北京

中華人民共和國 > 北京市

北京（粵拼：bak¹ ging¹；普通話拼音：Běijīng，音標：[peɪ˨˩ t͡ɕiŋ˥]；英文：Beijing，傳統英文名：Peking），簡稱京（ging¹），係中華人民共和國嘅首都。佢位於華北，係中國四個直轄市之一，直接受中華人民共和國國務院管理。北京幾乎畀河北省圍住，而東南面接壤天津市。北京嘅範圍好大，現時轄有14區、2個縣，其中城六區係市區，其他係郊區、縣份。

北京
北京市
順時針方向：天安門、天壇、國家大劇院、北京國家體育場（鳥巢）
----
簡稱：京
花名：燕京、北平
舊名：薊、燕、幽、薊城、燕都、廣陽、幽州、幽燕、幽都、南京、析津、宛平、燕山、聖都、大興、（金）中都、（元）大都、汗八里、甘巴力克、京師、京城、京都、京畿、京兆、順天、首都
北京位置圖
經緯度 北緯39°54′″東經116°23′26″
國	中華人民共和國
直轄市	北京市
轄下一級政區	16（14區、2縣）
轄下二級政區	322（140街道、142鎮、35鄉、5民族鄉）
建城年	前1046年
設市年	1928年
市長	王安順
市委書記	郭金龍
政府駐地	東城區正義路2號
地理
總面積	16410.54 km²
市區面積	3820 km²
海拔	20~1500 m
人口
總人口(2014)	2151.6萬
戶籍人口(2014)	1333.4萬
市區(2014)	1859萬
人口密度	1311人/km²
民族	漢族 - 96.16% 回族 - 2% 滿族 - 2% 蒙古族 - 0.3%
官方語言	普通話
本地語言	北京官話京師片北京話
註	常住外來人口818.7萬人，佔常住人口38.1%
經濟
GDP(2014)	21330.8億人民幣
人均GDP	99995元人民幣
HDI(2010)	0.901 極高
時間
時區	中國時區（UTC+8）
識別信息
電話區號	10
郵政編碼	100000–102629
車牌	京A、C、E、F、H、J、K、L、M、N、P、Q 京B（的士） 京G、Y（郊區） 京O（警察、政府） 京V（中央軍委、中央政府）
政區代碼	110000
象徵
市樹	側柏、國槐
市花	月季、菊花
友好城市
開羅、威靈頓、都柏林、地拉那、紐約、貝爾格萊德、利馬、華府、馬德里、里約熱內盧、安卡拉、伊斯蘭堡、耶加達、曼谷、布宜諾斯艾利斯、首爾、基輔、布魯塞爾、河內、菴士、莫斯科、渥太華、坎培拉、雅典、布達佩斯、倫敦、古龍、馬尼拉、墨西哥城、阿斯塔納、聖地亞哥、阿迪斯阿貝巴、布加勒斯特、柏林、里斯本、巴黎、法蘭西島、赫爾辛基、東京、豪登、夏灣拿、羅馬
網站： 首都之窗

北京係中國人口第二多嘅城市，僅次於上海。2014年常住人口達2151.6萬人，喺世界上亦係人口多嘅大都會，估計咗2015年嘅市區人口，北京係世界第8大城市。一般人認為北京係中華人民共和國嘅政治、教育同埋文化中心，而上海同香港就係經濟中心。雖然經濟重心喺南方，不過北京係幾乎所有最大嘅中國國有企業嘅總部駐地，同時亦係中國交通樞紐之一，包括國道、高速路、鐵路、高鐵。北京首都國際機場係世界客流量第二大機場。

北京史有三千年咁長。北京係中國四大古都之一，係四朝京師（金、元、明、淸）及遼國陪都，同埋好多政權嘅首都，有七百年時間係中國嘅政治中心。北京遺蹟豐厚，有宮殿、寺廟、花園、皇陵、城牆、城門，因爲北京有豐富嘅藝術收藏，亦集中多間高校，令北京成爲中國嘅文化、藝術中心。世界上得少數城市長期同時作爲廣大地區嘅政治中心同文化中心，北京就係其中一個雙中心古城。

