哈利波特世界觀與設定

喺英國作家J·K·羅琳創作嘅奇幻小說系列《哈利波特》同埋佢嘅相關作品裡面，故仔裡面嘅虛構世界包括住兩個截然唔同嘅社會：巫師世界（又叫魔法世界）同埋麻瓜世界（現實世界）。喺小說裡面，巫師世界同麻瓜世界係共存嘅，巫師同女巫大部分時間都隱藏喺作為麻瓜嘅非魔法人類當中，而麻瓜世界就係大多數唔係魔法人口所住嘅世界。

《哈利波特》系列嘅背景設定喺20世紀90年代嘅英國，巫師同女巫一般都會隱居喺魔法世界裡面，佢哋普遍都會用魔法，對外隱藏住佢哋自己嘅能力。英國魔法界有佢哋自己嘅法律、政府部門同埋魔法學校。

基本設定

内文：哈利波特裡面嘅魔咒同哈利波特裡面嘅魔法物品

成個《哈利波特》系列都設定喺1991年—1998年之間，除咗發生喺1981年10月31號嘅第一輯小說嘅開篇，同埋發生喺2017年9月1號嘅第七輯小說嘅尾聲之外。喺《哈利波特》時間線上面唔同嘅點，作者用倒敘同埋提前敘述嚟分別講述咗1920年代、1930年代、1940年代、1970年代、1980年代、2010年代同2020年代嘅魔法世界。

魔法世界嘅描繪係以魔法嚟做中心，而魔法係巫師同女巫嘅一種與生俱來嘅能力，呢樣嘢可以用魔杖等等呢啲道具嚟施放。

巫師世界為咗唔俾啲麻瓜知道魔法世界嘅存在而付出咗大量嘅努力。巫師世界同麻瓜世界起初係共存嘅，不過啲麻瓜喺幾個世紀以嚟持續咁迫害嗰啲擁有魔法嘅人，迫使到啲巫師制定咗一系列嘅法律，目的係隱藏魔法世界嘅存在。巫師世界嘅第一個亦都係最重要嘅法規係1692年嘅《國際巫師保密法the International Statute of Wizarding Secrecy》，裡面涉及咗禁止去用麻瓜人工製品、限制未成年巫師同女巫喺學校以外嘅地方用魔法，仲規定特登向麻瓜社會暴露魔法能力嘅話就會受到懲罰。不過喺危及生命嘅情況（無論係巫師定麻瓜）之下，就准啲巫師同女巫可以喺麻瓜面前用魔法嚟避免受傷。呢啲法律由魔法部去執行，而其中嘅一個特殊部門—魔法意外和災難部嘅除憶師Obliviators，佢哋嘅職責係確保睇到巫師同女巫施展魔法嘅麻瓜唔會留低「唔方便」嘅記憶。另外，保密法亦都可以豁免咗部分嘅麻瓜，包括巫師同女巫嘅麻瓜親屬，仲有需要同魔法部接洽嘅麻瓜高級政治領袖（例如英國首相）。不過，就好似喺《神秘的魔法石》嘅第一章睇到嘅咁，佛地魔喺1981年第１次倒台嗰陣時嘅歡呼雀躍而令到呢啲法規暫時被忽視咗，啲巫師同女巫會無緣無故咁暴露喺麻瓜面前，搞到啲麻瓜好困惑。

魔法世界同麻瓜世界相比，佢哋嘅科技發展相對落後，照明工具係用蠟燭，而唔係用電力、煤氣燈/燈膽；佢哋依然用貓頭鷹通訊而唔係簡單方便嘅電話或者電郵，不過貓頭鷹郵件唔使寄件人知道收件人嘅確切位置或者電話號碼就可以送到去。某方面嚟講，魔法同電力喺雙方嘅世界係等價嘅，但係電子裝置喺充滿魔法嘅地方（例如霍格華茲）係無作用嘅，而巫師用嘅麻瓜裝置（例如係相機同收音機）可以用魔法嚟代替電力去運作，不過呢種例子好少見；就算科技會令佢哋生活得更加輕鬆，巫師同女巫好少去用麻瓜科技，佢哋大部分對呢啲嘢都無興趣（偶爾都有例外，例如最大嘅抱負係「搵出飛機點樣去飛」嘅麻瓜狂熱者亞瑟·衛斯理）。純血巫師對麻瓜科技嘅運作方式覺得好困惑，霍格華茲為咗對呢方面有興趣嘅學生開設咗麻瓜研究呢個課程。哈利·波特有幾次嘅任務係解釋麻瓜科技嘅運作原理，例如喺《消失的密室》裡面向衛斯理先生介紹電話，不過榮恩·衛斯理喺《阿茲卡班的逃犯》開頭打咗第一個電話俾哈利，結果帶嚟咗災難性嘅後果。

巫師世界亦都無採納現代麻瓜用嚟記錄訊息同傳遞嘅模式，例如霍格華茲嘅學生會用點咗墨水嘅羽毛筆同羊皮紙嚟做筆記同功課，而唔會用原子筆／鉛筆、紙張同埋電腦嘅電子裝置。巫師世界嘅錢亦都係相當傳統嘅，魔法貨幣全部都係金屬硬幣，無紙幣。當英國麻瓜喺1971年用十進制嗰陣時，英國巫師同女巫繼續沿用佢哋嘅貨幣系統——２９個銅納特Bronze-Knut兌１個銀西可Sickle，而１７個銀西可Sickle就兌１個金加隆Gold Galleon；巫師世界有收音機，但無電視；巫師同女巫會用飛天掃把嚟做短途嘅交通工具，而飛天掃把會量產，仲好似麻瓜嘅私家車咁定期推出新型號；另一方面，魔杖係由技藝精湛嘅工匠手工去製作嘅，每支獨立嘅魔杖都透過漫長而艱苦嘅過程嚟製作。魔法世界嘅印刷係由機械印刷機嚟做，而唔係透過魔法去做（至少《謬論家》係咁樣整出嚟）。

英國嘅巫師世界喺好多方面類似麻瓜世界，例如年滿１７歲嘅巫師可以去考現影術嘅許可，同齡嘅麻瓜就可以去考汽車嘅駕駛執照；無論喺麻瓜中學定係霍格華茲嘅５年級定係７年級，學生都需要參加校外考試。麻瓜流行文化嘅某啲方面亦都反映喺巫師世界入面，例如係搖滾樂、海報同埋小報。有啲後生嘅巫師同女巫全心全意咁擁抱麻瓜文化，例如係天狼星·布萊克喺後生嗰陣時喺佢屋企自己間房裡面擺滿晒麻瓜靚女、電單車同埋搖滾樂隊嘅相，嚟反抗有偏見又憎麻瓜嘅父母。喺改編自《鳳凰會的密令》嘅戲入面可以聽到麻瓜嘅音樂——喺葛萊分多交誼廳可以聽到麻瓜樂隊普通男孩嘅音樂喺電影背景入面播放。

麻瓜出身或者係混血嘅巫師同女巫傾向於採用麻瓜嘅成長方式，咁樣佢哋更加容易去融入麻瓜社會同埋迎合麻瓜嘅潮流：葛萊分多嘅學生丁·湯瑪斯成日用韋斯咸足球會嘅海報嚟裝飾佢嘅睡房；阿不思·鄧不利多曾經話佢對麻瓜嘅編織圖案同埋保齡球有興趣。

