率會提議出版方拒絕篇文，而就算篇文最後係登到，都要經過閒閒哋三四次（喺評者嘅意見下做）嘅修改先至俾人評定係質素夠高，出版方肯攞去出版－成個過程可以用成三四個月咁耐嘅時間。學者對啲文嘅行文同用詞好講究，有一套套特定嘅標準要跟從，想確保寫嘅文能夠清晰噉表達自己嘅諗頭。

組成部份

一般嚟講，無論係邊個領域或者邊種類型都好，一份學術文都大致上會跟以下噉嘅流程：

• 摘要：指一段短短哋嘅字（喺英文學術寫作裏面通常係 150 - 200 字左右咁長），用嚟大致上噉講吓一篇出版物嘅內容係乜；摘要通常會擺喺啲人臨睇篇嘢嘅內容之前會睇嘅地方，例如係篇文第一頁最上個位，用意係要幫摷文獻嚟睇嘅人有得快速噉判斷一份文獻「係咪自己有興趣想詳細睇嘅嘢」。
• 文獻綜述：正路嚟講，研究人員喺郁手做新嘅研究之前，都實會摷吓同讀吓自己研究緊嗰範嗰啲近期文獻；佢哋噉做嘅用意係想睇吓嗰範嗰啲研究者近排做咗啲乜同埋有冇乜嘢新發現或者理論－噉樣做一嚟係要攞靈感，二嚟係要費事自己嘥時間走去做一啲人哋已經做咗嘅嘢；而喺做討論（包括寫科學文獻）嗰陣，研究者通常首先會大致上噉概括吓嗰個研究課題，講吓個課題有啲乜嘢主要理論同諗頭，跟住就會講吓呢啲理論同諗頭有冇啲乜嘢甩漏（所以先至需要做份新嘅研究嚟補救呢啲甩漏）－例如做新科學研究嘅常見理由包括「現有嗰啲理論解釋唔到某啲現象」，又或者係個研究者嫌打前嗰啲研究用嘅量度方法唔掂... 呀噉。
• 諗法理據：講完現有嗰啲文獻之後，位研究者就要提出自己嘅諗法同埋有啲理據嚟支撐自己提出嘅諗法；响實證嘅科學上，「支撐自己提出嘅諗法」通常都係實際噉去做實驗或者觀察嚟攞數據，並且對呢啲數據作出分析（詳情可以睇吓統計分析方面嘅嘢）同埋呢啲分析得出嘅結果係點。
• 討論總結：提出咗諗法，又搵到證據撐自己個諗法之後，研究者正路會大致上噉總結吓自己搵到嘅結果，包括係嘗試解釋呢啲結果（解釋現象係學術研究嘅一大目標）或者講吓呢啲結果同現有嘅知識有咩關係（會唔會挑戰某啲既有嘅睇法）... 呀噉－例如「對於我而家呢個實驗，手上呢兩個理論會作出唔同嘅假說，做呢個實驗嘗試驗證邊個理論作嘅假說先至係真確，實驗結果撐理論 A 多過撐理論 B，而理論 B 要作出噉噉噉嘅修改先至可以令佢有說服力」噉嘅推論。

如是者，學術界作為一嚿知識體就一路係噉有進展－後人基於前人做嘅研究嚟諗新橋，係噉累積數據同埋知識。

系統綜述

「如果我睇得更遠，係因為我企咗喺巨人嘅膊頭上面。」

牛頓

喺學術寫作上，「文獻綜述要點做」可以幾撈絞。求知呢家嘢本質上就係要求一個人大量噉睇前人諗過嘅嘢：想像家陣有位學者想對理論 A 作出創新，要挑戰理論 A 嘅某啲基本假設，同時提出新嘅諗頭答「嗰啲基本假設唔成立，今後要點樣思考理論 A 相關嗰啲現象？」噉嘅問題；噉嘅話，佢必然要好熟理論 A 嘅嘢；喺最理想嘅情況下，佢可以將古往今來講理論 A 嘅文獻冚唪唥睇嗮佢－但現實係唔理想嘅，人類有嘅文獻多得滯，嗰位學者頂攏淨係可以集中睇最重要嗰啲文獻。於是就帶出咗以下呢啲問題：

• 摷文獻嚟睇嗰陣，要點摷法先至可以摷到嗮最重要嗰啲料出嚟呢？
• 睇一位學者寫嘅文嗰陣，係咪要考慮埋佢摷文獻嘅方法，知佢有冇咩甩漏？

... 呀噉。

Google Scholar 係廿一世紀初學者最常用嘅搜尋器之一；專畀人用嚟摷學術文－想像（例如）有人發現 Google Scholar 用嘅演算法有問題，噉一位研究者就知「齋靠 Google Scholar 嚟摷文獻睇嘅學者寫嘅嘢，可能有偏差」。

