維基百科

認知心理學

研究知識所涉及嘅精神過程
(由認知心理跳轉過嚟)

認知心理學（粵拼：jing6 zi1 sam1 lei5 hok6 | 英文：cognitive psychology，源自拉丁文 cognosco，即係了解噉解）係研究認知嘅心理學子領域。定義上，認知指一系列喺個腦入面發生嘅資訊處理過程，包括咗[1]

  • 感知－由外界嗰度接收資訊、
  • 注意力－由外界嘅資訊當中篩選一部份嚟集中處理、
  • 記憶－將處理緊嗰啲資訊攞一部份嚟儲起、
1619 年嘅一幅圖畫；幅畫描述畫畫人想像中嘅認知模型。

... 呀噉。呢啲認知功能幫個腦透過處理由外界嗰度收到嘅資訊，仲能夠透過諗嘢等嘅過程，將呢啲資訊同佢已有嘅知識結合埋一齊，學到新嘅知識同埋適應變化多端嘅環境[2][3]。

認知心理學家會用科學化嘅方法嚟研究認知：佢哋會主要用實驗嘅方法，睇吓認知功能會受咩影響－簡單嘅例子可以係研究「噪音會點樣影響一個人背默生字－反映記憶功能－嗰陣嘅表現」；除此之外，認知心理學家仲可以用埋神經造影嘅方法，剖析受試者做緊認知作業（背默生字或者解數學方程式呀噉）嗰陣個腦入面發生緊乜事－例如研究「個人解數學方程式嗰時邊啲腦區會活躍咗」，靠噉研究每種認知功能分別係由個腦邊忽主控嘅。呢啲噉嘅研究組成咗認知科學（專研究心靈嘅跨學科領域）嘅重要一環[4][5]。

定位

編輯
 
一個腦睇咗好多件相似嘅物件之後，發覺嗰幾件嘢都有葉同樹幹等嘅特徵，於是就產生咗「樹」呢個概念。
睇埋：認知科學、心理學、心理實驗、情緒同科學方法

認知

編輯
内文：認知
睇埋：智能體

認知（cognition）係認知心理學嘅研究對象。喺心理學上，認知係指一個腦內部嗰啲資訊處理過程。具體嚟講，認知包括咗[6][7][8]：

  • 感知－由外界刺激嗰度吸取資訊；
  • 注意力－外界嘅資訊量大得滯，焗住要由呢啲資訊當中篩選一部份出嚟集中處理；
  • 記憶－將一部份嘅資訊儲起，等第時有得攞嚟使用；
  • 知識表示－用手上已有嘅資訊，建立可以用嚟做判斷嘅心靈模型；
  • 語言－用符號嚟向第啲個體傳達資訊；
  • 學習－用過往接收過嘅資訊修改自己行為；同埋
  • 想像－喺冇外界刺激嘅情況下，喺腦海裏面組合資訊；

... 呀噉。上述呢啲噉嘅功能有好多非人動物都做得到，而喺人類呢種出嗮名智能高嘅物種當中，認知可以包括更複雜嘅功能，譬如係用語言嚟講自己做緊嘅行動同講明行動嘅邏由，仲有係用自省（self-reflection）能力嚟檢睇同埋惗度自己嘅意識。一般嚟講，智能體（intelligent agent）就係泛指有能力做認知過程嘅物體，智能體會靠認知過程嚟決定要採取咩行動，並且令自己達到目的嘅機率有咁大得咁大－無論係人類、其他動物抑係有智能嘅機械都係噉[9]:8。

喺廿一世紀初嘅認知科學上認為，自然智能體（人同第啲動物）嘅認知能力係受到進化塑造嘅：想像一隻身處喺自然環境入面嘅動物；佢要通過物競天擇嘅考驗（要生存落嚟同繁衍後代）就一定要達到某一啲特定嘅目的－當中「目的」包括咗搵嘢食同保護仔女呀噉[10][11]；要達到呢啲目的，隻動物嘅腦就實要做好多資訊處理過程－包括係要探測周圍環境有冇嘢食（感知同注意力），要按睇到嘅影像同聽到嘅聲判斷環境入面有咩物件（思考），用自己嘅知識判斷呢啲物件有邊啲係嘢食邊啲唔係（知識同記憶），然後決定係咪要行埋去一件判定咗係嘢食嘅物件度（決策）－上述嘅呢啲資訊處理過程冚唪唥都屬認知嘅範疇[12][13]。認知心理學家做研究嗰時，佢哋會量度一隻智能體喺進行認知作業嗰陣「反應有幾快」等嘅變數，會剖析呢啲變數受乜因素影響，靠噉判斷受試者嘅腦內部發生緊啲乜嘢資訊處理過程[14][15]。

同腦嘅拏褦

編輯
内文：認知神經科學
睇埋：神經心理學、心腦同一論同心身二元論

廿一世紀初嘅認知科學上一般都認同，對於有腦部嘅動物嚟講，認知係由個腦做嘅功能。心腦同一論（mind-brain identity）係一種有關心靈本質嘅觀點，主張腦等同於心靈。根據典型嘅心腦同一論，心靈入面發生嘅事－包括感知、思緒同想像等嘅認知功能－冚唪唥都同腦入面發生嘅物理事件（例如神經細胞之間嘅訊號）有所對應[16]。