羅琳喺撰寫《哈利波特》之前花咗好多時間嚟確立魔法世界嘅規則同埋極限，佢曾經喺接受採訪嗰時話：「創造一個奇幻世界最重要嘅係決定角色唔可以做啲咩嘢」，例如佢再三咁強調嘅就係魔法並唔可以令人死而復生。喺巫師世界入面，巫師同女巫喺好細個開始就必須要去學點樣去控制同埋去用魔法，佢哋喺童年嗰時好容易喺壓力極大嘅情況下唔經意咁施展咗魔法，就好似哈利俾佩妮姨媽將佢啲頭髮剪到極短之後，佢喺無意間令佢啲頭髮喺一夜之間還原。

大多數嘅魔法都係要透過魔杖嚟施展，每個巫師或者女巫喺佢去買自己嘅魔杖嗰陣時，魔杖會選擇佢嘅主人；魔杖製造者奧利凡德先生曾經同哈利講，若巫師用咗屬於人哋嘅魔杖，咁佢嘅魔法效果就會大打折扣。

血統

巫師世界同麻瓜世界長期分離，搞到有好多巫師同女巫都主張應該保持兩者各自嘅獨立性。有啲巫師認為麻瓜出身嘅巫師愚蠢又信唔過，甚至有部分嘅極端者認為佢哋係低等嘅族群。呢啲極端主義者將巫師或者女巫同麻瓜嘅通婚睇成係異族通婚，仲提倡要保持「純血」。呢個係佛地魔嘅部分意識形態，而布萊克家族會同任何同麻瓜或者混血巫師結婚嘅家庭成員斷絕關係。不過，海格同榮恩都話可能已經無晒「純正血統」喇，因為經過充分調查，所有巫師都可能喺佢哋嘅家族歷史入面搵到一啲同麻瓜嘅血緣。

純血

純血Pure-blood呢個詞適用喺屋企族譜入面完全無麻瓜血統、麻瓜出身嘅人或者係混血嘅巫師同女巫。純血係幾種血統入面最稀有嘅，羅琳曾經指出巫師社區嘅純血巫師同女巫得10%。嚴格嚟講，純血家族並無麻瓜祖先，但係巫師人口比較少搞到「真正嘅」純血極之罕見，有啲巫師同女巫會刻意忽視或者唔承認家族裡面為數唔多嘅麻瓜成員。已經確定嘅純血家族包括有布萊克Black、柯羅奇Crouch、岡特Gaunt（呢個家族喺《神秘的魔法石》開始之前就已經滅絕咗）、雷斯壯Lestrange、隆巴頓Longbottom、馬份Malfoy同埋衛斯理Weasley（不過最新一代有混血嘅成員）。為咗保持佢哋嘅血統純潔，係人都知，一啲種族優越論嘅屋企會通過同表親結婚嚟壯大佢嘅家族，有時會搞到家庭成員精神唔穩定同埋有暴力傾向。岡特家族喺第６輯小說入面就表現出呢兩種傾向。

種族優越論嘅人相信血嘅純度係衡量巫師同女巫魔法能力嘅標準——就算有純熟嘅麻瓜出身女巫嚟做例子——例如係妙麗·格蘭傑同埋莉莉·波特，同埋能力差啲嘅純血巫師──例如係奈威·隆巴頓，不過佢有英勇無畏嘅精神，佢嘅能力喺《死神的聖物》入面體現到出嚟。純血優越論嘅人會用「血腥叛徒Blood Traitors」呢個詞嚟稱呼嗰啲同唔係純血嘅巫師或女巫結婚生仔嘅純血巫師或者女巫。

《哈利波特》系列小說裡面嘅純血巫師同女巫幾乎全部都係種族優越論嘅人，但係其中都有一啲唔提倡血統至上嘅；隆巴頓Longbottom、波特Potter同埋衛斯理Weasley都係古老嘅純血統家族，但係呢啲家族裡面就無已知嘅成員對種族優越論嘅人表示贊同。傳統上純血又支持種族優越論嘅布萊克家族，佢哋似乎每一代都有一兩個咁樣嘅害群之馬，亦都即係天狼星·布萊克同貝拉·雷斯壯仲有水仙·馬份嘅細妹──美黛·東施Andromeda Tonks，佢後嚟嫁咗俾麻瓜出身嘅泰德·東施Ted Tonks，仲做咗小仙女·東施Nymphadora Tonks嘅阿媽。

有啲巫師對純血嘅概念表示完全質疑，阿不思·鄧不利多喺佢後嚟以遺贈方式交俾妙麗·格蘭傑嘅《吟遊詩人皮陀故事集》副本入面，佢嘅註釋指自己認為大肆吹噓嘅血統純潔其實並唔存在，而且呢個只係支持種族優越論嘅巫師為咗呃晒全世界而維持嘅虛構作品。

混血

混血Half-blood呢個詞適用喺屋企族譜入面有結合咗魔法同埋麻瓜祖先血統嘅巫師同女巫。佢哋係最常見嘅巫師血統，佢哋嘅數量超出純血同埋麻瓜出身嘅人好多。羅琳曾經話過，喺霍格華茲嘅年度入學人數裡面，有50%嘅學生都係混血嘅。純血優越論嘅人認為雖然混血巫師同女巫優勝過麻瓜同埋麻瓜出身嘅人，不過仍然唔及純血嘅人優勝。馬份家族係一個蔑視麻瓜嘅有錢純血巫師家族，佢哋試圖去保持血統嘅純潔，但如果發現無啱去結婚嘅純血血統嘅人，佢哋同混血巫師或者女巫結婚都係可以接受嘅選擇。

混血巫師嘅例子：

• 佛地魔係個混血巫師，佢老豆—老湯姆·瑞斗係個麻瓜——佢嘅呢個秘密好少有巫師或者女巫知道；
• 賽佛勒斯·石內卜都係個混血巫師，佢老豆—托比亞·石內卜Tobias Snape係個麻瓜，所以石內卜俾自己嘅綽號做「混血王子Half-blood Prince」；
• 哈利·波特本人亦都係個混血巫師，佢嘅純血阿爸詹姆·波特同麻瓜出身嘅女巫莉莉·伊凡結咗婚，而哈利嘅外公外婆都係麻瓜。

麻瓜出身

麻瓜出身Muggle-born呢個詞適用喺父母都係麻瓜嘅巫師同女巫。羅琳曾經話過，佢哋係巫師血統入面第２種常見嘅類型，大約佔巫師社區嘅25%。佢哋通常被認為係嫁咗俾麻瓜嘅爆竹後裔，而佢哋潛藏嘅魔法基因可能會喺幾代之後先至會重新浮現出嚟。呢個就好似哈利·波特嘅阿媽莉莉·伊凡，同埋哈利嘅好朋友妙麗·格蘭傑都係麻瓜出身。霍格華茲嘅員工喺處理其他巫師家庭嘅細路透過貓頭鷹嚟收霍格華茲嘅錄取通知書唔同，佢哋通常會親手將嗰封信交俾麻瓜出身嘅細路嚟方便同佢哋同學生嘅麻瓜父母會面同解釋。

