中文維基百科

 中文維基百科（粵拼：zung1 man4*2 wai4 gei1 baak3 fo1） 係維基百科協作計劃嘅中文版，於2002年10月24號成立，伺服機由維基媒體基金會負責維持運作，已有超過100萬篇文。

中文維基百科嘅標誌，左邊（電話睇為上）正體字版，右邊（下）係簡體字版

名

中文維基百科啟用嗰時，祗係以「中文Wikipedia」做名。直至2003年10月21號，Wikipedia嘅中文名，經過13個人投票，定名為「維基百科」。「維」字解作綁嘢嘅大繩，亦解做網，可以引申做互聯網，「基」係事物之根本，或者係建築物嘅底部。所以「維基百科」可引申為互聯網上裝載人類基礎知識嘅百科全書。

中文維基百科嘅副題為「海納百川，有容乃大」。此乃對聯中嘅上聯，由中國清朝大臣林則徐（1785年—1850年）喺1839年為廣州越華書院所作，下聯原為「壁立千仞，無欲則剛」 。「海納百川」出自《管子·形勢解》，意指海洋之所以廣大，係因為佢唔揀擇咁容納咗數以百計嘅河流。「有容乃大」就出自《尚書·周書·君陳》。對聯嘅上聯勉勵待人接物應仿效海洋，以闊大胸襟同寬容態度接納唔同嘅人同事。此合維基百科自由之宗旨，開放。

維基百科

内文：維基百科

GNU嘅標誌

中文維基百科正如維基百科本身，有三個引人注意嘅特點。正係呢啲特點令中文維基百科同傳統嘅中文百科全書有所分別：

• 首先，中文維基百科將自己定位為一個包含人類所有知識領域嘅百科全書，而唔係一本詞典、互聯網論壇或其他任何嘅嘢。
• 其次，計劃本身係一個wiki，咁就畀到大眾去廣泛參與。中文維基百科係第一個用wiki系統進行百科全書編撰工作嘅中文協作計劃。
• 重有一個重要嘅特點，就係中文維基百科係一部內容開放嘅百科全書。內容開放嘅材料畀任何第三方唔受限制咁複制、修改同再發布材料嘅任何部分或全部。維基百科用GNU自由文檔許可證。

同其他版本嘅維基百科一樣，中文維基百科係民主制、菁英制、獨裁制嘅混合，通常大部分嘅內容，由普通嘅網友討論、修改，通常為民主嘅形式，而維基管理員就因為特殊、適當嘅理由而解除部分限制，例如修改首頁、適當嘅刪除文章或封鎖用戶。

差第二啲話嘅版

中文維基百科於2011年06月22號嘅首頁

中文維基百科以白話文嚟寫，係漢族嘅主要書寫語言，喺中國大陸、台灣、香港、澳門、新加坡係官方文字。雖然漢語有七家（官話、贛語、閩語、粵語、客家語、吳語、湘語）,但係中文維基百科冇規定以邊家嚟書寫，不過維基人約定俗成，以白話文為通用形式，耐唔耐滲啲文言文，以求文句能夠兼雅達。

中文維基百科嘅編輯者嚟自於世界各地嘅華文使用者，根據2018年統計數據，使用者連線來源統計，台灣50.8%、香港18.8%、北美洲11.5%、東南亞5.3%、歐洲3.3%、日本2.5%、澳洲同南韓都係1.5%、中國大陸同澳門各佔1%，其他同未知連線來源共佔剩低嘅3.1%。另外根據2013年10月維基百科對各語版本嘅編輯者來源嘅統計結果，台灣嘅編輯者佔39.1%、香港佔25%、中國大陸佔20.7%，而美國同澳洲就分別佔3.9%同埋1.9%。

嚟自於各地擁有唔同成長背景嘅華文使用者共同參與中文維基百科，唔同嘅政治立場同社會觀念喺中文維基百科產生最直接嘅接觸，中文維基百科嘅文章內容係全球華文使用者互相妥協折衷後嘅成果。另外，包括中文維基百科在內各語言版本對於非自由版權下嘅內容，或者版權、來源不明嘅文章同圖片，就保有唔同於當地網絡氛圍嘅，極為嚴格嘅審查制度。基本上任何唔可以用於自由傳播或者禁止無經濟補償咁應用於商業領域嘅文章、圖片，原則上都冇得留低。

