拉法街道

中華人民共和國 > 吉林省 > 吉林市 > 蛟河市 > 拉法街道

  想搵第二個意思嘅話，請睇拉法街道 (搞清楚)。

拉法街道
統計資料
普通話拼音	Lafa
所屬省級政區	吉林
所屬地級政區	吉林
所屬縣級政區	蛟河
政區類別	街道
面積	327.35 km²
社區數目	1
行政村數目	18
人口(2011)	2.2萬人
人口密度	67人/km²
郵政編碼	132000
政區代碼	220281005
網站： 蛟河市拉法街

拉法（粵拼：laa1 faat3；滿文：ᠯᡝᡶᡠ，穆麟德：lefu，義「熊」）係中國吉林省吉林市蛟河市中北部嘅街道，位於蛟河市區東北12公里處嘅拉法山麓。東面係前進鄉，東南面連住烏林朝鮮族鄉，南面接住蛟河新區，其中東南、西南部份連住河南街道，西面接去慶嶺鎮，北面係新站鎮。轄區面積327.35 km²，其中林業用地3.19萬公頃，森林覆蓋率57.6%，耕地面積5774公頃。呢條街道轄有18條行政村同1個社區，以下有65個自然屯、3個居民小組。辦事處駐喺拉法村。

史

拉法原名叫砬門子（砬讀啦，laa1 mun4 zi2），「砬」嘅意思係大石山，因爲當地地形東西高、中部低，東西兩處石山就似石門噉；而「拉法」呢個名其實係轉音自滿文嘅lefu，呢個詞係「熊」噉解。而喺先前，就已經有一個拉法驛站，後來1928年吉敦鐵路（長圖綫）喺度設站，站名沿襲自呢個驛站。

1938年設拉法村。1959年設拉法人民公社，1983年恢復爲拉法鄉，1992年由鄉昇爲拉法鎮。1997年底時，拉法嘅新民村、先鋒村劃入蛟河市區。2006年，拉法由鎮改爲拉法街道。

呢度打過場拉新戰役，即係拉法新站戰役，因爲主場喺拉法，可以乾脆嗌做拉法戰役。呢場仗係國共內戰時，國共兩軍爲咗爭奪長圖鐵路而打，打喺1946年6月7號夜晚到6月10號上晝，後來國民政府軍輸咗，成爲中共嘅東北民主聯軍喺撤退時贏嘅第一場仗。

地理

地形上，拉法嘅東西部多山，南部係河谷，個地形似馬鞍噉，就中間凹咗落去。東西長34公里，南北闊17公里。氣候上屬溫帶大陸性季風氣候，同時呢度受松花湖影響，年均温3.6℃，無霜期130日左右，有效積温2550─2800℃，年均降水量700─750 mm。有時有旱災、水災、雹災、風災、蟲災。

拉法有三條主要河流，都可以愛來灌溉；其中嘅拉法河穿過全境，喺南邊滙入蛟河。水利上有三座細I型水庫，儲水量達17603 m³。除咗水資源，重有礦產，如鐵、銅、金、泥炭。

交通上有拉濱鐵路、長圖鐵路喺度設嘅拉法站，同時亦有302國道、204省道蛟榆公路（蛟河─榆樹）穿過。

人口

2011年時有2.2萬人。拉法有農戶5539戶，農業人口19947人。少數民族人口3046人，一共有六個族：漢族、朝鮮族、滿族、回族、蒙古族、維吾爾族。

政區

拉法轄1個社區、18條村。

• 社區：拉法
• 村：拉法、新興、大甸子、田寶、大坡、海青、宋家、義和、愛國、山咀、永新、北大、常家、公安、新鄉、十八垧地、自強、向陽

地名釋義、沿革

※可查中國國家地名信息庫。

• 拉法社區（laa1 faat3 se5 keoi1）

  喺2008年設居委會。地名跟咗上頭。

• 拉法村（laa1 faat3 cyun1）

  地名同上頭一樣出自滿文（滿文：ᠯᡝᡶᡠ，穆麟德：lefu）轉音而成嘅官話（普通話拼音：Lāfǎ），意思係熊，因爲呢度山高林密，周不時有熊出沒。

  清康熙元年（1661年）開村，因爲位置喺山口，所以叫砬門子（laa1 mun4 zi2）。1928年吉敦鐵路喺度設咗拉法站。

  清初時呢度係通往蛟河舊縣城額穆索羅嘅緊要驛站。1932年時屬滿洲國新站保嘅舊站甲；1946年設拉法村，屬拉法區；1954年上頭區改鄉；1959年改成公社嘅管理區；1962年改成大隊；1983年改成村委會。