種族優越論嘅人一般都認為麻瓜出身嘅人唔夠魔法，就算有好似係莉莉·伊凡同埋妙麗·格蘭傑呢啲相反嘅例子，佢哋喺自己嘅魔法能力方面異常咁擅長。種族優越論嘅人會用啲帶有攻擊性嘅貶義詞「麻種Mudblood」嚟指代麻瓜出身嘅人。海格喺聽到跩哥為咗侮辱同埋挑釁妙麗而對佢講咗呢個詞出嚟嗰陣好嬲，因為呢種咁侮辱嘅用詞永遠都唔應該出現喺對話入面。妙麗喺貝拉·雷斯壯因為佢嘅血統而折磨佢之後，妙麗就決定用自豪而唔係羞恥嘅態度嚟重新去用「麻種」呢個詞，嚟到消除呢個詞作為誹謗同埋侮辱人哋嘅用法。

喺佛地魔統治嗰陣，法律要求麻瓜出身嘅人喺桃樂絲·恩不里居領導嘅「麻瓜出身登記委員會Muggle-born Registration Committee」嗰度做登記。神秘部門喺呢段時間就會聲稱麻瓜出身嘅人喺「真正」嘅巫師身上偷咗魔杖同魔法。好似榮恩·衛斯理咁樣嘅其他巫師同女巫並唔認同呢個觀念，仲提出咗質疑：如果魔法真係可以被偷嘅話，咁爆竹就唔會再存在。

恩不里居喺佛地魔倒台之後就被韞wan3住喺阿茲卡班監獄度坐監，「麻瓜出身登記委員會」嘅其他成員唔係被監禁嘅話，就係做咗逃犯。

爆竹

爆竹Squibs呢個詞係指有魔法能力嘅巫師父母所生嘅細路，但係呢啲細路並唔能夠發展佢哋嘅魔法潛能，呢個啱啱好同麻瓜出身嘅巫師同女巫對立。爆竹嘅出世係好罕見嘅：小說裡面提到嘅爆竹有雅各·飛鼠、阿拉貝拉·多琳·費，同埋茉莉·衛斯理做會計師嘅第２個堂表親。魔法部唔要求佢哋註冊做魔法社會嘅成員。爆竹佢哋會同啲巫師分享一啲佢哋意識同理解到巫師世界嘅事。佢哋仲可以睇到一般麻瓜睇唔到嘅嘢，比如係匿埋喺霍格華茲城堡嘅嘢同埋催狂魔。不過，根據榮恩嘅牡丹姨婆所講，啲爆竹通常會被送去麻瓜學校，仲會被鼓勵融入去麻瓜世界，呢個比起佢哋永遠留喺被睇成「下等人」嘅巫師世界仲要「仁慈得多」。對比起麻瓜同麻瓜出身嘅巫師喺巫師世界大部分都被接受甚至被尊重，家族裡面有個爆竹通常被認為係一件「陀衰家」嘅事。

奈威·隆巴頓曾經講過，佢嘅屋企人初頭認為佢係個爆竹，直至佢嘅伯叔祖阿爾吉Algie將佢喺２樓嘅窗掉deu6出去，後尾奈威喺路上面彈咗起身；身為默然者嘅阿不思·鄧不利多細妹阿蕊安娜Ariana亦都曾經被誤認係個爆竹。

混種

混種Mixed species係指嗰啲人類巫師或者女巫同或多或少有人類智慧嘅魔法生物結合嘅產物。

混種嘅人類包括：

• 花兒·戴樂古同埋佢細妹佳兒·戴樂古：佢哋兩個都有1/4嘅迷拉嘅血統；
• 孚立維教授：佢有1/4嘅妖精血統；
• 魯霸·海格同埋歐琳·美心Olympe Maxime：佢哋兩個都係混血巨人。

好似桃樂絲·恩不里居咁樣對佢哋有偏見嘅巫師同女巫成日會用啲侮辱性嘅用詞「雜種half-breed」嚟指混血巫師或女巫同其他唔同物種嘅生物結合而生出嚟嘅巫師或者女巫，嗰啲生物例如係狼人、家庭小精靈、人魚同埋半人馬。嗰個小說系列裡面嘅半人馬更加鍾意離群，鮮有同人類互動。

動物同植物

内文：哈利波特裡面嘅生物同哈利波特裡面嘅生物 § 植物

魔法世界孕育咗好多魔法動植物，其中魔法動物喺民俗傳說同神話入面耳熟能詳，例如係幻形怪、龍、巨人、妖精、獨角獸，而好多有神奇特性嘅魔法植物，例如係：魔蘋果、渾拚柳、魚鰓草同埋艾草...等等。呢啲動植物喺巫師同女巫嘅努力之下喺麻瓜民間傳說入面消失咗，呢啲動植物已經隱藏咗幾個世紀。霍格華茲准佢哋嘅學生帶某啲類型寵物返到學校，例如：貓、貓頭鷹、老鼠同埋蟾蜍。

J·K·羅琳寫咗一本叫做《怪獸與牠們的產地》嘅衍生作品，呢本書係關於呢啲魔法動植物，作為《哈利波特》系列嘅補充資料。呢啲魔法動物喺書裡面被分類做「怪獸」、「靈性生物」同埋「靈魂」。《怪獸與牠們的產地》同埋佢嘅同名電影成日都提到管理怪獸嘅法律。呢本書同任何法律一樣都會隨住時間而變化，而且亦會因國家同地區而唔同。魔法部嘅奇獸管控部所制訂嘅法律一方面係為咗保護佢哋，另一方面係為咗保護巫師同女巫唔好俾啲危險嘅怪獸傷害，仲管理某啲魔法生物嘅擁有權，同埋將佢哋喺麻瓜世界裡面隱藏。喺同名電影入面，當時巫師社會嘅政治形勢全面禁止咗去擁有魔法生物。

地理

内文：哈利波特裡面嘅地點

喺《哈利波特》嘅世界裡面並無獨立嘅「魔法土地」，巫師世界同麻瓜世界喺一齊，而且仲嵌入咗喺裡面。喺英國，唯一完全由巫師人口組成嘅定居點係活米村，啲巫師同女巫通常住喺麻瓜村莊入面由幾個家庭組成嘅小社區入面，例如係鄧不利多同埋波特家族嘅故鄉—高錐客洞，又或者係康和郡。成個家族都係巫師嘅家庭，比如係衛斯理家Weasleys、迪哥里家Diggorys、洛古德家Lovegoods同埋福西特家Fawcetts，佢哋都住喺德雲郡嘅凱奇波區奧特瑞街Ottery St Catchpole嘅麻瓜村落附近。《哈利波特》小說入面好多巫師嘅屋仔係喺遠離城鎮裡面大部分社區嘅郊區嗰度。

同樣，巫師大街係喺倫敦市中心查令十字路口嘅斜角巷。霍格華茲特快列車喺現實中嘅倫敦國王十字車站裡面虛構嘅9¾月台出發來往國王十字車站至活米村站，為咗令到啲麻瓜入唔到去呢啲地方，呢啲地點就被落咗複合保護魔咒，包括咗麻瓜排斥咒同埋迷幻術...等等，除非有巫師或者女巫陪同一齊，如果唔係啲麻瓜就無辦法入到去。《哈利波特》系列入面最廣為人知嘅場景就係霍格華茲城堡，大部分嘅故事情節都喺城堡入面發生。霍格華茲城堡係喺蘇格蘭某個地方。根據《火盃的考驗》嘅形容，霍格華茲城堡係俾無數嘅魔咒保護住，對於行埋去嘅麻瓜嚟講，嗰度只係一個被遺棄嘅廢墟同埋一堆警告牌，而且科技裝置喺嗰度亦都會失靈。例如係蘇格蘭海岸出面嘅德雷爾島，又或者係魁地奇世界盃嘅體育場仲有巫師監獄阿茲卡班呢啲好多嘅魔法地點都係「唔可以喺地圖上面繪製」，又或者喺地圖上面定位唔到。