系統綜述就係指「有系統」噉做文獻綜述，個人會諗清楚「自己用咩搜尋器摷文獻嚟睇？嗰個搜尋器係咪靠得住？」等嘅問題（睇埋後設認知嘅概念）。一般嚟講，要做系統綜述，需要考慮以下呢啲嘢：

• 要用咩做標準決定包邊啲文？呢場綜述會唔會淨係睇某啲時期之間出嘅文？會唔會淨係包用某隻實驗方法做嘅研究？會唔會淨係包做喺某類對象身上嘅研究（例如今次綜述淨係睇研究昆蟲嘅動物行為研究）？會唔會排除某啲特定類嘅文（例如已知某隻統計分析方法有問題，所以用嗰隻方法嘅文冚唪唥排除）？
• 用咗咩方法摷文獻？呢場綜述用咗邊啲搜尋器（睇吓 Google Scholar）摷文獻睇？用咗咩關鍵字嚟摷文？
• 摷嗮啲文返嚟，按標準排除咗唔想要嗰啲文之後，有冇檢驗吓啲文嘅質素？有關「點樣判定一份研究嘅質素」，可以睇吓樣本大細同雙盲等嘅概念。
• 有冇做元分析或者敏感度分析？

研究者最後就會畫個表出嚟，總括嗮經過咁多篩選程序淨低嘅文，講吓呢啲文（例如）用咗咩量度方法同埋搵到咩結果... 等等。

理想特徵

寫作風格

主流認為，做得好嘅學術寫作會有以下呢啲特徵：

• 一針見血嘅開頭：一般認為學術文嘅開頭最好要一針見血；個開頭需要
  1. 用一句就講出篇文研究緊嘅課題、個核心概念有咩重要特徵、同埋呢個課題點解值得研究，當中個個論點都要有文獻撐，
  2. 跟住要講篇文建基於咩背景（睇文獻綜述），現有嘅文獻有啲咩已知同未知，一句道出篇文想解答咩問題，
  3. 再估吓篇文會搵到咩答案同埋有啲咩貢獻，
  4. 最後再為讀者提供一個路向－帶出咗成篇文嘅信息，而且一吓就吸引到讀者嘅興趣令佢哋想睇落去；
  • 篇文打後嘅每一段，都可以當係個開頭其中一句嘅擴張版；事實係據估計，雖然一篇學術文嘅開頭平均佔咗總字數嘅唔夠 10%，成功嘅學者寫自己啲文嗰陣平均會花成 24% 嘅時間嚟淨係寫同執個開頭。可以睇埋敘事鉤嘅概念。
• 邏輯上嘅連貫：篇文會分做若干部份－包括摘要、文獻綜述、研究方法、研究結果同埋針對啲結果做嘅討論... 呀噉；每部份由若干段落組成，而每段落由若干句句子組成；每一段開頭第一句就要講出嗰段嘅主旨，而嗰段跟住啲句子就會係（例如）
  1. 解釋句主旨，
  2. 講吓有咩過往嘅證據支撐主旨嘅主張，或者
  3. 講吓個主旨提到嘅概念，有邊啲（對份研究嚟講有啦更嘅）主要類型... 等等。
  • 每一段都會喺邏輯上跟從打前嗰段，例如係
    1. 「打前嗰段個諗頭同另外一個已知嘅諗頭有某啲相似嘅地方」、
    2. 「打前嗰段個諗頭同另外一個已知嘅諗頭有某啲重要嘅啦掕」、
    3. 「打前嗰段講嘅嘢同另外一啲證據似乎唔相容」

    ...呀噉。

• 客觀：呢點係學術寫作同（例如）創意寫作最大嘅分別；如果話一樣嘢係客觀嘅，意思即係指呢樣嘢係咪真確唔會受觀察者嘅身份影響，而客觀係學術寫作需要達到嘅嘢之一：
  • 強調諗頭，而唔係強調個人：舉例說明，寫「我認為呢個理論係真確嘅」冇咁好，而係應該寫「呢啲研究結果支撐嗰個理論」；
  • 唔好表達任何嘅情緒；
  • 避免用軼事證據。
• 最佳差異：指「有返咁上下創新得嚟，又會跟慣例」－一份有用嘅學術文要有啲創新嘅諗頭，但同時又會跟從某啲約定俗成嘅法則；响廿一世紀初嘅學術界，「約定俗成嘅法則」包括係
  • 正式：寫嘢啲用詞似正常講嘢得嚟又要有返咁上下正式；
  • 清晰：篇文嘅每隻字都有明確嘅定義，唔會寫埋嗮啲含糊嘅字詞；
  • 簡潔：唔會用埋嗮啲不必要嘅修辭，而且用嘅字量要有咁少得咁少，用最少嘅字數表達最多嘅意思；睇埋奧坎剃刀。
• 行話使用：需要明白讀者（同作者比起嚟）對篇文講個課題未必係咁熟，所以有需要嗰陣要解釋清楚篇文用到嗰啲概念同行話；一般認為，一篇文最好係由讀者會識嘅嘢帶起，跟住再由呢啲嘢帶去讀者未必識嘅嘢度。
  • 亦有學者指出，真係想求知嘅人正路係會想將啲嘢寫到有咁簡潔得咁簡潔（睇埋奧坎剃刀）嘅，唔想因為讀者睇唔明嘥時間精神；而冇乜實際內容講得出嘅人，反而好多時會係噉用啲懶高深嘅詞彙，目的係想搵人老襯，等人以為佢寫嗰啲嘢好有料到。詳情可以睇吓後現代主義生成器等嘅事例。

