馬來西亞文化
馬來西亞文化（粵拼：ma5 loi4 sai1 a3 man4 fa3）融匯咗馬來西亞各個民族唔同嘅文化。最早生活喺呢笪埞方嘅係馬來西亞原住民Orang Asli，佢哋依家仲喺處。之後係馬拉人，喺古時候由亞洲大陸遷徙到呢度。再到後來嘅華人同印度人，佢哋同馬來西亞嘅貿易同移民逐漸增加，所以華人文化同印度文化對馬來西亞文化嘅影響亦都好深。另外波斯文化、阿拉伯文化同英國文化都對馬來西亞文化有好大影響。今時今日馬來西亞國內各個民族，都有自己獨特嘅文化認同，互相之間又有交融。
淵源 編輯
種族 編輯
呢節要加長。 |
馬來西亞係一個多民族、多文化、多語言嘅社會。最大族群係馬來人、華人同印度人，另外，重有好多其他族群。
馬來人係馬來西亞最大族群，佔總人口大約50%以上，主要信奉伊斯蘭教同馬來傳統。
華人係馬來西亞第二大族群，大約佔總人口25%。馬來西亞華裔好大程度上採用咗馬來傳統，同時亦保留中華文化元素，佢哋有多數信佛教同道教。好多華人喺馬來西亞做生意同開餐廳。
印度人只係佔總人口大約10%，佢哋大多數喺英屬馬來亞時期嚟到馬來西亞。印度人多數信印度教同錫克教，同時亦將好多印度文化帶到嚟馬來西亞，例如廟宇特色、香辣食物同精美嘅莎麗。
原居民 編輯
馬來半島 編輯
馬來半島本地族群主要係尼格利陀族（Negrito）、色諾族（Senoi）同原馬來族（Proto-Malay）。尼格利陀族一般住喺北部，色諾族主要住喺中部，而原馬來族就住喺南部，每個族群都有自己嘅語言同文化。
沙巴州 編輯
沙巴州最大本地族群有卡達山杜順族、巴瑤族同毛律族（Murut）。
卡達山杜順族係沙巴州最大族群，佔沙巴州人口大約30%。嗰個族群其實包括兩個部落，分別係卡達山族同杜順族，因為語言同文化相同，所以合二為一。不過，卡達山族主要住喺平坦河谷三角洲，嗰度適合種植水稻，而杜順族主要住喺沙巴州內陸嘅丘陵同山區。
沙巴州第二大族群係巴瑤族，佔沙巴州人口大約 15%。
毛律族係沙巴州第三大族群，佔沙巴州人口大約3%。佢哋以前主要住喺婆羅洲北部內陸，係沙巴州最後一個放棄獵頭習俗——割取敵人頭顱——嘅族群。依家佢哋主要喺山度耕種水稻同木薯，有時亦會吹鏢打獵同捉魚。同沙巴州大多數原住部落一樣，佢哋傳統服裝點綴住各具特色嘅珠飾。
沙撈越 編輯
統稱為達雅克人嘅伊班族、比達友族同烏魯族係沙撈越州嘅主要少數民族。達雅克意思係上游或內陸，係沿海地區伊斯蘭人口用嚟稱呼200幾個部落群體嘅總稱。佢哋一般都住喺長形房屋入面，呢種傳統社區房屋可以容納到20至100個家庭。
伊班族係沙撈越最大嘅少數民族，佔沙撈越州人口大約30%。佢哋多數住係婆羅洲中心上游，大部分族人信奉基督教。
砂拉越嘅比達友族主要住喺沙撈越山區，大部分以農業同狩獵為生。以前獵殺人頭時期，佢哋會將作為戰利品嘅頭顱儲藏喺大約1.5米高嘅baruk（圓形房屋）入面。族人以前信奉萬物有靈論，依家好多信基督教。
