維基百科

夜空

夜空（粵拼：je6 hung1；英文：night sky）喺天文學上係指地球喺夜晚嗰陣（如果好天嘅話）會望到嘅天嘅樣：當地球表面某笪地方入咗夜，嗰度就唔會再受到太陽嘅直接照射，光量會大減，但只要天氣夠好，而且光污染（指燈等人造嘅光照亮夜空嘅現象）唔算太嚴重[1]，企喺地表嘅人就可以用肉眼望到地球夜晚嗰一邊面向住嘅各種光源[2]。

多地夜空景象：2014 年美國亞利桑拿州（上）、2018 年臺灣（中）同 2015 年冰島南部（下）。

人喺夜晚黑用肉眼，可以睇到嘅光源包括咗：

光源 實例 備註
曉自己發光嘅天體 恆星同由大量恆星組成嘅銀河[3]
會反射陽光嘅天體 月亮以及地球以外嘅太陽系行星
大氣層當中會發光嘅物體 喺極地夜空嘅極光[4] 因為太陽風吹襲地球而形成嘅。

由古到今，夜空都一路引起人類嘅種種遐想：喺科學並唔發達嘅古代，古人會用好多神話嚟解釋喺夜空見到嘅事物，例如古羅馬同古希臘嘅人就好興將夜空嘅各種天體想像成天上嘅眾神或者至少同眾神相關嘅事物，好似係羅馬人，就有將喺夜空當中發出耀眼光煇嘅金星當做維納斯（羅馬神話裏面主管愛同美嘅女神）嘅象徵，而且世界各地嘅古人仲有思考占星術呢種學問，諗住用天體嘅移動同位置占卜未來[註 1][5][6]。到咗現代，世人經已透過科學對夜空有咗比較真實嘅了解，但夜空嘅美態依然吸引到好多人進行睇星等嘅活動[1][4]。

亮度

編輯
内文：天空亮度

夜空有一定嘅亮度（有關解釋呢啲現象嘅物理知識，可以睇吓光學）：

  • 當一笪地方喺日頭嗰陣，嗰度會受到太陽光嘅直接照射，同時大氣層會散射[歐 1]太陽嘅光，令嗰度嘅天會光同有顏色[7][8]；相比之下，喺好似水星呢啲大氣層極之稀薄嘅行星上，日頭嘅天會得一個漆黑嘅背景同好耀眼嘅太陽[9]。
  • 隨住地球自轉，嗰笪地方望到嘅太陽會慢慢下降到地平線以下（日落），而當太陽嘅位置跌到落低過地平線 6 度嘅位置，嗰笪地方嘅人就會見到暮光[歐 2]—日出之前或者日落之後俾大氣層上層散射，照亮地表嘅陽光—，而當太陽嘅位置超過地平線以下 18 度，嗰笪地方嘅天就會到達最低亮度－正式入夜[10]。
  • 一旦地球上一笪地方入咗夜，嗰度就唔會再受到陽光嘅直射，但夜空並唔係漆黑一片嘅－地球仲會受到好多唔同來源嘅光照射：月亮同第啲太陽系行星會反射照落佢哋嗰度嘅陽光，呢啲光有部份會照返落地球度，而（離地球閒閒哋成幾光年遠嘅）星星本身就曉發光；地球嘅大氣層會散射呢啲光，令夜空唔只有微弱嘅光，仲會有一股淡淡嘅藍色[11][12]。

