推想型故仔

推想型故仔（粵拼：teoi1 soeng2 jing4 gu2 zai2 | 英文：speculative fiction）係虛構故仔嘅一個大類，泛指任何作者特登要故仔內容喺某啲方面完全唔似現實嘅虛構故仔，狹義淨係包小說，廣義包埋喺第啲媒體（電影同漫畫等）出現嘅呢啲故仔，即係包括：

• 科幻泛指一啲集中於講科學同先進科技相關主題嘅故仔，呢啲故仔通常會提到一啲－由作品出嘅年代睇－現實世界冇嘅先進科技，出名作品有《攻殼機動隊》、《廿二世紀殺人網絡》同《未來戰士》呀噉；
• 奇幻泛指一啲設喺虛構世界嘅故仔，內容會有魔法等現實冇嘅超自然力量或者同現實世界唔同嘅物理法則，而且往往會用到一啲人類神話傳說當中嘅生物，例如係西洋龍，出名嘅奇幻作品有《魔戒》同《哈利波特》；
• 恐怖故仔泛指作嚟想令讀者觀眾覺得驚嘅故仔；呢啲故仔嘅情節會將主角置身喺受威脅嘅處境當中，透過展示故仔角色喺面對呢啲嘢嗰陣嘅無助，引起讀者觀眾嘅恐懼情緒，好多時都會用鬼魂同喪屍等涉及超自然事物嘅橋段，所以恐怖故仔好多都屬推想型故仔，例子可以睇史提芬京同伊藤潤二嘅作品。

各種推想型故仔嘅常見橋段：

• 左上：科幻常見嘅機械人、
• 右上：奇幻常見嘅西洋龍、
• 下：恐怖故仔常見嘅狼人。

好似科幻同奇幻等嘅體裁往往要求作者做詳細嘅世界創建，確保個故仔世界雖然同現實世界唔同，但依然有內部一致嘅法則，令讀者觀眾肯暫停懷疑。因為呢個緣故，推想型故仔俾好多人認為係象徵想像力嘅體裁。

三大體裁

科幻

一個 1906 年嘅科幻故仔嘅圖畫；舊嘅科幻故仔當中想像嘅科技好多時幾廿年後嘅人望到會覺得好老土。

内文：科幻

科幻（SF）係最重要嘅虛構故仔文類之一。廿一世紀初敘事學學界對科幻嘅定義未有一致共識，不過一般嚟講，科幻故仔背景設定會設於未來嘅世界，會有一啲（由作品出嘅年代嘅角度睇）極先進嘅科技；喺主題上，好多時都會集中於一啲當代有關科學同科技嘅哲學問題；常用嘅橋段包括咗似人嘅人工智能以及機械人等等。

對於科幻呢個文類係點定位，廿世紀美國科幻大師阿西莫夫就噉講：

「

原版英文："Science fiction can be defined as that branch of literature which deals with the reaction of human beings to changes in science and technology." 粵文翻譯：科幻可以定義為文學當中專門應付人對科學同科技上嘅改變嘅反應嘅嗰一個分枝。

」

而人稱科幻先生嘅美國科幻作家羅拔海萊因就噉講：

「

原版英文："A handy short definition of almost all science fiction might read: realistic speculation about possible future events, based solidly on adequate knowledge of the real world, past and present, and on a thorough understanding of the nature and significance of the scientific method." 粵文翻譯：一個能夠簡短噉概括幾乎所有科幻作品嘅定義望落係噉嘅：對未來事件嘅真實性預測－呢啲預測係穩陣噉建基於有關現實世界以及過去同未來嘅知識，同埋建基於對大自然同科學方法嘅重要性嘅完整理解。

」

科幻有得細分做多個子文類。其中一個常見分法係按真實度分做軟科幻同硬科幻兩種：

• 軟科幻指故仔入面嗰啲先進科技完全係老作嘅，根本冇現實基礎可言，而且好多時故仔內容科學上唔準確（例如連物理法則都搞唔清），出名作品有《星空奇遇記》同《星球大戰》等－呢啲作品有星際航行等主題，但喺科學上並唔準確，而且含有超自然成份，好似係星戰嘅當中嘅原力；
• 硬科幻啱啱相反，指個故仔入面啲先進科技真係有現實基礎，甚至乎直頭係當代科學界正喺度研究緊嘅嘢，而且故仔內容盡可能做到合乎當代嘅科學，出名作品有《攻殼機動隊》－呢個作品當中出現嘅先進科技真係當代重視嘅技術，而且主題仲涉及對當代科學問題嘅思考。

奇幻

一個騎士喺度同隻西洋龍戰鬥；西洋龍係西方奇幻故仔入面常見嘅角色。

内文：奇幻

奇幻（fantasy）係另一個重要嘅虛構故仔文類，成日俾人攞嚟同科幻對比。喺背景上，奇幻故仔設喺虛構嘅世界，會有一啲現實世界冇嘅超自然力量或者同現實世界唔同嘅物理法則（例如係魔法嘅存在）；喺角色上，奇幻故仔往往會涉及一啲神話傳說當中嘅生物，包括高扁、精靈以及西洋龍等，甚至乎係作者自己想像出嚟嘅生物。奇幻故仔零舍睇重世界創建－喺作奇幻故仔嗰陣，作者往往會好俾心機建構佢哋心目中嘅魔幻世界，例如《魔戒》嘅作者就認真到為自己諗出嚟嘅魔幻世界整咗地圖，描述佢個世界係點嘅（而且佢唔係唯一一個噉做嘅奇幻作家），仲要度埋呢個魔幻世界嘅物理法則同現實世界有乜分別，以及呢個世界嘅魔法點用（要令讀者覺得個故仔有理可循）等嘅問題。

