星加坡

新加坡共和國; Republic of Singapore（英文）; Republik Singapura（馬來文）; சிங்கப்பூர் குடியரசு（淡米爾文）
通稱：新加坡
旗	徽
	格言：Majulah Singapura（馬來文）; 「前進吧，星加坡！」
	國歌：《前進吧，星加坡！》
屬地（實轄）
	幅員國土：735.2平方公里（世界第176名） ; 水域：1.43% ;
首都	星加坡（城邦）
至高地	武吉知馬山
至長河	加冷河
至大湖	克蘭芝蓄水池
海岸線長	193公里
時區	星加坡標準時間：UTC+8
國民
人數	以下係2023年嘅估計數字人數： 5,917,600（世界第113名） ; 人口密度：7,804人/km2（世界第3名） ;
官方語言	英文（行政用語）; 馬來話（國語）; 華語、淡米爾文
官方文字	英文、馬來文（中文：馬來語字母）、簡化中文、淡米爾文（中文：泰米爾文）
民族	62.0% 星加坡公民; 9.1% 永久居民 71.1% 星加坡人 74.3% 華裔; 13.5% 馬來裔; 9.0% 印度裔; 3.2% 其他; ; ; 28.9% 唔係公民/永久居民; ;
主要宗教	31.1% 佛教; 20.0% 無宗教信仰; 18.9% 基督教; 15.6% 伊斯蘭教; 8.8% 道教同唐人民間信仰; 5.0% 印度教; 0.6% 第啲
曆法	公曆
主要節日	開齋節、農曆新年、排燈節、聖誕節同國慶日
行車方向	靠左行駛
	家用電源電壓：240 V ; 插座：G ; 頻率：50Hz ;
政制
國家憲法	《新加坡共和國憲法》
國家結構形式	單一制
國家政權	星加坡國會
政制	共和立憲制; 自由民主制; 議會共和制; 半總統制; 一黨獨大制
法律體系	普通法
	主要領袖國家元首（總統）：尚達曼; 政府首腦（總理）：黃循財;
	其他領袖（三權分立）行政（總理）：黃循財; 立法（國會）：謝健平; 司法（大法官）：梅達順;
經濟
	GDP（購買力平價）以下係2024年嘅估計數字總計：▲ $7,941.79億（第38名）; 人均：▲ $133,737（第3名）;
	GDP（國際匯率）以下係2024年嘅估計數字總計：▲ $5,252.28億（第32名）; 人均：▲ $91,100（第5名）;
	HDI 以下係2022年嘅估計數字 ▲ 0.949（第9名）－極高;
中央銀行	新加坡金融管理局
貨幣	星加坡元（SGD，S$）
堅尼系數	▼ 0.433（中，2023年）
資訊
	立國歷史立國日期：1965年8月9號; 立國事件：被逐出馬來西亞聯邦被迫獨立（1965年8月9號）;
國家象徵	國家標誌：星加坡國徽 ; 國父：李光耀等人 ; 國花：卓錦萬代蘭 ; 地標：魚尾獅;
國家代碼	SGP、SIN
國際域名縮寫	.sg、.新加坡、.சிங்கப்பூர்
國際電話區號	+65
現役軍人數	51,000－2023年

1°18′N 103°48′E / 1.3°N 103.8°E / 1.3; 103.8

星加坡（粵拼：sing1 gaa3 bo1），又有同音異字星架坡、星嘉坡、星加波、新咖波，或者新加坡（粵拼：san1 gaa3 bo1），官名新加坡共和國san1 gaa3 bo1 gung6 wo4 gwok3（英文：Republic of Singapore，簡化字：新加坡共和国，馬來話：Republik Singapura，淡米爾文：சிங்கப்பூர் குடியரசு）係東南亞城邦。又有星洲（sing1 zau1）、獅城（si1 sing4）之稱。唐人又叫佢做石叻（sek6 lik1/nit1）或者叻埠（lik1/nit1/lak6 bou6/fau6）^{[註 1]}。

