橋段
橋段（粵音：kiu4 dyun6），或者就噉叫
.jpg)
舉個例說明，大野狼係一條好出名嘅橋段，最廣義上指一隻扮演故仔奸角嘅狼；用大野狼呢條橋段嘅作品會運用狼嘅形象將呢個角色描繪成具有攻擊性同「出於食慾想殺害主角」等嘅特質，作為隻狼嘅動機嘅一部份[5]；用咗大野狼呢條橋段嘅作品，有遠至公元前嘅伊索寓言裏面嘅《狼嚟喇》，而比較近嘅有源自中世紀嘅童話《小紅帽》同埋 19 世紀嘅英倫寓言故事《三隻豬仔》－大野狼呢條橋超過 2,000 年歷史[6]，而廿世紀開始嘅大眾媒體作品仲有對大野狼嘅橋段作出另類嘅詮釋，甚至係將大野狼描繪成忠嘅都有[5][7]。
創意寫作等嘅工作成日要諗點樣喺創作嗰陣使用橋段。一位創作者要了解唔同嘅橋段會引起讀者觀眾有咩反應，並且用呢啲知識創作出讀者觀眾會鍾意嘅作品[8]，例如一條俾人用得多得滯嘅橋往往會俾人覺得變咗陳腔濫調，搞到好多讀者觀眾一見到條橋就覺得冇新意唔想睇，所以個創作者一係要避免用條橋，一係喺條橋上作出一啲創新[9][10]。
主要分類
編輯橋段可以按敘事元素分類：一件創作品通常都或多或少噉會有故仔；喺敘事學（研究故仔嘅社科領域）上，一個故仔可以想像成由多件敘事元素組成，敘事元素包括咗[11][12]
...呀噉。角色類橋段包含喺多部作品當中都見到嘅角色類型，而背景設定橋段同情節橋段都係同一道理。
角色橋段
編輯.jpg)
角色係指喺一個故仔當中做決策，以呢啲決策影響情節發展嘅個體。角色通常會係人類，不過喺 sci-fi 等嘅文類入面可以有「先進嘅人工智能」等嘅非人類智能體做角色。固定角色係橋段嘅一種，泛指一啲喺多部作品入面都有出現嘅角色大類，每一種固定角色都有一啲重點特徵，亦會有一啲「呢類角色普遍會有嘅特徵」。啲觀眾或者讀者好多時一眼就會認得出「呢個角色係屬於嗰個固定類型嘅人物」[13]。舉啲實質嘅例子：
- 白馬王子係一種常見於童話故事嘅固定角色，泛指一個出場嚟救或者幫公主嘅王子，成日都會配合英雄救美嘅劇情使用。佢通常仲會生得靚仔－有利於及後嘅戀愛劇情、勇敢－所以就會唔怕危險拯救公主... 等等。白馬王子呢個類型嘅角色可見於《白雪公主》、《灰姑娘》以及《睡美人》等嘅好多個著名童話故事[14]。
- 神仙教母係另一種常見於童話故事嘅固定角色，指一個用魔法幫助主角（通常係女主角）解難嘅女性角色。呢個角色通常會係一位仙子，所以識得用魔法，而且佢會同主角有某啲特殊關係，例如係主角嘅教母呀噉，所以會有意圖幫助主角；神仙教母成日會喺主角最絕望嗰陣出場，用魔法幫主角解難，例子可以睇吓《灰姑娘》裏面[註 1]，灰姑娘喺冇得去舞會好唔開心嗰陣，佢嗰位神仙教母出場，施展魔法變條靚裙俾佢著同埋變架用南瓜造嘅馬車出嚟，等灰姑娘有得去舞會[15]。
- 絕世高手係一種喺武俠小說裏面成日出現嘅角色類型，例子有《射鵰英雄傳》系列嘅五絕，仲有係《中華英雄》入面嘅南神掌同北腿王等等。絕世高手喺武俠故仔入面可以有好多作用：例如係出場教主角一啲新招，等主角可以變強；又或者係喺個故仔入面出場，並且俾個奸角打低，用嚟突顯主角個敵人有幾咁勁[16]。
好多時，作故仔嘅人會將自己個故仔啲角色建基於固定角色類型之上，並且喺呢啲類型度作出創新。舉例說明，2004 年嘅夢工場電影《史力加 2》（Shrek 2）就用咗白馬王子同神仙教母嘅角色類型，但就大膽創新：喺傳統嘅童話故事當中，神仙教母嘅形象係忠嘅，但《史力加 2》入面嘅神仙教母係奸角－呢個神仙教母好堅持身為公主嘅女主角費安娜理應要同白馬王子喺埋一齊，對個樣生得唔好睇、外型上唔似白馬王子嘅主角史力加有偏見，打後仲出陰招想搞喎史力加同費安娜之間嘅戀情；呢個角色喺好多特徵上似傳統嘅神仙教母，但另一方面，套戲又對「神仙教母」呢條橋作出咗嶄新嘅詮釋－神仙教母嘅動機可以引致佢做衰嘢，相對於傳統「神仙教母實係忠」嘅諗法[15]－喺當時嘅電影界受到相當嘅好評[17]。