... 等等。

互文性

「...書梗會提到其他書，而每個故仔都係講緊一個經已俾人講咗嘅故仔。」

Umberto Eco （烏伯圖·艾高）

有好多學者都指出，學術寫作嘅一個重要功能在於促進唔同學者之間嘅交流。互文性包含一篇文有幾做到將前人寫嘅嘢同當中嘅諗法結合埋一齊：

• 有學者主張，一篇寫得好嘅學術文需要做到將唔同嘅前人提出嘅諗頭連接埋一齊，例如有兩班學者，佢哋研究嘅題目唔同所以好少可會傾偈（即係兩班人各自成一個對話社群），而跟住有個學者成功噉諗到啲諗頭出嚟，係對嗰兩班學者嚟講都有用嘅－就有可能令到嗰兩班學者之間出現對話，因而造就佢哋喺諗頭上嘅碰撞。
• 參考文獻係寫學術嘢一定做嘅工作，指喺一篇學術文裏面註明返話「呢個諗法係由邊個邊個喺邊年邊年講過嘅」－學術研究往往會想將自己嘅諗法建基喺第啲研究者嘅諗法之上，又或者係批判第啲研究者嘅見解，而喺呢啲情況下，寫一篇文嘅人通常要喺篇文入面註明返「呢個諗法係由某個人講過嘅」，例如喺句句子最尾掕返隻類似史密夫 (1990) 噉嘅字－意思係話句句子入面嗰個諗法係由史密夫喺 1990 年嘅一篇文或者一本書嗰度講過嘅。
• 抄襲係做學術寫作一定要避免嘅嘢，指一個人攞第個人寫或者講過嘅諗法嚟用，仲要係講到嗰個諗法好似係佢自己原創嘅噉：正常嚟講，參考同運用第啲人嘅諗法係冇問題嘅，但响學術上，想喺自己寫嘅文入面用第啲人嘅諗法就要喺篇文入面註明返話「呢個諗法係由邊個邊個喺邊年邊年講過嘅」，有心唔做呢樣嘢就會俾人當係抄襲；喺現代嘅學術上，抄襲係相當嚴重嘅罪行，一個學者俾人捉到佢抄襲，閒閒哋會冇咗份工。

... 等等。

主要文類

一位研究者（企喺度嗰個人）喺研討會上向其他研究者講解自己做緊嘅研究。

• 論文：一篇長（以英文計，閒閒哋萬零二萬字咁長）嘅文獻，通常都係由一位讀緊某啲學位（尤其係博士學位）嘅學生寫（睇埋博士論文）－喺篇文入面講吓自己喺讀個學位嘅過程當中學到啲乜；論文正路會分若干個章節，第一個章節會係文獻綜述講吓自己研究緊嗰個課題大致上嘅情況係點，跟住嗰啲章節就可能講自己做過嘅實驗或者觀察，以及係呢啲實驗觀察得到咩結果，最後仲有個章節做總結。論文通常係臨尾先至寫同交嘅，而間院校嘅人員睇咗個學生篇論文覺得滿意，就會俾佢畢業。
• 綜述文：學術文嘅一種，指篇文寫嚟係想總括有關某個課題嘅學術文獻嘅；啲人會寫綜述文，通常都係因為佢哋研究緊嗰個課題累積咗好大拃研究－啲學者研究一個課題就會出文，出到咁上下就會累積咗一大拃文，呢拃文資訊量大，搞到做呢範研究嘅人覺得係時候要整理吓手上嘅知識，於是就寫篇綜述文，喺文入面講吓研究緊個課題有邊啲主要嘅概念、相關嗰啲實驗大致上搵到啲咩結果、仲有係（基於呢啲結果）覺得做呢範嘅研究者跟住落嚟應該做咩研究... 呀噉。喺學術研究上，綜述文好多時都好受注目。睇埋元分析。
• 研討文：學術研討會係一種學術性嘅聚會，俾相同領域嘅學者同研究者聚埋一齊討論佢哋做緊嘅研究－
  • 响學術界，每位研究者都梗會有某幾個課題係佢零舍有興趣研究嘅，而一場研討會有個課題，想吸引同嗰個課題相關嘅研究者聚埋一齊，大家傾各自做緊嘅研究同諗緊嘅得意諗頭；
  • 搞一場研討會嘅單位通常會係喺嗰個課題入面富有經驗嘅研究者，佢哋會喺某啲地方嗰度公佈「要搞研討會」，想參加研討會嘅研究者就會去佢哋個網頁嗰度或者用電郵嘅方法，遞交自己做緊嘅研究嘅摘要；
  • 搞研討會嗰方會睇勻嗮遞上嚟嗰啲摘要，跟住決定邊啲研究值得喺場研討會上面傾，最後就會定返個時間表，講明「研討會嗰日有邊幾份研究會做發表同埋每份發表喺咩時間做」噉嘅資訊。一般認為，研討會上報告嘅文係做學術研究嘅人交流諗法嘅重要渠道之一。
• 研究計劃書
• 匯報
• 編輯卷章節
• 期刊嘅文
• 書評
• 百科全書