雖然巫師社會大部分直接同麻瓜生活喺同一個社區，但係自1692年嘅《國際巫師保密法》頒佈以嚟，呢兩個社群之間幾乎係完全無交流。好少有巫師會了解最基本嘅麻瓜文化，例如大部分巫師同女巫都唔了解麻瓜嘅服飾習俗。喺某啲偶爾嘅場合上，如果要求巫師或者女巫著住麻瓜嘅服飾，通常會搞到非常之搞笑嘅結果；而麻瓜亦會自然傾向於忽略啲佢哋解釋唔到同理解唔到嘅嘢嘅影響。

雖然系列故事主要嘅發生地點喺英國，但係有證據表明魔法世界嘅觸手遍佈全世界，《火盃的考驗》入面形容咗魁地奇世界盃嗰度有好多講外語嘅人。有相當數量嘅愛爾蘭巫師同女巫曾經喺霍格華茲讀書仲喺魔法部做嘢，亦都有好多唔同國籍嘅學生喺波巴洞學院Beauxbatons同埋德姆蘭學院Durmstrang讀書，呢啲資訊顯示出巫師世界嘅邊界唔同喺麻瓜世界嘅地緣政治劃分。不過，保加利亞同愛爾蘭等等呢啲國家都有代表佢哋自己參加魁地奇世界盃嘅國家隊——雖然呢啲國家嘅麻瓜並唔知道有呢種比賽。《阿茲卡班嘅逃犯》裡面仲暗示住巫師喺古埃及歷史嘅重要作用，而且可能係現代世界好多歷史奇蹟嘅幕後推手，例如係埃及嘅金字塔同陵墓。

貨幣

華納兄弟倫敦工作室—哈利波特製作巡迴展裡面古靈閣巫師世界銀行嘅電影場景。

英國嘅巫師同女巫一路都用緊一種虛構嘅貨幣系統，呢種貨幣系統淨係用硬幣嚟做記帳單位，呢種貨幣系統係基於３種類型嘅硬幣，呢啲硬幣會因為佢哋嘅特徵而有佢哋嘅名，按照價值遞減嘅順序分別係：金加隆Gold Galleon、銀西可Silver Sickle，同埋銅納特Bronze-Knut。巫師銀行會幫攞住麻瓜貨幣嘅人去提供貨幣兌換嘅服務。《哈利波特》系列中唯一出現提供呢個服務嘅銀行係喺斜角巷嘅古靈閣銀行，嗰度有幾百個保險庫。帳戶嘅持有人可以用呢啲保險庫嚟擺任何佢哋想保管嘅嘢。海格曾經話巫師擁有呢間「唯一」嘅銀行，可以用嚟擺貴重或敏感嘅嘢，佢仲認為古靈閣係除咗霍格華茲以外最安全嘅地方。

古靈閣嘅有啲員工駐紮喺英國以外嘅國家，仲負責回收啲寶物嚟俾銀行去用。比爾·衛斯理喺成個系列裡面被介紹做呢種員工，佢喺埃及做破咒員Curse Breaker，仲喺古墓入面攞啲財富出嚟。

硬幣

英國嘅巫師世界有３種硬幣，呢３種硬幣入面最大面值嘅係加隆Galleon，呢款硬幣有金色圓形嘅外形，佢比其他硬幣大啲，硬幣嘅邊緣刻咗一組標誌住負責鑄造硬幣妖精嘅序號。根據《神秘的魔法石》，１個金加隆兌到１７個銀西可，而１個銀西可就兌到２９個銅納特。

根據《Pottermore》，巫師世界從來都未改變過佢哋嘅度量衡制度（即係英尺>米、盎司>克、磅>公斤...等），佢哋可以用魔法嚟換算。

匯率

J·K·羅琳喺2001年嘅訪問入面透露，１個金加隆大約係£５英鎊（當時嘅匯率約係$7.50美金或者係€5.50歐元）。

《怪獸與牠們的產地》為慈善事業而籌得嘅£1.74億英鎊，相當於34,000,872個金加隆，同14個銀西可仲有７個銅納特。呢個意味住１個金加隆相當於£5.12英鎊，不過呢本書嘅封面價錢係£2.50英鎊（$3.99美金），可以兌換做14個銀西可同埋３個銅納特。推測佢嘅匯率係£3.01英鎊，又或者係向麻瓜買家提供咗41%嘅折頭。

１個銅納特	１個銀西可	１個金加隆
１個銅納特	29個銅納特	493個銅納特
0.03448...個銀西可	１個銀西可	17個銀西可
0.002028...個金加隆	0.05882...個金加隆	１個金加隆
大約１個英國便士	大約２９個英國便士	大約５個５磅
大約1.5個1美分	大約44個50美分	大約$7.50美金

交通

現影術

内文：哈利波特裡面嘅魔咒 § 現影術同消影術

巫師同女巫成日都會利用現影術嚟去到佢哋嘅目的地，呢樣嘢同電子傳輸非常之似。現影術係一件相當之難嘅嘢，就好似麻瓜嘅駕駛考試一樣，有好多巫師同女巫嘗試過現影術失敗嘅例子。嗰個巫師同女巫如果唔係將現影術用得啱嘅話，佢哋可能會喺呢個過程裡面無咗佢哋身體嘅一部分，呢個過程就叫做「肢體異位被分裂」。榮恩喺《死神的聖物》入面俾食死人牙克厲捉住之後被分裂，妙麗後嚟用佢嘅手袋裡面嗰支白鮮Dittany嘅精華液嚟醫返好佢，治療嘅過程需要幾日嘅時間。

曾經係魔法執法部負責人嘅卜·奧格登Bob Ogden喺佢俾魔佛羅·岡特同埋佢個仔魔份襲擊之後，奧格登用現影術返番去佢嘅總部，帶埋更加多嘅巫師警察返去制伏犯咗法嘅人。

交通工具

内文：哈利波特裡面嘅魔法物品 § 交通工具

喺成個《哈利波特》嘅小說同電影系列入面，好多角色都用各種嘅魔法裝置同埋人工製品嚟幫自己喺魔法世界同麻瓜世界之間穿梭。呢啲嘢裡面最常見嘅例如係飛天掃把、飛天汽車、一種用魔法嚟互相連接嘅壁爐網絡嘅呼嚕網、騎士巴士，仲有霍格華茲特快列車。某啲角色係人都知會施展魔法落去啲麻瓜私家車嗰度，令到嗰啲私家車有啲神奇嘅功能，就好似衛斯理先生嘅飛天汽車，又或者係天狼星·布萊克嘅魔法電單車咁樣。

喺《火盃的考驗》入面，圍繞住進口飛毯嘅政治討論仲喺度進行緊。

港口鑰

内文：哈利波特裡面嘅魔法物品 § 港口鑰

如果巫師或者女巫用唔到現影術嘅話，無論係因為佢哋做唔到，定係因為佢哋同行嘅人裡面有一個未成年嘅巫師或者女巫，咁佢哋就可以用港口鑰Portkeys。港口鑰幾乎可以係任何嘅嘢，嗰啲嘢通常係麻瓜好容易會忽略嘅平凡日常用品，例如係好似垃圾咁樣嘅嘢，好似係錫罐或者係舊襪。如果巫師或者女巫要用港口鑰嘅話，佢哋只要利用咒語「港口現Portus」就可以做到。只要使用嘅人喺要行嗰陣時揸住嗰樣嘢，嗰樣嘢就可以將使用佢嘅人帶到去目的地。

