靚

靚（粵音：leng3），又或者叫美感（粵音：mei5 gam2），係人、動物、地方、靜物甚至乎諗法可以具有嘅一種特性。呢種特性難以具體噉界定，大致可以理解做「一個人感知到佢覺得係靚嘅事物嗰陣，會有一股快感同滿足感」。

巴黎聖母院嘅花窗玻璃好多人覺得靚。幅相係喺 2008 年嗰陣影到嘅。

基本定義

呢幅 1922 年嘅日本畫描繪楊貴妃。楊貴妃出晒名生得靚，係四大美人當中嘅羞花：相傳楊貴妃有次去賞花，點知佢一出現啲花就冚唪唥耷低晒—佢嘅美貌搞到連花都自愧不如。

内文：美學

睇埋：快感

美學係藝術同哲學嘅領域，成日思考

「

乜嘢係靚？

」

呢條問題。呢方面嘅學者普遍認為，靚呢個概念係有可能定義嘅：事實表明，「一樣嘢靚唔靚」有些少主觀；唔同時代、唔同族群以至唔同個體對「點至算係靚」睇法可以好唔同，呢點就係所謂嘅各花入各眼或者係成語燕瘦環肥講嘅嘢。

Info：燕瘦環肥

北宋大文豪蘇軾噉講（下面呢段係文言文）—

「

短長肥瘦各有志，玉環飛燕誰敢憎。

」

—句嘢就係講緊個個人嘅體形都唔同（短長肥瘦），大家各有自己嘅風格，楊玉環同趙飛燕都各有自己嘅美態。

不過又有學者指，靚亦明顯有啲客觀—事實表明，有好多事物係多數人都會覺得佢哋靚嘅，噉即係表示靚未至於係個個人睇法都唔同。美學呢個領域其中一個重要嘅目標就係想知呢啲「多數人都覺得靚」嘅特性到底係乜，而包括畫家在內嘅藝術工作者就會用呢啲知識，務求整出俾多數人覺得係靚嘅作品。

自然之美

睇埋：雪月花

以下係一啲俾好多人覺得係靚嘅自然事物：

曙暮光 曙暮光  星雲 星雲  多種嘅蝴蝶 多種嘅蝴蝶

夜空 夜空  極光 極光  紅葉 紅葉

雪 雪  月—東亞有中秋賞月嘅傳統。 月—東亞有中秋賞月嘅傳統。  花—圖入面嘅係象徵粵文化嘅木棉。 花—圖入面嘅係象徵粵文化嘅木棉。

科學觀點

睇埋：藝術心理學

進化解釋

睇埋：性選擇

有視覺藝術方面嘅學者主張，人一般都對喺幾何上具有某啲特性嘅視覺刺激有好感，會覺得呢啲嘢有美感。佢哋當中有人由生物學嘅角度思考：

• 佢哋指出，稍為複雜啲嘅動物都會進化到鍾意顯示食物出現嘅物理刺激，例如食昆蟲嘅哺乳類動物會對「識郁嘅黑色點點」（望落似周圍爬嚟爬去嘅細隻昆蟲）有好感—就算呢啲黑色點點唔係真係昆蟲都好；
• 人類係一種雜食動物，所以理論上會進化成對任何望落似有生命嘅嘢（即係對人類嚟講有可能係食得嘅嘢）有上述呢種反應，而有生命嘅嘢普遍都喺幾何上具有某啲特性嘅，例如健康正常嘅生物一般都係左右大致上對稱嘅，於是人類就進化成會對具有呢啲特性嘅冇生命物體（例如係對稱嘅人造藝術品）有好感，令到對稱成為咗受歡迎嘅藝術品常有嘅特徵之一。

• 
  一塊大致左右對稱嘅樹葉
• 
  一隻大致左右對稱嘅蝴蝶
• 
  一棟喺形狀上大致左右對稱嘅建築物

神經美學

内文：神經美學

到咗廿一世紀，仲開始有人用腦神經學方法嚟研究靚呢個概念。

神經美學係美學嘅一個子領域，旨在用神經科學方法研究靚：神經美學上嘅研究會用神經造影方法，要受試者一路睇畫等嘅藝術品、一路監察住受試者嘅腦活動，然後再要求受試者對睇到嘅藝術品「係咪靚」作出判斷，嘗試靠噉嚟探討

• 「見到靚嘅嘢嗰陣，個人嘅腦入面發生緊乜事」
• 「點解人會覺得某啲事物靚」

等嘅問題。

語言相關

美呢隻漢字喺各東亞語言當中都具有同靚相關嘅意思。隻字喺中古漢語入面嘅發音（用 IPA 寫）估計係 /mˠiɪX/。

雖然話靚難以定義，但事實表明，世上嘅主流語言都有字嚟指靚呢個概念。

粵語

廿一世紀初嘅粵語：粵語用語裏面有靚同好睇呢兩隻形容詞，當中靚成日畀人攞嚟結合埋第啲名詞同動詞，形成合成詞，包括

• 靚仔—生得靚嘅男人或者男仔
• 靚女—生得靚嘅女人或者女仔
• 省鏡—話一個人生得靚
• 又平又靚—指啲貨價錢低質素又好
• 靚爆鏡—靚到「塊鏡都爆埋」
• 靚到痺—靚到「我覺得麻痺」
• 扮靚—透過化妝等嘅方法，令人變得更加靚

