巴別塔

巴別塔（希伯來文：מגדל בבל‎‎，羅馬拼音：Mīgdal Bāḇel ^{[註 1]}），又有叫通天塔，係《舊約聖經 · 創世記》裡便提到嘅一座塔。巴別塔嘅故仔講到人類想起座同天一樣高嘅塔，上帝覺得佢哋太囂，就變亂晒佢哋嘅講嘅話、口音，大家聽唔明對方噏ap1乜，溝通唔到，座塔自然就起唔成。

呢個故仔可以算係一個創建神話，畀人攞嚟解釋點解人類會講咁多種唔同嘅語言。而《聖經》可以話係人類史上最有影響力嘅書，好似巴別塔噉嘅聖經故事廣泛傳播到去世界各地，仲有唔少創作品由巴別塔嘅故事嗰度取材，用巴別塔嚟做語言多樣性嘅一個象徵。

原文粵譯

19 世紀一幅畫，描繪想像中「巴別塔下，世人嘅語言被變到亂晒」嘅情境。

呢幅畫出自 17 世紀，描繪畫畫人想像中嘅巴別塔。

原版《巴別塔》嗰個故仔出自《創世記》第 11 章第 1 至 9 節，譯做現代粵文嘅話如下^{[註 2]}^[1]。

話說當時全世界嘅人冚唪呤都係講同一隻語言嘅，是但攞兩個人，佢哋講嘢都做到完全相通。世人喺示拿搵到一笪平地，並且喺嗰度定居。
有一日，佢哋有咗個諗法，想要起一座宏偉無比嘅城市，城市要有一座塔，座塔嘅頂高到能夠掂得到個天，噉就傳揚到佢哋嘅名。傾掂之後佢哋就郁手，攞住泥土整磚頭同砂漿，啲磚頭燒到紅晒，一路就開始起塔。
主（上帝）一路望住人類起塔，就講：「睇吓，世人要起城同塔，成為同一樣嘅人民，講同一樣嘅語言，咁劃一就乜嘢都做得到喇話？我哋落去，將佢哋嘅語言搞亂，等佢哋嘅語言彼此唔再互通。」
就係噉，主令佢哋（世人）分散咗去世界唔同嘅角落，佢哋就唯有停工，唔再起乜嘢通天塔。噉係因為主變亂咗天下人嘅語言。

文獻分析

個名點來

《聖經》其實從來都冇提過「巴別塔」噉嘅字眼，而係用

希伯來文：אֶת-הָעִיר וְאֶת-הַמִּגְדָּל

噉嘅字句來lei4指巴別塔。呢組字詞係指^{[註 3]}

אֶת	הָ	עִיר	וְ	אֶת	הַ	מִּגְדָּל
et	ha	iyr	ve	et	ha	migdal
標 O 記號	指定冠詞	陰性名詞	連接詞	標 O 記號	指定冠詞	陽性名詞
		城市	同埋			塔

—要譯做粵語可以解做嗰座城市同嗰座塔噉嘅意思。有關 בבל / Babel / 巴別baa1 bit6 噉嘅字詞係點來嘅，廿一世紀初嘅學界仲未有咩共識。一個比較多人接納嘅講法係，隻字詞源自希伯來文 בָּלַל / bālal（大致似粵拼：baa6 laau1）—即係希伯來文撈埋一齊、搞亂噉解^[2]。

主題詮釋

《巴別塔》嘅故事同好多《聖經》故事一樣，成日畀猶太教徒同基督徒攞來教道理。

對於「上帝點解要噉樣搞亂人類嘅語言」，其中一種最常見嘅詮釋係話佢覺得人類想起通天塔係自大得滯，所以就搞亂人類嘅語言，想藉此懲罰人類；而成個故事就畀人用來教人喺上帝嘅無窮力量面前要謙卑，自大只會招致上帝懲罰。呢點亦被指係響應咗《創世記》入便成日講到上帝同人類之間起衝突噉嘅主題—例如《亞當同夏娃》嘅故仔，係講人類想要得到智慧，最後搞到畀上帝逐出伊甸園^[3]。