烏魯族亦係沙撈越上游部落，大約佔沙撈越人口5.5%，依家大約有十萬多個唔同烏魯族部落。烏魯族人主要住喺裝飾住壁畫同精美嘅木雕寬大長形房屋；另外佢哋嘅器皿都點綴住花樣複雜嘅珠飾品；貴族女性都喺自己身體上面紋身。
語言 編輯
馬來西亞多元種族語言有馬來語、英語、華語、印度語，其中以馬來語係馬來西亞官方語言，而英文可被視為實際行政語言。馬來西亞華人除咗講華語，亦有講閩南話、廣東話、客家話、潮州話、海南話。淡米爾語係馬來西亞印度人嘅通用語言，亦有啲印度人用泰盧固語、馬拉雅拉姆語同旁遮普語。
部分華人亦精通多種華語。
融合語 編輯
雖然馬來文係馬來西亞官方語言，而英文係第二主要語言。因馬來西亞經歷過殖民統治，再加上馬來西亞係一個多元化民族國家，當中以馬來人、華人同印度人佔大多數，佢哋喺同一種群之間多數講返自己嘅語言，受唔同文化嘅影響唔多唔少會加入一啲特別詞彙喺英文同中文入面，而形成咗馬式英文同馬式中文。
飲食 編輯
馬來西亞飲食體現出呢個地方居民種族嘅多元[1]，所以飲食文化十分之豐富。馬來西亞本土同周邊國家嘅文化都影響咗馬來西亞飲食，尤其是係馬拉菜、唐餐、印度菜、泰國菜、爪哇菜同蘇門答臘菜。其中一個好緊要嘅原因係，馬來西亞舊陣時係香料貿易嘅重要通道。[2]馬來西亞飲食同星加坡飲食、汶萊飲食好相似[3]，亦同菲律賓飲食有啲似。馬來西亞各個州亦有自己獨特嘅菜式變化。喺馬來西亞搵到嘅各民族菜式，往往同原版唔一樣，自己改良咗。[4]
馬來西亞料理以米或麵作為主糧，通常以唔同風味烹調嘅肉或者魚做主菜，再配上蒸熟嘅蔬菜伴碟。而主菜食物多數會蘸上醬料食用。好多馬來西亞菜都係辣，辣味主要係香辣，辣度比泰國菜辣啲。
由於華人佔馬來西亞人口好多，好多華人會喺中國菜加入馬來西亞食材、醬料同特色，演化成匯聚咗兩者精髓嘅娘惹菜，喺馬來西亞唐人餐館好普遍。
馬來西亞印度人同阿拉伯人會將一部份香辛料，好似係辣椒、檸檬草、薑、咖喱葉同埋孜然等引入馬來西亞，受到呢種烹飪方法影響，部份馬來料理衍生成以蒸、煮同炒為主嘅濃味菜式。
馬來亞北部菜系同泰國菜味道比較接近，以酸辣為主，多用Assam香料。馬來亞南部菜係類似新加坡口味，甜味偏重。東馬沙巴菜就以清淡濃味兼有馬來華人特式，同時糅合咗椰香味重嘅娘惹菜特色。
娘惹菜 編輯
娘惹菜主要係馬來菜同中國菜嘅融合菜，主要喺東南亞馬來西亞、新加坡同印尼流行。
娘惹菜口味濃重，使用多種嚟自馬來料理常用嘅香料，好似係小蔥頭（shallot）、薑（會選用普通薑，山薑或南薑）、薑花、辣椒、薄荷葉、香茅、叻沙葉、班蘭葉、肉桂、蠟燭果（英文：candlenut，馬來話：buah keras）、羅望子、香菜籽、蒔蘿、蝦醬（峇拉煎）、青檸、鹹蝦醬（cincalok）、豆醬、棕櫚糖等，講究將香料研磨杵碎，調成稠糊嘅配料。另外華人傳統食材，例如椰漿、芒光、江魚仔、青瓜等，配合香料加以長時間嘅燉煮，最後成為一派色香味俱全嘅美食。
娘惹菜亦有地域嘅區別，好似叻沙咁，檳城附近鍾意加入酸味，而馬六甲新加坡一帶就鍾意加入椰漿同辣椒。