基本上，一個用心腦同一論研究認知嘅人會攞住佢研究嗰種認知現象，用神經造影嘅方法，睇吓個腦嘅邊啲物理特性同佢研究緊嗰種認知靈現象有統計相關，靠噉嚟劃出認知同腦成點樣嘅對應；舉個簡單例子，家陣個研究者研究緊想像力，佢可以一路要受試者做要求想像力嘅工作（假設「想像力」呢個詞有明確嘅定義）一路用腦電圖（EEG）嘅方法睇住大腦皮層各橛有乜電活動，如果大腦皮層有幾橛嘅電活動同「係咪用緊想像力」完全冇統計相關嘅話，噉呢幾橛大腦皮層當中嘅物理過程就應該同想像力唔啦更[16][17]。呢類噉嘅研究係廿一世紀認知心理學當中不可或缺嘅一環[註 1]。

 
一個受試者一路做 EEG 量度一路冥想；
佢諗緊嘅嘢會點樣影響佢嘅腦活動呢？

不過值得一提嘅係，神經系統似乎（最少喺某啲物種當中）並唔係認知嘅必要條件，例如有廿一世紀初嘅實驗就顯示，連粘菌（slime mold）呢種冇神經系統嘅單細胞生物，都曉根據過去嘅經驗嚟改變自己嘅行為－而呢種現象經已可以算係廣義上嘅學習[18]。亦都可以睇吓有關植物智能嘅嘢。

感知

編輯
 
曖昧圖像：幅圖入面嗰個係後生女人定係阿婆呢？
内文：感知
睇埋：心理物理學

一個資訊處理體要解難，就實要由外界嗰度吸收資訊，感知（perception）就係指透過感官獲取外界嘅資訊－視覺會幫手接收外界嘅光、聽覺會接收外界嘅聲、嗅覺能夠幫手辨別周圍環境有乜嘢化學物質喺度... 呀噉，而喺感知系統為個個體提供咗「外界有啲乜嘢物理刺激」嘅資訊之後，腦部仲會對呢啲資訊做進一步嘅處理。人類最依賴嘅係視覺同聽覺，但第啲動物喺呢方面可以同人好唔同，例如狗同狼等嘅犬科動物就出嗮名零舍依賴嗅覺[19]。

感知涉及相當複雜嘅資訊處理過程，不過感知呢種認知過程最基本上可以分做兩大流：

  • 由下至上（bottom-up）過程係指「由下層特徵主導」嘅感知，當中「下層特徵」係指呢種過程純粹受制於啲外界刺激嘅物理特性，例如係睇到嘅光嘅強度或者係聽到嗰串聲嘅頻率呀噉；
  • 由上至下（top-down）過程係指「由上層特徵主導」嘅感知，當中「上層特徵」係指個個體嘅神經系統本身嘅特質，即係話個人嘅主觀感覺同心理特性會左右佢嘅感知；舉個具體啲例子，曖昧圖像（ambiguous image）就係一種成日俾認知心理學家攞嚟研究由上至下過程嘅架生，好似係幅附圖噉，幅圖可以睇做一個後生、頭髮黑嘅女人，又可以睇成一個頭髮白嗮嘅阿婆；想像有認知科學家搵班人返嚟做受試者，俾佢哋睇一啲曖昧圖像，要佢哋睇完一幅圖之後即刻答幅圖係後生女定阿婆，並且對數據做吓統計分析，睇吓受試者嘅答案會受咩因素影響；而實驗顯示，（例如）某啲類型嘅人零舍傾向將幅附圖睇做後生女，又或者係「如果個人臨睇幅圖之前睇過有老人家喺入面嘅相，會零舍容易將幅圖睇成阿婆」－噉即係表示受試者「感知到啲乜」並唔係純粹由收到嘅刺激嘅物理性質主宰嘅，展示咗由上至下嘅感知過程[19][20]。

順帶一提，腦研究上已知，人腦有視覺皮層同聽覺皮層等嘅腦區專門處理感知資訊。

注意力

編輯
内文：注意力

注意力（attention）係一種嘅認知過程，涉及個智能體由接收到嘅外界資訊當中篩選一部份出嚟集中處理，仲要忽略唔係集中處理緊嘅嗰啲資訊：一隻動物（包括人）嘅腦無時無刻都喺度接收緊極大量嘅資訊，多到冇可能一吓過處理得嗮；好多時為咗要有效噉解決佢生存所需要解決嘅問題，一隻動物需要集中處理同佢生存最有啦掕嗰啲資訊，同時又焗住要忽略嗰啲同佢生存冇咁有啦掕嘅資訊－呢種能力就係現代心理學上所講嘅注意力[21][22]。喺對注意力嘅研究上，認知心理學家興將注意力想像做一種有限嘅資源，由個腦嘅某啲系統決定要點分配落去唔同嘅資訊源嗰度[23]，當中塊額葉同塊頂葉之間嘅網絡（fronto-parietal network）已知同注意力零舍有關[24][25]。

一隻狼用對眼𥄫實佢有興趣嘅物件；定義上，注意力集中點係資訊處理能力嘅集中之處，一隻動物用眼（收集資訊嘅器官）望實一件物件，正路就表示佢將注意力集中咗喺嗰件物件嗰度。

眼動追蹤（eye-tracking）係廿一世紀初最常用嘅注意力研究架生之一。眼動追蹤指用某啲方法量度受試者眼珠嘅郁動相關嘅資訊－好似係「對眼喺呢個時間點望住呢個位，逗留咗幾多幾多秒」等等[26]。喺廿一世紀嘅眼動追蹤研究裏面，最常用嘅做法係拍片影住受試者對眼，個眼動追蹤器會得到受試者眼珠嘅影像，用機械學習演算法等嘅方法加埋「個鏡頭喺邊個位置」嘅資訊，判斷受試者喺拍片期間每個時間點對眼望緊邊個位。呢啲資訊跟住就可以攞嚟做進一步嘅分析。想像家陣有份噉嘅研究：研究者搵柞畫人物嘅畫返嚟，叫受試者睇吓啲畫，一路用眼動追蹤器監察住佢哋嘅眼珠；佢哋跟住發現，多數受試者都會望咗（視覺固定）幅畫當中塊人面先（將注意力擺喺塊人面嗰度）－於是呢份研究就搵到一啲有趣嘅資訊[27]。