見到嘅物體

編輯
 
大犬座嘅圖解；啲線係為咗清楚起見而加嘅。

星星

編輯
睇埋：恆星

星星係遙遠嘅恆星（太陽都係一粒恆星），會發光。一粒典型恆星嘅光度[歐 3]—指一個天體每單位時間射出幾多電磁能量—並唔低，例如天狼星[歐 4]嘅光度就係太陽嘅成 25.4 倍左右[13]，不過呢啲太陽以外嘅恆星離地球遠得好交關[註 2][13]，所以呢啲恆星由地球表面望落好似細過同暗過太陽好多噉，而且望落好似冚唪唥都同地球差唔多一樣咁遠（查實呢啲星星彼此之間閒閒地相距幾光年）。由地表睇，星星嘅光弱到能夠輕易俾雲、濕氣同空污粒子遮蔽；光污染亦都會阻礙人睇星，喺好多街燈等人造光源嘅都市帶，光污染足以搞到地表嘅人睇唔到星星[1]。視乎上述呢啲因素，用肉眼睇得到嘅星星數量由幾百到幾萬粒不等。順帶一提，查實恆星之間喺發乜嘢色嘅光上可以有異，熱－開氏 25,000 度左右－嘅恆星傾向射藍色嘅光，而好似太陽呢啲凍－得開氏 6,000 幾度－嘅恆星會主要射黃色嘅光，不過星星嘅色水就噉用肉眼睇好難睇得出[14]。

數星星係好多人喺睇星嗰陣會做嘅一樣嘢。一般嚟講，喺完全冇架生嘅情況下數星星係冇可能嘅，因為星星數量太多，而且齋靠人手亦都冇方法知道邊粒星數咗邊粒未，而且暗啲嘅星星仲有可能會因為觀察者冇集中眼光而消失，睇星嘅人如果想數星星通常會帶埋星圖[歐 5]同望遠鏡等嘅架生，星圖會話俾睇嘅人知喺某一個地點每一個時間點天上會見到乜嘢星星同埋啲星會喺邊個位[15]。

星座

編輯
内文：星座

星座[歐 6]係指天球當中包含若干粒星星嘅一忽，因為嗰忽入面嗰啲星星排列嘅規律俾人覺得似某一樣事物－人、動物或者死物等－所以得名。喺古代，人造光源比較少，古人喺夜晚嗰時可以輕易噉睇星，仲會發揮佢哋嘅想像力，幫星座改名同想像呢啲星座背後嘅故仔。例如大犬座[歐 7]噉，就因為俾人覺得佢嗰幾粒畫線連埋有少少似隻狗噉嘅形而得名，而古希臘人傳說話大犬座查實係獵戶座[歐 8]養嗰隻狗[16]。同一個星座入面嘅星星可以相距好遠。例如天狼星係大犬座嘅一部份，但大犬座嘅星星當中有啲離天狼星成幾光年遠[17]。

銀河

編輯
内文：銀河

銀河[歐 9]係包含太陽系嘅一個星系，望落好似天上一條會發光嘅河噉：宇宙入面有極大量嘅物質－包括恆星、星際塵埃同暗物質呀噉－喺太空當中飄浮，好多時會有一大柞噉嘅物質因為重力聚埋一齊，形成一個星系；一個星系當中嘅恆星數量由幾億（108）粒至幾百億（1014）粒不等，彼此之間因為重力嘅作用而圍住星系嘅中心公轉；銀河係太陽系所屬嗰個星系，結構上呈牒形，太陽帶住地球等嘅行星圍住銀河中心公轉，所以由地球嘅角度嚟睇，銀河望落就好似一條長帶（或者河）噉形[18][19]。銀河有相當嘅光度，不過一般嘅廿一世紀城市都會因為光污染睇唔到銀河[20]。

銀河嘅獨特外形自古以嚟就引起人類嘅幻想。例如中國就有牛郎織女嘅故事，相傳身為人類嘅牛郎同身為仙女嘅織女相遇並且墮入愛河，但因為人仙相戀犯天規而俾天界阻止，王母娘娘變條銀河出嚟分隔佢哋，限佢哋淨係喺每年嘅農曆七月初七先可以喺條鵲橋上面相會－呢個傳說就係傳統節日七姐誕嘅起源[21]。