奇幻係一個充滿幻想嘅文類，而美國奇幻大師佐治·R·R·馬田就噉樣描述奇幻文學：

「

原版英文："Fantasy is silver and scarlet, indigo and azure, obsidian veined with gold and lapis lazuli. Reality is plywood and plastic, done up in mud brown and olive drab. Fantasy tastes of habaneros and honey, cinnamon and cloves, rare red meat and wines as sweet as summer. Reality is beans and tofu, and ashes at the end." 粵文翻譯：奇幻（嘅世界）係銀同猩紅、靛青同天藍、帶有金同青金脈嘅黑曜岩。現實（嘅世界）係膠合板同塑膠，用泥啡同單調橄欖色砌出嚟。奇幻陣味似夏灣拿辣椒同蜜糖、肉桂同丁香、一分熟嘅紅肉同好似夏天一樣咁甜美嘅紅酒。現實係豆同豆腐，最尾就得灰燼。

」

奇幻文學係一個大類，底下仲有好多子文類。其中一個將奇幻分類嘅做法係按「個虛構世界有幾虛構」分做古典奇幻同當代奇幻等嘅類別：

• 古典奇幻背景設於高度虛構嘅世界，個故仔世界具有獨立於現實世界嘅物理法則（但自身喺物理上內在一致）同地點；古典奇幻嘅出名作品有《魔戒》同由佐治·R·R·馬田作嘅《冰與火之歌》，以冰與火之歌為例，冰與火之歌舞台主要設於維斯特絡（Westeros）呢個虛構嘅大陸（作者有為維斯特絡畫咗多幅地圖），喺呢個特殊嘅奇幻世界當中，一個季節閒閒地可以維持成幾年咁耐嘅時間，而個故仔開始嗰陣啱啱係維持咗近乎十年嘅夏天就嚟結束（同現實唔一樣嘅物理法則），維斯特絡以北嘅地方長年積雪（特色地點），而且有某啲得人驚嘅類人生物喺嗰度，等緊冬天來臨嘅機會侵略維斯特絡（衝突）。
• 當代奇幻背景都係設於虛構嘅世界（定義上屬奇幻），但個虛構世界同作者身處嘅世界好相似，除咗可能有魔法之外，基本上同現實世界冇乜大分別，而且故仔會出現現實世界嘅地點；當代奇幻出名嘅作品有《哈利波特》－哈利波特背景設於一個虛構版本嘅廿世紀尾英國，呢個英國同現實嘅英國冇乜大分別（而且故仔仲有提及現實英國嘅地點），但就係有魔法同魔法生物嘅存在。

恐怖

鬼結合咗死亡、黑暗同未知，係恐怖故仔常用嘅橋段。

内文：恐怖故仔

恐怖（horror）係一個以恐懼做中心嘅文類。恐怖故仔喺背景設定、角色、同情節好多變，但重點都係在於要將主角置身喺令人覺得恐怖嘅處境當中，目的係令讀者有驚嘅感覺。恐怖文學源於宗教同民間故事：古代嘅宗教成日會用恐怖嘅景象嚟形容做壞事嘅人嘅下場，例子有天主教對罪人落咗地獄之後所受嘅折磨繪聲繪影嘅描述；而民間故事就往往源於人對佢哋唔了解嘅自然現象嘅恐懼。恐怖故仔通常做法係利用人嘅各種原始恐懼－即係死亡、黑暗、同未知等人本能上會驚嘅事物－迫故仔主角面對呢啲嘢，而且好多時透過展示主角點克服呢啲恐怖嘅事物，等讀者有所共鳴同領悟。

恐怖故仔可以按多個準則分做子文類：

• 哥德式恐怖係一種「結合恐怖、死亡同浪漫」嘅體裁。哥德式恐怖源自 18 世紀嘅英格蘭，受到當時盛行歐洲文壇嘅浪漫主義影響，鍾意觸及人對未知事物嘅恐懼，用 macabre 等嘅美學，仲會加入同當代社會結構相關嘅主題，例如貴族就係哥德式恐怖常見嘅元素，而傳統上同歐洲貴族相關嘅城堡同哥德式建築等嘅嘢亦都自然跟住成為哥德式恐怖常用嘅橋段。被指為哥德式恐怖嘅作品有 1897 年出嘅小說《德古拉》。
• 肉體恐怖指靠人體嘅變異令讀者覺得驚嘅恐怖故仔，例子有日本漫畫家伊藤潤二嘅多部作品；喺肉體恐怖故仔入面，啲角色嘅身體會經歷一啲恐怖嘅異變（呢啲異變可以、但唔一定因為超自然力量而起嘅），例如係身體俾怪獸寄生而變形、手腳俾人斬斷、或者身體俾神秘力量影響而監生腐爛呀噉。呢啲作品往往令讀者同時有恐懼同作嘔嘅感受。
• 宇宙恐怖係指透過展示人嘅微不足道令讀者覺得驚嘅恐怖故仔，例子有美國作家 H. P. 洛夫卡拉夫特嘅作品。喺呢啲故仔入面，威脅主角生存嘅力量係一啲規模極宏大嘅事物，例如係一個外形極古怪、身體好似星球咁大、力量無邊、而且當人類係玩具噉玩嘅神，呢個神用各種方法玩弄主角，將啲恐怖靈異生物逐一派去殺主角，而喺主角辛苦一輪逃離啲生物嘅追殺之後，個神淨係笑咗笑，再不費吹灰之力一吓殺死主角－令讀者感覺到人係幾咁微細同無力。

睇埋

• 虛構故仔
• 大眾小說
• 怪奇故仔
• 超級英雄
• 超自然
• 想像力

拎

• （英文） Internet Speculative Fiction Database.
• （英文） The SF Page at Project Gutenberg of Australia.