下圖係眼動追蹤數據嘅例子：圖上嘅一個圓圈代表個受試者有𥄫實過嘅區域（望咗超過若干秒），而圓圈上嘅數字表示望嘅次序。

 

記憶

編輯
内文：記憶

記憶（memory）係指個腦將[註 2]啲資訊入碼、儲起、同埋喺有需要嗰陣提取出嚟用嘅能力：喺野外，一隻動物需要記住（例如）邊啲地方有嘢食、邊啲地方係獵食者成日去嘅、仲有係打前見過嘅同類當中邊啲信得過邊啲出賣過自己... 等等嘅資訊－記憶對動物（包括人）嘅體驗嚟講至關重要，記憶功能令一隻動物曉由接收到嘅資訊當中揀一部份儲起，並且喺要用嗰陣將呢啲資訊提取返出嚟用[28][29]，而喺人當中，記憶仲係人際關係、語言學習同埋人格同一性嘅根本[30]。

一個人類認知系統當中嘅記憶可以分做好多類：首先記憶可以按「有冇得用口頭報告返出嚟」分做有意識（explicit）同冇意識（implicit）兩種；又有得按「會維持幾耐」分做短期記憶（short-term）同長期記憶（long-term）兩大種－當中短期記憶頂嗮櫳都淨係維持到幾分鐘，不過幫到人暫時將要用嘅資訊儲住，而長期記憶就閒閒哋維持得到成幾年（甚至幾廿年）咁耐，對人（要喺複雜嘅社會當中運作）嚟講係不可或缺嘅[31]。

一隻蜜蜂試過「推開個塞」會「有蜜糖」之後，學識次次見到個塞都走去推－展示佢記得「推個塞會有蜜糖」。

而無論係長期定短期記憶，記憶功能可以分做入碼、儲藏同提取三大部份[31][32]：

  • 入碼（encoding）指將要記嘅外界資訊轉化成個腦能夠儲起嘅型態，簡單講例如將眼感知到嘅光轉化做腦識得處理嘅神經訊號；
  • 儲藏（storage）係指個認知系統將做咗入碼嘅資訊儲落去短期記憶同長期記憶等嘅記憶子系統嗰度；
  • 提取（retrieval）就包括咗回想同辨識－
    • 回想係指個認知系統憑空諗返起一件記憶出嚟，即係話要諗起嗰樣資訊唔存在喺周圍嘅環境當中－「我記得尋日睇咗嗰本書，啲內容係噉噉噉」；
    • 辨識係指個認知系統感知到一件資訊，並且認得嗰件資訊同之前感知過嘅記憶吻合－「我睇緊呢啲內容，我記得喺尋日睇嗰本書嗰度睇過」。

順帶一提，神經研究經已表明，上述嘅功能由唔同嘅腦區掌控。

學習

編輯
 
一個細路喺度溫緊書；溫完書佢嘅行為正路會由「唔識答條問題」變成「識得答條問題」。
内文：學習
睇埋：知識、動物行為學同先天定後天

學習（learning）喺心理學上嘅一個基本定義係「一個個體按自己嘅經歷改變自己嘅行為」嘅過程。學習係記憶嘅必然結果：個認知系統獲取外界嘅資訊（感知同注意力），將呢啲資訊嘅最少一部份儲喺記憶裏面，並且喺將來嘅時間點，俾呢啲儲起咗嘅資訊左右自己嘅行為；

  • 簡單例子有一個人有次俾個煮食爐辣親好痛，佢下次就會記得上次嘅經驗，識唔好再搵隻手去掂個爐；
  • 好似人呢啲智能高嘅動物，仲有能力學做一啲複雜嘅行為或者理解複雜嘅概念，例如足球等嘅運動當中都有極高深嘅技巧－要「踢波踢得好」就需要識得一連串有返咁上下複雜嘅動作，學習者要有大量嘅經歷（日積月累噉練波）先至能夠得知「邊啲動作係能夠幫到自己踢波踢得好嘅」[33][34]。

由上面呢兩個例子亦都可以睇得出，學習可以係學全新嘅行為（學踢波嘅動作），又可以係改變舊有嘅行為（學識唔好再搵隻手去掂個爐）－涉及行為上嘅改變[35][36]。

學習嘅現象展現咗認知科學上先天定後天（nature versus nurture）爭論：一方面，人有好多行為都係天生嘅，多數嘅性格特質同智商等嘅個體特性都經已證實咗，起碼局部係天生嘅[37]；另一方面，人又好明顯具有學習嘅能力，曉按照自己經歷過嘅嘢改變自己嘅行為[36]。例如係根據研究，五大性格特質（一套廿一世紀初常用嘅性格理論）當中嘅外向度（外向嘅人鍾意講嘢同交際）就有成 54% 係受遺傳因素影響嘅－簡單啲講，有啲人天生就外向，又有啲人係後天學到咁外向嘅，更多人身處呢兩個極端之間[38]。到咗廿一世紀，主流科學界都認同行為係同時受到先天同後天因素影響嘅，但仲係會對「呢個行為係先天因素多定後天因素多」有所爭論[37]。

