經濟學詞彙表

以下係經濟學（日常口語又會借英文 econ 嗌做粵拼：ji6 kon1*6）上嘅常用詞彙一覽。呢個表唔淨只包含啲理論性質嘅概念，仲會提到一啲實際經濟學應用（例如投資或者理財）上要用嘅工具。

2008 年影到嘅香港中銀大廈

理論基礎

内文：經濟學

• 稀缺：經濟學最基礎嘅一個概念，講緊有限嘅資源同理論上無限嘅慾望之間爭幾遠；人類有好多慾望，但佢哋手頭上嘅資源－錢、時間、精神－都實係有限嘅，好多時佢哋都冇足夠嘅資源達到嗮佢哋想要達到嘅目的，例如一間公司唔夠資源生產嗮佢想要生產嘅嘢；有好多資源都係稀缺嘅，所以人類要做好多決策，決定點樣運用某啲資源（時間、精神等等）去最大噉滿足自己嘅慾望－而「人類點樣用手上資源，最有效率達到目的」正正就係經濟學研究嘅嘢。

研究方法

GDP（X 軸）同失業率（Y 軸）之間嘅關係嘅迴歸模型（呢兩個變數大致上成反比）就涉及咗經濟測量學。

睇埋：科學方法

• 經濟模型：用嚟描述經濟現象嘅數學模型；一個經濟模型想用最少量嘅假設，做出最精確嘅預測同埋解釋最多嘅現象（睇埋奧坎剃刀）；舉個簡單例子，以下係模擬一間公司嘅利潤嘅經濟模型：

  $\pi (x,t)=xp(x)-C(x)-tx\quad$

  • 當中 $\pi (x,t)$ 係指利潤，$x$ 係間公司供應貨品服務嘅率，$p(x)$ 係指喺 $x$ 之下啲貨品服務嘅價格，$C(x)$ 係指以 $x$ 呢個率供應貨品服務嘅成本，而 $t$ 就係指每賣一件貨品服務要交嘅稅。
• 經濟測量：經濟學同統計學嘅結合領域，旨在諗點樣用統計學方法分析啲描述經濟現象嘅數據，靠噉嚟搵出唔同經濟現象之間嘅關係，簡單嘅例子有用迴歸分析分析 GDP 同失業率之間嘅關係。
• 經濟實驗：嘗試用實驗驗證經濟理論嘅做法；舉例說明，行為經濟學當中有所謂嘅損失規避現象，指人類零舍在意損失，所以（例如）損失 100 文引致嘅滿足感喪失數值上大過獲得 100 文引致嘅滿足感得益；喺一個展視損失規避嘅實驗當中，研究者可以去搵一柞受試者返嚟玩一啲買賣遊戲，途中問佢哋（例如）寧願賺多 10 文定係避免損失 10 文，結果多數係發現啲受試者通常都會揀後者－引證咗損失規避嘅假說。

微觀經濟學

一間工廠喺度生產汽車，滿足人（想要唔使吓吓去邊都行路）嘅慾望。

一班人員喺度拍影片，生產影片。

内文：微觀經濟學

• 生產：喺生產嘅過程當中，做生產嘅人會用某啲輸入（生產因素，包括原材料、精神同時間等）製造出一啲可以滿足某啲人嘅慾望嘅貨品或者服務，從而創造經濟價值；例如一個喺廣東菜餐廳入面炒緊餸嘅廚師噉樣，佢會花費一啲原材料－生嘅菜同肉等等嘅食材－同埋用自己嘅精神時間，煮出一碟碟可以滿足啲食客（想食靚餸）嘅慾望嘅產品。
  • 分工：各人各自噉生產自己擅長生產嘅嘢，通常會令效率更加高。
  • 機會成本：指喺生產嘅過程當中做生產嘅人放棄咗冇用啲資源去做第啲嘢，而做一次生產嘅機會成本就係「做佢而放棄咗嘅選擇當中最有價值嗰個」；例如如果有班工程師同建築工人用咗啲材料喺澳門度起咗條路，佢哋就冇得用嗰啲材料喺珠海或者香港嗰度起路，而呢啲如果冇起澳門嗰條路就有得起嘅路當中最有價值嗰條就係「用啲材料喺澳門起路」嘅機會成本。
  • 報酬遞減：根據邊際報酬遞減定律，假設第啲因素不變，係噉提高某一個生產因素嘅量普遍會引致整體產量嘅提升，但邊際報酬（指報酬上升嘅率，設報酬做 $r$，生產因素嘅量做 $F$，邊際報酬由 ${\Delta r}/{\Delta F}$ 反映）會係噉跌，即係話如果將「產量」（Y 軸）同「生產因素 A 嘅量」（X 軸）畫幅圖，假設第啲生產因素不變，條線嘅斜率會隨住生產因素 A 嘅量上升愈嚟愈負，好似下圖噉－