設定橋段
編輯背景設定指個故仔所發生嘅時空。背景設定可以係真實，但又可以係虛構：有好多故仔都係設喺貼近現實嘅世界，但另一方面，又有好多故仔設喺虛構世界，例如係 sci-fi 常用嘅「遙遠嘅未來世界」呀噉。一般認為，設定對一個故仔嘅重要性在於，設定會為個故仔設下啲規則，講明乜嘢可以發生乜嘢唔可以，令成個故仔更加有理可循，例如如果拍套設喺唐朝時代嘅電影，噉個故仔正路就唔可以有槍或者坦克等嘅現代武器出現，因為嗰個時代嘅世界仲未有呢啲嘢，而如果個作者想個故仔有呢啲現代武器出現，噉佢就實要諗啲特別嘅理由出嚟將呢樣嘢合理化，好似係個故仔可能講現代人坐時光機返咗去唐朝等等[18][19]。
廿一世紀初嘅文學有唔少設定類嘅橋段－一啲成日會出現喺創作品入面嘅背景設定：
- 中世紀歐洲係童話成日用嘅設定類橋段：呢啲故仔設於中世紀嘅歐洲，背景嗰度往往會有某啲特定嘅事物，好似城堡、君主制、騎士以及係教父母（睇返神仙教母）等嘅事物，都係中世紀歐洲文化嘅特徵，所以讀者觀眾一見到呢啲事物就睇得出個故仔係設於中世紀嘅歐洲[20]。
- 末日後幻想係常見於科幻故仔嘅設定類橋段[21][22]：末日後幻想指故仔發生嘅世界處於未來，故仔世界經歷過一啲重大災難，例如有隕石撞落地球或者第啲天災，搞到地球環境喺各方面都變到好惡劣，唔多再適合人類居住，背景嗰度會有
- 空寥寥同埋因為冇人打理而敗壞嘅城市、
- 污濁嘅空氣同水、以及係
- 差劣嘅生活質素（好多人類要瞓街等）
- 魔法學校係常見於奇幻作品嘅設定類橋段[23][24]：魔法學校泛指一間多古怪嘢（所以成日有刺激嘢發生）嘅學校，主角通常會係呢間學校嘅學生，並且經歷各種刺激嘅體驗，出名嘅例子可以睇奇幻小說《哈利波特》當中嘅霍格華茲魔法學校，又或者係驚奇漫畫《變種特攻》（X-men）入面嘅異變人學校[註 3]。
情節橋段
編輯
情節係指緊個故仔入面所發生嘅一連串事件，情節當中嘅每件事件都會對跟住落嚟嘅發展有明顯影響。敘事學上一般認為，一個好嘅故仔要有一連串[25][26]
- 「因為情節 A，所以情節 B，於是乎令到情節 C 發生...」
嘅因果邏輯過程，個故仔先會俾人覺得算係合情合理。事實係，好多故仔嘅情節查實都好類似，或者有相似之處，所以就有所謂嘅情節橋段。
- 一見鍾情：愛情小說常用嘅橋段，指故仔嘅兩位主角一見面就一瞬間鍾意咗對方，而且最後墮入愛河；好似係舉世聞名嘅芭蕾舞劇《天鵝湖》噉，天鵝湖第二幕講王子去到一個湖邊，見到因為受詛咒而變成天鵝嘅公主，並且喺嗰一刻就愛上咗公主。一見鍾情嘅橋段常見於廿世紀前有愛情成份嘅故仔[27]，不過到咗廿一世紀初，好多人都開始覺得呢條橋冇新意，係一種陳腔濫調[28]。
- 異世界（日羅：isekai）[註 4][29][30]：另一條常用嘅情節橋段，指故仔嘅主角因為某啲神秘力量而進入咗一個異世界，異世界喺物理法則等方面都同主角原來嘅世界好唔同，例子有《愛麗絲夢遊仙境》、《千與千尋》同埋《數碼暴龍》嘅多部動畫呀噉。
- 高傲：希臘神話啲故仔成日都提到「有人類自高自大，諗住自己同天神對等甚至乎超越天神，結果落得悲慘下場」噉嘅情節，例如掗克妮嘅故仔就係噉[31]。亦可以睇埋天國戰爭嘅故仔。
