大正天皇

嘉仁
在位	1912年至1926年
前任	老豆明治天皇
繼任	大仔昭和天皇
私人明細
配偶	貞明皇后
仔女	昭和天皇; 秩父宮雍仁親王; 高松宮宣仁親王; 三笠宮崇仁親王
年號	大正
父	明治天皇
母	柳原愛子

大正天皇（日文：大正天皇／たいしょうてんのう^{Taishō Tennō}；1879年 8月31號—1926年 12月25號），原名嘉仁，乳名明宮，係日本第123代天皇，1912至1926年在位。佢同時是上皇明仁阿爺、昭和天皇爸爸，媽媽係明治天皇嘅典侍柳原愛子。

喺佢在位期間，日本開始民主化，並日漸強大。但佢死後嘅一連串事件令到軍國主義抬頭，所有民主化成果都化為烏有。

經歷

出世

明治十二年（1879年）7月14號上晝8點20分，嘉仁喺東京赤坂區青山御所出世，老豆係明治天皇，媽咪係權典侍柳原愛子。嘉仁仲有2位同係由柳原愛子所生嘅家姐梅宮薰子內親王（1875-1876）及大哥建宮敬仁親王（1877-1878），但係都夭折。由於權典侍屬於後宮女官，名義上並唔屬於明治天皇正式嘅妃嬪，雖然係就係生咗個仔，但柳原愛子除咗喺女官職務上嘅提升之外，並冇獲得任何晉封同埋名號。相似嘅前例仲有明治天皇嘅生母中山慶子。

嘉仁從1879年出世之後一直到1889年之間，係由明治天皇生母中山慶子負責養育。細個嗰陣，嘉仁曾患有腦疾，雖然經過治療有所好轉，但係佢嘅精神狀態好差。

成為皇太子

13歲嘅嘉仁皇太子，攝於1892年

按照繼承順位，由於皇后一條美子冇生到仔女，嘉仁喺成年之後，於1888年11月被明治天皇冊立為皇太子。

大婚

嘉仁皇太子大婚，攝於1900年

1893年，伏見宮貞愛親王個女禎子女王（日文：山内禎子）被內定為未來嘅皇太子妃，但係喺1899年因為有肺病嘅疑慮被取消同嘉仁親王嘅婚約。1900年5月10號，21歲嘅嘉仁迎娶九條道孝公爵四女九條節子（即後來嘅貞明皇后）為皇太子妃；1901年禎子女王降嫁山內豐景（日文：山内豊景）侯爵，即使冇得做皇太子妃，禎子依然同後來繼位為皇后嘅節子幾有交情。

日本天皇同皇室自大正之後就開始咗一夫一妻制度。嘉仁婚後同妻子之間感情良好，皇太子妃打破一般慣例，親自喺丈夫身邊照料，並生咗四個仔，即裕仁親王（昭和天皇）、雍仁親王、宣仁親王、崇仁親王。

喺大正天皇大婚期間，日本全國各地都種咗大量櫻花，係人民對天皇嘅祝賀。

即位

1912年（明治45年）7月30號，明治天皇駕崩，32歲嘅嘉仁繼位，年號大正，攞易經嘅「大亨以正，天之道也」嘅意思。

大正政變

大正時代開始嗰陣，軍部推行急劇增加軍備，不過嗰陣日本有嚴重嘅財政困難。經過日俄戰爭，日本將朝鮮同中國東北部劃為自己嘅勢力範圍，令到軍備需求急速膨脹。1912年12月，西園寺公望內閣因陸軍部要求擴軍兩個師團而集體辭職，由軍閥巨頭桂太郎接替。但係桂太郎上台引起抗議，東京爆發第一次護憲運動。呢場運動嘅幕後支持者係企圖從軍閥，官僚手中奪取政權嘅資本家。1913年，反對黨提出彈劾內閣案，迫使國會休會。憤怒嘅市民包圍國會，破壞警察局、派出所，形勢惡化。大正天皇出面干涉，佢希望維持政局穩定，桂太郎內閣因此落台。民主運動戰勝保守勢力，史稱「大正政變」。

大正民主

以第一次護憲運動為起點，要求政黨政治嘅民主運動，喺1914年終於實現咗政黨議會，呢個成果被人叫做「大正民主」。呢個時候歐洲爆發一戰，而日本經過明治維新，接受西方文化同思想，國家平穩發展，造成日本一片繁華，令到大正前期為明治維新之後前所未有嘅盛世。

但係大正民主並冇改變日本對外侵略擴張嘅政策。大軍閥山本權兵衛組閣後，提出大規模擴充海軍嘅預算案。人民掀起第二次護憲運動，山本內閣落台。歐戰完咗之後，民主氣息濃厚，開始「大正民主時期」。

在位後期

大正天皇自幼多病，曾經患上腦膜炎留下後遺症，40歲又患腦血栓，仲變成精神病，搞到皇太子裕仁要攝政，不過大正同大仔裕仁嘅幕僚不和，形成兩個唔同嘅派別，晚年嗰陣，大正天皇仲被記載話佢精神錯亂添。1923年發生關東大地震，死咗好多人。不過大正天皇精神差而搞到唔知情，加上在位期間有好多天災人禍，所以大正天皇畀人叫做「唔好彩嘅大正」。