香港公共圖書館

香港公共圖書館係香港嘅公共圖書館系統，由康樂及文化事務署管理，轄下包括1間總館中央圖書館、70間分館公共圖書館、12間流動圖書館同154間社區圖書館，其中32間圖書館附設有學生自修室，所收藏嘅資料包括書籍、視聽資料、報章、期刊、唯讀光碟數據庫、縮微資料同地圖等，藏量總計有1,248萬項。

位於銅鑼灣嘅香港中央圖書館

史

香港最早期嘅公共圖書館服務由1869年，喺當時啱啱起好嘅香港大會堂成立圖書館開始。當時嘅公共圖書館以英文藏書居多，中文嘅就佔少數。不過，圖書館嘅服務隨住1933年大會堂嘅拆卸而關門大吉。

喺香港日治時期，港日政府亦用過香港大學圖書館嘅部份館藏做基礎，加埋部份喺日本買嘅書，成立咗「香港市民圖書館」。日本投降之後，呢個圖書館解散，跟住有關藏書就歸香港大學圖書館所有。

全新設計嘅香港大會堂喺1962年落成，其中一座作公共圖書館用途嘅大樓，成為咗而家香港公共圖書館系統嘅開端。當時嘅公共圖書館由市政局管理，1965年喺窩打老道設立第一間響九龍區嘅圖書館。1974年第一間響新界區嘅公共圖書館喺荃灣福來邨成立，1976年第一部流動圖書館投入服務；1983年響香港藝術中心成立咗藝術圖書館。1985年9月，九龍中央圖書館（已改叫九龍公共圖書館）落成啟用，係第一座以圖書館為用途嘅大樓。

1986年，區域市政局成立之後，香港出現咗兩個公共圖書館嘅系統，一個係由市政局管理嘅香港島及九龍區圖書館系統，另一個係由區域市政局管轄嘅新界區圖書館系統。兩個圖書館系統喺好長時間內，各不相干，好似兩個系統分別簽發借書証，檢索系統亦各自獨立。重有，喺公共圖書館實行跨館還書服務嗰陣，淨係接受同系統嘅圖書館。1993/94年度開始，電腦化計劃實行，將圖書檢索目錄系統改咗做電腦貯存，加設中英兼容系統，第一間電腦化運作嘅圖書館位於荔枝角，到第二年市政局轄下嘅31間圖書館同區域市政局轄下25間嘅圖書館全部完成電腦化程序。1995年7月1號開始，無論係市政局或者區域市政局圖書證嘅讀者，都可以喺兩局圖書館借閱資料，省卻重新辦證嘅麻煩，不過兩局依然有獨立運作嘅系統。2000年政府解散市政局同區域市政局，兩個市政局同民政事務局原來嘅古物古蹟、康樂同文化職能由新成立嘅康樂及文化事務署接管，兩個市政局轄下嘅圖書館系統就係咁統一咗。

2001年，位於香港島灣仔區，同坐落喺維多利亞公園對面嘅香港中央圖書館落成，代替咗大會堂公共圖書館嘅「總館」角色。香港公共圖書館總辦事處亦搬咗去香港中央圖書館。

2020年1月，政府為咗防範武漢肺炎同避免市民聚集，所有圖書館喺2020年1月29號開始全面暫停開放。到同年3月3號，所有自助圖書站同還書箱恢復服務。直至同年3月11號，其中7間主要公共圖書館恢復有限服務，進入圖書館嘅人要先攞籌，並要戴口罩同接受量體溫，而職員每個鐘會清場一次，所有人都要離開。部分圖書館喺中午開門嗰陣出現排隊人龍。有市民批評排隊攞籌輪候嘅安排造成人群聚集，還書或續借亦要攞籌係嘥時間。亦對只准逗留一個鐘嘅安排感到不滿，寧願繼續閉館。所有圖書館喺同年3月23號開始再度全面暫停開放。5月6號其中7間主要公共圖書館恢復有限服務，同日所有自助圖書站同還書箱恢復服務。5月21號12間分區圖書館恢復有限度服務。6月15號19間分區圖書館恢復有限度服務。6月22號31間小型圖書館恢復有限度服務。6月29號，流動圖書館開。7月7號所有公共圖書館恢復服務時間。由於第三波武漢肺炎疫情爆發，所有圖書館喺同年7月15號開始再度全面暫停開放。9月17號開始局部開放，提供有限度服務。9月29號，31間小型圖書館同流動圖書館重開並恢復服務時間。12月2號，31間小型圖書館同流動圖書館再度全面暫停開放，而其中38間公共圖書館再度實施特別開放時間，並暫停提供報刊閱覽同電腦服務。其中38間公共圖書館於同年12月10日號再度全面暫停開放，2021年2月19號，7間主要圖書館同31間分區圖書館恢復有限度服務，實施特別開放時間。4月3號，32間小型圖書館以特別開放時間恢復服務，所有重開圖書館重新提供報刊閱覽、參考圖書館及電腦服務。4月7號，七間主要圖書館恢復正常服務時間。