一段情節會對個故仔跟住落嚟嘅發展有顯著影響：男女主角一見鍾情之後愛上咗對方可能會嘗試拍拖，而愛情小說好多時就係要講男女主角拍拖，並且展現佢哋點樣克服戀情上遇到嘅困難－例如係父母反對－最後終成眷屬；主角走咗入去個異世界之後可能會遇到各種嘅危險，於是成個故仔就係講主角點樣克服呢啲危險，並且透過克服呢啲難關嚟成長做一個心智上更加成熟嘅人－《愛麗絲夢遊仙境》同埋《數碼暴龍》動畫都係噉[26][32]。
玩弄橋段
編輯創作嘅其中一個重要部份係玩弄橋段，而要玩弄一條橋，有好多種方法，包括[33][34][35][註 5]：
| 用法[36] | 解釋 | 例：一見鍾情[註 6] | 例：魔法學校[註 7] | 例：白馬王子[註 8] |
|---|---|---|---|---|
| 直用 | 直接用條橋。 | A 同 B 兩位主角一見面就愛上對方。 | 拉爾夫學院係一間魔法學校，日日都發生怪事。 | 亨利王子係一個身份同性格上都高貴嘅角色。 |
| 誇張化 | 將條橋或者當中某啲部份極端化。 | A 見親邊個都會即刻對嗰個人一見鍾情。 | 班上面日日都有學生因為怪事返唔到學，老師都見怪不怪。 | 亨利王子型到所有女人一見佢就尖叫，好打到一個打廿個，仲有天才頭腦。 |
| 淡化 | 將條橋或者當中某啲部份輕微化。 | A 同 B 一見面就對對方有好感，相處咗一日之後愛上對方。 | 拉爾夫學院係就係有一啲古怪嘅課外活動，但並唔係乜嘢魔法學校。 | 亨利王子係一個心地善良嘅人，不過可能唔係零舍靚仔，或者唔係咁好打。 |
| 合理用 | 故仔當中有理由將條橋合理化。 | A 同 B 俾魔法師落咗咒。 | 拉爾夫學院正正就係俾政府起嚟專教一啲異於常人嘅學生嘅。 | 國王好重視佢個仔嘅教育，所以花咗好多心機栽培亨利王子，令佢成為一個高貴嘅人。 |
| 反轉用 | 將條橋入面嘅某啲成份變成相反。 | A 同 B 兩位主角一見面就憎死對方。 | 一個魔法師走去正常人嘅世界，開咗間普通學校，用佢法力阻止任何異常事件發生。 | 亨利王子又肥又矮又醜樣而且性格猥瑣下流，係有皇族血統，但全身上下冇任何貴氣。 |
| 顛覆用 | 作者將個故仔作到好似要用嗰條橋噉，但最後冇用到。 | A 同 B 兩位主角見面，背景響起浪漫嘅音樂... 然後 A 同 B 連望都冇望對方多眼，就各自返去做自己嘢。 | 阿明轉校，佢聽講間新學校鬧鬼，所以覺得又驚又興奮，但新老師話佢知，有關學校鬧鬼嘅嘢完全只係謠言。 | 就噉睇，亨利王子似係一個典型嘅白馬王子，但費安娜公主嫁咗俾佢之後，先至知原來亨利王子私生活好唔檢點。 |
| 雙重顛覆 | 顛覆咗之後，再直用。 | ... 不過三秒後，A 同 B 突然間攬埋一齊，發誓今生愛對方至死。 | ... 不過阿明打後發現新學校真係鬧鬼，同佢講話鬧鬼係謠言嗰個老師只係驚得滯而唔想面對有鬼嘅現實。 | ... 不過打後亨利王子真心愛上咗費安娜，仲因為想費安娜幸福而嘗試改善自己，最後成為一個真正嘅白馬王子。 |
| 利用 | 故仔入面有個角色知條橋發生緊，就利用呢一點達到自己目的。 | A 知道 B 對自己一見鍾情，利用呢點嚟呃 B 錢。 | 一個記者知拉爾夫學院多怪事，於是成日走去嗰度採訪，諗住靠噉搵多啲趣聞做頭條。 | 流氓羅拔知亨利王子形象好，於是就假扮成微服出巡嘅亨利王子嚟周圍去呃飲呃食。 |
| 解構 | 特登用條橋，然後探索條橋喺現實世界會引致嘅後果。 | A 同 B 一見鍾情三日後閃電結婚，但婚後佢哋發現自己對愛情有太多唔實際嘅幻想，最後離婚收場。 | 拉爾夫學院日日都有超自然事件發生，俾人評定為對學生造成危險，最後搞到俾人殺校。 | |