中文維基百科大幅度而且深度咁介紹中華文化、中國歷史同中國大陸、台灣、香港、澳門、新加坡嘅人、事、物。喺某啲領域，闡述咗華語使用者嘅價值觀，內容更貼近於華人自己嘅理解。

中國大陸嘅介紹，沿海地區擁有較為詳細嘅文章內容，內陸同西部地方嘅介紹就較為缺乏，反映中國大陸各地互聯網發展嘅唔平衡。

參與

去到而家，中文維基百科已經有1,173,216篇文，但數量仲未包括對話頁、冇內連結嘅文、重定向頁（跳轉頁）以及其他空間名嘅頁，如果加埋呢啲頁，截至2021年1月，總共有超過647萬頁，仲有超過6,364萬次編輯。參與人數方面，有超過3,042,941個註冊用戶編輯過，當中編輯超過1,000次嘅維基人有1,154人，而佢哋嘅貢獻佔咗中文維基百科編輯總次數嘅73.6%。至於管理人員，中文維基百科擁有超過79名管理員及11名行政員，負責站內日常嘅維護工作。

史

維基不時喺重要嘅節日喺首頁顯示相應嘅圖片、Logo同寄語。圖為2005年春節時期中文維基百科嘅限時Logo。

自從2002年10月24號第一篇文起，中文維基百科至今已經迅速擴展。

創立及初期

2001年5月，中文維基百科計劃同另外12種主要語言維基百科計劃同時成立，但係當時維基百科網站唔支援中文輸入。同時期，同中文版有相同困擾嘅日文維基百科，權宜咁用羅馬字母嚟寫日文文章，中文維基百科喺嗰時只擁有少少嘅測試文字。

2002年10月24號，Ghyll（而家嘅Mountain）成功咁用工具軟件輔助，寫咗實質中文內容嘅文章HomePage，中文維基百科到呢一刻先算係真正開始運作，而Mountain亦成為中文維基百科嘅第一位參與用戶。10月27號，中文維基百科移動到新服務器，軟件升級到Phase III，新版嘅軟件解決咗中文輸入嘅問題。同時，域名改做zh.wikipedia.org。11月17號，中文維基百科網站界面嘅中文化工作告一段落，Mountain翻譯咗英文文章Computer Science，貼上中文維基百科，呢個係真正意義上嘅第一篇文：計算機科學。

喺中文維基百科嘅早期，大部分嘅長文都係從英文翻譯過嚟嘅，中文維基原創嘅就以短文居多。

早期維基人同佢哋嘅貢獻

中文維基百科最早嘅維基人係Mountain，而早期累積大量編輯次數嘅五位維基人：Samuel、Menchi、Lorenzarius、Formulax同Shizhao，在2003年6月14號一齊成為首批中文版嘅華人管理員。

其中Shizhao喺維基百科嘅整理同協調方面做咗好多嘢，佢喺中文版嘅其他維基媒體計劃入面都做咗好多維修嘅工作，佢編輯次數高倨榜首，對中文維基百科嘅向上發展奠定咗基礎，亦奠定咗佢喺中文維基社群嘅威信。

2002年至2003年，中文維基百科持續進行本地化同正體（繁體）化嘅翻譯工作。直至2004年12月23號，隨住MediaWiki 1.4版本嘅發布，中文維基百科初步實現正（繁）簡體自動轉換。

媒體關注同使用者增長

2003年10月20號，中國大陸嘅《中國電腦教育報》文章介紹維基百科，呢次係中文媒體第一次正式報導維基百科。2004年2月15號，同係中國大陸嘅《新周刊》喺第173期亦發表同維基百科有關嘅報導，跟住隨後嘅幾個禮拜，好多媒體跟進報導，為中文維基百科帶嚟大量嘅中國大陸維基人。2004年嘅3至5月，維基人以倍數計咁增加，總文章數字好快咁由6000篇突破10000篇。

2004年5月16號，台灣嘅《中時晚報》刊出《維基網路百科，大家一起寫》，係台灣主流媒體首次報導維基百科，隨後喺6月，台灣嘅《聯合報》跟進報導《Wiki百科網書，你都可寫一筆》，為維基百科帶嚟大量嘅台灣維基人，時值維基百科喺大陸受到封鎖，台灣相關文章嘅編寫量大幅增加，首頁亦加入咗台灣嘅熱門新聞。