  •  
    2005 年一晚
    喺加州死亡谷影到嘅全景；相入面睇到條銀河劃過夜空。

行星

編輯
睇埋：太陽系行星

行星係圍住恆星公轉嘅天體，本身唔曉發光，但可以反射恆星照落去佢哋嗰度嘅光。一般嚟講，喺地球上會見到嘅行星淨係得太陽系嘅其餘行星－太陽系內嘅行星嘅大氣層會散射同反射陽光，呢啲反射嘅陽光有啲會射落地球嗰度，俾地表嘅人睇到，而且有陣時呢啲行星嘅衛星會因為喺行星嘅影像上留低陰影而可以用望遠鏡觀察得到。一粒行星由地表睇嘅光度視好多因素而定－粒行星同地球嘅距離以及佢本身反射幾多光（呢一點取決於粒行星嘅大氣層等嘅因素）都會影響佢由地表望落有幾光[22]。

當中金星係由地球望落最耀眼嘅行星：一來金星離地球近－喺公轉途中，金星同地球嘅距離可以只得 38,000,000 公里[23]；二來金星離太陽近，所以會受大量陽光照射；三來金星仲有極厚嘅大氣層，會反射大量陽光－據估計，射落金星嘅陽光大約有 70 至 80% 嘅都俾金星反射，相比之下，（例如）火星只會反射大約 30% 射落佢嗰度嘅陽光[24]。上述因素令金星成為由地表望落光度第三高（次於太陽同月亮）嘅天體[25][26]。不過除咗金星之外，地表嘅人亦有可能用肉眼睇到火星、水星、木星同土星－只要天氣夠好、光污染程度夠低而且啱時間（粒行星咁啱公轉到離地球近嘅位置）[22]。

  •  
    2008 年一晚喺太平洋上嘅一個夜空；
    圖入面望到金星同木星（中間好光嗰粒就係金星）。

月亮

編輯
内文：月亮

月亮係地球唯一一個自然衛星，靠住反射陽光成為地球夜空當中最光嘅天體：月亮本身唔識發光，只係能夠反射太陽嘅光；月亮會一路圍住地球公轉，一路反射射落佢度嘅陽光，月相[歐 10]會喺呢個過程當中變化－視乎太陽、地球同月亮之間成乜角度，月亮可以因為完全俾地球遮住而望落全黑（新月），但隨住月亮公轉，佢會慢慢噉得到更多嘅陽光，最後變成滿月－月亮成個面都受到陽光照射，喺地表嘅人會睇到一個圓形嘅大月亮[27]；不過月亮反射光嘅能力唔強－據估計，射落月亮嘅陽光得大約 13% 嘅會俾月亮反射（相對於金星嘅 70% 反射率），就算係滿月，月亮由地表睇嘅光度都淨係得太陽嘅 400,000 分之一左右[28]。

月亮因為受到地球嘅重力影響，而有潮汐鎖定[歐 11]嘅現象：月亮喺會圍住地球公轉之餘，又會自轉；潮汐鎖定嘅意思係話，月亮嘅公轉週期同自轉週期差唔多咁長－都係大約 27.3 日左右；亦即係話，月亮長期都係攞同一面嚟對住地球[27]。