  

  • 生產可能性曲線，簡稱 PPF：一種用嚟表達稀缺性、成本同效率嘅圖；假想而家有間好簡單嘅工廠，佢淨係曉生產「槍」（gun）同「牛油」（butter）兩種貨品，佢幅 PPF 條 Y 軸係「生產嘅槍嘅量」，而 X 軸係「生產嘅牛油嘅量」。呢間工廠手頭上嘅資源係有限嘅，如果佢想生產多啲槍，佢就要生產少啲牛油－即係話兩個量之間嘅關係必然係負，條線所包含嘅面積必然係有限嘅。
  • 絕對優勢：指一個經濟個體（個人、公司或者國家）能夠比對手喺某樣貨品或者服務當中產量更加多，而且途中用嘅資源量不變甚至更少。
  • 相對優勢：指一個經濟個體能夠比對手以更低嘅機會成本生產某一樣貨品或者服務。
• 經濟價值：指一件貨品或者服務對一個經濟個體（例如係一個消費者）嘅主觀價值。
• 市場價值：一件貨品或者服務嘅「客觀」價值，好大程度上由經濟價值話事；例如如果有一件貨，佢好能夠滿足消費者嘅慾望，對所有消費者嚟講都有好高嘅經濟價值，令所有消費者都肯付出高嘅代價嚟得到呢件貨，最後結果件貨就會有高嘅市場價值。
• 實際同名目價值：實際價值係指以貨品同服務嚟衡量嘅價值，而名目價值係指以錢嚟衡量嘅價值；舉個具體例子，假想家陣有個人，佢做嘢賺咗 1,000 文美金嘅人工返嚟，佢將筆錢儲落去個錢罌度；過咗一年之後，佢攞返嗰 1,000 文出嚟使，不過喺嗰一年期間個經濟體有通脹－啲貨品同服務嘅普遍價錢上升，即係話
  • 雖然嚿錢名義上依然係 1,000 文咁多（名目價值冇變），
  • 但通脹搞到啲貨品服務貴嗮，所以攞住嚿錢可以買到嘅嘢就少咗（實際價值跌咗）。
• 柏里圖最適：指資源分配嘅一種理想狀態；俾若干量嘅資源俾一班人，如果有兩個可能狀態 $s_{1}$ 同 $s_{2}$，世界由 $s_{1}$ 變成 $s_{2}$，而喺呢個過程當中有人嘅境況變好咗，但冇令任何人嘅境況變差，由 $s_{1}$ 去 $s_{2}$ 嘅過程就算係令個世界變得更接近柏里圖最適。
• 消費：指運用手上資源獲取即時效益嘅舉動，例如一個人攞到一個蘋果，佢即刻食咗個蘋果，滿足自己「想食嘢」嘅慾望。
• 投資：指投放啲資源去做唔能夠即時滿足慾望、但能夠喺將來引起更大得益嘅活動，例如一個人攞個蘋果去種，將來種樖蘋果樹出嚟，等自己將來多啲蘋果食。
• 貿易：「將貨物或者服務由一方轉送到去另一方度」嘅過程，例如 A 君俾若干量嘅錢俾 B 君，令 B 君肯將手上嘅貨交俾 A 君。