香港媒體對中文維基百科嘅關注較遲，係香港維基人發展起步較遲嘅主因之一。2006年2月20號，香港嘅《明報》喺副刊發表《生活百科：Wiki世界 自由開放》，呢次係香港媒體第一次正式報導維基百科。3月29號至3月30號，香港嘅《頭條日報》喺新聞故事連載發表《網友齊編「自由」百科全書　港八月辦首屆中文維基聯會》（按：應該係中文維基年會），呢次係香港媒體第一次深入咁介紹中文維基百科。同年5月，中國大陸嘅環球時報亦都報道咗維基百科，好多大陸青年就係通過睇報紙而得知同加入維基百科嘅。

文章數量嘅增長

「十萬分的感謝」 — 中文維基百科突破十萬篇文嘅限時標誌。

中文維基百科喺2002年10月正式開始嗰時，英文維基百科已經有超過40,000篇文，係起步較遲嘅主要語言版本。2004年2月24號，中文維基百科突破咗5000篇文，但係其中有啲文章包括正（繁）簡兩個版本；註冊用戶數亦同時突破咗3000人。2月27號，用戶Ktsquare大量添加年份文章，令中文維基百科短短3天內就突破咗6000條條目。5月14號，中文維基百科總文章數字終於突破1萬篇。

隨住更多維基人嘅加入，文章數量增長速度亦穩步上升。2005年12月13號，用戶Shibo77大量添加年份文章，令中文維基百科喺短短1日內多咗500篇文，重突破5萬條。到咗2006年11月12號，中文維基百科文章數字突破10萬篇，成為第12個擁有超過10萬篇文嘅維基百科語言版本，係一個重要嘅里程碑。

中國大陸政府封鎖

内文：中國大陸封鎖維基媒體事件

中華人民共和國對互聯網採取內容審查嘅制度，政府有權依法對網路內容進行審查，對嗰啲有爭議嘅網頁內容採取限制措施。維基百科網站對一般人民嚟講好易接觸得到，但維基百科計劃成長嘅紀錄上，喺中國大陸被封鎖過四次。

中文維基百科喺封鎖時嘅首頁歡迎語上面加上被中國大陸政府封鎖嘅告示。

第一次封鎖

首次封鎖發生喺2004年6月2號到6月21號。

封鎖嘅最初幾日只係封鎖中文維基百科，後來所有維基媒體網站喺中國大陸都被封鎖。為咗解決呢次封鎖，中文維基嘅管理員向當地嘅互聯網服務提供商溝通，重向有關單位申請解除對維基計劃網站嘅封鎖。所有維基媒體網站喺2004年6月17號至6月21號被解除封鎖。

呢次封鎖影響到中文維基百科發展嘅生命力，使用者增長放緩，文章數增加速度減慢，文章編輯次數銳減，直到2004年9月好多狀況重未回復到2004年5月嘅程度。

第二次封鎖

第二次輕微嘅封鎖發生喺2004年9月23號到9月27號。

第三次封鎖

2005年10月19號下晝五點起，維基百科再次突然受到封鎖，中國大陸部分用戶無法登錄各語言版本嘅維基百科，封鎖原因至今未明，有人估計同近期發表嘅《中國的民主政治建設》白皮書有關。2006年11月9號，大量用戶回報中文維基百科http://zh.wikipedia.org/ 已經可以訪問，呢個係自2005年10月19號封鎖長達一年幾以嚟中國大陸首次可以重新訪問。同時https://secure.wikimedia.org/ 已全部唔能夠使用。

第四次封鎖

2006年10月，英文維基百科、維基新聞等維基媒體喺中國大陸可以正常訪問。

2006年11月9號下晝六點左右，中文維基百科喺中國大陸各地陸續解禁。然而呢次解禁只係持續咗8日，由11月17號開始，中文維基百科再次受到封鎖。一般認為呢次臨時解禁係由於GFW升級所致。

上面嘅封鎖都係無預警、無預先通知嘅，同埋中華人民共和國相關單位甚至冇講畀維基百科知封鎖嘅原因同任何理由。

2007年6月15號，中文維基百科以外嘅各語言版本維基百科同維基媒體各項目網站再次可以喺中國大陸正常訪問。

字詞差異

中文維基百科正（繁）簡處理系統原理所在網頁嘅屏幕截圖

内文：漢字、繁體中文同簡體中文

背景

中文存在兩種書寫系統──正體中文（繁體中文）同簡體中文。一般喺台灣、香港同埋澳門嘅使用者用正體中文（即係繁體中文），喺中國大陸、新加坡、馬來西亞就會用簡體中文。因為缺乏交流同各自唔同嘅書寫系統嘅發展，好多正式嘅名喺中國大陸、台灣、香港同埋新加坡都完全唔同。例如話電腦嘅印嘢設備，喺中國大陸叫做打印機，喺台灣叫做印表機。