智能

編輯
 
一隻長尾獼猴用石頭打爛一粒堅果嘅殼；「識得用工具」一般俾人認為係智能嘅象徵。
内文：智能

智能（intelligence）係認知科學領域上嘅一個重要概念，而呢個概念就係建基於認知之上嘅：就算到咗廿一世紀，學界對智能嘅定義仲有唔細嘅爭詏[39]；不過多數嘅心理學家都同意，智能包含咗一個認知系統－無論人定係第啲動物嘅腦－處理資訊以及用呢啲資訊解決問題嘅能力，用日常用語講嘅話大致上就係講緊佢「有幾聰明」－概念上，講一個個體智能有幾高，就係靠佢喺各種認知作業上嘅表現嚟判斷嘅，智能高啲嘅人理應會傾向學嘢學得快啲、記憶能力勁啲又者係比較識得做 metacognition，佢哋喺認知上嘅卓越能力令到佢哋學完嘢之後仲更加有能力去運用學咗嘅知識嚟解難[40][41]。

智商

編輯
内文：智商

喺人類當中，智能一般都係用智商（intelligence quotient，IQ）嚟量度嘅，而智商就係靠認知能力嚟量度嘅：心理學家會整好多標準化嘅測試出嚟，呢啲測試會包含一啲考驗各種認知功能嘅問題，例如係要求受試者搵出一串數之間有乜規律嘅問題噉，就要求對數嘅理解；一個受試者答啱嘅題目數量愈多，佢喺呢個測試上嘅分數就會愈高，而測試分數愈高就表示個人智商愈高[42]。呢啲測試係建基於以下噉嘅思路嘅：

  • 智能決定一個人普遍嘅認知能力，所以假想而家有一大柞考驗唔同認知能力嘅標準化問題，結合做一個測試；假設動機同專注力等嘅因素不變，一個人智能愈高理應會答啱愈多條問題；
  • 於是心理學家攞若干個人做樣本，假設個樣本代表到人類總體，噉個樣本啲人喺個測試上嘅分數中位數（median）係   理應反映咗人類總體喺個測試上嘅分數中立數，代表住最平均嘅智商（一般會設做 100）；
  • 假想有個人喺個測試上嘅分數係  （  係分數嘅標準差），理應表示佢嗰個分數代表高過平均兩個標準差嘅智商... 如此類推。

不過要留意嘅係，智商測試有好多唔同款，款款度嘅認知能力都有啲唔同，而是但搵個測試，都梗會有專家批評個測試冇充分噉量度某個重要嘅認知功能。

 
智商呈常態分佈，意思即係話多數人喺「智商」呢樣特性上都近全人類嘅平均值（100），100 係出現得最密嘅數值，智商極端高或者極端低嘅人的確存在，但愈極端嘅數值出現頻率就愈低。畫做圖嘅話，就會好似上圖噉，上圖打橫條軸做智商，打戙條軸做嗰個智商數值喺人類當中出現嘅頻率。

喺社會科學上，智商測試相當受重視，因為研究指出，一個人嘅智商可以用嚟預測好多嘢，好似係佢嘅學業成績、人工同埋健康呀噉－智能高嘅人通常成績會好啲，畢咗業之後賺到嘅人工會高啲，而且因為比較識照顧自己所以健康會好啲－智商對一個人喺社會環境入面嘅運作相當有影響[43][44]。

進階認知功能

編輯

意識

編輯
 
冥想俾人廣泛噉覺得係一種意識異常嘅狀態。可以睇埋額葉功能低下[45]。
内文：意識

喺是但一個時間點，一個人會喺度諗緊一啲嘢，而呢啲嘢係口頭報告得到出嚟嘅，但佢同時又會無意識噉做一啲唔使諗都曉做嘅嘢，例如係行路噉，一個正常嘅大人行起路上嚟唔使特登思考「應該邊隻腳踩出去先」等嘅問題，就能夠自動噉行路；而好多時，人會突然發覺自己喺冇思考過嘅情況下，就自動做咗一啲行為－即係話喺個腦處理緊嘅資訊當中，有一啲係有意識（conscious）嘅，有一啲係無意識（unconscious）嘅，前者能夠口頭報告返出嚟，而後者就唔得。喺認知科學當中，意識定義大致上就係指一個「知自己諗緊乜做緊乜」嘅狀態[46][47]。

認知科學上嘅研究顯示，人嘅行為會受到無意識嘅資訊處理影響。舉個例說明，有啲實驗就試過用類似噉嘅做法：

  • 研究者要求一班受試者各自噉望實自己前面個熒光幕，再俾個掣佢哋，叫佢哋一見到有個藍色四方形喺個熒光幕閃過，就要有咁快得咁快撳個掣；
  • 喺一部份嘅「藍色四方形出現」事件當中，個熒光幕會喺個藍色四方形出現前 0.5 秒嗰一刻有粒極之快消失嘅星星閃過（快到受試者冇能力意識到粒星星嘅存在）；
  • 粒星星係一個訊號，會話俾睇到佢嘅人知「藍色四方形將會喺 0.5 秒後出現」；

實驗顯示，事後問返啲受試者，佢哋冚唪唥都唔知道有星星閃過，但統計分析嘅結果就反映，粒星星能夠令受試者反應變快－有星星出現嘅「藍色四方形出現」事件當中嘅受試者反應時間短啲，噉即係話受試者雖然意識唔到粒星星嘅存在，但粒星星依然影響得到佢哋嘅認知過程同行為[48][49]。