宗旨

香港公共圖書館從創立到而家，一直以下列嘅宗旨服務市民：

• 扮演資訊中心嘅角色，幫助市民以自由平等嘅途徑知道時事，獲取各樣資訊，好似各學科嘅最新發展、各種遊藝同工餘消遣嘅資料；
• 透過圖書館嘅資源幫助市民進修同提高文化水平，以作為自修同持續教育嘅重要媒介；
• 扮演推廣香港文學同研究中心嘅角色—提高普羅大眾喺創作文學、欣賞同研究文化方面嘅興趣，保存香港文學嘅著作、促進文學發展同文化方面嘅交流；
• 提供多元化嘅館藏資料畀市民借閱使用，以鼓勵大眾善用餘暇；
• 扮演社區文化中心嘅角色—經常舉辦以圖書館資源做宗旨嘅活動，畀所有年齡嘅讀者提供各樣嘅資訊、消遣同娛樂。

組織

九龍公共圖書館

荃灣公共圖書館

屯門公共圖書館

沙田公共圖書館

粉嶺公共圖書館

馬鞍山公共圖書館

尖沙咀公共圖書館

油麻地公共圖書館

樂富公共圖書館

流動圖書館

香港公共圖書館喺組織之上可根據圖書館嘅規模同性質分做中央圖書館、主要圖書館、分區圖書館、小型圖書館同流動圖書館。

香港中央圖書館

• 香港中央圖書館（香港島銅鑼灣）

主要圖書館

主要圖書館喺香港中央圖書館未成立之前叫做中央圖書館。根據規劃嘅建議，主要圖書館可以畀40萬個市民使用，平均面積約3,000至4,000平方米。

根據圖書館委員會嘅建議，而家新規劃建設嘅主要圖書館以6,200平方米為面積（屏山天水圍公共圖書館會係第一間去到呢個標準嘅主要圖書館）。

而家共有6間主要圖書館：

• 大會堂公共圖書館（香港島中西區）
• 九龍公共圖書館（九龍九龍城區）
• 荃灣公共圖書館（新界荃灣區）
• 屯門公共圖書館（新界屯門區）
• 沙田公共圖書館（新界沙田區）
• 屏山天水圍公共圖書館（新界元朗區）

分區圖書館

根據規劃嘅建議，分區圖書館可以畀20萬個市民使用，平均面積約2,000平方米。根據圖書館委員會嘅建議，而家新規劃建設嘅分區圖書館以2,900平方米為面積。

香港島

• 石塘咀公共圖書館（中西區）
• 駱克道公共圖書館（灣仔區）
• 北角公共圖書館（東區）
• 鰂魚涌公共圖書館（東區）
• 柴灣公共圖書館（東區）
• 香港仔公共圖書館（南區）

九龍

• 土瓜灣公共圖書館（九龍城區）
• 牛頭角公共圖書館（觀塘區）
• 瑞和街公共圖書館（觀塘區）
• 藍田公共圖書館（觀塘區）
• 荔枝角公共圖書館（深水埗區）
• 保安道公共圖書館（深水埗區）
• 牛池灣公共圖書館（黃大仙區）
• 新蒲崗公共圖書館（黃大仙區）
• 花園街公共圖書館（油尖旺區）
• 油蔴地公共圖書館（油尖旺區）

新界

• 北葵涌公共圖書館（葵青區）
• 南葵涌公共圖書館（葵青區）
• 青衣公共圖書館（葵青區）
• 大興公共圖書館（屯門區）
• 元朗公共圖書館（元朗區）
• 粉嶺公共圖書館（北區）
• 上水公共圖書館（北區）
• 大埔公共圖書館（大埔區）
• 馬鞍山公共圖書館 (沙田區）
• 圓洲角公共圖書館（沙田區）
• 西貢公共圖書館（西貢區）
• 將軍澳公共圖書館（西貢區）
• 調景嶺公共圖書館（西貢區）
• 長洲公共圖書館（離島區）
• 東涌公共圖書館（離島區）

小型圖書館

根據規劃嘅建議，喺一個人口稠密嘅地區附近冇任何分區圖書館，甚至未有喺短期內計劃設立，會考慮設立小型圖書館，呢啲圖書館平均面積約500平方米。

香港島

• 士美非路公共圖書館（中西區）
• 黃泥涌公共圖書館（灣仔區）
• 電氣道公共圖書館（東區）
• 耀東公共圖書館（東區）
• 小西灣公共圖書館（東區）
• 鴨脷洲公共圖書館（南區）
• 薄扶林公共圖書館（南區）
• 赤柱公共圖書館（南區）