轉換功能之前

隨住中文維基百科嘅成長，正（繁）簡體問題成為中文維基百科發展唔可以唔面對嘅問題。喺2003年嘅討論裏面，中文維基百科社群嘅主流意見，係畀正體（繁體）簡體喺中文維基百科共存，正（繁）簡體問題應該通過發展轉換程式來解決，而唔係等正（繁）簡體分別成立兩個中文維基百科網站，但係當時無開發相關嘅技術，所以就停止咗討論呢件事。

絕大部分嘅文章係正（繁）簡體共同存在喺一篇文章之中，少數文章係擁有正（繁）簡兩個唔同嘅版本，例如法國用過兩種唔同版本：「法國」同「法国」，日本亦用過「日本/简」同「日本/繁」。其他維基百科可以用zh-tw同zh-cn做跨語言連結。中文維基內部嘅正（繁）簡跨語言連結就用

〖繁〗

嘅方式做連結。呢種方式可以令兩種文字系統唔會互相干擾，但就只能夠靠人工整合正體（繁體）同埋簡體兩個版本嘅差異。而公告、總集型嘅頁就用正（繁）簡並存嘅方式存在（好似開頭介紹部分依然係正〔繁〕簡重存），即係話正（繁）簡體文字喺中文維基百科有相同嘅地位。

喺正體（繁體）簡體轉換功能啟用之前，部分嘅使用者大量地將正體（繁體）文章全面改為簡體，反之亦然，實際上就冇編輯文章嘅任何內容。噉嘅做法被認為係一種破壞行為，正體（繁體）內容嘅缺少好容易被視為中文維基百科排擠正體（繁體）字嘅使用者。隨住簡體使用者大幅增長，中文維基百科由以往嘅正（繁）簡並存，逐漸成為簡體為主流嘅百科全書。中文版成立以來就不斷出現正體（繁體）版或者台灣版維基百科獨立嘅呼聲，由呢段時間得到越來越多台灣使用者嘅認同。

經過大概兩年嘅爭論同等待，2004年9月，Zhengzhu加入中文維基，提出正（繁）簡轉換，因為噉重寫咗成套程式，開始進行正（繁）簡轉換功能嘅開發。呢套轉換程式一度以主要中文維基用戶嘅所在地做字庫分類，之後簡化做「簡體」、「繁體」同「唔轉換」3類。中文正（繁）簡轉換系統因此容易手動添加同埋使用，成為中文維基百科解決正（繁）簡問題嘅最實際重可行嘅方案。呢套方案及程式喺2005年嘅第1屆維基媒體國際大會上由中文用戶進行咗簡單嘅介紹。

繁簡體字詞轉換

為咗免除呢啲障礙，由2004年12月23號開始，中文維基百科嘅伺服器提供一個功能──正（繁）簡體自動轉換功能，能夠依據用戶參數設置自動轉換唔同嘅字體同辭彙去畀用戶睇。好多以前用正（繁）簡兩種版本內容嘅文章逐漸合併。輸入正（繁）簡兩種名都可以檢索瀏覽合併後嘅文章。

轉換功能免除咗正體（繁體）簡體嘅隔閡，亦一併解決咗中國大陸同台灣、香港之間辭彙嘅分歧所帶來難以跨越嘅障礙。

最初喺頁頂嘅文章文字轉換嘅標籤只有「唔轉換」、「簡體」同埋「繁體」三種，但「繁體」係用台灣用語嘅繁體字，對習慣港澳用語嘅香港、澳門使用者感到唔方便。2006年11月，經投票通過後，頁頂嘅文章文字轉換嘅標籤改為「唔轉換」、「簡體」、「台灣正體」同「港澳繁體」四種。