Metacognition

編輯
内文：Metacognition

Metacognition（粵拼：met6 taa6 kok6 nit1 seon4，意思係「喺認知之上」噉解）係指一個認知系統監察自己嘅狀態嘅能力，甚至運用呢樣能力嚟幫助自己學習，簡單嘅例子有一個人諗要點樣組織啲資訊自己會比較容易記住，然後用呢樣知識幫手加強自己嘅記憶[50]。人類當中嘅 metacognition 相當容易研究：由日常觀察都可以得知，人曉觀察自己嘅認知過程；好似記憶術（mnemonic）就係人類 metacognition 嘅一個常見例子，指一個人自創同運用一啲幫助記嘢嘅技巧嚟增強自己嘅記憶（用記憶術表示嗰個人一定要了解到自己有記憶呢種認知功能），簡單嘅例子有喺腦海入面將一段電話號碼喺腦海入面斬開做幾橛，等成段號碼容易記啲[51]。

喺對動物認知嘅研究上，metacognition 嘅能力有可能用以下嘅測試觀察[註 3]：

  • 搵隻受試者，俾佢哋睇一個佢哋需要將佢分類嘅刺激，而佢哋有權唔俾反應，俾啱反應會有大獎，唔俾反應會有細獎，俾錯反應會冇獎；
  • 例：搵一隻大家鼠入個籠嗰度，籠有兩個掣同一盞燈，盞燈會定時定候閃，閃紅燈佢要撳左面個掣，閃黃燈佢要撳右面個掣，撳啱有大嚿嘅嘢食，撳錯冇嘢食，唔撳有細嚿嘅嘢食（佢要喺腦海裏面將盞燈嘅色水分類）；
  • 理論上，喺呢啲測試當中，如果個個體選擇唔俾反應，可以表示佢對個選擇作出咗「我唔肯定我諗緊嘅嘢啱唔啱」嘅判斷；

根據呢種實驗方法，有好多動物都具有 metacognition 嘅能力，包括某啲雀鳥物種[52]、海豚[53]以及包括人在內嘅靈長目[54]。

 
一種用嚟記每個月有幾多日嘅記憶術；兩個拳頭上面每一點表示一個月份，凸嘅表示係長月，凹嘅表示係短月。

雙重過程理論

編輯
内文：雙重過程理論

廿一世紀初嘅認知心理學經已確立咗所謂嘅雙重過程理論（dual process theory）。根據呢套理論，人腦有兩大系統負責做決策同推理功能：

用神經造影做嘅研究顯示，呢兩種過程明顯涉及唔同嘅腦區，清楚表明第一型過程同第二型過程係兩個唔同嘅系統[55][56]。呢兩種過程嘅特性如下[57][58]：

第一型過程：
「直覺」		 第二型過程：
「理性」
定義性嘅特徵 唔使用到工作記憶 要用到工作記憶
通常有嘅特徵
  • 快（可以即刻俾答案）
  • 可以同時處理大量資訊
  • 平行（可以同時做幾樣作業）
  • 無意識
  • 易受認知偏誤左右
  • 唔抽象化
  • 自動化嘅
  • 同智能嘅相關比較弱
  • 人類以外嘅動物都有
  • 進化上比較早出現
  • 慢（要諗吓先俾到答案）
  • 淨係有得同時處理少量資訊
  • 串連（冇時同時做幾樣作業）
  • 有意識
  • 冇咁易受常見嘅認知偏誤左右
  • 可以好抽象化
  • 受控嘅
  • 同智能嘅相關比較強
  • 人類獨有嘅
  • 進化上比較遲出現

多數嘅決策過程都會屬於呢兩種過程當中是但一種，不過人又可以用噉嘅做法先，佢哋嘅第一型系統（直覺）會俾個答案，然後佢哋嘅第一型系統又會衡量吓個答案係咪啱，如果第一型系統覺得個答案有問題（感覺覺得有問題），就會轉手俾第二型系統處理[57]。

認知發育

編輯
 
臊孲子好多時都冇物體恆存嘅概念－一旦佢哋睇唔到樣嘢，佢哋就會當嗰樣嘢唔存在。
内文：認知發育

認知功能並唔係靜止嘅，一個人嘅認知功能由出世直至成長成大人嘅過程當中會有唔少嘅變化：一般嚟講，隨住一個細路成長，佢嘅認知功能會慢慢噉成熟，發育出一啲本來冇、但大人應該具有嘅認知能力；而隨住一個人老化，佢身體各個器官（包括個腦）會慢慢噉喪失原有功能，而呢個過程往往會造成認知功能嘅衰退[59]。認知發育（cognitive development）係認知心理學嘅一個子領域，專門研究細路嘅認知功能點樣發育嘅[59]。

認知發育論

編輯
内文：認知發育論

瑞士心理學家尚·皮亞傑（Jean Piaget）係認知發育上一個極具影響力嘅心理學家。佢做咗多份研究，搵咗唔同年紀嘅細路返去實驗室嗰度，分別要呢啲細路答一啲問題以及做一啲講求認知功能嘅作業，靠噉嚟研究唔同年紀嘅細路喺諗嘢方式上有乜嘢差異，最後得出好出名嘅認知發育論－呢個理論講明咗一個細路嘅認知功能喺佢成長嘅過程當中唔同階段會點演變，成為咗廿世紀認知發育研究嘅基礎[60]。

根據認知發育論，一個細路由出世到認知上成熟（起碼 12 歲）中途主要會經過四大階段，每個階段之間都會出現質性上（qualitative）嘅變化－「質性上嘅變化」即係指出現一個原先冇嘅認知功能；例如係物體恆存（object permanence）噉，具有物體恆存概念嘅智能體明白，一件物體就算自己睇唔到都唔表示嗰件物體唔存在，而好細個嘅臊孲子似乎係唔識物體恆存呢個概念嘅－實驗顯示，呢啲臊孲子一旦一樣物件俾某啲嘢遮住，就唔會再當嗰件物件存在，唔會嘗試去搵件物件[註 4]。所以喺發育出物體恆存嘅過程之中，個臊孲子嘅認知功能起咗質性上嘅變化[61]。以下係古典認知發育論所描述嘅四大階段[60][62]：