• 新興（san1 hing1）

  佢係從拉法大隊分出嘅，嗰年呢度出咗三次火燭，啲人爲咗求平安，就起咗呢個名來保佑。

  原本係拉法大隊嘅一部分，之前嘅建置同上面拉法村重合，1970年獨立做新興大隊，1983年改成村委會。

• 大甸子（daai6 din6 zi2）

  清光緒二十七年（1901年）開村，因爲村前有半截山，而初時叫半截砬子（bun3 zit6 laa1 zi2）。設行政村時，因爲啲屋都向陽，能夠曬正熱頭，而改名做向陽（hoeng3 joeng4）。後來因爲村前有大笪草皮，而再改名叫大甸子。

  1901年開村，叫半截砬子；1936年設行政村，叫向陽；1947年改名做大甸子。原本屬拉法大隊，之前建置同上面拉法村重合，1970年分出做靠山大隊（kaau3 saan1），1981年改叫大甸子大隊，1983年改成村委會。

• 田寶（tin4 bou2）

  民國元年（1912年）開村，當時呢度笪地嘅所有權歸自衛團嘅朱姓團總，佢收嘅地租好貴，所以啲人鬧佢。因爲朱同豬同音，豬填飽肚就肥，所以啲人嗌笪地做添飽（tim1 baau2；普通話拼音：Tiānbǎo），後來呢個諷刺地名用官話諧音雅化成田寶（普通話拼音：Tiánbǎo）。

  呢度有田寶村西北崗遺址，喺條村西北面嘅山度出土咗1件石斧，仲有啲石刀、鬲腳、陶片，屬西團山文化，喺1985年全國第二次文物普查時發現。

  1912年開村，叫添飽；1936年設行政村，叫田寶。滿洲國時屬新站保，1945年屬拉法區嘅治安行政村；1959年屬向陽管理區；1962年先至分出做田寶大隊，1983年改成村委會。

• 大坡（daai6 bo1）

  條村四面環山，入村時要行過一處大山坡，故而得名。

  民國元年（1912年）開村，因爲位置喺馬河嘅上游，所以初時叫馬河上屯（maa5 ho4 soeng6 tyun4）。1936年有韓氏定居，就改名叫韓大坡（hon4 daai6 bo1）。呢度條村逐漸變大，啲人驚日本仔來害，啲後生村民自組民團，於是改名叫自安（zi6 on1），然後又諧音成治安（zi6 on1）。1981年全國第一次地名普查時，改名叫大坡。

  1912年開村，叫馬河上屯；1936年設行政村，叫韓大坡；1937年改叫自安，然後變成治安，屬新站保。1946年設治安村，屬拉法區，1959年改成管理區，1962年改成大隊；1981年改叫大坡，1983年改成村委會。

• 海青（hoi2 cing1）

  清道光十四年（1834年）由劉氏開村，因爲喺山嘅西南邊，所以初時叫西南岔（sai1 naam4 caa3）。因爲佢隔籬流過海青河而改名叫海青，海青係官話諧音嘅滿文（滿文：ᡥᠠᠴᡠᡥᠠᠨ，穆麟德：hacuhan），意思係鑊仔，呢度指獵人用嘅架鑊。

  當地對個地名作咗個民間古仔：宋家屯南邊嘅山頂度有嚿大石似人噉，啲人嗌佢做海青，晚黑時嚿石人化成生人，擊殺咗爲禍當地嘅妖魔海洪，啲人多謝佢，就攞佢個名當地名。

  1834年開始有人住，1919年逐漸開發，1936年設行政村，叫西南岔，屬新站保嘅海青溝甲；1949年改叫海青，屬拉法區；1954年改屬進步鄉；1959年屬進步管理區；1962年分出做海青大隊；1983年改成村委會。