喺2007年1月，轉換標籤更增加去到「唔轉換」、「大陸簡體」、「台灣正體」、「馬新簡體」加埋「港澳繁體」五種。

而家轉換標籤「港澳繁體」改成「香港繁體」同「澳門繁體」，「馬新簡體」改成「大馬簡體」同「新加坡簡體」。

主要項目

特色同優良條目

經過一定時間發展嘅維基百科一般都會產生「典範條目」（原名「特色條目」），雖然真正100%符合維基百科完美作品標準嘅文實際上重未存在，但「典範條目」依然係作為該語言維基百科中，通過多數人認可為比一般文章要更為完整、優秀嘅作品。佢哋一般係眾多維基人共同協作嘅成果，亦可以係部分人獨立完成嘅華彩篇章。每一篇「典範條目」都會喺文嘅右上角同文嘅討論頁上注明標記。

對於中文維基百科嚟講，「典範條目」嘅概念嘅出現始於2004年3月（中文維基百科實質開展近半年後），起初係由管理員將個人認為較為完整嘅文章遴選為「典範條目」，而呢種做法喺中文維基百科步入文章數量同質量大幅增長後變得唔符合發展嘅要求。另外，為盡快提升中文維基百科文章嘅質量，嗰年5月，中文維基百科引入咗一直持續到而家嘅「條目質量提升計劃」，成為當時唯一一個成為「典範條目」嘅方法。但冇幾耐，「典範條目評選」制度許可有個人獨立完成嘅文章參選「典範條目」。

最早嘅「特色條目」係「文化大革命」同「伊麗莎白一世 (英格蘭)」，經過第一次同行評審後「伊麗莎白一世 (英格蘭)」依然保留「特色條目」嘅地位，嗰篇文亦成為中文維基百科最早嘅「特色條目」。但係喺2007年2月8號，「伊麗莎白一世 (英格蘭)」已被撤消特色條目資格。2007年2月26號，中文維基百科嘅「特色條目」數量正式突破100，第100個「特色條目」係「哆啦A夢」（多啦A夢），但由於隨後有幾條「特色條目」被撤消資格，因此「特色條目」數目一度跌返落100以下。直到兩個月後嘅4月28號至再度回到100個「特色條目」嘅數字。

另一方面，中文維基百科好多文章擁有極佳嘅內容質素但都唔足以成為「特色條目」；可能係因為佢長度過短、或論題太過廣、或過份聚焦於某一話題、或者係文章所述嘅領域唔係太知名。即嗰啲具有成為「特色條目」潛力嘅文章，由維基人主動揾出、編寫，通過提名並通過嘅，將會成為「優良條目」。

截至目前，中文維基百科嘅「典範條目」當中以歷史類最多，其次係文學藝術及政治類嘅文章。可能同參與者嘅愛好同日常工作，文化類文章嘅普及度較高所致。同時，中文維基百科擁有嘅「優良條目」數量亦正穩定上升，其中以政治類文章最多，但歷史同地理類文章都佔好大比重。

條目質量提升計劃

「條目質量提升計劃」始於2004年5月，目嘅係集合維基人嘅力量，更快咁合力打造更多「特色條目」。「條目質量提升計劃」旨在動員更多維基人參與嘅同時，提升中文維基百科嘅寫作質量，選取進行質量提升嘅文章由維基人投票決定，經過幾個禮拜提升後再交去「特色條目」評價。當中，「特色條目」評選得分最高嘅係「歐洲」，滿分5.0分中平均有4.8分。

除咗主計劃之外，其他領域下都設有自己嘅「條目提升計劃」。例如「香港條目提升計劃」係針對香港相關文章而發展嘅質量提升項目，以提升香港相關文章至「特色條目」為目標。此外，重有台灣主題、化學主題、生物主題、足球主題，但後三者現時經已處於荒廢狀態，只有香港同台灣嘅計劃仍然繼續正常運作。

然而，自2006年起，由於維基人對編寫文章嘅態度，轉變成以獨力完成為主，因此呢啲「條目質量提升計劃」嘅成效大不如前。除咗提升後嘅文章質素重無大改善，部份計劃更陷入荒廢狀態。2006年11月曾經有維基人動議廢除「條目質量提升」嘅主計劃，但主流意見傾向保留進行改革，直到現時重未有最後定案。