九龍

• 紅磡公共圖書館（九龍城區）
• 九龍城公共圖書館（九龍城區）
• 鯉魚門公共圖書館（觀塘區）
• 秀茂坪公共圖書館（觀塘區）
• 順利邨公共圖書館（觀塘區）
• 石硤尾公共圖書館（深水埗區）
• 元州街公共圖書館（深水埗區）
• 樂富公共圖書館（黃大仙區）
• 龍興公共圖書館（黃大仙區）
• 慈雲山公共圖書館（黃大仙區）
• 富山公共圖書館（黃大仙區）
• 大角咀公共圖書館（油尖旺區）
• 尖沙咀公共圖書館（油尖旺區）

新界

• 石圍角公共圖書館（荃灣區）
• 蝴蝶邨公共圖書館（屯門區）
• 粉嶺南公共圖書館（北區）
• 沙頭角公共圖書館（北區）
• 天水圍北公共圖書館（元朗區）
• 瀝源公共圖書館（沙田區）
• 梅窩公共圖書館（離島區）
• 南丫島北段公共圖書館（離島區）
• 坪洲公共圖書館（離島區）
• 南丫島南段公共圖書館（離島區）
• 大澳公共圖書館（離島區）

流動圖書館

流動圖書館為人口密集但係附近冇圖書館嘅地區或者偏遠嘅地區提供服務。

• 流動圖書館一（服務範圍：新界嘅荃灣、葵涌、青衣）
• 流動圖書館二（服務範圍：新界嘅將軍澳、大埔、粉嶺、沙田、馬鞍山）
• 流動圖書館三（服務範圍：新界嘅屯門、元朗、天水圍）
• 流動圖書館四（服務範圍：新界嘅大嶼山）
• 流動圖書館五（服務範圍：新界嘅沙田、馬鞍山、大埔、荃灣）
• 流動圖書館六（服務範圍：香港島嘅筲箕灣、鴨脷洲、石澳）
• 流動圖書館七（服務範圍：九龍嘅黃埔花園、西九龍填海區、藍田、油塘、黃大仙）
• 流動圖書館八（服務範圍：九龍嘅藍田、秀茂坪、大坑、紅磡、深水埗）
• 流動圖書館九（服務範圍：九龍嘅九龍灣、觀塘、香港嘅黃竹坑、鯉景灣、小西灣、杏花邨）
• 流動圖書館十（服務範圍：新界嘅天水圍、青衣、長宏、葵涌、洪水橋、屯門、大埔、船灣、上水、粉嶺、南昌）
• 流動圖書館十一（服務範圍：九龍嘅油塘、黃大仙、香港嘅鴨脷洲）
• 流動圖書館十二（服務範圍：九龍嘅南昌、新界嘅粉嶺、上水、荃灣）

起緊嘅圖書館

• 深水埗公共圖書館，分區圖書館（九龍深水埗區）

結業嘅圖書館

• 葵涌公共圖書館（葵青區）
• 窩打老道公共圖書館（九龍城區）
• 灣仔公共圖書館（灣仔區）
• 跑馬地公共圖書館（灣仔區）
• 坪石公共圖書館（黃大仙區）
• 黃大仙公共圖書館（黃大仙區）
• 深水埗公共圖書館（深水埗區）
• 美孚新邨公共圖書館（深水埗區）
• 白田公共圖書館（深水埗區）
• 旺角公共圖書館（油尖旺區）
• 大角咀公共圖書館（臨時圖書館）（油尖旺區）
• 康寧道公共圖書館（觀塘區）
• 觀塘公共圖書館（觀塘區）
• 九龍灣公共圖書館（觀塘區）
• 藍田公共圖書館（小型圖書館）（觀塘區）
• 西區公共圖書館（中西區）
• 福來邨公共圖書館（荃灣區）
• 友愛邨公共圖書館（屯門區）
• 天水圍公共圖書館（元朗區）

服務同設施

外借圖書館資料

圖書證同智能身份證內都唔會儲存所有關於外借記錄嘅資料，因為呢啲資料會儲存喺於圖書館嘅伺服器入面。香港公共圖書館嘅圖書證係屬於政府財產，所以一旦唔見咗嘅話，就要儘快去圖書館辦理報失手續。持有有效圖書證嘅讀者，可以去到全港任何一間公共圖書館借閱同續借圖書館資料。以下係而家香港公共圖書館有效嘅圖書證：