港口鑰可以同時傳送幾個人，就好似喺《火盃的考驗》入面，哈利、妙麗、衛斯理一家同埋迪哥里一家去欣賞魁地奇世界盃嗰陣時咁樣。

騎士墮鬼馬

内文：哈利波特裡面嘅生物 § 騎士墮鬼馬

騎士墮鬼馬係一種黑色有翼而且瘦骨嶙峋嘅馬類動物，淨係得親眼睇過死亡嘅人先至可以睇到佢哋。佢哋可以被馴服同埋去騎住坐，佢哋負責拉住來往霍格華茲同活米村站嘅馬車。

呢種運輸方式用喺《鳳凰會的密令》嗰陣時，當時鄧不利多的軍隊嘅成員需要去魔法部嚟諗辦法去營救天狼星·布萊克；喺《死神的聖物》嗰陣時，佢哋亦都用嚟將哈利喺小惠因區嘅德思禮家嗰度送到去衛斯理一家嘅洞穴屋。

其他已知嘅魔法雀仔都可以用嚟飛，例如哈利、榮恩、金妮同埋洛哈教授喺《消失的密室》入面得到鳳凰佛客使去營救；哈利、妙麗同天狼星喺《阿茲卡班的逃犯》就騎住巴嘴走甩。

通訊

呼嚕網

内文：哈利波特裡面嘅魔法物品 § 呼嚕粉

呼嚕網Floo Network係由幾個以上嘅壁爐形成嘅網絡，呢啲壁爐除咗主要用嚟運輸之外，偶爾亦可以用嚟通訊。巫師同女巫可以點著一執Zap1呼嚕粉然後掉Deu6落去同呼嚕網相連嘅壁爐裡面啲火度，然後將佢哋個頭伸入去啲火焰嗰度嚟出現喺佢哋諗住傾計嘅巫師或者女巫嘅壁爐入面。呢個情況就好似喺《火盃的考驗》入面，阿默·迪哥里個頭喺壁爐嗰度同茉莉·衛斯理傾計咁樣；天狼星·布萊克喺嗰個系列裡面亦好多次用咁樣嚟同哈利去溝通。

貓頭鷹

貓頭鷹喺巫師世界入面係作為郵政服務嘅代替品，用嚟派信同埋報紙。截至而家為止，貓頭鷹仍然係巫師世界入面最流行嘅通訊方式。貓頭鷹可以用嚟運送包裹，幾隻貓頭鷹可以一致咁行動嚟運送啲再重啲嘅包裹。如果貓頭鷹要交付一啲例如係報紙呢啲要俾錢嘅嘢，收件人通常會將嗰啲錢擺喺綁住喺貓頭鷹隻腳上面嘅一個細袋仔裡面。呢方面唔單止可以用貓頭鷹，天狼星·布萊克有次用咗一種熱帶鳥類嚟做呢樣嘢，佢可能用咗金剛鸚鵡。魔法部裡面有個部門負責管理貓頭鷹郵件。

貓頭鷹對於點樣搵到佢哋嘅收件人並無具體嘅說明，喺某啲情況下，喺佢哋身上嘅信上面會有極其明確嘅地址（指定建築物裡面嘅房間或者位置）。其他時候就唔使提到地址，只要話俾隻貓頭鷹知道將封信交俾邊個就得。魔法部喺以前成日利用貓頭鷹喺魔法部大樓裡面去傳遞辦公室之間嘅郵件，不過根據衛斯理先生嘅講法，嗰個情況澩laau2嫪gaau6到無人信。另外，雖然貓頭鷹被形容成直接飛向包裹嘅收件人，但係有暗示指貓頭鷹嘅交通係可以被監控甚至係被中斷。小說裡面有幾個地方提到「被監視嘅貓頭鷹」，因為哈利隻雪鴞──嘿美據講會引起太多嘅關注，所以哈利喺故事裡面會用唔同嘅貓頭鷹嚟同佢嘅契爺天狼星去交流。嘿美有一次喺被攔截同搜查之後受咗傷（據講係由桃樂絲·恩不里居造成）。

而家，魔法部裡面會用到魔法備忘錄去傳訊息，呢種工具會好似紙飛機一樣喺成座魔法部大樓入面飛，而唔會再係貓頭鷹。

護法咒

内文：哈利波特裡面嘅魔咒 § 護法咒

護法咒Patronus主要係用嚟打走催狂魔，同埋亦都係唯一已知能夠趕得走吸魂衣Lethifolds嘅方法。

護法咒亦都可以俾有經驗嘅巫師同女巫用嚟做交流。鄧不利多設計同發明咗一種用護法咒嚟傳遞聲音訊息嘅通訊方式，仲將呢樣嘢專門俾鳳凰會成員去用，呢個比起用貓頭鷹或者呼嚕網嚟得更加安全，而且又唔會受到魔法部嘅監控。鄧不利多、麥教授、金利·俠鉤帽同埋亞瑟·衛斯理喺成個系列裡面都透過護法咒嚟傳遞訊息。麥教授亦都係嗰個系列入面唯一一個有能力可以同時施展出幾個護法咒嚟分別發出幾個訊息俾唔同對象嘅角色。賽佛勒斯·石內卜喺《死神的聖物》入面利用佢自己嘅護法咒嚟將哈利引領去隱藏喺森林水池裡面嘅葛萊分多寶劍。

黑魔法通訊

内文：哈利波特裡面嘅魔咒 § 黑魔法

黑魔王佛地魔同佢嘅食死人都會去用一種叫做黑魔標記Dark Mark嘅方式嚟做交流，呢個就好似食死人前臂內側嘅烙印一樣。當㩒落去呢種標記嗰時，咁樣就會搞到所有其他食死人嘅黑魔標記滾熱辣起上嚟仲向佢哋發出信號，佛地魔本人同埋其他食死人就會去接觸，佢哋跟住就可以喺任何地方用消影術，然後再用現影術嚟即刻出現喺佛地魔身邊。嗰啲追隨佛地魔嘅人認為黑魔標記係非常之重要嘅嘢，而呢種特權只限於嗰啲純血嘅巫師同埋女巫，佢哋有啲人認為可以擁有到一個係件「好好彩」嘅事。據講兇狠嘅狼人焚銳·灰背唔准去有黑魔標記，呢個好可能係因為佢係個狼人嘅身份。

妙麗喺《鳳凰會的密令》裡面利用咗黑魔標記嘅原理嚟整屬於鄧不利多的軍隊成員嘅硬幣，不過佢並唔係將個訊息燒／烙印喺嗰個組織成員嘅皮膚上面，而係利用呢樣嘢嚟模仿做假加隆，仲硬幣嘅邊緣上面帶住啲訊息。後嚟跩哥·馬份同埋受到蠻橫咒操控嘅羅梅塔夫人Madam Rosmerta就利用呢種假加隆嚟互相聯繫。