2007年4月6號，由用戶dgg32提出嘅「用戶條目質量提升計劃」正式試行。該計劃目前預計試行3個月，到期後由維基人討論佢嘅可行性，同埋係唔係取代舊計劃等問題。

動員令

「動員令」係中文維基百科特有嘅一種為增加文章數量同兼顧質量而進行嘅召集維基人編輯文章嘅活動，方式係部份維基人主動邀請其他維基人參與編輯文章。「動員令」分「大動員令」及「小動員令」兩種。「動員令」搞過四次，其中頭三次係大動員令，第四次係小動員令。而第三、四次動員令更啟用咗加分機制。首次動員令喺2006年7月15號到2006年8月1號舉辦；第二次喺2006年8月15號到2006年10月1號；第三次喺2006年12月1號到2007年1月1號；第四次喺2007年4月1號始到4月30號，呢次動員令限定生物動員令、翻譯動員令、寰宇動員令、體育奧運動員令、音樂動員令同暗黑動員令六個主題。一啲維基人樂於接受呢種活動，但亦有人表示反對。「動員令」確實對中文維基文章質量產生一定促進作用，但因為參加人數有限而效果平平。關於「動員令」重搞唔搞落去下去重有爭議。

翻譯

中文維基有參與元維基嘅「每周翻譯」計劃，每個禮拜由其他語言版本嘅維基百科翻譯一篇文。呢個計劃到現時為止已成功翻譯超過100篇中短篇幅嘅外文文章，為翻譯工作提供榜樣。

專題同主題首頁

中文維基百科設有唔同嘅專題。專題係一個幫助各參與者去整理喺維基百科某一特定範疇嘅資料嘅資源。呢個唔係提供嗰啲資料嘅地方，而只係一個有關嗰啲資料嘅資源：好似邊啲資料應該如何編排方式、或者邊啲內容應該包含等等。而且各個專題嘅討論頁亦為嗰啲對嗰個題目有興趣嘅參與者提供一個討論地方。截至2007年3月，中文維基百科有大概70個專題。

對於特定範疇，中文維基百科重設有主題首頁。主題首頁係為對某一領域嘅知識有興趣嘅維基人及一般讀者提供嘅首頁，用嚟幫助揾嗰個主題嘅資料，重擴充同嗰個主題相關嘅文章。一個維基主題可以係一個或多個專題相連。不過，同專畀維基編者使用嘅維基專題唔同，維基主題係同時為編者同埋一般讀者服務嘅。截至2007年3月，中文維基百科有48個主題首頁。

工作小組同興趣小組

為凝聚對特定範疇感興趣嘅維基人，中文維基百科設有唔同嘅工作小組及興趣小組。工作小組嘅主要焦點嘅中文維基百科內嘅站務維護，而興趣小組則集合咗對有興趣編寫特定範疇條目嘅維基人，藉呢進行意見交流。截至2006年12月，中文維基百科共有9個工作小組及27個興趣小組。

地區維基人協作

2005年8月，香港維基人者尺發起咗香港維基人佈告板。呢個係中文維基百科首個地區性維基人佈告板，作為香港維基人同對撰寫香港文章有興趣嘅維基人聯絡之用。佢嘅最大特色，係佢嘅「香港條目提升計劃」。喺呢個計劃之下，有啲文嘅質量得到大幅提高，重成為「特色條目」。最早由呢個計劃出現嘅「特色條目」係「香港電車」，喺嗰板嘅「條目提升檢討」嘅滿分5.0分中得到平均分3.4分。

繼香港維基人喺中文維基百科首創地區性維基人佈告板之後，喺2006年1月1號，台灣維基人阿儒發起咗相同性質嘅台灣主題公告欄，以求將台灣嘅風土文化喺維基百科展現出嚟。其後，來自廣東、中國中部、日本同澳門嘅維基人都建立咗佢哋嘅維基人佈告板。截至2007年3月，中文維基百科共有6個地區性維基人佈告板。

刊物

維基讀本嘅第一期封面，由Shizhao主編

中文維基百科由2005年起，由中文維基百科行政員Shizhao主持編寫維基讀本（第二期稱為維基文摘）。維基讀本係對維基百科上某種主題文章精選嘅一個連續出版物，並製作成PDF格式出版。維基讀本每季出一期，但出咗兩期就冇再出。2006年第一屆中文維基年會籌備期間，有提議重辦維基文摘，但都係未成事。

• 第一期（2005年第一季度）：繁簡混合版、簡體中文版
• 第二期（2005年第二季度）：繁簡混合版

另一方面，中文維基百科設有一個名為wikidigest嘅郵件組。個郵件組由中文維基人snowyowls喺2005年12月建立，內容係中文維基百科新文章精選，目前定期向用戶發送每日入選中文維基首頁「你知道嗎」欄目嘅文章，可以喺呢度入。