  • 感知運動階段（sensorimotor stage；0-2 歲）：個細路有智能；會用各種嘅郁動嚟學嘢，但唔曉用（抽象嘅）符號；發展有限嘅知識，而學到嘅知識係建基於體驗嘅；識得郁動令到個細路可以學新嘢；呢個階段最後期會開始學語言；喺呢個階段嘅細路一般會學識睇唔到嘅物件仲係存在嘅（物體恆存）、會對因果有基礎理解、同埋明白時間以及空間嘅概念。
  • 前運算階段（pre-operational stage；2-7 歲）：個細路曉運用符號同語言；有一定記憶力同想像力；諗嘢冇乜邏輯可言，而且相當自我中心；識得用直覺解難；開始睇到事物之間嘅關係；開始了解數嘅概念。
  • 具體運算階段（concrete operational stage；7-12 歲）：個細路有邏輯同有系統性嘅智能；識得用符號代表實質嘅事物；開始識由其他人嘅角度去諗嘢；了解質量、長度、重量、同容量呢啲概念。
  • 形式運算階段（formal operational stage；12 歲同打後）：有邏輯噉用符號代表實質嘅事物；諗起嘢上嚟有彈性，而且識得抽象思考以及喺個腦入面試假說；喺做複雜嘅思考同解難嗰陣曉考慮唔同嘅可能性。

起源

編輯
睇埋：心理學史同認知革命

對認知嘅研究早喺 19 世紀尾（現代心理學開始成形）嗰陣經已存在－當時有心理學同神經科學上嘅研究者發現咗布諾卡區同韋力卡區呢兩個腦區會主宰一個人講嘢嗰時組織句子嘅能力，可以算係早期嘅認知研究[63]。

不過廿世紀早期（1920 年代至 1950 年代）嘅心理學由行為主義（behaviorism）主導：當時啲心理學家，尤其係美國嗰啲，普遍認為思緒或者記憶呢啲嘢冇得直接量度同觀察，難以作為科研嘅對象，因而輕視對呢啲嘢嘅研究，令到心理學研究完全變成以外顯行為做主導－例如分析「呢個刺激通常會引致邊個邊個行為」噉嘅推論，忽略一隻動物內部嘅資訊處理過程。喺 1959 年，美國嘅語言學家杭士基（Noam Chomsky）猛烈批評「語言嘅現象能夠齋靠外顯行為理解」嘅諗法，提倡要了解語言呢個現象，就實要考慮個人腦內部做嘅資訊處理，呢個諗法得到唔少學者支持[64]。

事實上，廿世紀 50 年代係認知革命（cognitive revolution）進行得如火如荼嘅時期：呢個時期有多個研究心靈嘅領域嘅學者，包括心理學家同語言學家等，開始發覺一味淨係研究外顯行為嘅行為主義根本唔掂，解釋唔到好多心靈嘅相關現象；於是開始出現咗一股思潮，提倡要研究心靈內部嘅資訊處理過程，集結心理學、神經科學同人工智能等領域嘅科學家，形成所謂嘅認知科學－研究心靈嘅科學，而因為認知係心靈不可或缺嘅一部份，認知心理學就正式成為咗一個有學術地位嘅領域[65][66]。

註釋

編輯
  1. ↑ 不過一個認知理論未必會提及個腦，可以純粹淨係掛住講成串認知過程入面涉及咗咩資訊同係點處理法。
  2. ↑ 通常係經過注意力篩選之後
  3. ↑ 有唔少認知科學家都認為呢個測試唔可以 100% 表示 metacognition 嘅存在，所以主張呢個測試頂櫳只可以做輔助。
  4. ↑ 大個啲嘅臊孲子會，不過臊孲子「要去到幾大個先會識物體恆存」係一條有少少爭議性嘅問題。

睇埋

編輯

文獻

編輯
  • Ardila, Alfredo (2018). Historical Development of Human Cognition. A Cultural-Historical Neuropsychological Perspective. Springer. ISBN 978-9811068867.
  • Coren, Stanley; Lawrence M. Ward; & James T. Enns (1999). Sensation and Perception. Harcourt Brace. ISBN 0-470-00226-3.
  • Groeger, John A. (2002). "Trafficking in cognition: Applying cognitive psychology to driving". Transportation Research Part F: Traffic Psychology and Behaviour. 5 (4): 235-248.
  • Lycan, W. G. (ed.). (1999). Mind and Cognition: An Anthology, 2nd Edition. Malden, Mass: Blackwell Publishers, Inc.
  • Mansell, Warren (2004). "Cognitive psychology and anxiety". Psychiatry. 3 (4): 6-10.
  • Stanovich, Keith (2009). What Intelligence Tests Miss: The Psychology of Rational Thought. New Haven (CT): Yale University Press. ISBN 978-0-300-12385-2.

