調味料

調味料係改善嘢食香味嘅物質，好多都係嚟自植物（譬如蒜、薑、蔥），亦有部份嚟自動物（譬如柴魚），或者人工合成（譬如味精）。

三大基本調味料：食鹽、食糖、胡椒粉

調味料可以係煮食期間落，好似係醃肉嘅醃料、炒餸嗰陣落嘅食鹽；亦可以臨食之前先至落，好似食麵落辣油、食白切雞點薑蓉。

按味道分

加甜

内文：糖

事實表明，「鍾意食甜嘢」呢種傾向全世界嘅人都有，無論係世界邊笪地方嘅文化都會或多或少反映呢點：淨係粵港澳嘅飲食文化就不溜有好多種甜味食品，例如紅豆沙、花生糊同楊枝甘露噉嘅糖水，又或者係大良崩紗等嘅小食呀噉。糖係世上最多人用嘅調味料之一。

加酸

睇埋：醋同檸檬汁

酸味喺人類嘅飲食文化當中幾有影響力：有好多日常會見到嘅物質都係食落或者飲落酸酸哋噉嘅，出名啲嘅有柑桔類嘅生果（包括檸檬同桔）；亦有好多食物同飲品酸得嚟又富含糖份，所以又酸又甜噉，例如汽水或者粵菜名菜咕嚕肉呀噉。好多人都鍾意啲嘢食酸酸哋，所以世界各地嘅菜系都成日會用調味料加酸味落啲食物度，例子有東亞常用嘅醋，以及係歐美人常用嘅檸檬汁等。

睇埋

• 醬
• 香料
• 香草