不過亦有學者同信徒持有第啲見解^[4]。例如有種觀點就覺得，上帝唔係想懲罰人類：《巴別塔》件事發生喺大洪水之後；世人經歷過大洪水，變到船頭驚鬼船尾驚賊噉，喪失晒探索嘅意慾；佢哋仲想創造一個完全一元嘅世界—所有人都要講同一隻語言、用同一套方法諗嘢，然後佢哋仲想建造通天塔，要全世界嘅人都睇到，進一步令全世界變得更加單一；有見及此，上帝就郁手將世人變成會講多種唔同嘅語言，世人就焗住要分別去唔同地方探索，用唔同方法思考^{[註 4]}；根據呢種睇法，上帝嘅舉動並唔係懲罰，而係對世人嘅祝福^[5]。

語言學觀點

巴別塔係一個創建神話，畀古時嘅猶太人攞嚟解釋點解世上有咁多隻唔同嘅語言。

語言學不溜都有研究語言起源嘅概念：早喺廿世紀中，語言學家已經留意到包括眾日耳曼語言（英文同德文等）、眾羅曼語言（法國話、西班牙話同葡萄牙話等）、希臘話同埋印地話（覆蓋印度北半橛多地）... 等嘅好多隻語言，都有某啲奇怪嘅相似性，於是就萌生咗印歐語系嘅概念，主張呢拃語言查實曾經係同一隻語言（語系），但後嚟因為（例如）講呢隻語言嘅人類四圍遷徙，變咗做兩個唔同嘅群體，兩者嘅語言就慢慢演變咗做兩隻差異大到唔能夠互通嘅語言；簡化講，打後嘅語言學研究睇返呢啲語言嘅歷史，發現呢啲語言的確有「曾經係一樣咁滯嘅，但後嚟變到愈嚟愈唔同」嘅情況，最後確立咗印歐語言嘅諗頭^[6]。除咗印歐語言，漢藏語系（粵語同閩南話等漢語所屬嘅語系）、南島語系（例子有馬拉話）同亞非語系（例子有希伯來話）... 等都係相當出名嘅語系。

因此，「呢幾隻語言曾經係同一隻語言」噉嘅諗法，喺廿一世紀初嘅語言學上係廣受接納嘅^{[註 5]}^[7]。之但係語言學家一般都認為巴別塔嘅故事純屬神話，唔係史實，理由包括—

《舊約聖經》似乎自相矛盾：巴別塔個故仔開頭嗰陣話，全世界嘅人都係講同一隻語言嘅；但係打前嘅部份—《創世記》第 10 章第 5 節^[8]—就話喺大洪水過後嘅世界，挪亞嘅後代四圍去建立唔同嘅國家，呢啲國家各有自己嘅語言；
語言演變係逐漸嘅：例如粵語噉，2010 年嘅粵語同 1910 年嘅粵語有啲差異，但依然夠相似，能夠高度互通，2010 年嘅粵語同 1810 年嘅粵語亦都有啲差異，但依然相對細；不過如果攞 1010 年嘅粵語先祖同 2010 年嘅粵語，兩者望落會似唔同嘅語言。現代語言學一般唔接受「一隻語言受到神秘力量影響，一瞬間變咗幾隻唔同語言」噉嘅主張^[9]。
巴別塔嘅故仔相當含糊，例如根本冇講清楚件事喺幾耐之前發生。可以睇睇可否證度嘅概念。

睇埋

註解

↑ 希伯來文有唔同嘅羅馬字拼音方案，並唔統一，冇任何一種係通用；咁拼係其中一種可能遇到嘅拼法，仲有第啲拼法。
↑ 以下個譯版基於英王欽定本。
↑ 留意希伯來文傳統上係由右到左噉寫嘅。以下為咗方便分析，會跟羅馬字噉由左到右排啲字詞。
↑ 可以睇睇薩丕爾-沃夫假說講嘅嘢。
↑ 不過類似「語言 A 同語言 B 係咪真係屬同一個語系」噉嘅問題，當然好多時係有得拗嘅。