其他交流方式

除咗妙麗幫鄧不利多的軍隊整嘅嗰啲魔法假加隆之外，小說同電影入面仲有其他嘅交流方式。巫師肖像主題嘅油畫成日用喺佢哋嘅肖像懸掛地點之間嚟傳遞訊息。霍格華茲嘅前校長兼布萊克家族成員斐尼亞·奈傑勒斯·布萊克Phineas Nigellus Black嘅畫像被用嚟做鄧不利多嘅辦公室同古里某街12號嘅另一幅畫像之間傳遞訊息。喺《死神的聖物》嗰陣，妙麗喺古里某街12號就將斐尼亞嘅幅畫帶走咗，仲利用嗰幅畫嚟攞到有關霍格華茲事件嘅訊息。當亞瑟·衛斯理喺魔法部俾娜吉妮襲擊嗰時，鄧不利多仲用類似嘅方式嚟聯絡另外兩個前校長。喺《混血王子的背叛》嘅開場入面仲可以睇到一幅帶住魔法部部長同麻瓜首相之間訊息嘅畫像。

喺小說同電影入面用嘅另一種閉路通信方式仲有一組屬於天狼星·布萊克同埋詹姆·波特後生嗰陣時各自持有嘅雙面鏡嚟方便佢哋兩個喺唔同地方嘅時候可以互相去傾計。天狼星後嚟喺《鳳凰會的密令》入面將屬於佢嘅嗰塊雙面鏡交咗俾哈利，上面有一張紙條向哈利解釋話，天狼星同詹姆喺以前被單獨拘留嗰陣時成日利用嗰塊鏡嚟互相傾計。喺《死神的聖物》入面，哈利喺馬份莊園利用佢自己掟爛咗嘅雙面鏡碎片嚟搵幫手，後來佢發現阿波佛·鄧不利多一直喺度用緊喺蒙當葛·弗列契嗰度攞到屬於天狼星嘅嗰面鏡嚟睇住哈利，不過哈利就一直都唔想用呢塊鏡。

當亞瑟·衛斯理帶哈利去到魔法部嗰時，佢解釋指喺魔法部裡面用嘅嗰啲紙飛機佢哋叫嗰樣嘢做「跨部門備忘錄」取代咗貓頭鷹嚟盡量減少混亂嘅情況。呢啲紙飛機嘅機翼邊緣帶有啲呈淡紫色嘅魔法部字樣印章。喺《阿茲卡班的逃犯》嘅電影版裡面出現咗呢種交流方式嘅一種變體，跩哥·馬份當時喺課堂上用飛紙鶴嘅形式嚟同哈利傳紙仔。

媒體

喺《哈利波特》嘅巫師世界入面，巫師同女巫透過巫師報章、雜誌同電台嚟攞到最新嘅資訊。小說同電影系列裡面嘅主要媒體係《預言家日報》同埋《謬論家》。

預言家日報

内文：預言家日報

《預言家日報The Daily Prophet》係英國巫師社會最大嘅日報，但係就無乜新聞誠信，佢哋更加關心銷量而唔係事實，仲成日做咗魔法部嘅喉舌。就好似麗塔·史譏所講，「《預言家日報》嘅存在係為咗推銷佢自己！」

《預言家日報》後嚟仲推出咗晚報版本嘅《預言家晚報The Evening Prophet》，亦都有周末版本嘅《周日預言家The Sunday Prophet》。

謬論家

内文：謬論家

《謬論家The Quibbler》係《鳳凰會的密令》裡面第１次提到嘅巫師雜誌，呢本雜誌用陰謀論同奇獸學嚟做主題，總編輯係露娜·羅古德嘅阿爸—贊諾·羅古德Xenophilius Lovegood。

其他出版物

• 《實用魔藥大師The Practical Potioneer》：呢本雜誌只係喺《混血王子的背叛》裡面被提到過，阿不思·鄧不利多曾經喺嗰本刊物發表論文。
• 《今日變形學Transfiguration Today》：呢本雜誌係學術性刊物，阿不思·鄧不利多後生嗰陣曾經喺嗰本刊物發表過論文。
• 《女巫周刊Witch Weekly》：呢本雜誌嘅讀者多數係女巫，報導嘅內容偏向啲小測驗、食譜或者係名人新聞。呢本周刊曾經刊登過麗塔·史譏嘅八卦嘢。

巫師電台

巫師世界入面最受歡迎嘅廣播電台係簡稱做「WWN」嘅巫師無線電聯播Wizarding Wireless Network，哈利喺收聽WWN嘅同齡朋友嗰度認識到流行嘅巫師樂隊怪姊妹The Weird Sisters。喺《混血王子的背叛》裡面，哈利喺衛斯理家一齊過聖誕節，衛斯理一家喺網絡上去聽瑟莉堤娜·華蓓Celestina Warbeck嘅巫師電台節目。

有啲魔法收音機係基於閥門開關嚟運作嘅，但係佢哋並唔係好似麻瓜裝置咁樣並排嚟擺嘅，而是透過將一個個閥門裝嵌喺另一個來建構。呢個可能暗示住一種類似於七極或八極線路超外差嘅解調技術，但係其中包括咗功率級嘅驅動喇叭。

喺《死神的聖物》入面，巫師電台同其餘媒體一樣都受佛地魔嘅勢力控制，榮恩喺呢輯小說裡面向哈利同妙麗推薦咗一個巫師電台節目—《波特觀察Potterwatch》，嗰個係一個由李·喬丹主持嘅一個反佛地魔嘅巫師地下電台節目，呢個電台節目需要暗號先至可以收聽到。哈利三人組收聽嘅呢個節目以鳳凰會嘅唔同成員嚟做主題，呢個電台節目仲支持住哈利·波特同埋鳳凰會。

體育同遊戲

内文：魁地奇同哈利波特裡面嘅魔法物品 § 遊戲

喺魔法世界同埋成個《哈利波特》系列入面，巫師世界的體育項目──特別係魁地奇Quidditch扮演住重要嘅角色。魁地奇係一種利用飛天掃把喺天空度進行嘅球類團隊運動，佢嘅受歡迎程度就同麻瓜世界入面嘅足球比賽一樣。世界各地嘅巫師同女巫都用類似足球嘅方式狂熱咁追隨住魁地奇呢樣運動，而魁地奇世界盃喺巫師年曆上面嘅一項４年一次嘅大賽。

霍格華茲嘅４大學院都各自有一隊佢哋嘅魁地奇球隊，喺哈利去到霍格華茲讀咗一年級之後無幾耐，佢就有機會加入葛萊分多學院嘅魁地奇球隊做負責去搵同捉住金探子嘅搜捕手，嚟證明自己係個天才魁地奇球員。佢喺魁地奇球場上嘅活動喺幾輯小說裡面佔咗一席位。比哈利大兩歲嘅李·喬丹直至畢業之前都喺霍格華茲嘅各項魁地奇比賽入面做評述員。除咗第７輯嘅小說之外，呢項運動都會出現喺嗰個系列嘅每一輯故事入面。因為霍格華茲需要用場地嚟舉行三巫鬥法大賽，搞到學校裡面嘅第４屆魁地奇校內比賽被取消咗，不過哈利就利用衛斯理一家嘅家屬身份去欣賞魁地奇世界盃嘅賽事。

其他巫師遊戲同埋運動包括咗一種會爆炸嘅紙牌遊戲—爆炸牌Exploding Snap、 一種彈珠遊戲版本嘅多多石Gobstones，同埋啲棋子會有意識仲會喺玩家嘅指揮下去郁動嘅棋盤遊戲—巫師棋Wizard chess。巫師世界亦都有好多其他巫師公眾體育嘅舉辦場地，例如係嗰個嚟自蘇格蘭嘅掃把遊戲頭頂大釜Creaothceann，玩家喺裡面就要用綁喺頭上面嘅釜嚟接住啲石頭，不過呢個遊戲而家已經被禁止咗；而魁地撲Quodpot係一種喺美國興起嘅遊戲，裡面涉及用到掃把同埋一個會爆炸嘅快浮Quaffle嘅球類比賽。