  •  
    2011 年一晚
    京都嵐山花灯路一景；紅葉喺明月映照下演示秋色。

第啲物體

編輯
 
1997 年一晚影到嘅一粒彗星

夜空入面仲會有以下嘅物體：

  • 雲係水同第啲化合物蒸發上天而形成嘅氣霧。雲係唔透明嘅，所以好多時會遮蔽夜空入面嘅天體，搞到想睇星嘅人好唔高興，不過有陣時雲又會受夜空嘅光源照射而變出一啲花樣，例如喺有卷雲（有絲縷結構、分離散亂嘅雲）喺月亮前面嗰時，可能會喺月亮周圍產生彩虹噉色嘅環[29]。
  • 黃道光[歐 12]係天上有時會出現嘅微弱白光，由太陽嘅方向擴散開去，常見於春天日落之後嘅暮光同秋天日出之前嘅曙光。呢種現象源於行星際空間（太陽系行星之間嘅太空）有啲塵埃粒子喺度散射陽光[30]。
  • 流星[歐 13]係指太空入面嘅碎石，有細有大。有陣時會有流星跌入地球嘅大氣層嗰度，同大氣層磨擦而著火發光，絕大多數嘅流星都好細粒，一係就喺大氣層入面完全燒到冇咗，一係就細粒到就算撞到落地表都唔足以造成任何明顯嘅破壞；流星雨[歐 14]係大量流星跌入地球大氣層嘅現象[31]。
  • 彗星[歐 15]係太陽系入面一啲由冰組成嘅細小物體，當一粒彗星接近太陽嗰陣會受熱，並且產生氣體，形成一個大氣層，而呢股大氣層可以因為太陽風嘅刺激而發光，形成一條「尾」（條尾可以係地球直徑嘅 15 倍長）；如果一粒彗星夠光，地表嘅人就有可能睇得到佢向後噴氣體、有條掃把噉形嘅尾嘅樣[32]。
  • 人造衛星[歐 16]係由人射上近地球嘅軌道，用嚟做通訊等目的嘅機械。人造衛星離地球好近，多數離地表得幾萬公里遠（相比之下，月亮離地球大約 384,400 公里遠）；佢哋會一定程度上反射陽光，所以有可能俾地表上嘅人睇到。夜空中見到人造衛星常見於日落之後冇幾耐或者日出之前冇幾耐，而且會郁得好快，好多時會喺一兩分鐘內就橫跨成個夜空[33]。
  • 飛機
  • UFO
  • 星雲（如果嚿星雲夠光）[34]

相關文化

編輯
 
呢幅油畫描繪畫家想像中嘅夜空女神倪克斯。
 
19 世紀日本畫家月岡芳年畫嘅牛郎織女

神話傳說

編輯

希臘神話

編輯
睇埋：倪克斯

古希臘人同古羅馬人嘅信仰入面有對夜空作出各種幻想。古希臘人（同文化上參考佢哋嘅古羅馬人）往往將夜空當中嘅天體當成眾神嘅象徵，例如好大粒嘅木星就俾古希臘人視為眾神之首宙斯[歐 17]嘅代表，而各星座喺希臘神話入面都有相關嘅故仔，例子有上面提到嘅獵戶座同大犬座之間嘅主人寵物關係噉[35]。

倪克斯[歐 18]（佢個名喺古希臘文入邊係夜晚噉解）係希臘神話入面一個象徵夜空嘅神秘女神。古希臘人嘅文獻鮮有提到倪克斯，但佢依然係一個重要嘅天神：希臘神話相傳話，倪克斯生於宇宙嘅極初期（某啲版本話佢係同宇宙一齊誕生嘅），而且係睡眠、死亡同黑暗之母；根據傳說，倪克斯生得靚之餘又法力高強，連宙斯呢個眾神之王都對佢又敬又畏－有歷史學家話，夜空女神俾古希臘人想像成好似夜空一樣，壯麗又神秘[35][36]。