名

北京

北京嘅字面意思係「北面嘅京城」，「京」字安名符合東亞傳統上對首都嘅稱呼。比如日本嘅京都、韓國嘅京城（而家嘅首爾），呢啲國都名有「京」字；而個名類似北京嘅有中國嘅南京（字面解做「南面嘅京城」）、日本嘅東京及越南嘅東京（越南東京即係而家河內；呢兩個名字面都係「東面嘅京城」）。

對中國來講，北京嘅「北」係相對於洛陽來講，因爲洛陽喺傳統上稱爲「天地之中」，中國各個古都中得洛陽稱爲「神京」，照計中國首都應該定喺中原洛陽，但而家方位有偏差，噉就喺前面加字表示，譬喻南京，又譬喻稱做西京嘅長安、東京嘅開封。

亦有種講法話，明朝時原本喺南京開國，後來國都搬咗去北京，南京成爲留都做南直隸，所以當時中國有南北兩京，呢兩個城市嘅名就噉樣得來。

北平

喺1368年到1403年期間，以及1928年到1940年、1945年到1949年期間，北京嘅正式名叫做北平（bak¹ ping⁴），字面意思係「平定北方」、「北方和平」，作爲地名最早出現喺秦漢。呢三個時期，北京唔係政權中央所在，所以唔叫做「京」。其中第一個時期係大明洪武皇帝在位期間，第二、三個時期係中華民國國民政府時期，呢兩個時期嘅中央政權都喺南京。

洪武皇帝係明朝開國皇帝，佢擊退蒙元，入咗蒙元京師嘅大都後，將大都路改爲北平府，而蒙元退守漠北，稱做北元，長期同明朝敵對。改名做北平嘅用意，係希望北方和平，防止北元侵犯。而喺民國時期，北京曾經係北洋政府嘅中央所在，當時叫做京兆，北伐贏咗後，喺南京成立國民政府，北京唔再係首都，於是由京兆地方改爲北平特別市，「北平」嘅用意係指北伐軍平定咗北洋政權，同時亦係繼承自古名。日本侵華時期，北平改名叫北京，係同國民政府作對使然。

1949年中共建立中華人民共和國，將北平改名做北京，並且將北京定爲首都。直到1990年代前，喺臺灣嘅中華民國政府唔承認改名，而且由於反攻大陸嘅政策，喺臺灣出版嘅中國地圖繼續用舊名，兼且啲政區建置、邊界重係中華民國大陸時期嘅樣。當時將北京稱呼做北平，係暗指北京政權唔合法。而家臺灣社會包括政府在內普遍都用「北京」呢個詞，而且1990年代後唔再發行《中華民國全圖》，現時臺灣市面上嘅中國地圖根據現況來標示啲政區名、政區邊界。

別名同簡稱

北京有個常用嘅別名做燕京（燕讀煙；jin¹ ging¹），噉係因爲周朝時呢度係燕國嘅地頭。燕京個名至今重用喺啲組織、商標度，比如燕京啤酒，又比如已經併入北京大學嘅燕京大學。

現時北京嘅簡稱叫「京」，但凡北京車牌都係京字開頭；而北京嘅拉丁字母縮寫係「BJ」。喺中華民國國民政府時期，由於當時正式叫北平，所以簡稱做平（ping⁴），相對應，當時嘅「京」係指南京。

