燒嘢食
燒嘢食（粵拼：siu1 je5 sik6；英文：Barbecue，又叫 BBQ，讀音似粵拼：bi1 bi1 kiu1）係一種煮食方法，通常認為係人類最原始嘅煮食方式，一般嚟講，燒嘢食係將啲嘢食放喺火上面燒熟，喺現代社會，由於有多種用火嘅方式，燒烤方式亦逐漸多元化，發展出各式燒烤爐、燒烤架、燒烤醬等。燒嘢食亦成為一種社交聚會休閒娛樂方式或者係生意。一個人燒嘢食喺現代社會係好少見，無論喺亞洲、美洲、歐洲等，燒嘢食通常係細至家庭，大至學校嘅集體活動。
由於肉類喺燒嗰陣會產生煙霧，燒嘢食通常都喺戶外進行。但煙霧可以用強力通風將佢大幅減少，因此亦有餐廳發展出室內燒烤嘅型式，喺亞洲例如日本、韓國、台灣、泰國等地方，稱之為燒肉店，亦即係喺枱中間有燒烤架，枱上面有強力抽風機，喺燒烤架上面放無煙木炭，網架或欄架畀客人自己將生肉燒熟嘅方式。
古今分別
編輯之前
編輯當人類重係晌捕獵同採摘野果充飢嘅時代，一切幾乎都係即食。士多啤梨蘋果橙係，飛禽走獸殺咗返嚟都係生食，停留晌茹毛飲血嘅階段。當人類發現鑽木可以取火，就開始利用火嚟改善生活，好似照明、取暖以及煮食等等。由於冇任何裝嘢嘅砂煲罌罉，一切都係用手又或者用樹枝代手去做。搵啲柴同葉返嚟去起火，用樹枝木棍直接拮住啲啱啱打返嚟嘅豬牛羊等等肉類，直接同火接觸，燒到佢出煙變色熟晒，食得，就係古代嘅燒烤，其實同家陣三五成群郊野燒嘢食好似，不過用具同玩法當然先進好多。
而家
編輯
今時今日，燒嘢食唔再係醫肚咁簡單。燒嘢食成為飲食業中其中一門最撈得起嘅生意。世界各地發展出好多具備當地風格，各有所長嘅燒烤類型。韓燒、港式燒味、東南亞串燒等等都好受大眾歡迎。而且，古代燒烤通常一個人搞掂，為滿足生存必需充飢，食完就算。家陣啲人燒嘢食啱啱相反，一個人無論去郊外定係入餐廳燒嘢食都唔常見，因為除咗醫肚，好多時喺為咗聯誼，係人類社會一種人際交流活動。都市人會約埋去燒烤餐廳唰餐勁，鄉郊居民會叫埋鄰居老友嚟開個燒烤大會，邊食邊吹水，都見到燒嘢食呢件事晌現代嘅轉變同功能轉換。有得食有得玩有意義，一舉幾得。
燒嘢食用嘅嘢
編輯火：燒嘢食一定要起火。一般郊遊/沙灘，又或者街邊串燒檔，用燒烤爐燒嘢食主要都係用炭，或者執啲乾柴嚟燒。起火過程叫透爐或者起爐，炭唔係咁容易燒得着，要視乎每個人嘅經驗。餐廳就方便得多，燒嘢食甚至唔再一定見到火。利用電或煤氣爐加熱鐵板，一樣可以整熟板上食物。例如：韓燒。
架生：露天燒烤一般係用燒烤叉，喺燒嘢食之前用水洗或插沙，之後燒一燒，再用紙抹，作為清潔程序。坐地式燒烤爐就用長鐵夾，放食物放喺烤架上面燒熟，之後直接分畀食客。用嚟食嘢嘅架生通常都用即棄餐具，例如：筷子、刀、叉或者用手，裝嘢食用紙碟或碗。若果著重環保，可以帶備非即棄餐具。
各地燒嘢食用咗好多唔同嘅架生，港式燒乳豬用大鐵鈎，都係因應件嘢食大細而發展出嚟。
燒：燒到差唔多食得嗰陣，有人鍾意加蜜糖或者燒烤醬，帶出食物嘅香味。有啲比較難熟嘅食物會用錫紙包住然後放喺炭執邊煨同烘，例如：金菇牛肉、番薯、粟米等，大概到中段開封就食得。不過由於火力大細好難控制，同埋睇唔到裏面，好多時拆開嗰陣啲嘢食有機會燶咗。錫紙包嘅燒法可以加入較多調味料，例如：豉油、蒜頭、BBQ醬等。有另外一啲方法會將食物用半個人咁高嘅鐵叉拮起，然後喺啲火隔離唔停噉轉，係要令到每一部份嘅肉都均勻受熱。
食物：燒嘢食多數都係肉類：香腸、丸：牛丸、貢丸、魚蛋、蝦。其他生肉例如：雞翼、牛扒、雞扒、豬扒、羊扒、其他魚蝦海鮮等。一般街邊肉食店都有啲已經醃好，買嚟可以即燒嘅肉食。非肉食類嘢食通常有麵包、棉花糖、粟米、番薯、冬菇等。菜都可以用錫紙包住嘅煨。
餐廳以開放自助嘅形式任揀任攞，食物選擇都係大同小異。
燒嘢食地方
編輯
歐美嘅人經常會晌屋企個花園度搞燒嘢食，叫埋三五知己隔離鄰舍一齊嚟聯誼。由於地方大，十幾廿人邊食邊玩邊吹水，悠悠閒閒過個歡樂下晝，非常寫意。
好似香港呢啲太細嘅地方，搵個後園燒嘢食唔係咁容易。唔少私人樓個天台都畀住客租嚟燒嘢食，而政府晌唔少沙灘同郊野公園都整咗好多石造嘅燒烤爐，畀市民燒嘢食。市民拎齊架生，先到先得，等到個爐就有得你燒。大時大節，免費爐例必供不應求。有啲有公眾爐嘅地方會有私人營業嘅燒烤檔，齋提供鐵架爐租畀人，不過收費幾揦脷，大節日更加會坐地起價，比閒日高一到兩倍不等，重要限制時間。
近年有新興燒烤樂園湧現，晌一啲位置離市區幾遠，但係風景幾正嘅地方開設一大個燒烤場。裏面提供所有嘢食同架生，重有玩嘅嘢，好似足球直播、麻雀耍樂等等，畀錢就有得玩有得食，成為好多家庭聚會或者集體活動嘅去處。
串燒好味抵食，晌各地嘅露天市集或食街都見到串燒檔開到成行成市。串燒流行令到市區任何一條街邊都變成燒嘢食嘅地方。
晌露天地方燒嘢食，好處係啲煙可以自然散走，唔會搞到一陣味。不過時下好多餐廳經營各國嘅燒烤菜，令到燒嘢食可以登堂入室。食客可以嘆住冷氣，自己一邊燒一燒食，又或者職員燒，顧客食。燒嘢食經已唔再一定搞到周身汗污糟邋遢，而係一年四季都可以舒舒服服。燒烤餐廳較常見係做韓燒，皆因佔地唔多，一個場可以開多幾圍。而且晌鐵板中間放個爐做埋打甂爐更係越嚟越普遍，令食客有雙重嘅享受。
睇埋
編輯參考
編輯- 香港燒烤露營指南，李日陽，萬里機構 ISBN 962-14-2347-3
出面網頁
編輯- 短線遊：郊野公園BBQ唔使帶炭 壹蘋果網絡
- 港式燒烤（英文）
- 港式燒烤嘅樂趣（英文）
- 港台中秋小不同