教育

内文：霍格華茲魔法與巫術學院

點著支魔杖

入學前

喺巫師世界入面，接受魔法教育似乎係冇官方嘅前身；好明顯，作為巫師同女巫嘅父母會將一啲例如係識字同算術呢啲基本非魔法主題嘅生活技能喺屋企教俾佢哋嘅仔女。不過，英國嘅巫師世界並唔存在有義務教育嘅法律，麻瓜出身嘅巫師同女巫（或者由麻瓜養育嘅巫師同女巫）喺入讀霍格華茲之前好明顯係曾經接受普通嘅麻瓜初級教育，呢個可以被睇成係一種認知嘅優勢或者劣勢。巫師父母可以繼續俾佢哋嘅仔女喺屋企上堂，或者將佢哋送去霍格華茲，又或者將佢哋送去喺海外嘅其他魔法學校。不過，喺佛地魔推翻魔法部嘅嗰段期間裡面，去霍格華茲返學係強制性嘅，咁樣佛地魔嘅追隨者就可以完全咁控制住啲青少年巫師。

畢業後

喺完成咗霍格華茲嘅教育之後，巫師世界係無標準嘅巫師高等教育，亦都無出名嘅巫師大學。

考試成功通過嘅霍格華茲學生被認為係已經準備好去好似成年人咁去返工做嘢，不過有啲巫師專業確實係需要喺完成霍格華茲嘅學業之後再去完成為期幾年嘅特殊培訓計劃，包括正氣師同埋治療師魔法世界嘅醫生。有啲後生嘅巫師同女巫會喺畢業之後去環遊世界嚟「去觀察外國巫師」。艾飛·道奇喺向佢朋友鄧不利多形容咗佢哋嘅環遊世界計劃係點樣之後，佢因為後者嘅阿媽過咗身而中斷咗；同樣，奎若教授喺慶祝佢嘅學術生涯之後，亦都抽時間嚟去得到第一手嘅經驗。

巫師考試

巫師考試管理局The Wizarding Examinations Authority係負責去考核魔法學校５年級嘅普等試O.W.L.s，同埋７七年級超勞巫測N.E.W.T.s嘅機構。呢啲考試同英國、威爾斯仲有北愛爾蘭嘅麻瓜世界學校裡面嘅GCSE同埋A-Level相關。巫師考試管理局嘅負責人係溫順·馬治邦Griselda Marchbanks係一位異常咁年長嘅女巫，佢曾經喺鄧不利多應考超勞巫測嗰時幫佢監考。

考試分級：

• 普等試O.W.L.s：呢個考試嘅全名係普通巫術等級考試Ordinary Wizarding Levels，呢個考試係霍格華茲嘅５年級學生需要去考嘅巫師考試。普等試係由巫師考試管理局去主持，影響住學生喺畢業之後嘅工作資格。
• 超勞試N.E.W.T.s：呢個考試嘅全名係超級疲勞轟炸巫術考試Nastily Exhausting Wizarding Tests，呢個考試係霍格華茲嘅７七年級學生需要去考嘅巫師考試。超勞巫測係巫師同女巫喺學業生涯裡面最後嘅考試，用嚟評估佢哋有資格從事邊一方面專門嘅工作。

妙麗喺《死神的聖物》嘅事件完咗之後返番去霍格華茲去考N.E.W.T.s，而哈利同榮恩就只係考過O.W.L.s而無去考N.E.W.T.s。就算哈利係無考過N.E.W.T.s，佢仍然喺未來做咗魔法執法部嘅主管。

評級

評級	評級	備註
O	傑出Outstanding	有可能係最高嘅等級
E	超乎期待Exceeds Expectations	高過平均水平
A	可接受Acceptable	平均（最低嘅合格成績）
P	不佳Poor	唔合格嘅評級
D	糟糕Dreadful	最低嘅普通等級（唔合格嘅評級）
T	山怪Troll	極低等級

其他已知嘅海外魔法學校

内文：哈利波特裡面嘅魔法學校

喺英國海外嘅已知嘅魔法學校包括：

• 波巴洞魔法與巫術學院（法國）
• 卡斯特羅布舍（巴西）
• 德姆蘭學院（北歐）
• 伊法魔尼魔法與巫術學院（北美）
• 魔法所（日本）
• 瓦加杜（非洲）

飲食

巫師世界裡面都會好似麻瓜世界咁樣有好多唔同種類嘅零食同飲品，有啲係巫師世界裡面獨有同埋比較出名嘅，包括：魔法糖果、紫羅蘭水、南瓜汁，同埋大個啲嘅巫師同女巫先至可以飲嘅牛油啤酒同埋火燒威士忌。

魔法糖果

内文：哈利波特裡面嘅魔法物品 § 魔法糖果、哈利波特裡面嘅地點 § 蜂蜜公爵糖果店同衛氏巫師法寶店 § 魔法糖果

小說同電影裡面提到嘅甜嘅零食，入面有啲小食有奇異嘅副作用，特別係由弗雷同喬治·衛斯理創造出嚟嘅嗰啲。大多數魔法糖果都可以喺活米村嘅蜂蜜公爵糖果店，又或者喺霍格華茲特快列車上面嘅糖果手推車上面搵得到。鄧不利多似乎偏偏鍾意呢啲零食，因為佢成日用零食嘅名嚟去做密碼。

另外，喺小說同電影入面，柏蒂全口味豆Bertie Bott's Every-Flavour Beans同埋衛氏巫師法寶店嘅速效逃課糖Skiving Snackbox喺巫師世界裡面係好出名嘅糖，仲有呢啲好多嘅糖果喺現實世界都係由Jelly Belly生產。自從2001年以嚟，柏蒂全口味豆除咗正常嘅味道之外，Jelly Belly仲生產咗小說同電影裡面提到嘅奇怪口味。

朱古力蛙

内文：哈利波特裡面嘅魔法物品 § 朱古力蛙

朱古力蛙Chocolate Frog係巫師世界裡面一種受歡迎嘅魔法糖果。每個包裝都附有一張朱古力蛙嘅卡，裡面展示咗中世紀去到現代出名嘅巫師或者女巫嘅魔法相仲有簡介，包括咗梅林、鄧不利多、尼樂·勒梅Nicolas Flamel，同埋霍格華茲嘅４位創辦人...等等。盒裡面有一隻朱古力蛙，佢喺霍格華茲特快列車上面淨係得一次可以跳出去逃生嘅機會...。

紫羅蘭水

紫羅蘭水Gillywater係一種喺哈利波特世界裡面有得賣嘅飲品。麥教授喺《阿茲卡班的逃犯》入面飲過呢種飲品，而露娜·羅古德喺《鳳凰會的密令》亦都飲過呢款飲品。

南瓜汁

南瓜汁Pumpkin juice係巫師世界同埋霍格華茲學生受歡迎嘅凍飲。呢種飲品可以喺任何場合度飲用，例如早餐、午餐、宴會或者係其他場合。南瓜汁似乎等同於麻瓜世界入面柳橙汁嘅角色。南瓜汁好容易就可以買得到，亦都可以喺霍格華茲特快列車上面買得到。