除此之外，粵語日常講嘢都會用一啲比較古雅文言化嘅字詞嚟指靚，例如用佳麗（尤其常見於選美活動）或者成語出水芙蓉嚟指靚女呀噉。

其他語言

• 英文：靚嘅標準英文形容詞係 beautiful（可以借入粵語做粵拼：biu1 ti4 fou4）；而除此之外，英文仲有好多唔同嘅字詞嚟指唔同嘅美感，例如
  • Pretty 通常係指「好睇得嚟又有啲柔弱嘅靚」，成日用嚟形容後生嘅女仔，或者個樣生得有些少陰柔嘅男仔；
  • Hot 用嚟形容人嗰陣係話個人好睇得嚟性感，身材惹火，可以大致對應粵語索。

    "That woman is hot!" → 「嗰個女人好索！」

• 法文：靚嘅標準法文形容詞係 beau（大致粵拼：bou1）、bel 同 belle（大致粵拼：be1 loe4）－beau 同 bel 係陽剛（子音之前用 beau，母音之前用 bel）belle 係陰柔。例子：
  1. Une belle femme → 一個（陰柔；une）靚嘅（belle）女人（femme）
  2. Un beau garçon → 一個（陽剛；un）靚嘅（beau）男仔（garçon）

  －喺 1 當中，名詞 femme 係指緊女人（一件陰柔嘅事物），所以要用陰柔嘅 une 同 belle 唔用陽剛嘅 un 同 beau，而喺 2 當中，名詞 garçon 係指緊男仔（一件陽剛嘅事物），所以要用陽剛嘅 un 同 beau 唔用陰柔嘅 une 同 belle 。其他羅曼語言—例如葡萄牙話—都係噉嘅情況。

• 日本話：
  • 靚嘅標準日本話形容詞係 kirei（平假名：きれい；漢字：綺麗）；值得一提嘅係，呢隻字同時亦可以係指乾淨噉嘅意思，而呢點畀人話係體現咗日本人幾咁鍾意乾淨。
  • 除此之外，日本話傳統上有用漢字，亦都有用美（漢音 bi / 訓讀 utsuku）呢隻漢字嚟書寫同靚相關嘅意思，例子可以睇睇 bijutsu（びじゅつ / 美術；指緊美術）呢隻字詞噉。
• 韓國話：
  • Kkonminam（諺文：꽃미남；漢諺混寫：꽃美男）：即係所謂嘅花美男；呢隻字詞最基本上係指「好似花一樣咁靚嘅男子」；會畀人嗌做「花美男」嘅男人或者男仔，通常對打扮有返咁上下講究，個樣好睇得嚟帶些微嘅陰柔。好似係香港嘅男子偶像組合 MIRROR 當中嘅李駿傑，就有畀人稱之為「花美男」。

美學概念

睇埋：美學

• 核突，可以算係靚嘅相反。
• 優雅，因為簡單而有嘅美感。
• 侘寂，日本文化嘅「唔完美、唔完整、唔永恆」美感。
• 黃金比例（ϕ），一個俾好多人覺得係象徵住美感嘅數。
• 得意，指一件物體嘅外形令人想保護同照顧佢。

睇埋

• 藝術
• 創意
• 仙子
• 童話：童話成日用靚做主題，例如《白雪公主》講惡毒後抵乸妒忌白雪公主生得靚過佢，或者《醜小鴨》講醜樣嘅「鴨仔」大個咗變成好靚嘅天鵝。
• 阿芙蘿迪蒂（希臘文：Αφροδίτη / Aphrodítē）：希臘神話入便掌管美感同性慾嘅女神，係奧林匹斯十二神（希臘神話最大粒嗰 12 位天神）嘅其中一柱。
• 卷積神經網絡：一種成日俾人攞嚟分析圖像（包括視藝作品）嘅人工神經網絡。

《維納斯嘅誕生》呢幅名畫描繪維納斯（Venus，即係阿芙蘿迪蒂嘅羅馬版）嘅誕生。 企喺畫面中間嗰個靚女，就係畫家想像中嘅維納斯。 《維納斯嘅誕生》呢幅名畫描繪維納斯（Venus，即係阿芙蘿迪蒂嘅羅馬版）嘅誕生。 企喺畫面中間嗰個靚女，就係畫家想像中嘅維納斯。

拎

• 香港藝術館：首頁（繁體中文）
• Beauty，史丹福哲學百科全書呢篇英文文章寫俾有志專攻哲學嘅學生睇，有詳細噉討論靚呢個概念，用咗好多篇幅嚟講靚嘅定義係乜。