• 宋家（sung3 gaa1）

  清乾隆年間（1795年）開村，因爲村姓係宋，初時叫宋家堡子（sung3 gaa1 bou2 zi2）。中共建制後，以「不斷向上」嘅意思改叫進步（zeon3 bou6）。公社化之後先至改叫宋家。

  1795年開村，1936年設行政村，叫宋家堡子，屬海青溝甲；1946年改叫進步，屬拉法區；1954年撤區，改做進步鄉；1959年改成拉法公社嘅管理區；1962年改成大隊；1976年改叫宋家；1983年改成村委會。

• 義和（ji6 wo4）

  民國元年（1912年）開村，有李氏商人開咗間雜貨舖，當時跟咗舖名，地名叫福順慶（fuk1 seon6 hing3）。滿洲國期間嘅1937年，吉林嘅吳氏巨商、有錢佬李東子、日本人旦華買低呢度，聯合經營，話要「一齊講義氣，彼此和睦」，個名就叫義和堂（ji6 wo4 tong4），後來簡省成義和。因爲官話同音，當地又寫個地名成義合（ji6 hap6；普通話拼音：Yìhé），但國家統計局嘅登記唔用呢個名。

• 愛國（oi3 gwok3）

  民國元年（1912年）開村，嗰陣有董、丁、穆嘅佃農幫北大屯嘅孟氏地主打工，因此初時呢度叫孟家（maang6 gaa1）。之後有啲人搬入嚟避難，係避日本仔捉壯丁去鋪鐵路。當共產黨來蛇時，孟家地主驚大禍臨頭，將啲田地無償分晒畀啲佃農耕，啲人讚佢，就改地名叫積善（zik1 sin6）。中共建制後，呢度改名叫愛國，陸續有山東、河北嘅農民遷入。

  呢度有愛國水庫，1954年始建，當年落成。

  1912年開村，叫孟家；1936年設行政村，屬海青溝甲；1945年改叫積善；1950年改叫愛國；1954年屬進步鄉，基本同上面宋家村嘅建置同步；1962年分出愛國大隊；1983年改成村委會。

• 山咀（saan1 zeoi2）

  民國十年（1921年）開村，呢度三面環山，西面座山以梯級形狀似雀嘴噉𡁷（doeng1）開，所以初時呢度叫砬嘴（laa1 zeoi2）。後來呢度流行過克山病，啲人話係起錯名，就改名叫山咀嚟避忌。

  呢度有山咀屯北山遺址，喺條村北面座山嘅漫崗度出土咗石刀、石㳫，屬西團山文化，喺1985年第二次文物普查時發現。

  1921年開村，叫砬嘴；1936年設行政村；1946年改名叫山咀。

• 永新（wing5 san1）

  當地原名叫牌樓（paai4 lau4），來歷有兩種講法：一話道光二十七年開始有人住，個人搭間木屋有住好大嘅屋檐，啲人就嗌佢做牌樓；第二個係話有個楊氏寡婆病死，鄉里爲佢樹個貞節牌坊，所以得名牌樓。後來用「永遠朝氣蓬勃」嘅意思改叫永新。

  1910年開村，叫牌樓；1936年設行政村，屬新站保；1954年改叫永新；1959年屬北大管理區；1962年分出做永新大隊；1983年改成村委會。

• 北大（bak1 daai6）

  清光緒元年（1875年）開村，因爲多人，所以初時叫大屯（daai6 tyun4），之後因爲佢喺蛟河城北，所以改叫北大。

  呢度有幾處考古遺址，都係屬西團山文化。北大村北山遺址，喺條村北面座山度出土座陶罐、石斧、石鑿、石網墜、陶鼎腳、陶鬲腳、陶器耳、陶片，喺1985年第二次文物普查時發現。北大村東北山遺址，喺條村嘅東北面座山度出土咗石斧、石刀、石網墜、陶紡轆、鬲腳，同樣喺1985年發現。北大村北山墓羣，亦喺山度發現兩挺裸露石棺、一件石斧，喺2009年第三次文物普查時發現。北大村東北山墓葬，出土咗一件石斧，同樣喺2009年發現。

