第7屆香港區議會選舉

2023年香港區議會選舉，係香港主權移交後第7屆區議會選舉，定喺2023年12月10日舉行，呢次選舉總共選出470個區議員議席，其中有88個直選議席、176個間選議席、179個委任議席同埋27個當然議席。呢場選舉普遍被視為係一場繼2021年香港立法會選舉後，又一次由中國共產黨操控嘅一場表演性選舉。

2023年香港區議會選舉

2023年12月10號

直選議席：88席；間選議席：176席 委任議席：179席；當然議席：27席 總共議席：470席   第一大黨 第二大黨 第三大黨   領袖 李慧琼 羅健熙 廖成利 政黨 民建聯 民主黨 民協 政黨聯盟 親中派 民主派 民主派 代表選區 土瓜灣北 利東二（喺2021年7月辭職） 彩雲東 上屆結果 21席，16.78% 91席，12.36% 19席，2.63% 選前議席 21席 7席 6席   第四大黨 第五大黨 第六大黨   領袖 吳秋北 張宇人 盧偉國 政黨 工聯會 自由黨 經民聯 政黨聯盟 親中派 親中派 親中派 上屆結果 5席，4.39% 5席，0.94% 3席，2.27% 選前議席 5 5 3（民選）

呢場選舉係中共喺2019年香港區議會選舉民主派贏到開巷同親中派輸到甩褲之後輸打贏要，未經香港人同意或者事先諮詢，就強行顛覆香港選舉制度，大幅度削減區議會直選議席數目同比例，恢復返已經廢除咗嘅委任議席，同時將政治審查制度化之後嘅第一次區議會選舉。而且由於呢次選舉剝奪咗香港選民嘅真正選擇權，再加上大量政治異見人士因為遭到港版國安法嘅迫害而坐緊監。因此大部分民主派都杯葛呢場選舉，所以呢次亦係首次有主要政治派系明言唔參加嘅香港區議會換屆選舉。

背景

2021年5月，港共政府強行通過《2021年公職（參選及任職）（雜項修訂）條例》，強逼區議會議員作出宣誓。法案通過前，幾十個民主派區議員因為拒絕宣誓而辭職。

2021年7月初，有傳港共政府考慮禁止230個議員宣誓就職，並且強逼佢哋交出自2020年就職以嚟嘅議員袍金同津貼，每人大約一百萬，觸發260幾個民主派區議員大規模辭職，同時有八個區議員因為受到政治迫害或者流亡海外而被強行剝奪議員資格。港共政府強逼區議員分區宣誓，2021年10月完成四場宣誓之後，港共政府喺冇任何解釋之下老屈49個區議員宣誓無效，強行剝奪議員資格。根據港共政府強行修訂過嘅《宣誓及聲明條例》，被剝奪資格嘅區議員將會被禁止喺之後五年入面參加選舉。連同辭職、流亡同入獄嘅議員，18個區議會有70%以上嘅席位出缺。

議員人數亦大幅減少，黃大仙剩低兩個議員，中西區得返三個，南區減到四個，令呢啲議會部分職能癱瘓。同時原本係少數派嘅親中派乘機搶走包括九龍城、觀塘、灣仔同北區區議會嘅控制權。就算係咁，當時嘅行政長官林鄭月娥喺2021年7月攞武漢肺炎疫情嚴重為藉口，宣佈喺佢任期內都唔會舉行補選。

2023年5月2號，行政長官李家超老屈支持香港獨立嘅人「操縱癱瘓」區議會，攞所謂國家安全同埋所謂愛國者治港做藉口，宣佈顛覆區議會選舉制度。根據港共政府計劃，得返由鄉事委員會主席做開嘅當然議席維持唔變，民選議席將會大幅減少到唔夠兩成，另外四成議席由間接選舉產生，剩低四成議席由行政長官直接委任。而區議會主席亦唔再由議員互選產生，改由首長級公務員嘅民政事務專員兼任。

當中直選議席由原本452個單議席選區合併為44個雙議席選區，呢88個議席用雙議席單票制選出，而176個間選議席就由港共政府委任嘅三個地區委員會，即係「分區委員會」、「地區撲滅罪行委員會」、「地區防火委員會」，用全票制方式選出。所有候選人除咗要有50個以上當區選民提名之外，仲必須分別攞到三個委員會各自三個委員嘅提名，仲要畀港共政府委任嘅區議會資格審查委員會批准，決定候選人係唔係符合維護香港基本法同效忠港共政府嘅強加要求同條件。

選區分界

各區議席數目分佈如下：

地區	選區數目	區議會地方選區名稱
中西區	2	中區、西區
灣仔區	1	灣仔
東區	3	太北、康灣、柴灣
南區	2	南區東南、南區西北
油尖旺區	2	油尖旺南、油尖旺北
深水埗區	2	深水埗西、深水埗東
九龍城區	2	九龍城北、九龍城南
黃大仙區	2	黃大仙東、黃大仙西
觀塘區	4	觀塘東南、觀塘中、觀塘北、觀塘西
荃灣區	2	荃灣西北、荃灣東南
屯門區	3	屯門東、屯門西、屯門北
元朗區	4	元朗市中心、元朗鄉郊東、天水圍南及屏夏、天水圍北
北區	2	蝴蝶山、紅花嶺
大埔區	2	大埔南、大埔北
西貢區	3	西貢及坑口、將軍澳南、將軍澳北
沙田區	4	沙田西、沙田東、沙田南、沙田北
葵青區	3	青衣、葵涌東、葵涌西
離島區	1	離島

出面網頁

• 區議會網站
• 選舉事務處網站