南瓜汁係繼牛油啤酒之後成為主題公園環球影城哈利波特魔法世界嘅特色飲品。根據《紐約時報》嘅尼爾·根茲林格Neil Genzlinger嘅評論話：「南瓜汁比起主題樂園裡面嘅牛油啤酒得意好多裝喺一個可愛嘅南瓜頂嘅樽裡面嘅，或者係因為實際嘅南瓜似乎好少——佢仲似係一款入面放咗個南瓜仔嘅活潑蘋果酒。」

牛油啤酒

牛油啤酒Butterbeer係年輕嘅巫師同女巫首選嘅飲品。哈利喺《阿茲卡班的逃犯》裡面先至試到呢款飲品。雖然啲家庭小精靈會因為牛油啤酒裡面嘅酒精含量而醉到冧咗，不過呢樣嘢對巫師同女巫嘅影響係微乎其微嘅。羅琳喺接受《Bon Appétit》雜誌採訪嗰時話，佢會想像呢樣嘢係「嗒dep1落去有啲似唔會好膩nau6嘅奶油糖」。牛油啤酒可以凍飲又或者熱飲，但無論以咩方式去飲都好，呢款飲品都有令人覺得溫暖嘅效果。

火焰威士忌

火焰威士忌Firewhisky係一種酒精類飲品，１７歲以下嘅巫師同女巫唔准飲，不過呢個規定並唔係成日都被遵守。火焰威士忌被形容做飲嘅人喺飲呢款嘢飲嗰陣時會燒傷佢哋喉嚨嘅一種飲品。呢款飲品可以被睇成係一種非常之濃烈嘅威士忌，而且喺各方面嚟講都係咁樣用。

當瘋眼穆敵喺《死神的聖物》入面最後嘅飛行入面過身嗰陣時，一眾嘅角色飲咗呢樣嘢嚟減輕佢哋嘅震驚仲為佢嘅生命而乾杯。海格都飲咗佢，不過佢嘅容量仲要大得多。

政府同政治

魔法部

内文：魔法部

魔法部M.o.M.係英國巫師界嘅政府機關，嗰個政府喺《神秘的魔法石》裡面第１次被提到，呢個機構對巫師世界做咗唔同方面嘅管制，仲制定咗唔少嘅法律同規則。魔法部最高級嘅官員叫做魔法部部長，康尼留斯·夫子係第１個出現喺小說裡面嘅魔法部部長。

魔法部呢個機構直至《鳳凰會的密令》先至出現，佢嘅名聲隨住小說同電影情節嘅進展而變得越嚟越腐敗，仲喺佛地魔崛起嗰陣去到最低點。已知嘅魔法部部長包括咗小說開始之前嘅米莉森‧巴格諾，仲有康尼留斯·夫子、盧夫·昆爵、俾佛地魔利用蠻橫咒嚟間接控制嘅派厄思·希克尼，同埋金利·俠鉤帽。

根據J‧K‧羅琳嘅《北美魔法史》，美國巫師界嘅政府機關係喺1693年成立嘅美國魔法國會MACUSA，佢哋嘅最高級官員係美國魔法國會主席。

國際關係

世界上嘅巫師政府喺某種程度上由國際巫師聯合會International Confederation of Wizards嚟團結。呢個組織主要係為咗執行《國際巫師保密法》而孭咗好多責任，佢哋參考咗魔法部嘅國際魔法交流合作部，仲有好似係國際魔法交易標準機構、國際魔法辦公室、國際巫師聯合會同埋國際魁地奇協會...等等嘅各種國際機構。 呢個就好似喺《火盃的考驗》裡面嘅魁地奇世界盃所形容嘅咁，愛爾蘭同埋保加利亞嘅巫師可能仲有嚟自其他國家嘅巫師能夠感受到強烈嘅民族自豪感，仲非常之渴望佢哋嘅國家贏到──就算愛爾蘭同保加利亞嘅麻瓜喺呢兩個國家佔咗大部分人口都好，但係佢哋並無意識到魁地奇世界盃正喺度舉行緊。呢啲小說入面並冇提到麻瓜政府之間嘅緊張局勢同埋戰爭（例如世界大戰或者冷戰）有幾大程度上影響咗各自巫師政府之間嘅關係。不過，羅琳曾經強烈暗示過，黑巫師蓋勒·葛林戴華德嘅崛起同埋佢喺1945年俾鄧不利多打低咗都同第三帝國嘅興衰有關。

同麻瓜嘅關係

根據1692年國際巫師聯合會保密法International Statute of Secrecy嘅法律規定，巫師世界同麻瓜世界被分隔開，大部分魔法物品對麻瓜嚟講係隱藏睇唔到嘅。麻瓜通常對巫師世界嘅嘢一無所知。以英國嚟講，魔法事件喺麻瓜世界出現嗰時，魔法部會有個部門去施展記憶咒Memory Charm嚟善後；另一方面，巫師世界裡面嘅巫師同女巫對麻瓜世界嘅嘢所知甚少，當佢哋無得唔試圖去假扮成麻瓜嚟入去麻瓜世界，仲「冒險」行到去正常嘅街道上面嗰陣時，往往都會發生幽默搞笑嘅事。喺巫師世界入面，佢哋對麻瓜術語「電話telephone」、「自動扶手電梯escalator」、「水管工plumber」、「手槍firearms」或者「警察policeman」呢啲常見嘅錯誤發音分別係「fellytone」、「escapator」、「pumble」、「firelegs」同埋「please-men」。

魔法部會向麻瓜施展記憶咒嚟將巫師世界嘅嘢保密。不過，有啲麻瓜同魔法世界有啲互動，而巫師同女巫嘅麻瓜親屬係少數知道巫師世界存在嘅麻瓜，例如例妙麗嘅麻瓜父母，同埋哈利·波特嘅親戚—德思禮一家。除咗麻瓜出身嘅巫師家庭之外，仲有混血嘅巫師家庭。西莫·斐尼干嘅阿媽係個女巫，佢喺結咗婚之後先至話俾佢嘅麻瓜老公知道佢自己嘅魔法能力。

霍格華茲裡面設有麻瓜研究嘅呢一科。

唔清楚兩個世界之間嘅財務關係，不過可以將麻瓜嘅貨幣唱做巫師嘅貨幣。

政策

哈利喺《阿茲卡班的逃犯》入面寫咗一篇關於中世紀獵巫嘅文章，呢個係《國際巫師保密法》嘅成立同埋巫師世界匿埋避咗麻瓜嘅原因。鄧不利多喺《吟遊詩人皮陀故事集》裡面嘅每篇故事之後寫低筆記，記低咗唔希望細路仔接觸到親麻瓜意識形態嘅巫師點樣去修改故事嘅內容。

喺《怪獸與牠們的產地》顯示，世界各地嘅巫師政府同麻瓜嘅關係都唔同，甚至可能好似其他政策咁樣隨住時間而有啲變化。紐特·斯卡曼德喺電影入面認為美國嘅麻瓜法律「相當落後」，仲指出美國巫師被禁止同麻瓜去接觸。

英國巫師界同麻瓜世界嘅唯一官方聯繫渠道就係魔法部部長同埋英國首相，魔法部部長會向每一任嘅麻瓜首相話俾佢哋知巫師世界嘅存在。

外部連結

• Wikia有關於呢個主題嘅wiki喺Harry Potter（英文）
• Pottermore（页面存档备份，存于）（英文）
• 魔法世界官網（页面存档备份，存于）（英文）
• 哈利波特電影（页面存档备份，存于），華納兄弟官網（英文）