牛郎織女

編輯
内文：牛郎織女

牛郎織女係中國古代一個講銀河起源嘅民間故事。個故仔係噉嘅：傳說喺好耐好耐之前，有個叫做牛郎嘅孤兒，佢跟佢阿哥阿嫂生活；牛郎阿嫂好刻薄佢，佢有日將九隻牛交俾牛郎，要佢帶十隻牛返屋企，如果唔係就𢴒佢走。但牛郎好彩得到高人指點，喺山上發現咗隻有病嘅老牛，打後牛郎發現老牛原來係被打落凡間嘅金牛星，於是就將佢帶返屋企。後嚟牛郎得到老牛指點，搵到下凡仙女沖涼同玩嘅地方，佢同咁啱下凡玩嘅織女邂逅，兩人墮入愛河，後嚟仲生埋對龍鳳胎。但因為人仙相戀犯天規，織女俾神仙扚返去天界。深愛老婆嘅牛郎靠老牛嘅力量上天界搵織女，王母娘娘用佢頭上嘅銀簪變條銀河出嚟擋佢嘅去路，但天上嘅喜鵲俾牛郎嘅愛情感動咗，化作鵲橋，等牛郎可以跨過銀河同織女團聚。而王母娘娘亦都俾佢哋打動咗，下令每年七月初七，牛郎織女可以喺鵲橋相會，成為咗牽牛星同織女星。呢個傳說就係七姐誕嘅由來；而傳統上，東亞各地嘅婦女喺農曆七月初七嗰陣，都會向七姐（織女）獻祭，求自己可以有佢嗰對擅長編織嘅巧手同良緣[37]。

文學

編輯

自古以嚟，月亮同星星等夜空嘅景象時不時都會引起文人嘅讚嘆，賦予佢哋作詩嘅靈感。例如唐詩當中都有多首描寫星月夜空嘅詩[38]：

細草微風岸，危檣獨夜舟。

星垂平野闊，月涌大江流。

名豈文章著，官應老病休。

飄飄何所似，天地一沙鷗。

—杜甫《旅夜書懷》

用現代粵語表達：

微風吹拂江岸嘅草，有高桅杆嘅小船喺黑夜當中孤零零噉停泊。
星星垂喺天邊，令平野顯得寬闊；月光隨波涌動，大江滾滾東流。
我唔通係因爲文章而出名嘅咩？年老多病都應該休官喇。
自己到處漂泊似啲乜呢？就好似天地間一隻孤零零嘅沙鷗[39]。

銀燭秋光冷畫屏，輕羅小扇撲流螢。

天階夜色涼如水，臥看牽牛織女星。

—杜牧《秋夕》

用現代粵語表達：

秋天嘅夜晚，精美嘅銀色蠟燭發出微弱嘅光，為畫屏添咗幾分清冷之色；
一位宮女手執綾羅小扇，輕輕噉撲打飛舞嘅螢火蟲。
天階上嘅夜色清涼好似水噉；
坐榻仰望星空，只見牽牛星同織女星[40]。

畫藝

編輯
睇埋：星夜

傳統嘅西方藝術好興描繪夜空：歐洲人畫家成日都會喺描述歷史大事（中世紀歐洲藝術嘅常見題材）嗰陣用到夜空，又會喺描繪宗教或者奇幻題材嗰時用黑夜製造神秘感，用夜空象徵恐懼、死亡、哀愁、秘密同超自然力量等嘅主題[41]。

描繪夜空嘅西洋畫當中最出名嘅要數荷蘭畫家梵高[歐 19]喺 1889 年完成嘅作品《星夜》[歐 20]：星夜畫嘅係一個天上面有好多星星嘅夜晚，係後印象派嘅一幅代表作品，亦係西方藝術史上最出名嘅畫作之一[42]。

  •  
    名畫《星夜》

夜空魅影

編輯
  •  
    2015 年某日
    加州一角夜空
  •  
    2018 年某日
    加州一角夜空
  •  
    一個人喺夜空下瞓覺。
  •  
    2013 年某日
    喺某地影到嘅夜空
  •  
    2016 年某日
    臺灣合歡山嘅夜空
  •  
    2013 年某日
    加拿大一個松樹林上嘅夜空
  •  
    2018 年某日
    阿拉斯加一間屋仔上嘅夜空
  •  
    某地夜空
  •  
    2017 年 6 月 12 號
    印度北部一處夜空
  •  
    2020 年 4 月 20 號
    智利一個天文台上嘅夜空
  •  
    2005 年 7 月某日
    南極一角夜空
  •  
    2016 年 5 月 28 號
    美國紐約州一角星空
2014 年 3 月 17 號喺日本群馬縣草津白根山影到嘅夜空快鏡；嗰度光污染程度低，所以人能夠清楚噉睇到天上嘅銀河同眾多星星。