... 等等。

睇埋

• 學術研究
• 學術文獻
• 教書哲學
• 圖書館學
• 編輯
• 捉刀
• 創新

文獻

• Booth, Wayne C.; Colomb, Gregory G.; Williams, Joseph M. (15 May 2009). The Craft of Research (3rd ed.). University of Chicago Press. ISBN 978-0-226-06264-8.
• Canagarajah, A. Suresh (2002). A Geopolitics of Academic Writing. University of Pittsburgh Press. ISBN 978-0-8229-7238-9.
• Coinam, David (2004). Concordancing Yourself: A Personal Exploration of Academic Writing, Language Awareness, Vol. 13, Issue 1, pp. 49-55.
• Colquitt, J. A., & George, G. (2011). Publishing in AMJ - Part 1: topic choice (PDF). Academy of Management Journal, 54(3), 432-435，呢篇文討論點樣先算係好嘅管理學文，講一篇學術文選題應該要揀有人關注嘅課題、要能夠改變現有嘅諗頭、要能夠引起讀者嘅好奇、份研究嘅樣本要有返咁上下廣、仲有係要帶出可以實行嘅改革。
• Creme, P., & Lea, M. (2008). Writing at university: A guide for students. McGraw-Hill Education (UK).
• Crysler, C. G. (2003). Writing spaces: discourses of architecture, urbanism and the built environment, 1960-2000. Routledge，呢本書專講建築學入面嘅學術寫作。
• Grant, A. M., & Pollock, T. G. (2011). Publishing in AMJ - Part 3: Setting the hook (PDF). Academy of management journal, 54(5), 873-879，呢篇文提出咗個諗法，覺得一篇引起到人興趣嘅文，通常一係就係挑戰緊現有嘅共識，一係就係喺未有共識嘅課題度帶出個共識。
• Greene, S. (2001). Argument as conversation: The role of inquiry in writing a researched argument (PDF). The subject is research: Processes and practices, 145-56.
• Gourlay, L. (2008). The handbook of academic writing: a fresh approach. London Review of Education.
• Harley, B., & Hardy, C. (2004). Firing blanks? An analysis of discursive struggle in HRM. Journal of Management Studies, 41(3), 377-400.
• Kantz, M. (1990). Helping students use textual sources persuasively (PDF). College English, 52(1), 74-91.
• Luey, Beth (2010). Handbook for Academic Authors, 5th ed. Cambridge: Cambridge University Press.
• Nash, R. (2019). Liberating scholarly writing: The power of personal narrative. IAP.
• Paltridge, B. (2004). Academic writing (PDF). Language teaching, 37(2), 87-105.
• Patriotta, G. (2017). Crafting papers for publication: Novelty and convention in academic writing (PDF). Journal of Management Studies, 54(5), 747-759，一篇以管理學做起始點講學術寫作嘅文，不過佢講啲內容對第啲學術領域嚟講都係有用嘅。
• Porter, J. E. (1986). Intertextuality and the discourse community (PDF). Rhetoric review, 5(1), 34-47.
• Richards, J. C., & Miller, S. K. (2006). Doing academic writing in education: Connecting the personal and the professional. Routledge.
• Sparrowe, R. T., & Mayer, K. J. (2013). From the editors: Integrating theories in AMJ articles. Academy of Management Journal, 56(4), 917-922，呢篇文討論有四種情況下，可以將幾套唔同嘅理論拉埋一齊講。

拎

• Study skills / Writing. University of Sydney.