地理上星加坡由星加坡島同埋周邊幾個島組成，地處馬來半島最南邊，馬六甲海峽南口，南面有星加坡海峽同印尼廖內群島隔海相望，北同馬來西亞相隔柔佛海峽，有新柔長堤相連。

1819年英國東印度公司嘅萊佛士同柔佛蘇丹簽訂條約，獲批准喺星加坡建立交易站同殖民地，後來稱為「星加坡開埠」^[9]^[10]^[11]。由於特殊嘅地理位置，星加坡喺第二次世界大戰之前一直係大英帝國喺東南亞最重要嘅據點，因為噉慢慢發展成為繁榮嘅轉口港。1965年獨立後，喺總理李光耀嘅領導之下，新加坡喺一代人嘅時間內從一個第三世界國家轉變為一個有錢嘅已發展國家，人均國民生產總值居世界前茅。星加坡以廉潔嘅政府、清潔嘅都市、高效率同完善嘅法制聞名於世，但同時又以政府嚴格嘅管制著稱。

歷史

萊佛士嘅尊像

星加坡早期主要有馬來人住，佢最早嘅文獻，源自中國公元3世紀。14世紀中國大明時將星加坡叫做淡馬錫（Temasek）。1819年 1月29號英國不列顛東印度公司僱員萊佛士登陸星加坡，並開始管轄呢個地區。1824年星加坡正式成為英國殖民地，最初隸屬於英屬印度殖民當局管轄，1867年升格為海峽殖民地，受英國直接統治。

1941年太平洋戰爭時期，星加坡畀日本佔領達3年6個月，改埋名叫「昭南特別市」（Syonan）。1945年8月英國重新接管星加坡，恢復舊名。1959年星加坡取得自治地位，1963年佢同馬來亞聯合邦、砂勞越同北婆羅州（現沙巴）成立馬來西亞聯邦，完全脫離英國統治。1965年8月9號馬來西亞宣布將星加坡驅逐出聯邦，星加坡被迫獨立。

星加坡獨立後，尤其喺1970年之後，政治上嘅自由空間畀政府逐步壓制，之不過經濟上高速發展，好快就成為東南亞重要嘅金融同埋轉口貿易中心，成為「亞洲四小龍」之一。喺吳作棟做第二任總理嗰陣，星加坡平穩度過咗1997年亞洲金融危機。但到21世紀初第三任總理李顯龍接任嗰陣，星加坡又再度遇到，點樣面對區內其他經濟體系崛起嘅新難題。

政治

星加坡國會大廈

根據星加坡憲法，星加坡實行嘅係議會制政府。國家機構三權分立，總統由直接民選產生，係國家元首。國會議員亦都係選舉產生，總理喺國會多數黨中產生，佢領導嘅內閣擁有行政權，並由獨立嘅公共服務委員會管理公務員嘅聘用同埋處分。總理喺議員入邊揀人做內閣部長。

自1959年起，人民行動黨一直係唯一嘅執政黨，喺議會亦好少有能夠形成監督力量嘅反對黨。外界普遍認為，人民行動黨對反對黨同埋異見分子嘅打擊係毫不留情，包括喺選舉前重新劃分選區、運用行政資源同訴諸法律行動等。但同時唔可以否認嘅，人民行動黨確實喺星加坡人中有好高威望，建國後咁多次選舉，行動黨嘅總得票率未試過低過60%。

有啲西方國家指責人民行動黨主宰咗星加坡主要嘅政治舞臺，因為國會成員絕大多數都係該黨黨員，三任總理李光耀、吳作棟同李顯龍亦都係人民行動黨黨員。由於國會嘅構成來自選舉結果，呢啲指責並無太大嘅說服力。不過，星加坡即使係實行選舉制度，亦有啲人認為星加坡政府體制似乎更接近專政統治而唔係民主政治。