攷

編輯
  1. ↑ Stefano Franchi, Francesco Bianchini. "On The Historical Dynamics Of Cognitive Science: A View From The Periphery". The Search for a Theory of Cognition: Early Mechanisms and New Ideas. Rodopi, 2011. p. XIV.
  2. ↑ "cognition - definition of cognition in English from the Oxford dictionary 互聯網檔案館嘅歸檔，歸檔日期2018年11月7號，.". www.oxforddictionaries.com.
  3. ↑ Adapted from Miller, George A (2003). "The cognitive revolution: a historical perspective". Trends in Cognitive Sciences, 7.
  4. ↑ Von Eckardt, Barbara (1996). What is cognitive science?. Massachusetts: MIT Press. pp. 45-72.
  5. ↑ Thagard, Paul, Cognitive Science, The Stanford Encyclopedia of Philosophy (Fall 2008 Edition), Edward N. Zalta (ed.).
  6. ↑ Belkin, N. J. (1990). The cognitive viewpoint in information science. Journal of information science, 16(1), 11-15.
  7. ↑ Paas, F., Renkl, A., & Sweller, J. (2004). Cognitive load theory: Instructional implications of the interaction between information structures and cognitive architecture. Instructional science, 32(1), 1-8.
  8. ↑ Sternberg, R. J., & Sternberg, K. (2009). Cognitive psychology (6th Ed.). Belmont, CA: Wadsworth, Cengage Learning.
  9. ↑ Vernon, David (2014). Artificial Cognitive Systems: A Primer. MIT Press. ISBN 978-0-262-02838-7.
  10. ↑ Povinelli, D. J. (1993). Reconstructing the evolution of mind. American Psychologist, 48(5), 493.
  11. ↑ Tenenbaum, J. B., Kemp, C., Griffiths, T. L., & Goodman, N. D. (2011). How to grow a mind: Statistics, structure, and abstraction. Science, 331(6022), 1279-1285.
  12. ↑ Sensation & Perception, 5th ed. 1999, Coren, Ward & Enns, p. 9.
  13. ↑ Cognitive Psychology, 5th ed. 1999, Best, John B., pp. 15–17.
  14. ↑ Bruyer, R., & Brysbaert, M. (2011). Combining speed and accuracy in cognitive psychology: Is the inverse efficiency score (IES) a better dependent variable than the mean reaction time (RT) and the percentage of errors (PE)?. Psychologica Belgica, 51(1), 5-13.
  15. ↑ Glickman, M. E., Gray, J. R., & Morales, C. J. (2005). Combining speed and accuracy to assess error-free cognitive processes. psychometrika, 70(3), 405-425.
  16. ↑ 16.0 16.1 Ryle, G., 1949, The Concept of Mind, London: Hutchinson.
  17. ↑ Putnam, H., 1960, 'Minds and Machines', in S. Hook (ed.), Dimensions of Mind, New York: New York University Press.
  18. ↑ Slime Molds Remember — but Do They Learn?. Quanta magazine.
  19. ↑ 19.0 19.1 Mechelli, A., Price, C. J., Friston, K. J., & Ishai, A. (2004). Where bottom-up meets top-down: neuronal interactions during perception and imagery. Cerebral cortex, 14(11), 1256-1265.
  20. ↑ Parkkonen, L.; Andersson, J.; Hämäläinen, M.; Hari, R. (2008). "Early visual brain areas reflect the percept of an ambiguous scene". Proceedings of the National Academy of Sciences of the United States of America. 105 (51): 20500–20504.
  21. ↑ How Psychologists Define Attention. Verywell Mind.
  22. ↑ Chavajay, P.; Rogoff, B. (1999). "Cultural Variation in Management of Attention by Children and Their Caregivers". Developmental Psychology. 35 (4): 1079-90.
  23. ↑ Anderson, John R. (2004). Cognitive Psychology and Its Implications (6th ed.). Worth Publishers. p. 519.
  24. ↑ Posner, M. I.; Petersen, S. E. (1990). "The attention system of the human brain". Annual Review of Neuroscience. 13(1): 25–42.
  25. ↑ Corbetta, M. (1998). Frontoparietal cortical networks for directing attention and the eye to visual locations: Identical, independent, or overlapping neural systems?. Proceedings of the National Academy of Sciences, 95(3), 831-838.
  26. ↑ Taylor, Stanford E. (November 1965). "Eye Movements in Reading: Facts and Fallacies". American Educational Research Journal. 2 (4): 187–202.
  27. ↑ Hunziker, H. W. (1970). "Visuelle Informationsaufnahme und Intelligenz: Eine Untersuchung über die Augenfixationen beim Problemlösen" [Visual information acquisition and intelligence: A study of the eye fixations in problem solving]. Schweizerische Zeitschrift für Psychologie und Ihre Anwendungen (in German). 29 (1/2).
  28. ↑ Lauralee Sherwood (1 January 2015). Human Physiology: From Cells to Systems. Cengage Learning. pp. 157–162.
  29. ↑ Schwarzel. M. & Mulluer. U., "Dynamic Memory Networks", Cellular and Molecular Life Science, 2006.
  30. ↑ Eysenck, M.W. (2012). Fundamentals of cognition. New York: Psychology Press.
  31. ↑ 31.0 31.1 Thompson, R. F., & Kim, J. J. (1996). Memory systems in the brain and localization of a memory. Proceedings of the national academy of sciences, 93(24), 13438-13444.
  32. ↑ Recognition vs. Recall 互聯網檔案館嘅歸檔，歸檔日期2019年1月18號，.. Decision Science News.
  33. ↑ Daniel L. Schacter; Daniel T. Gilbert; Daniel M. Wegner (2011) [2009]. Psychology, 2nd edition. Worth Publishers. p. 264.
  34. ↑ Mery, Frederic; Kawecki, Tadeusz J. (2004). "An operating cost of learning in Drosophila melanogaster" (PDF). Animal Behaviour. 68 (3): 589-598.