| 重構 | 攞一條解構咗嘅橋，解決解構過程當中所發現嘅問題，再重新直用。 | A 同 B 兩位主角知自己對愛情有太多不切實際嘅幻想之後，學識變得更加成熟，最後成功建立一段美滿嘅婚姻。 | 班學生喺拉爾夫學院俾人殺咗後，反而對超自然嘢更加感興趣，大個咗用佢哋學過嘅嘢成立一間新嘅古怪學校。 |
陳腔濫調
編輯
陳腔濫調係指一條失去咗原有意義或者藝術效果嘅橋，原因通常係因為啲創作者將條橋用得太多太濫用到爛嗮[37]。例如係「係管家做嘅」呢條橋噉：
| 「 | 」 |
一般認為，呢條橋喺廿一世紀嘅西方偵探文學界經已係一條陳腔濫調[註 9]，如果一個偵探故仔用呢條橋，好少可會令讀者感到驚訝（意圖嘅效果），而係會令佢哋覺得個故仔老土冇新意。喺創意寫作嘅世界，一條橋係咪陳腔濫調唔係固定嘅，而且有陣時有少少主觀：橋段好多時會隨時間而變成陳腔濫調，但跟住由一啲出色嘅作家做某啲創新，例如係上述嘅解構或者重構等嘅用法，然後變返做受人接納嘅橋[38][39]。
一般認為，一條橋會變成陳腔濫調嘅常見原因有以下呢啲[37]：
- 俾人用得多得滯[40]。
- 用嗰條橋嘅某件作品取得巨大成功，引致好多人抄佢，最後令到條橋喺俗作入面出現太多。
- 條橋俾人發覺佢查實根本唔合理，例如一見鍾情俾人用唔少，但好多人發覺，現實世界根本冇咁多一見鍾情[41]（睇埋一見鍾情嘅解構）。
... 等等。
詞彙對照
編輯以下係篇文用咗嘅詞彙嘅粵英對照，啲拼音用嘅係粵拼：
- 橋段 / trope；隻英文字詞據講源自古希臘文 τρόπος / tropos，意思係方向或者路徑噉解[42]。
- 敘事元素 / zeoi6 si6 jyun4 sou3 / narrative element
- 固定角色 / gu3 ding6 gok3 sik1 / stock character
- 白馬王子 / baak6 maa5 wong4 zi2 / Prince Charming
- 神仙教母 / san4 sin1 gaau3 mou5 / Fairy Godmother
- 背景設定 / bui3 ging2 cit3 ding6 / setting
- 末日後幻想 / mut6 jat6 hau6 waan6 soeng2 / post-apocalyptic fiction
- 情節 / cing4 zit3 / plot
- 陳腔濫調 / can4 hong1 laam5 diu6 / cliché
睇埋
編輯註釋
編輯- ↑ 講緊沙略·佩羅嗰個版本。
- ↑ 可以睇 After The End。
- ↑ 可以睇 Academy of Adventure。
- ↑ 可以睇 Trapped in Another World。
- ↑ 可以睇 Playing with a Trope。
- ↑ 可以睇 Playing With / Love at First Sight。
- ↑ 可以睇 Playing With / Academy of Adventure。
- ↑ 可以睇 Playing With / Prince Charming。
- ↑ 雖然呢條橋查實唔算俾人用得好多。
引咗
編輯- ↑ Cuddon, J. A.; Preston, C. E. (1998). "Trope". The Penguin Dictionary of Literary Terms and Literary Theory (4 ed.). London: Penguin. p. 948.
- ↑ Miller (1990). Tropes, Parables, and Performatives. Duke University Press. p. 9.