一般認為，星加坡言論自由嘅空間喺1965年獨立之後就一直受到壓制，雖然近年佢為咗鼓勵創意產業嘅發展同展現更開明嘅政府態度，已經喺呢方面有所放鬆。有啲人認為，人民行動黨政府通過政府持股嘅方式間接控制咗該國兩大媒體集團，反對聲音亦因為種種限制好難通過其他私人出版機構出版佢哋嘅著作或者發表言論。外國媒體批評星加坡政府，有時會俾人告誹謗而要賠錢，或者俾星加坡政府限制喺星加坡嘅發行量。此外，個人或民間組織亦被禁止自行安裝衛星天線接收器，冚辦爛鬼佬嘅電視節目都可被審查。政府亦對網絡進行管制，要求大型新聞網站必須攞牌，而封鎖嘅網站好多都係鹹網。

人民嘅行動自由並冇受到太大限制，但當局對一切集會活動都非常關注。只要達到一定數量嘅戶外集會，都必須同警方備案。星加坡嘅內部安全局擁有非常大嘅權力，殖民地時期留低嘅內部安全法授權佢哋可以喺必要時無限期拘留任何被懷疑可能對種族和諧同社會穩定造成威脅嘅人士，並可以喺不經審訊嘅情況下扣押多年。有啲人認為，呢部法律喺人民行動黨政府對付共產黨嘅時候被濫用。

此外星加坡嘅高壓管制重表現喺對日常行為嘅監督上：香口膠被禁止喺星加坡境內銷售（醫療用香口膠除外）；隨地丟垃圾、用完廁所後唔沖水、喺地鐵飲水或者食嘢都有機會招致高額罰款或強制勞役，好似罰喺公眾地方掃街示眾。呢個國家重擁有可能係全世界最嚴格嘅禁毒法律，攜帶毒品入境或藏毒作販賣用途嘅主要刑罰係絞刑。另外對於成年男性犯罪者重可以使用笞刑處罰。不過雖然大多數外國人無法理解呢啲嚴厲嘅刑法，大多數星加坡人都認同可以用重罰來遏制犯罪或破壞性嘅行為。

地理

星加坡地圖

星加坡一共有大小島嶼 50 幾個，地勢起伏和緩。主島星加坡嘅面積佔 90% 以上。星加坡好多地都係填海得來，1950年到而家大約有20%嘅國土面積係由填海來。

星加坡地處熱帶，一年到頭都比較炎熱，氣溫變化較細，年平均溫度喺24到32攝氏度之間，濕度高，每日平均濕度係84%。降雨充足，年均降雨量喺2400毫米左右，每年11月到1月係雨季，雨水較多。

星加坡早期嘅移民多數聚集喺中南部星加坡河入海口一帶，其他地區好多係熱帶雨林或農業用地，不過今時今日除咗少數嘅自然保護區外，基本上都已經係城市。星加坡綠地面積非常大，除咗美化城市外，重有降暑嘅功用。^{[未記出處或冇根據]}

由於無淡水河，星加坡嘅主要水源就係降雨，因此修建咗多個水塘。雖然降雨量大，呢啲雨水都係無法滿足當地嘅用水需要，目前50%嘅水源依靠進口，大部分嘅水係喺馬來西亞進口。星加坡亦都積極開發其他水源，包括海水化淡同埋再生水。

人口同語言

星加坡係世界上人口密度第三高嘅地方，排喺澳門同摩納哥之後。常住人口超過570萬，其中25%以上係外國公民。本國公民當中，四分之三嘅人口係華人，亦係世界上除咗兩岸四地，唯一華人人口佔大多數嘅國家，大概有76%。馬來人佔15%左右，印度族大約7%，重有少部分歐亞混血人口。