詞彙

以下係篇文用咗嘅詞彙嘅粵英對照，啲拼音用嘅係粵拼：

巴別塔 / baa1 bit6 taap3 / Tower of Babel
創世記 / cong3 sai3 gei3 / The Book of Genesis
語言起源 / jyu5 jin4 hei2 jyun4 / origin of languages
印歐語言 / jan3 au1 jyu5 jin4 / Indo-European languages
漢藏語言 / hon3 zong6 jyu5 jin4 / Sino-Tibetan languages
南島語言 / naam4 dou2 jyu5 jin4 / Austronesian languages
亞非語言 / aa3 fei1 jyu5 jin4 / Afroasiatic languages

引述

↑ 〈創世記〉11章（基督教欽定本：〈創〉11；可以睇埋：基督教和合本：〈創〉11、天主教思高本：〈創〉十一）.
↑ John L. Mckenzie (1995). The Dictionary of the Bible. Simon and Schuster. p. 73.
↑ Harris, Stephen L. (1985). Understanding the Bible: A Reader's Introduction. Palo Alto: Mayfield.
↑ Rathbone, M. (2014). Interpretations of the Tower of Babel narrative in the African context. Acta Theologica, 34(1), 173-196.
↑ The Qur'an and Torah on the True Meaning of the Tower of Babel and Multiple Languages. Ancient Origins.
↑ Gamkrelidze, T. V., & Ivanov, V. V. (1990). The early history of Indo-European languages. Scientific American, 262(3), 110-117.
↑ Rahayu, E. Y. (2012). A CRITICAL REVIEW ON HISTORICAL LINGUISTIC WRITTEN IN WIKIPEDIA. Dinamika Bahasa dan Budaya, 7(2), 43-52.
↑ 〈創世記〉10章5節（基督教欽定本：〈創〉10:5；可以睇埋：基督教和合本：〈創〉10:5、天主教思高本：〈創〉十5）.
↑ Dresher, B. E. (2010). The tower of Babel. Toronto Working Papers in Linguistics, 32.

拎

（英文）巴別塔，不列顛百科全書講巴別塔呢個故事。
（英文）視像遊戲 / 示拿嘅詠唱，電視橋段網呢頁講《示拿嘅詠唱》，一隻故仔取材自《巴別塔》嘅解謎遊戲。

[1] 希伯來文有唔同嘅羅馬字拼音方案，並唔統一，冇任何一種係通用；咁拼係其中一種可能遇到嘅拼法，仲有第啲拼法。

[2] 以下個譯版基於英王欽定本。

[4] 留意希伯來文傳統上係由右到左噉寫嘅。以下為咗方便分析，會跟羅馬字噉由左到右排啲字詞。

[8] 可以睇睇薩丕爾-沃夫假說講嘅嘢。

[11] 不過類似「語言 A 同語言 B 係咪真係屬同一個語系」噉嘅問題，當然好多時係有得拗嘅。

[3] 〈創世記〉11章（基督教欽定本：〈創〉11；可以睇埋：基督教和合本：〈創〉11、天主教思高本：〈創〉十一）.

[5] John L. Mckenzie (1995). The Dictionary of the Bible. Simon and Schuster. p. 73.

[6] Harris, Stephen L. (1985). Understanding the Bible: A Reader's Introduction. Palo Alto: Mayfield.

[7] Rathbone, M. (2014). Interpretations of the Tower of Babel narrative in the African context. Acta Theologica, 34(1), 173-196.

[9] The Qur'an and Torah on the True Meaning of the Tower of Babel and Multiple Languages. Ancient Origins.

[10] Gamkrelidze, T. V., & Ivanov, V. V. (1990). The early history of Indo-European languages. Scientific American, 262(3), 110-117.

[12] Rahayu, E. Y. (2012). A CRITICAL REVIEW ON HISTORICAL LINGUISTIC WRITTEN IN WIKIPEDIA. Dinamika Bahasa dan Budaya, 7(2), 43-52.

[13] 〈創世記〉10章5節（基督教欽定本：〈創〉10:5；可以睇埋：基督教和合本：〈創〉10:5、天主教思高本：〈創〉十5）.

[14] Dresher, B. E. (2010). The tower of Babel. Toronto Working Papers in Linguistics, 32.

[註 1]

[註 2]

[1]

[註 3]

[2]

[3]

[4]

[註 4]

[5]

[6]

[註 5]

[7]

[8]

[9]