- ↑ Ryan, J. J. (2009). Introducing Mr Perky: subverting the fantasy trope of immortality in contemporary speculative fiction (Doctoral dissertation, Queensland University of Technology).
- ↑ Culler, J. (1981). Story and Discourse in the Analysis of Narrative. The Pursuit of Signs: Semiotics, Literature, Deconstruction, 169, 169-187.
- ↑ 5.0 5.1 Maria Tatar, p 25, The Annotated Classic Fairy Tales.
- ↑ Iona and Peter Opie, The Classic Fairy Tales. p. 93 - 4
- ↑ Sheppard, J. (2011). What if the Big Bad Wolf in All Those Fairy Tales Was Just Misunderstood: Techniques for Maintaining Narrative Rationality While Altering Stock Stories That are Harmful to Your Client's Case. Hastings Comm. & Ent. LJ, 34, 187.
- ↑ Childers, Joseph; Hentzi, Gary (1995). "Trope". The Columbia Dictionary of Modern Literary and Cultural Criticism. New York: Columbia UP. p. 309.
- ↑ Anton C. Zijderveld (1979). On Clichés: The Supersedure of Meaning by Function in Modernity. Routledge.
- ↑ Trope. Literary Terms.
- ↑ Bardi, A. (2006). The Gypsy as trope in Victorian and modern British literature. Romani Studies, 16(1), 31-42.
- ↑ Huang, A. (2010). Tropes of solitude and Lu Xun’s tragic characters. Neohelicon, 37(2), 349-357.
- ↑ Kamesha Jackson (2010). "Stock character. 互聯網檔案館嘅歸檔，歸檔日期2018年9月6號，.". In Ronald L. Jackson II. Encyclopedia of Identity. Sage Publications.
- ↑ Blair, W. (1982). The Funny Fondled Fairytale Frog. Studies in American Humor, 1(1), 17-23.
- ↑ 15.0 15.1 Lissauer, G. (2014). The Tropes of Fantasy Fiction. McFarland.