香港公共圖書館設有電話或者網上續借服務，讀者唔使親自去到圖書館續借資料，重有，圖書館亦設有網上預約圖書館資料嘅服務，每次預約會收取2.5元。

參考圖書館

除咗香港中央圖書館之外，大會堂公共圖書館、九龍公共圖書館、沙田公共圖書館、荃灣公共圖書館、屯門公共圖書館同屏山天水圍公共圖書館都設有參考圖書館。館內重設有各學科嘅常用參考工具資料同標準嘅參考資料。重有，喺其中3個圖書館設立咗以下專門嘅參考區域：

• 基本法圖書館

喺2004年12月20號啟用，響大會堂公共圖書館5樓，而家大約有14,000項關於香港特別行政區基本法同其他以法律為主題嘅書籍資料。

• 工商業圖書館

喺2003年9月啟用，響大會堂公共圖書館11樓，而家大約有20,000冊工商業參考書、重有期刊、縮微資料、唯讀記憶光碟同線上資料庫等各種資料。

• 創造力及創新資源中心

喺2003年11月27號啟用，響大會堂公共圖書館10樓，而家大約有1,500本有關創造力同埋以「創新思維」為主題嘅中、英文書同期刊。

• 地圖圖書館

喺香港中央圖書館5樓，而家大約有23,000項資料。入面所設嘅電腦工作站有助翻查唯讀記憶光碟同數碼化地圖資料，亦設置特大嘅地圖閱覽枱方便讀者查閱大型地圖。

• 香港文學資料室

喺香港中央圖書館8樓，而家大約有香港文學特藏32,000項資料，包括香港文學書/期刊、作家手稿、畫像、剪報同香港文學作家資料庫，內含約1000位作家嘅生平傳略、作品同作品評論等書目資料。

• 藝術資源中心

喺香港中央圖書館10樓，藝術資源中心嘅館藏包括中英文書、樂譜、期刊、各種視聽同多媒體資料、線上資料庫等，總數大約197,000項，重提供藝術品外借。

• 教育資源中心

喺2007年5月4號啟用，響九龍公共圖書館9樓，而家所收藏嘅大約有20,000幾項書、期刊、電子資源同線上資料庫等。

便民設施

• 
  圖書館喺辦公時間外使用嘅還書箱
• 
  還書箱
• 
  雨遮袋同回收箱

數碼圖書館

數碼圖書館係香港中央圖書館廣泛使用電腦同科技應用嘅一個例子，圖書館入面設有一個共三層嘅自選影像同自選錄音資料系統—第一層利用高質素嘅影音資料伺服器，畀公眾可以快速及同步連接系統觀賞媒體資料；第二層利用伺服器同光碟點播機，提供較經濟嘅渠道，等公眾選擇使用率低嘅媒體資料；第三層包括一個由電腦控制嘅模擬影音開關、多部傳統影音播放機（好似影碟機/小影碟機/數碼影碟機/鐳射唱機同卡式錄音機），同埋一個由控制台組成嘅分配網絡，讓公眾享用自選影/音服務。香港中央圖書館嘅樓層入面，安裝咗大約90個專為影音媒介而設嘅異步傳輸形式工作站，畀公眾使用上述三個層次嘅自選影/音系統；重有，呢間圖書館入面嘅400幾個區域工作站亦提供咗類似嘅系統。

除咗恆常嘅自選影音作品外，數碼圖書館亦提供短片同數碼文件—呢啲資料無論係繪圖、手稿、縮微資料、剪輯、報告、海報、音樂會/教會場刊、報章/雜誌、學報、畫作、地圖、相定係同黑白文件影像有關嘅，都會先取得版權許可同轉化成數碼格式，先至存放喺多媒體數據庫。

同傳統圖書館服務相比，數碼圖書館有助擴大同加強圖書館服務，並發揮到以下嘅優勢：

• 任何大眾身處嘅地方，祇要有接通網絡嘅個人電腦，就翻查得到任何資料，重打破咗圖書館地理位置方面嘅限制；
• 多位讀者可以喺同一時間閱讀同使用同一份圖書館嘅資料；
• 研究同翻查資料變得更有效率同更為徹底，並且節省時間；
• 使用者搜尋資料，除固有嘅文字資料外，重有顏色配搭、結構同樣式等範疇，搜尋嘅方式亦因而變得更多樣化。

重有，香港中央圖書館亦會同轄下嘅圖書館分館、香港電影資料館、衛生教育展覽及資料中心（食物環境衞生署）、藝團圖書館、康文署轄下嘅博物館、香港文物探知館同歷史檔案處等連接—咁亦有利於遠程使用者查閱數碼化資料同自選影音資料。

出面網頁

• 香港公共圖書館
• 香港地方：建設及建築物－公共圖書館