住房方面，84%嘅星加坡人口住喺由政府起嘅組屋，價格非常低廉，重可以再轉賣畀無權買新組屋嘅新加坡永久居民或外國人士。組屋之外最多人居住嘅係共管式公寓，屬於私人嘅公寓住宅，價格一般係政府組屋嘅四、五倍之多。此外重有少部分嘅排屋（即聯體別墅）或獨棟別墅。

星加坡有英文、馬來話、華語同埋泰米爾話四種官方語言，其中馬來話係國家語言，但係政府機構多數用英文。早期嘅星加坡華人大多習慣使用唔同嘅漢語族語言，例如福建話（閩南話）、廣東話等等，但係經過幾次大規模政府主導嘅講華語運動後，華語已經有壓倒性優勢。不過，受到香港演藝文化影響，廣東話喺星加坡民間仍然有一定地位^[12]。而近年星加坡政府喺一啲政策推廣上，亦會視乎對象使用方言（例如係針對建國一代嘅政策同埋喺武漢肺炎疫情期間嘅宣傳）。

不過，英文先至係星加坡嘅主導語言。政府一方面對最大族群華人推行講華語運動，一方面又喺80年代頭廢除華校制度，除咗中文同道德堂，所有嘅課程都係以英文嚟教，所以，星加坡人日常工作同生活，都係以英文為主要語言。另外，喺星加坡使用星式英文非常普遍，但係星加坡並唔樂見政府發起咗「講正確英語運動」，鼓勵國民學講、多講以英式英文同美式英文為標準嘅英文。

喺政府咁多年嚟有意推動之下，英文成為星加坡嘅共同語言，喺2015年開始，英文開始超越華語，成為新加坡國民最常喺屋企講嘅語言，到2020年，喺屋企主要講英文嘅人已經有成48.3%，而華語就得返29.9%。

星加坡粵語使用

雖然廣東裔只佔嘅星加坡華人嘅15%，但係喺保持祖籍母語方面就反而比其他祖籍嘅華人更加成功。截至2000年，廣東話依然係廣東人家庭入面最多人用嘅語言。

另外，近年新加坡政府一啲推廣政府政策（例如係方言電視劇同節目，特別係針對建國一代同埋武漢肺炎疫情期間嘅宣傳），當中除咗部份當地藝人會用廣東話演出之外（例：洪慧芳、張耀棟、向雲^[13]），有時仲會有政府官員（例：傅海燕、王乙康^[14]、楊莉明^[13]）粉墨登場，仲有廣東話對白。

宗教

新加坡宗教^[15]
宗教			百分比
佛教			33%
基督宗教			18%
無宗教信仰			17%
伊斯蘭教			15%
道教			11%
印度教			5.1%
其他			0.9%

實利·馬利亞曼印度廟

星加坡係一個多元民族、多元文化嘅移民社會，亦因此彙集咗世界上多種宗教。

82%嘅星加坡人有宗教信仰。

佛教：星加坡第一大宗教。約佔總人口33%，信徒基本上係唐人。
伊斯蘭教：馬來血統同巴基斯坦血統嘅人基本上都係穆斯林，有34.8萬人，全國有約80座清真寺。著名嘅有花蒂瑪清真寺同蘇丹清真寺。
基督教同天主教：10歲以上信徒28.5萬人（佔12.6%），係星加坡唯一信眾人數重增長緊嘅宗教。有186座教堂。星加坡最早嘅教堂係禧街嘅阿美利安教堂同聖安德烈路嘅聖安德烈教堂。
道教：佔人口嘅10%，信徒基本上係唐人。
印度教：有教徒8萬幾人，基本上係印度裔。印度廟22座。

其他宗教人數較少，合計只有1萬1千幾人。錫克教係19世紀喺印度傳入嘅，教徒主要係錫克族警察、看守人，有7間錫克廟，包括奎因街嘅中央錫克廟。猶太教喺星加坡有兩個會堂。拜火教冇廟。星加坡雖然有宗教自由，但係對少數偏門宗系，好似耶和華見證人，仍然有所禁制。