- ↑ 马文杰. (2015). 论中国武侠小说中的武功秘籍与功法招式. 赤峰学院学报: 汉文哲学社会科学版, 36(6), 134-136.
- ↑ Camerito (May 23, 2018). "Which Shrek Movie is the Best? 互聯網檔案館嘅歸檔，歸檔日期2019年10月10號，.". Teen Ink.
- ↑ Lodge, David (1992). The Art of Fiction. London: Martin, Secker & Warburg Ltd.
- ↑ Levin, Donna (1992). Get That Novel Started. Cincinnati, OH: Writer's Digest Books.
- ↑ Tatar, M. (2017). The Classic Fairy Tales (Second International Student Edition)(Norton Critical Editions). WW Norton & Company.
- ↑ 10 Tropes About Post-Apocalyptic Sci-Fi Films All Fans Know.
- ↑ Anderson, C. T. (2012). Post-apocalyptic nostalgia: Wall-E, garbage, and American ambivalence toward manufactured goods. Lit: Literature Interpretation Theory, 23(3), 267-282.
- ↑ Six Pros and Cons of the Magic School Genre.
- ↑ Wonderbook: Book of Potions.
- ↑ Ansen Dibell, Ph.D. (1999-07-15). Plot. Elements of Fiction Writing. Writer's Digest Books. pp. 5 f. ISBN 978-0-89879-946-0. Plot is built of significant events in a given story - significant because they have important consequences. Taking a shower isn't necessarily plot... Let's call them incidents ... Plot is the things characters do, feel, think or say, that make a difference to what comes afterward.
- ↑ 26.0 26.1 Foster-Harris (1960). The Basic Formulas of Fiction. Norman, OK: University of Oklahoma Press.
- ↑ Matthews, C. (2004). Love at first sight: The velocity of Victorian heterosexuality. Victorian Studies, 46(3), 425-454.
- ↑ Illouz, E. (1998). The lost innocence of love: romance as a postmodern condition. Theory, Culture & Society, 15(3-4), 161-186.
- ↑ Amaam, Baam (18 April 2018). "The 15 Greatest Isekai Anime as Ranked by Japan". GoBoiano.
- ↑ Lu, C. (2020). The Darker Sides of the Isekai Genre: An Examination of the Power of Anime and Manga.
- ↑ Wong, R. (2012). Hubris & Nemesis: A Correlational Analysis. Prandium: The Journal of Historical Studies at U of T Mississauga, 1(1).
- ↑ Freytag, Gustav (1900) [Copyright 1894], Freytag's Technique of the Drama, An Exposition of Dramatic Composition and Art by Dr. Gustav Freytag: An Authorized Translation From the Sixth German Edition by Elias J. MacEwan, M.A. (3rd ed.), Chicago: Scott, Foresman and Company.
- ↑ 施純宜. (2013). 兒戲人生: 王爾德的《 不可兒戲》. 英美文學評論, (22), 33-60.
- ↑ Using Story Tropes to Subvert Reader Expectations. Writer's Digest.
- ↑ Perri, C. (1984). Knowing and playing: The literary text and the trope allusion. American Imago, 41(2), 117-128.
- ↑ 原文：
直用－straight
誇張化－exaggerated
淡化－downplayed
合理用－justified
反轉用－inverted
顛覆用－subverted
雙重顛覆－double subverted
利用－exploited
解構－deconstructed
重構－reconstructed - ↑ 37.0 37.1 Really Useful Links for Writers: Tropes and Clichés 互聯網檔案館嘅歸檔，歸檔日期2020年1月25號，.. writing.ie.
- ↑ 38.0 38.1 Why do we think the butler did it?. The Guardian.
- ↑ Atwood, M. (2009). Strange things: the malevolent north in Canadian literature. Hachette UK.
- ↑ Cliche 互聯網檔案館嘅歸檔，歸檔日期2019年7月24號，.. Literary Device.
- ↑ Is Love at First Sight Real?. Psychology Today.
- ↑ trope (n.). Online Etymology Dictionary.