鑑於維基讀本已荒廢多時，中文維基百科用戶信陵使喺2007年3月13號，出版全新嘅《中文維基百科電子雜誌》試刊版（簡體中文版、繁體中文版）。雜誌初步計劃每月出一期，內容除咗展示中文維基百科嘅特色內容，亦會有用戶專訪、社群熱門話題及最新統計數據等。然而，截至2007年5月，重未有本雜誌嘅最新消息。

互助客棧同詢問處

中文維基百科設有一個名為「互助客棧」嘅地方，用嚟討論技術議題、方針同規則、以及中文維基百科嘅管理維修。呢個係中文維基人最主要嘅交流意見嘅地方。另一方面，面對雅虎知識+一類知識型網站嘅流行，中文維基百科喺2006年10月設立咗一個名為「詢問處」嘅地方，畀使用者發問及解答任何同維基百科無關嘅問題。

維基人社群

參與者

中文維基百科嘅參與者來自世界各地嘅華文使用者，而唔係集中於中國大陸。東南亞擁有龐大嘅華語使用人口，但當地華人人口並冇反映喺嗰帶地區相關文章嘅書寫量上，可能同東南亞華人多數用粵語、閩南語、客語或者係當地華人已失去華文書寫嘅能力有關。維基人嘅年齡跨度同一般人印象中「百科全書」嘅編輯者年齡跨度唔同，其中唔少活躍嘅維基人喺生活中重係大學生及中學生，甚至有少數小學生參與。呢外，通過「條目質量提升計劃」、訪問同編輯總數上顯示中文維基百科用戶大部分對政治、歷史、文化類文章報有較大嘅熱情，因此「特色條目」、「優良條目」、「新條目推薦」都以呢類文章居多。另一個特色現象，就係由於來自香港嘅維基人好多都關心本地嘅嘢，因此優秀嘅香港相關文章嘅比例都唔少。

截至2007年6月，中文維基百科有超過24萬名註冊用戶，擁有??????篇文同超過400萬次嘅編輯。但活躍嘅維基人所做出嘅貢獻佔據咗整個中文維基百科嘅大多數。編輯超過1,000次嘅維基人有大概300幾人，而佢哋嘅貢獻佔咗中文維基百科編輯總次數大概75%，而編輯超過10,000次嘅維基人嘅35人中，已貢獻咗超過三分之一嘅編輯總次數。有觀點認為呢個係維基百科唔易令新人上手或者對版權嘅要求嚴格嘅表現。

一般嚟講，已經熟悉中文維基百科嘅用戶大多數用互助客棧來進日常嘅編輯交流，而專為新人設立咗常見問題嘅集合社區。為咗進一步加強維基社區之間各用戶嘅交流，中文維基百科喺維基百科人中通過地域、愛好及興趣、畢業學校、政治傾向……各種唔同嘅分類創立咗各個維基人之間嘅交流板塊。通過呢個板塊維基人可以好快找到自己嘅同鄉、校友、志同道合嘅第啲維基人。維基人可以通過呢度尋求各種協助，或發起當地維基人舉行聚會。亦可以找到維基嘅部分指導方針，工作小組同一啲怪誕而罕見嘅文章。

管理員

2006年底，中文維基百科一共有86個管理員：29個嚟自中國大陸、16個嚟自台灣、14個嚟自香港、9個嚟自美國、5個嚟自加拿大、3個嚟自澳門，英國、澳大利亞、法國、韓國、德國、日本各一個，2個未鑒別。

聚會

參同2005年維基媒體國際大會嘅數位來自世界各地嘅維基人。

維基百科第一次嘅聚會──維基百科北京地區網友見面會，2004年7月25號喺北京大學舉辦。此後喺上海、香港、臺北、新竹都有維基人發起聚會，將網上嘅聚會帶到現實之中。聚會嘅主題主要涉及中文維基百科嗰當時遇到嘅問題同一啲發展嘅建議，因此討論嘅焦點往往各有側重。2005年8月，中文維基百科嘅Wing、阿仁、虎兒等幾名用戶參加咗呢一年嘅維基媒體國際大會，重喺會上發表由Zhengzhu撰寫嘅關於簡繁轉換嘅技術性論文「Chinese conversion the wiki way」同主要由Mountain撰寫嘅講演稿「We-create-pedia in China」等多篇文章，受到與會者嘅廣泛關注。

2006年4月，台北維基人開始展開每兩星期一次嘅定期聚會，香港維基人於10月仿效。2006年12月，廣東、北京、南京、香港同台北五個地區都計劃舉行冬季聚會，係中文維基百科成立以來同一個月內最多地方舉行聚會嘅月份。