經濟

中央商業區

1965年後星加坡經濟發展迅速，係新興嘅現代化工業國家。工業主要包括區內最大嘅煉油中心、化工、造船、電子同機械等。擁有著名嘅裕廊工業區。國際貿易同金融業喺星加坡經濟中扮演重要角色。星加坡目前係繼紐約，倫敦同東京之後國際上第四大外匯市場交易中心。運輸業發達，港口同機場係全世界最繁忙之一。人民生活水平較高，人均國民生產總值超過5萬美元，居世界前列。旅遊業亦喺總體經濟結構中佔重要比重，遊客主要來自日本、中國、歐美同東南亞其他國家。

得益於呢個國家穩定嘅政局、廉潔高效嘅政府同較低嘅成本，早期星加坡係眾多跨國公司在東南亞投資嘅首選地。但係隨住人力成本嘅提高，同埋東南亞其他國家嘅相繼發展，星加坡嘅呢啲優勢逐漸喪失，好多工業、製造業紛紛外遷。但係由於英語嘅普及同高素質嘅人才，星加坡依然係區內最重要嘅金融中心。

但係受限於自身環境同埋全球經濟蕭條影響，2001年星加坡經歷建國後經濟狀況最乍抖嘅一年，GDP負增長2.2%，迫使政府開始考慮其他嘅發展道路。目前該國政府開始鼓勵私人創業同埋依靠中國及印度嘅崛起調整經濟結構，鼓勵企業到新興工業國家進行投資，但重未見成效。

旅遊業同樣係政府重點支持嘅產業，雖然近年來旅遊業頻頻受到打擊，歐美同日本旅客明顯減少，憑住良好嘅旅遊服務質量同豐富多元嘅文化，星加坡每年接待嘅外國遊客重有超過600萬人次。其中中國遊客數量增長最為顯著，主要係由於政府放寬中國公民簽證程序同埋延長逗留時間所致。為咗進一步鼓勵旅遊業嘅發展，星加坡好重視廉價航空行業嘅發展趨勢，除咗開兩間私營嘅廉價航空公司之外，亦鼓勵馬來西亞、泰國、印度尼西亞同埋澳洲等國嘅廉價航空公司將星加坡列入目的地之中，亦表示願意降低樟宜國際機場對過往客機嘅收取費用。

交通

概要

星加坡交通發達方便，交通產業佔全國GDP總產值嘅10%左右。星加坡港嘅年噸位吞吐量，係居世界之冠，2004年全年達到10.4億噸，而以貨櫃數量來計算，就位居世界第二，達到2130萬個標準箱。

航空

樟宜機場

星加坡而家有5個機場，其中樟宜機場同實里達機場係國際民航機場；另外嘅巴耶利峇機場、三巴旺機場同登加機場等3個就用作軍事用途。

樟宜機場係東南亞乃至全世界最繁忙嘅機場之一，亦係唔少澳洲去歐洲航線經停嘅站。作為亞洲最繁忙嘅5個機場之一，樟宜機場嘅年旅客數已經突破3000萬人次。樟宜機場雖然已經有超過20年嘅歷史，但依然被評為全世界最舒適嘅機場之一，目前擁有4個候機樓同兩條跑道。估計到2008年，樟宜機場嘅年過境旅客人數就會達到6670萬人次。

重有，星加坡北部嘅實里達機場而家擁有一條長達1620米嘅跑道，專門連接鄰近國家嘅旅遊景點嘅定期航班、團體包機或者接待私人飛機，喺2005年，有關當局計劃擴展跑道到2000米，用來接待波音737級數嘅客機，佢係星加坡第一個國際民用機場。