  35. ↑ Richard Gross, Psychology: The Science of Mind and Behaviour. 6E, Hachette UK.
  36. ↑ 36.0 36.1 Ormrod, J. E., & Davis, K. M. (2004). Human learning. London: Merrill.
  37. ↑ 37.0 37.1 Pinker, Steven (September 30, 2002) The Blank Slate: The Modern Denial of Human Nature. Viking; 1st edition.
  38. ↑ Bouchard T.J., McGue M. (January 2003). "Genetic and environmental influences on human psychological differences". Journal of Neurobiology. 54 (1): 4–45.
  39. ↑ Legg, S., & Hutter, M. (2007). A collection of definitions of intelligence. Frontiers in Artificial Intelligence and applications, 157, 17.
  40. ↑ Gottfredson, L. (1998). "The General Intelligence Factor". Scientific American Presents. 9 (4): 24–29.
  41. ↑ Haier, R.J.; Jung, R.E.; Yeo, R.C.; Head, K.; Alkired, M.T. (2004). "Structural brain variation and general intelligence". NeuroImage. 23 (1): 425–433.
  42. ↑ Panizzon, Matthew S., et al. "Genetic and environmental influences on general cognitive ability: Is g a valid latent construct?." Intelligence 43 (2014): 65-76.
  43. ↑ Triglia, A.; Regader, B.; & García-Allen, J.; (2018). "¿Qué es la inteligencia? Del CI a las inteligencias múltiples". Barcelona: EMSE.
  44. ↑ Burson, Katherine A.; Larrick, Richard P.; Klayman, Joshua (2006). "Skilled or unskilled, but still unaware of it: How perceptions of difficulty drive miscalibration in relative comparisons". Journal of Personality and Social Psychology. American Psychological Association. 90 (1): 60–77.
  45. ↑ Dietrich, A., & Al-Shawaf, L. (2018). The transient hypofrontality theory of altered states of consciousness. Journal of Consciousness Studies, 25(11-12), 226-247.
  46. ↑ Cohen A.P., Rapport N. (1995). Questions of Consciousness. London: Routledge.
  47. ↑ Arnaud Destrebecqz; Philippe Peigneux (2006). "Methods for studying unconscious learning". In Steven Laureys (ed.). The Boundaries of Consciousness: Neurobiology and Neuropathology. Elsevier. pp. 69-80.
  48. ↑ Ansorge, U., Heumann, M., and Scharlau, I. (2002). Influences of visibility, intentions, and probability in a peripheral cuing task. Conscious. Cogn. 11, 528–545.
  49. ↑ Scharlau, I., and Ansorge, U. (2003). Direct parameter specification of an attention shift: evidence from perceptual latency priming. Vision Res. 43, 1351-1363.
  50. ↑ Smith, J. D. (2009). The Study of Animal Metacognition, Trends in Cognitive Science, 13(9): 389-396.
  51. ↑ Dunlosky, J. & Bjork, R. A. (Eds.). Handbook of Metamemory and Memory. Psychology Press: New York.
  52. ↑ Fujita, Kazuo, Noriyuki Nakamura, Sumie Iwasaki and Sota Watanabe, (2012), Are Birds Metacognitive? in Beran et al., Foundations of Metacognition, 2012: 50-61.
  53. ↑ Smith, J. David, Jonathan Schull, Jared Strote, Kelli McGee, Roian Egnor, and Linda Erb, (1995), The Uncertain Response in the Bottlenosed Dolphin (Terciops Truncatus), Journal of Experimental Psychology: General, 124(4): 391-408.
  54. ↑ Shields, Wendy E., J. David Smith, and David A. Washburn, 1997, Uncertain Responses by Humans and Rhesus Monkeys (Macaca Mulatta) in a psychophysical same-different task, Journal of Experimental Psychology: General, 126(2): 147-164.
  55. ↑ Goel, V., & Dolan, R. J. (2003). Explaining modulation of reasoning by belief. Cognition, 87(1), B11-B22.
  56. ↑ Tsujii, T., & Watanabe, S. (2009). Neural correlates of dual-task effect on belief-bias syllogistic reasoning: a near-infrared spectroscopy study. Brain research, 1287, 118-125.
  57. ↑ 57.0 57.1 Evans, J. S. B., & Stanovich, K. E. (2013). Dual-process theories of higher cognition: Advancing the debate (PDF). Perspectives on psychological science, 8(3), 223-241.
  58. ↑ Evans, J. S. B. (2010). Intuition and reasoning: A dual-process perspective. Psychological Inquiry, 21(4), 313-326.
  59. ↑ 59.0 59.1 "Cognitive Development - Encyclopedia of Special Education: A Reference for the Education of Children, Adolescents, and Adults with Disabilities and Other Exceptional Individuals - Credo Reference". search.credoreference.com.
  60. ↑ 60.0 60.1 Cherry, Kendra. "Jean Piaget Biography". The New York Times Company. Retrieved 18 September 2012.
  61. ↑ Baillargeon, R., Spelke, E. S., & Wasserman, S. (1985). Object permanence in five-month-old infants. Cognition, 20(3), 191-208.
  62. ↑ Parke, R. D., & Gauvain, M. (2009). Child psychology: A contemporary viewpoint (7th Ed.). Boston, MA: McGraw-Hill.
  63. ↑ Eysenck, M.W. (1990). Cognitive Psychology: An International Review. West Sussex, England: John Wiley & Sons, Ltd. (pp. 111).
  64. ↑ Chomsky, Noam (1959). "Reviews: Verbal behavior by B. F. Skinner". Language. 35 (1): 26-58.
  65. ↑ Baars, Bernard J. (1986) The cognitive revolution in psychology. Guilford Press, New York.
  66. ↑ Margaret A. Boden. (2008). Mind as machine: A history of cognitive science. Oxford University Press.

拎

編輯
 
維基書本度有本書關於呢個主題：Cognitive psychology
 
維基辭典有呢個詞嘅解釋：
認知心理學
由「https://zh-yue.wikipedia.org/w/index.php?title=認知心理學&oldid=2148721」收