中文維基年會

中文維基年會邀請到香港著名人士陸恭蕙、單仲偕等發言

内文：中文維基年會

為咗令各地嘅中文維基人增加見面嘅機會，以及向外界推廣中文維基百科嘅應用，中文維基年會因此而被發起。第一屆中文維基年會喺2006年8月26號至27號喺香港中文大學舉行。超過一百名參加者參與呢次活動。呢個年會更係全球第一個針對個別語系嘅維基聚會。

由於台灣台北市成功奪得2007年8月舉行嘅第三屆維基媒體國際大會主辦權，因呢第二屆中文維基年會可能未必會於2007年舉行。

網上討論交流

中文維基人依地區嘅習慣而有唔同嘅網上交流方式，例如來自台灣嘅維基人多數用BBS同MSN互相交流，而來自中國大陸嘅參與者就較多使用QQ進行即時交流。但係隨住參與者群體嘅不斷交流同融合，呢啲唔同網絡交流方式嘅利用都唔係絕對，比如，而家一啲中國大陸嘅中文維基嘅網絡會議都會用MSN，以及Skype呢類其他地區維基參與者常用嘅網上通訊軟件。下面係一啲大事紀：

• 2005年1月19號，以Wikipedia為主題嘅討論看板喺台灣批踢踢BBS站成立，重開始有計劃咁喺BBS上推廣維基百科。
• 2005年3月24號，中國大陸維基人冷玉（內容群：2382326，技術群：3680101）建立咗以維基百科為主題嘅QQ群，其他大陸維基人都先後建立以維基百科為主題嘅QQ群，其中冷玉嘅兩個群人數最多、討論最為熱烈。QQ群成為中國大陸嘅維基人嘅網上即時交流方式之一，接近甚至超越咗其他維基百科嘅IRC頻道嘅地位。
• 2006年4月26號，香港嘅香港地BBS建立維基百科版，重同台灣批踢踢BBS維基版建立轉信關係，係香港第一個開設維基討論區嘅站台。

維基榮譽同獎勵

2005年1月，Richy同Vipuser為進一步推動中文維基百科嘅發展，參考英文、日文版維基百科創建咗目前中文維基百科通用嘅「維基榮譽與獎勵」，冇幾耐之後設立咗以獎勵Gmail或Wallop為主要方式嘅其他維基獎勵，以作為對長期為中文維基百科付出貢獻嘅維基人嘅肯定。此後重有「新條目推薦」制同「條目編寫競賽制」（該項目已停止）。執行呢啲措施既收到確實嘅成效，帶動啱啱加入維基百科嘅新人嘅貢獻熱情，亦行咗唔少彎路。同年8月，由Ffaarr同Super1發起針對維基榮譽同獎勵具體操作細節嘅一次討論，重將之付諸投票通過。2006年2月，香港維基人佈告板設立咗「維基香港創作獎」，2007年3月起，ACG專題亦設立咗「維基ACG專題創作獎」。呢兩個獎勵係中文維基百科目前為止僅有獨立於維基榮譽同獎勵主計劃嘅創作獎項，另外，維基香港創作獎喺2007年4月，分拆成「維基香港內容獎」同「維基香港圖像獎」，畀更多攝影好手可以唔經由寫文嘅方式，參與攝影嘅協同工作。

弊端

内文：中文版維基百科嘅弊端

中文版維基百科有諸多弊病，包括增長慢、內容少、專業貧及錯漏多。呢啲問題有大把係多種維基百科嘅通病（畢竟佢開頭係由英文版倒模出嚟嘅），亦有無數充滿特色（中文使用者將其待人處世方式帶咗入去）。

紛爭

内文：中文維基百科爭議

環繞中文維基百科嘅爭議，主要包括資料來源可靠性同埋中國大陸同管理員用戶對政見唔同人士嘅攻擊同封殺。後者隨住香港反修例運動同香港國安法嘅爭議，而顯得更加嚴重，甚至有一個名叫Walter Grassroot，來自中國大陸嘅維基編輯，提議向國家安全處舉報香港用戶。有香港用戶就指責，中國編輯違反維基百科合作同互信嘅原則。

出面網頁

• 中文維基百科
• 中文維基嘅統計圖表
• 中文維基百科新條目精選

英文：

• 元維基：有關正（繁）簡中文轉換嘅文章