巴耶利峇空軍基地，擁有一條長達3760米嘅跑道，係畀外國空軍到訪時使用。據了解，美國空軍經常喺呢個空軍基地停留。星加坡另外重有三巴旺空軍基地同登加空軍基地。

公共運輸與公路交通

列車

星加坡島上軌道及公路完善，有10多條高速公路貫穿全島。公共交通同樣發達。而家開通咗5條地鐵線，重有1條起緊。巴士路線有成百條，由兩間巴士公司經營，分別係新捷運同SMRT巴士。祇係新捷運較常故障。

私家車普及率喺星加坡係好高，主要係由於政府嘅諸多限制措施。私人買車必須首先競標攞到數量有限嘅擁車證，一張擁車證嘅價格就已經相當於一架普通進口轎車嘅價格。另外星加坡亦係全球第一個用電子收費站嘅國家，喺入去市中心嘅道路上架設電子道路收費系統，喺高峰時段入去市中心嘅車輛就要自動畀錢。由於買私家車嘅成本太高，再加上完善、方便嘅公共交通網絡，令到大多數星加坡人選擇唔買車，呢個現象有效咁解決咗其他都市普遍存在嘅交通擠塞問題。^{[未記出處或冇根據]}

教育

教育部總部

星加坡嘅教育制度同英國嘅制度好似，除咗各國語言嘅課之外，其他科目都係用英文教嘅。一般讀完十到十一年嘅中小學之後，可以揀到初級學院、高中或者理工學院讀書，讀初級學院或者高中嘅學生，半數以上能夠升上國內大學。星加坡有5間理工學院同6間大學，其中新加坡國立大學同南洋理工大學係亞洲頗具名氣嘅學府。

每年星加坡都吸納唔少來自中國大陸同東南亞國家等地嘅留學生升學，令星加坡成為亞洲嘅區域教育樞紐。

星加坡教育制度成日俾人批評過分依賴教材，扼殺咗有彈性嘅獨立思想空間。本土戲「小孩不笨」就針對呢個教育弊病拍成嘅。

住屋

大巴窯組屋夜景

星加坡有八成四人住響政府樓，叫做組屋，價錢好平，只係私人樓嘅五分一到四分一。資格方面，家庭公民有優先權，唔係公民嘅永久居民排後面，而單身人士就要35歲後先至買得。星加坡組屋多數都係多層大廈，但係亦都有小量別墅式房屋。

飲食

勞明達熟食市場

星加坡人主要食飯多，但因為國內有三大民族（華人、馬來人、印度人），所以飲食文化相當多元化。而星加坡嘅食肆就以熟食市場為主，經濟實惠，除咗當地居民之外，唔少遊客都會幫襯。