宏觀經濟學

内文：宏觀經濟學

• 通貨膨脹：指一個經濟體內部啲貨同服務嘅價格普遍噉升，通常係表示個經濟體裡邊多咗經濟活動；通脹最直接嘅影響係會令一隻錢嘅實際價值下跌—想像依家有個人，佢手上揸住一張 1,000 文港幣嘅銀紙，然後香港出現通脹；雖然筆錢名義上仲係值 1,000 文咁多錢，但因為啲嘢貴晒，揸住張銀紙可以買到嘅貨品服務實際上少咗。

金融市場

内文：金融市場同金融

睇埋：投資

• 外匯市場：世界唔同地方嘅人喺冇交易所管控之下，交易唔同嘅通用貨幣（例如港紙同人民幣等），形成嗰個市場就係所謂嘅外匯市場；一位投資者可以手上同時揸住幾種唔同嘅貨幣，一隻貨幣嘅價值跌佢就入貨，等到隻貨幣嘅價值升返佢就放，佢就可以得到一定嘅利潤。呢種投資做法一般認為係低風險低回報嘅投資。
• 期貨：一種協議，做協議前買賣雙方講好咗個價，並且同意响將來某個時間點會買或者賣某樣嘢（可以係股票或者債券噉嘅金融工具；例如家陣阿明同阿偉兩位投資者同意，一個月後阿明會用 x 咁多錢買阿偉手上嘅金條，如果金價喺呢個月之內升咗嘅話，阿明就有賺－等同可以用低咗嘅價買入呢啲金條。
• 期權：都係一種協議，買賣雙方講定個履約價同日期，其中一方有權喺嗰個日期前用履約價買或者賣件嘢（呢樣嘢可以係股票或者債券）；期權所講定嘅，係交易其中一方「有權」買或者賣－唔似得期貨噉係「一定要」買賣。
• 孖展：一種畀人「用借返嚟嘅錢投資」嘅做法，高風險高回報；投資者開咗個孖展戶口之後，要確保戶口入面嘅錢量保持住喺某條「邊界」上面，噉亦即係話一旦投資者買咗嗰件資產嘅價下滑，搞到孖展戶口入面嘅錢量跌到去低過邊界嘅水平，投資者就會收到個 call 叫佢擺錢落個戶口，令戶口嘅錢量返到去邊界以上。
• 整筆支付：指一嘢過畀晒要畀嘅錢，相對於逐年逐年或者逐個月逐個月畀；啲人講親整筆支付，好多時都係講緊退休嘅問題—同定期畀嘅退休金比起嚟，整筆式噉攞退休金有好有唔好，一吓過攞晒筆錢有好處，例如有得攞筆錢去做投資，但同時又有風險嘅，例如可能個人條命長得滯，老去之前就使晒筆錢。
• 投資黃金：顧名思義係指緊靠買賣黃金嚟投資；首先，黃金可以攞嚟整好多嘢—包括銀仔、珠寶同電子元件等都係人類一路需要嘅嘢，噉就表示人對黃金永遠有一股需求，永遠有需求就表示黃金個價低極有限；另一方面，黃金被指供應穩定，唔似得銀紙噉政府有得話印就印；需求同供應都穩定，就表示市場價值都會有返咁上下穩定—揸黃金難有大損失，黃金就廣泛噉被視為一種風險比較低嘅投資。
• 市場趨勢：指一個市場入面啲嘢嘅價格趨向點郁，當中
  • 牛市指個價趨向升－記法係「好似牛隻角噉向上指」；
  • 熊市指個價趨向跌－記法係「好似隻熊掌噉一嘢向下冚kam2」；可以睇睇投降點嘅概念。
  • 牛皮市指個價趨向冇乜點變－記法係「唔上唔落，好似一塊牛皮咁堅韌」。
• 佣金：買賣投資相關產品嗰陣，好多時都要有某啲人員做中介幫手促成買賣；做買賣雙方往往會支付少少錢畀呢啲做中介嘅人員，先會令人有誘因幫手促成投資買賣，呢筆錢就係佣金。
• 供樓：

睇埋

• 管理學
• 市場學
• 社會學
• 市場學嘅大綱
• 人工智能詞彙
• 經濟用語

引咗

篇文用咗嘅行話或者專有名詞，英文（或者其他外語）名如下：

篇文引用咗以下呢啲文獻同網頁：