跨月台轉車站

跨月台轉車站（Kwa¹jyut⁶toi⁴ zyun³ce¹zaam⁶）係鐵路公共交通嘅一種車站設計，用意係令乘客行過個月台就可以轉綫，無需要行上行落。乘客唔使行到咁攰之餘仲可以舒緩車站嘅客流，提高通勤效率，喺繁忙嘅車站非常實用。跨月台視乎兩邊嘅行車方向可以分成兩種：順向同逆向。視乎實際情況可以決定用邊個，有陣時仲可以兩個並排用，組成一對雙子跨月台轉車站。香港港鐵嘅太子同旺角站就係其中一個例子。

香港港鐵油塘同調景嶺站嘅雙子跨月台配置

雖然跨月台非常方便，但係因為路軌嘅隧道或天橋要遷就比較尷尬嘅月台佈置，所以設計同工程方面有一定嘅困難。

例子

亞洲

香港

旺角同太子站大概就係香港最出名嘅一對跨月台轉車站。圖中，左邊嘅月台為荃灣綫往中環，而右邊嘅月台為觀塘綫往黃埔

由於香港嘅港鐵係世界上最繁忙同擠迫嘅地鐵系統之一，所以跨月台設計喺香港非常普遍，全系統有十個。

• 太子站、旺角站：觀塘綫 ⇔ 荃灣綫
• 油塘站、調景嶺站：觀塘綫 ⇔ 將軍澳綫
• 金鐘站：港島綫 ⇔ 荃灣綫
• 北角站：港島綫 ⇔ 將軍澳綫
• 荔景站：東涌綫 ⇔ 荃灣綫
• 大圍站：東鐵綫往金鐘 ⇔ 屯馬綫往屯門
• 南昌站：東涌綫往香港 ⇔ 屯馬綫往屯門
• 欣澳站：東涌綫往東涌 ⇔ 迪士尼綫

紅磡站喺沙中綫工程之前曾經喺地面層提供過東鐵綫同西鐵綫（現屯馬綫屯門至紅磡段）之間嘅跨月台轉乘，但係因為新嘅東鐵綫過海段嘅隧道口離車站太近，冇空間配合跨月台配置，所以新嘅地底月台採用較簡單嘅普通疊式設計。

臺北

臺北捷運嘅跨月台轉車示意圖

臺北捷運全系統有四個跨月台轉車站。其中中正紀念堂、古亭同東門站組成一個三角形，為來往松山新店綫、淡水信義綫同中和新蘆綫嘅乘客提供更方便嘅轉車體驗。

• 西門站：松山新店綫 ⇔ 板南綫
• 中正紀念堂站：松山新店綫 ⇔ 淡水信義綫
• 古亭站：松山新店綫 ⇔ 中和新蘆綫
• 東門站：淡水信義綫 ⇔ 中和新蘆綫

赤坂見附站嘅跨月台配置。橙色為銀座綫，紅色為丸之內綫

東京

• 赤阪見附站：銀座綫 ⇔ 丸之內綫
• 表參道站：銀座綫 ⇔ 半藏門綫

• 白金高輪站：南北綫 ⇔ 三田綫

• 新宿站、代代木站：山手綫 ⇔ 中央·總武緩行綫
• 田瑞站至田町站、品川站：山手綫 ⇔ 京濱東北綫
• 御茶之水站：中央綫快速 ⇔ 中央·總武緩行綫

歐洲

倫敦

• 芬奇利路站：大都會綫 ⇔ 銀禧綫
• 艾頓鎮站、男爵宮站、特南綠地站、咸默史密夫站：區域綫 ⇔ 皮卡地里綫
• 麥爾安德站：區域綫、咸默史密夫及城市綫 ⇔ 中央綫
• 史特拉福站：伊利沙白綫 ⇔ 中央綫
• 斯托克韋爾站、尤斯頓站：域多利綫 ⇔ 北綫
• 牛津圓環站：域多利綫 ⇔ 必嘉老綫
• 芬斯貝利公園站：域多利綫 ⇔ 皮卡地里綫
• 高貝里及伊斯靈頓站：域多利綫 ⇔ 北城市綫
• 必嘉街站：必嘉老綫 ⇔ 銀禧綫

北美洲

紐約

紐約地下鐵好多綫都有四條路軌，分快車同慢車服務。慢車通常行外面兩條路軌，而快車通常行裏面兩條。快、慢車都停嘅車站通常都有兩對島式月台，提供兩種服務之間嘅跨月台轉乘。唔同顏色嘅綫之間嘅跨月台轉車站如下：

• 皇后區廣場站：7綫 ⇔ N綫、W綫
• 霍伊特—歇爾美角街站：G綫 ⇔ A綫、C綫
• 萊辛頓大道—63街站：F綫 ⇔ Q綫

滿地可

• 萊昂內爾·格魯站：橙綫 ⇔ 綠綫
• 斯諾登站：橙綫 ⇔ 藍綫