  1879年開村，叫大屯；1933年屬新站保嘅老院甲；1945年設行政村，叫北大，之後一直屬拉法；1962年設北大大隊；1983年改成村委會。

• 常家（soeng4 gaa1）

  清光緒年間開村，村姓常氏，初時係搭咗間棚屋噉來住，所以開初叫常家窩棚（soeng4 gaa1 wo1 paang4）。

  呢度有常家水庫，1956年始建，當年落成。同時呢度有兩處考古遺蹟，都係屬西團山文化：常家村北山遺址，喺北面座山出土咗石鋤、石刀、石網墜、陶片，喺1985年第二次文物普查時發現。常家村北山墓羣，喺村北面座山度出土咗三嚿石棺、一件石斧、三塊陶片，喺2009年第三次文物普查時發現。

  1875年開村，叫常家窩棚；滿洲國時屬新站保；1959年屬拉法公社嘅北大管理區；1970年分出做建設大隊；1981年改名叫常家大隊；1983年改成村委會。

• 公安（gung1 on1）

  清宣統元年（1909年）開村，因爲村東面有六樖榆樹，所以初時叫六棵榆樹（luk6 fo2 jyu4 syu6），後來以「搞好治安，平平安安」嘅意思改名叫公安。1956年時呢條村嘅朝鮮族人搬出去，喺附近另開一條村，因爲相對細過原先條村，而叫做小公安（siu2 gung1 on1；中國朝鮮文：소공안／小公安 ^Sogongan）。

  1909年開村，叫六棵榆樹；1936年設行政村，屬新站保；1947年改叫公安，屬拉法區；1954年撤區後屬新民鄉；1959年屬拉法公社嘅北大管理區；1970年分出做公安大隊；1983年改成村委會。

• 新鄉（san1 hoeng1）

  清宣統二年（1910年）開村，日本扶植咗滿洲國後，宣揚大東亞共榮圈，就起呢度地名叫共榮（gung6 wing4）。1981年第一次地名普查時，爲咗鏟走殖民地名而改名叫新鄉，意思係「建設新鄉村」噉解。

  呢度有新鄉磚廠遺址，喺舊陣嘅新鄉磚廠度出土咗六嚿石器、有松花江猛獁象嘅象牙同腳骨，喺1991年發現，對吉林地區嘅舊石器時代考古有緊要價值。

  1910年開村，1936年設行政村，叫共榮，屬新站保荒溝甲；1946年屬拉法區嘅荒溝村；之後屬公社嘅拉法管理區；1962年分出做共榮大隊；1981年改叫新鄉；1983年改成村委會。

• 十八垧地（垧讀響，sap6 baat3 hoeng2 dei6）

  地名得自村前有大笪平地，面積啱好18垧。垧係北方用嘅土地面積單位，唔同地方定義唔同，喺東北一垧等於一頃（15畝）。因此18垧換算做公制有0.18平方公里（18萬平方米）。

  民國初年（1912年）開始有散戶開荒立村，1936年設行政村，屬滿洲國八家子保，兼設有拉法警察分駐所；1959年屬公社嘅新民管理區，1962年分出十八垧地大隊，1983年改做村委會。當地有十八垧地水庫，喺1955年起水壩，1958年水庫落成。

• 自強（zi6 koeng4）

  民國八年（1919年）開村，攞「自強不息」嘅意思起咗村名。

  當地有自強水庫，1958年始建，當年落成。

  1919年開村，1936年設行政村，屬新站保，1962年屬拉法大隊，1970年分出做東風大隊；1983年改成村委會，當年改返叫自強。

• 向陽（hoeng3 joeng4）

  呢度有東西兩個部分。東向陽（dung1 hoeng3 joeng4）喺1912年開村，西向陽（sai1 hoeng3 joeng4）喺1936年開村。因爲條村靠山向陽，所以噉得名。

  當地有向陽水庫，1956年始建，1965年落成，水庫下面有對應嘅向陽灌區。

  1936年設行政村，屬新站保，1959年屬治安管理區；1962年設向陽大隊；1983年改成村委會。

景點

拉法係蛟河主要嘅觀光地之一。主要景點有拉法山、拉新戰役烈士紀念塔、保安睡佛、高麗古城、新鄉磚廠古人類狩獵場遺址、高麗墳、向陽水庫。其中拉法山係中國國家4A級景區，海拔886.2米，山峰高險，多山窿。而喺302國道保安嶺處有尊天然臥佛，拉法政府喺1999年時喺嗰度整咗個瞻佛壇。

出面網頁

• 中國國家地名信息庫