西洋

北京嘅傳統英文名叫做Peking，呢個係郵政式拼音，由舊時嘅英國傳教士根據當時嘅官話整落嘅，係以前中國地名嘅羅馬字寫法。而家北京嘅英文名叫做Beijing，呢個係普通話拼音，係中華人民共和國成立後推行嘅拼音方案。呢兩個名可以睇出古今官話嘅音變。其中郵政拼音嘅Pe係「北」嘅發音，當時嘅官話有入聲，北嘅發音一般擬音成[pɛʔ]，一般加符號標示入聲，比如利金系統寫成pĕ，而郵政拼音慳咗個符號。到咗現代普通話，入聲消失兼且派入三聲，於是變成Bei。而「京」嘅拼寫兩個比較接近，得聲母唔同，反映出官話顎化嘅音變。「k」表明「京」嘅舊時官話聲母同現時粵語一樣，即係粵拼、普通話拼音嘅「g」，音標係[k]，但後來因爲[k]之後接[i]，[k]開始顎化爲[kʲ]，接住發音部位前移，由軟顎轉移到硬顎，變成現時嘅[t͡ɕ]，寫成普通話拼音就係「j」。

雖然Beijing係現時英文標準名，不過舊式嘅Peking重流傳，而且好多嘅歐洲語言繼續用舊名來稱呼北京，比如法文嘅Pékin，葡萄牙文嘅Pequim，西班牙文嘅Pekín，意大利文嘅Pechino，德文同荷蘭文嘅Peking，俄文嘅Пекин（羅馬字轉寫：Pekin）。

主要古名

北京地區最初嘅名叫做薊（讀繼，gai³），出自周朝時當地諸侯之一薊國，當時北京建城，係薊國都城，叫薊城（gai³ sing⁴）。後來薊國畀燕國吞併，於是改叫燕，叫做燕都（jin¹ dou¹）。唐朝時呢度屬幽州，所以又叫幽都（jau¹ dou¹）。幽同燕又合埋做幽燕，指嘅就係而家河北北部到遼寧一帶，北京就係屬幽燕地區。

北京作爲京城係從遼代開始，當時係遼國陪都，因爲喺京師南邊，所以嗌南京（naam⁴ ging¹），亦稱做「燕京」；金滅遼後，金國由上京遷都到呢度，稱爲中都（zung¹ dou¹）；蒙元滅金，後來忽必烈喺呢度登基做中國皇帝，改名爲大都（daai⁶ dou¹），自此，北京取代中原嘅長安、洛陽、汴梁嘅古都地位，成爲中國政治中心。明朝永樂帝由南京遷都北京，當時北京正名係順天府（seon⁶ tin¹ fu²），但因爲兩京制度，相對南京就又嗌「北京」。「順天」嘅意思係順應天意，係東亞地區常用喺京師嘅地名。清朝入關後，沿續明朝定北京爲帝京。

清朝滅亡後，中華民國定南京爲首都，後來袁世凱嘅北洋政府定都北京，1914年，順天府改爲京兆地方（ging¹ siu⁶ dei⁶ fong¹），受北洋政府直轄。1928年北伐贏咗後，京兆改叫北平，簡稱平，做過特別市、河北嘅省轄市、中央嘅院轄市。日佔時期改名爲北京，光復後恢復爲北平，又再喺中華人民共和國成立後改名北京，定爲首都。

地理

北京響華北平原上面，所以成個城市地勢平坦。如果連埋成個直轄市來睇，北京市西同北都係山，北係軍都山，西係妙峰山。

交通

北京係中國交通樞紐之一，有幾十條鐵路，國道同高速公路伸向各方。首都國際機場（PEK）亦係好多飛機嘅落腳點。

• 北京地鐵
• 北京西站

世界大都會

北京曾經響1993年申辦龍年嘅2000年夏季奧林匹克運動會，輸咗畀澳洲悉尼。2001年，佢終於成功申辦2008年夏季奧林匹克運動會。

北京係國際數學人大會2002同超弦2006嘅東道主。

• 人民
• 光明
• 京报
• 北青
• 新京
• 京华
• 晨报
• 南方
• 经济观察

• 北京
• 
• 
• 
• 
• 
• 
• 
•