註

↑ 「叻」係馬來文嘅Selat音譯，即係海峽咁解。

攷

↑ "Environment – Latest Data". Singapore Department of Statistics. 31 January 2023. 原先內容歸檔喺19 July 2019.
↑ "Population and Population Structure". Department of Statistics Singapore. 原著喺16 November 2023歸檔.
↑ "Population Trends 2023". Singapore Department of Statistics. 原先內容歸檔喺6 July 2024. 喺6 July 2024搵到.
↑ ^4.0 ^4.1 ^4.2 ^4.3 "World Economic Outlook Database, April 2024 Edition. (Singapore)". www.imf.org. International Monetary Fund. 16 April 2024.
↑ "Human Development Report 2023/2024" (PDF). United Nations Development Programme. 13 March 2024. 原先內容歸檔 (PDF)喺13 March 2024.
↑ https://www.singstat.gov.sg/-/media/files/publications/households/pp-s30.ashx#:~:text=7%20The%20Gini%20coefficient5%20based,fell%20from%200.433%20to%200.371.
↑ Leitch Lepoer, Barbara (1989). (DOCID+sg0033) "Singapore as Part of Malaysia". Library of Congress Country Studies. Washington, D.C.: Government Printing Office. 喺29 January 2011搵到. {{cite web}}: Check |url= value (help)
↑ （馬來文）Sejarah Tingkatan 3, Bab 7: Malaysia Yang Berdaulat, 226-229: Pemisahan Singapura
↑ 總理李顯龍新加坡總理辦公室 (2019年8月18號)。〈国庆群众大会 2019〉。原先內容歸檔喺2022年11月7號。｢各位同胞，大家晚上好！新加坡开埠200周年纪念
今年是新加坡的开埠200周年。1819年是我国发展史的转捩点。那一年，莱佛士登陆新加坡，并且在这里设立了自由贸易港，吸引了大批移民从东南亚、印度和中国到这里谋生。我们的华族先辈有的来自中国广东、潮汕和福建，有的则来自邻近地区如槟城、马六甲和廖内群岛。他们刚来时，大多只能做苦力，勉强糊口。不过，他们刻苦拼搏，结果都找到立足之地，在这里安家立业。一些后来做起小生意，教育程度比较高的会当老师、做记者。有些则成了大园主，或者创办了银行和贸易行。他们可以说是我们的"开埠一代"，为这里做出巨大的贡献。｣
↑ 新加坡國家圖書館管理局 Singapore Infopedia 資料庫。"Stamford Raffles's landing in Singapore" (英文)。原先內容歸檔喺2022年9月14號。｢28 Jan 1819: The Indiana and Enterprise anchor at St John's Island. Raffles and Farquhar meet the Temenggong...30 Jan 1819: A draft agreement is penned between the Temenggong and the British, and the Union Jack is raised with little ceremony...6 Feb 1819: The Singapore Treaty is signed between Raffles, the Sultan and the Temenggong, with commanders from the accompanying seven ships witnessing the event. Farquhar is appointed Resident and Commandant under the authority of Raffles, the Lieutenant-Governor of Bencoolen. The Union Jack is officially raised. This date is recognised as the official founding of Singapore.｣
↑ 新加坡國家圖書館管理局 Singapore Infopedia 資料庫。"1819 Singapore Treaty" (英文)。原先內容歸檔喺2023年1月5號。｢On 6 February 1819, Stamford Raffles, Temenggong Abdu'r Rahman and Sultan Hussein Shah of Johor signed a treaty that gave the British East India Company (EIC) the right to set up a trading post in Singapore. In exchange, Sultan Hussein was to receive a yearly sum of 5,000 Spanish dollars while the Temenggong would receive a yearly sum of 3,000 Spanish dollars. It was also on this day that the British flag was formally hoisted in Singapore. It marked the birth of Singapore as a British settlement...The ceremony during which the treaty was signed was attended by the people on the island at the time. Among those present were Chinese planters, Malays, as well as the orang laut. British officials, soldiers and Malay dignitaries at the ceremony dressed in regalia and fine clothes. The treaty was written in English on the left side and Malay on the right. It gave legal backing for the EIC to "maintain a factory or factories on any part of His Highness's hereditary Dominions".｣
↑ 趙曉彤 (2018-03-08)。〈【01周報．喺香港講廣東話（4）】禁絕方言的新加坡英培安：望放鬆管制〉。《香港01》 (香港中文)。喺2021-07-28搵到。
↑ ^13.0 ^13.1 黄伟曼, 文 /。〈部长与"阿姐"级艺人拍多语言短片鼓励年长者接种疫苗 | 早报〉。www.zaobao.com.sg (英文)。喺2021-07-28搵到。
↑ 〈【旅遊氣泡】新加坡部長練廣東話拍片推廣旅遊氣泡 - 香港經濟日報 - TOPick - 新聞 - 特寫〉。topick.hket.com。喺2021-07-28搵到。
↑ "Census of population 2010: Statistical Release 1 on Demographic Characteristics, Education, Language and Religion" (PDF) (新聞稿). Singapore Statistics. 2011-01-12. 原著 (PDF)喺2011-01-24歸檔. 喺2011-01-16搵到.