註釋

編輯
  1. ↑ 占星術經已俾現代科學證實咗係流嘅，不過就間接推動咗古人研究天文學。
  2. ↑ 天狼星離地球大約 8.611 光年遠，相比之下太陽離地球「只係」0.00001561 光年咁遠

睇埋

編輯

引咗

編輯
  1. ↑ 1.0 1.1 1.2 Kolláth, Z. (2010). Measuring and modelling light pollution at the Zselic Starry Sky Park. In Journal of Physics: Conference Series (Vol. 218, No. 1, p. 012001). IOP Publishing.
  2. ↑ Harrison, E. R. (1987). Darkness at night: A riddle of the universe. Harvard University Press.
  3. ↑ How To See the Milky Way – Dark Site Finder. National Geographic.
  4. ↑ 4.0 4.1 Weaver, D. (2011). Celestial ecotourism: New horizons in nature-based tourism. Journal of Ecotourism, 10(1), 38-45.
  5. ↑ Thagard, Paul R. (1978). "Why Astrology is a Pseudoscience". Proceedings of the Biennial Meeting of the Philosophy of Science Association. 1: 223–234.
  6. ↑ Pannekoek, A. (1989). A history of astronomy. Courier Corporation.
  7. ↑ C.F. Bohren, D. Huffman, Absorption and scattering of light by small particles, John Wiley, New York 1983. Contains a good description of the asymptotic behavior of Mie theory for small size parameter (Rayleigh approximation).
  8. ↑ Fish, D. J., & Jones, R. L. (1995). Rotational Raman scattering and the ring effect in zenith‐sky spectra. Geophysical Research Letters, 22(7), 811-814.
  9. ↑ Hunten, D. M., Morgan, T. H., & Shemansky, D. E. (1988). The mercury atmosphere. Mercury, 562-612.
  10. ↑ Mateshvili, Nina; Didier Fussen; Filip Vanhellemont; Christine Bingen; Erkki Kyrölä; Iuri Mateshvili; Giuli Mateshvili (2005). "Twilight sky brightness measurements as a useful tool for stratospheric aerosol investigations". Journal of Geophysical Research. 110 (D09209): D09209.
  11. ↑ Xavier Kerola, D. (2006). Modelling artificial night-sky brightness with a polarized multiple scattering radiative transfer computer code. Monthly Notices of the Royal Astronomical Society, 365(4), 1295-1299.
  12. ↑ Garstang, R. H. (1984). Improved scattering formula for calculations of artificial night-sky illumination. The Observatory, 104, 196-197.
  13. ↑ 13.0 13.1 Liebert, J.; Young, P. A.; Arnett, D.; Holberg, J. B.; Williams, K. A. (2005). "The Age and Progenitor Mass of Sirius B". The Astrophysical Journal. 630 (1): L69-L72.
  14. ↑ Colors of Stars.
  15. ↑ Swerdlow, N. M. (August 1986). "A Star Catalogue Used by Johannes Bayer". Journal for the History of Astronomy. 17 (50): 189–197.
  16. ↑ Canis Major Constellation. Constellation Guide.
  17. ↑ Allen, Richard Hinckley. (1899). Star-Names And Their Meanings, G. E. Stechert, New York, New York, U.S.A., hardcover; reprint 1963 as Star Names: Their Lore and Meaning, Dover Publications, Inc., Mineola, New York, U.S.A.
  18. ↑ Gerhard, O. (2002). "Mass distribution in our Galaxy". Space Science Reviews. 100 (1/4): 129–138.
  19. ↑ Gillessen, S.; et al. (2009). "Monitoring stellar orbits around the massive black hole in the Galactic Center". Astrophysical Journal. 692 (2): 1075-1109.
  20. ↑ Crumey, Andrew (2014). "Human contrast threshold and astronomical visibility". Monthly Notices of the Royal Astronomical Society. 442 (3): 2600-19.
  21. ↑ 袁珂編著《中國神話傳說辭典》，華世出版社印行。
  22. ↑ 22.0 22.1 When, Where and How to See the Planets in the 2020 Night Sky. Space.com.
  23. ↑ How Far is Venus from Earth?.
  24. ↑ Albedo of the Planets.
  25. ↑ Why is Venus so bright?.
  26. ↑ Marov, M. J., Marov, M. I., Marov, M. A., Marov, M. Y., & Grinspoon, D. H. (1998). The Planet Venus. Yale University Press.
  27. ↑ 27.0 27.1 Buick, Tony; Pugh, Philip (2011). How to Photograph the Moon and Planets with Your Digital Camera. Springer.
  28. ↑ How Bright is the Moon . . . Exactly?. Sky & Telescope.
  29. ↑ What makes a halo around the sun or moon?.
  30. ↑ Reach, W. T. (1997). "The structured zodiacal light: IRAS, COBE, and ISO observations". Diffuse Infrared Radiation and the Irts. 124: 1.
  31. ↑ Rubin, Alan E.; Grossman, Jeffrey N. (January 2010). "Meteorite and meteoroid: New comprehensive definitions". Meteoritics & Planetary Science. 45 (1): 114-122.
  32. ↑ Ishii, H. A.; et al. (2008). "Comparison of Comet 81P/Wild 2 Dust with Interplanetary Dust from Comets". Science. 319 (5862): 447–50.
  33. ↑ Satellite orbits.
  34. ↑ The Eyes Have it — Deep-Sky Observing Without Equipment. Sky & Telescope.
  35. ↑ 35.0 35.1 Gantz, Timothy (1993). Early Greek Myth: A Guide to Literary and Artistic Sources. Johns Hopkins University Press.
  36. ↑ Christopoulos, M., Levaniouk, O., & Karakantza, E. D. (Eds.). (2010). Light and darkness in ancient Greek myth and religion (pp. 66-67). Lanham, MD: Lexington Books.
  37. ↑ Mao, Xian. Cowherd and Weaver and other most popular love legends in China. eBook: Kindle Direct Publishing. 2013.
  38. ↑ 詩人們有多喜歡星星？——細數唐詩中的美麗星辰 互聯網檔案館嘅歸檔，歸檔日期2020年3月16號，.。
  39. ↑ 旅夜書懷，讀古詩網。
  40. ↑ 秋夕，讀古詩網。
  41. ↑ Steer, Isabella. (2002). The History of British Art. Bath: Parragon.
  42. ↑ Moyer, Edward (14 February 2012). "Interactive canvas lets viewers stir Van Gogh's 'Starry Night'". CNET News. Retrieved 12 June 2015. ...one of the West's most iconic paintings: Vincent van Gogh's 'The Starry Night.'

歐詞

編輯
  1. ↑ scatter
  2. ↑ evening twilight
  3. ↑ luminosity
  4. ↑ Sirius
  5. ↑ sky map
  6. ↑ constellation
  7. ↑ Canis Major
  8. ↑ Orion
  9. ↑ Milky Way
  10. ↑ lunar phase
  11. ↑ tidal locking
  12. ↑ Zodiacal light
  13. ↑ meteor
  14. ↑ meteor shower
  15. ↑ comet
  16. ↑ artificial satellite
  17. ↑ Zeus
  18. ↑ 希臘文：Νύξ / Nyx
  19. ↑ Vincent Willem van Gogh
  20. ↑ The Starry Night

拎

編輯
 
維基同享有多媒體嘅嘢：
夜空
由「https://zh-yue.wikipedia.org/w/index.php?title=夜空&oldid=2060174」收