娘惹菜嘅經典特色菜餚有叻沙、烏打、娘惹粽、娘惹糕點、黑果燜雞等。其中黑果燜雞係一道典型嘅費工費時料理，主要配料黑果產自馬來西亞，係一道娘惹傳統嘅家傳菜餚，需人工一粒一粒處理黑果堅硬外殼，唔係主打娘惹菜嘅餐廳一般好難品嘗到。
主食 編輯
馬來西亞人以飯、米粉、河粉同麵作為主食。馬來人多數將米加椰奶蒸熟，俗稱『椰漿飯』；印度人偏向食用印度香飯；華人就偏向糙米或以雞油同浸雞水烹煮嘅飯（通常係指雞飯）。
由於馬來人信奉伊斯蘭教而唔可以食豬肉同豬製品，馬來料理多數以雞、牛、羊、魚、蝦同其他海鮮類為主。
菜 編輯
咖啡 編輯
怡保舊街場白咖啡係馬來西亞最出名嘅咖啡。除咗馬來西亞之外，好多地方亦有得買即沖白咖啡。
生果 編輯
馬來西亞喺熱帶地區，盛產好多唔同品種生果。
以下係部分馬來西亞盛產生果之一：
- 香蕉（pisang）
- 榴槤（durian） - 又叫做「果王」。
- 番木瓜（betik）
- 西瓜（tembikai） - 外綠內紅或黃色，果肉鮮甜多汁。
- 紅毛丹（rambutan） - 因為外表有好多毛而叫Rambutan（Rambut係指毛）
- 山竹（manggis） - 又叫做「果后」。
- 荔枝（laici）
- 芒果（manga）
- 龍眼 （longan） - 野生龍眼唔常見，市面上所售賣嘅龍眼係已經加工並加入糖水嘅罐裝製品，通常用嚟做果凍或甜湯時會加入
- 楊桃（belimbing besi）
- 蛇皮果（salak）
- 哈密瓜（glamour）
- 火龍果（buah naga）
- 番石榴（jambu）
- 菠蘿蜜（nangka）
- 蘆菇冷殺（duku langsat）
- 蓮霧（jambu air）
- 菠蘿（nanas）
- 楊桃（belimbing）
- 椰子（coconut）
- 蘋果（epal bakelalan）
建築 編輯
呢節要加長。 |
馬來西亞建築融合咗多種風格，融合咗伊斯蘭文化，中國風格、印度風格同歐洲殖民地風格。
英國風格 編輯
英國人喺殖民地時期修建過好多宏偉建築，其中比較出名嘅有蘇丹阿都沙末大廈（Sultan Abdul Samad Building），呢座大樓屬於摩爾式建築，喺1897年落成，曾經係英國人統治時期嘅殖民政府辦公大樓。
沙巴同沙撈越原住民風格 編輯
沙巴同沙撈越原住民有自己獨特建築風格，其中最有特色係長屋同水上村落。
長屋係傳統群居式住宅，主要係內陸河流沿岸部落住嘅地方。長屋係一排好長嘅高腳屋，一般用砍落嚟嘅木材搭建，再用藤蔓綁實，屋頂蓋住聶帕櫚葉或者茅草，可以容納到20至100户人家。
體育 編輯
羽毛球 編輯
好多運動都係馬來西亞受歡迎活動之一，其中羽毛球舉辦過大大小小嘅比賽。其中馬來西亞、印尼同中國喺1949年以嚟一直舉辦湯姆斯盃，吸引成千上萬觀眾欣賞。馬來西亞選手由馬來西亞羽毛球協會代表出席國際賽事，其中出名參與者有李宗偉。
璧球 編輯
壁球運動由英國軍隊喺殖民地時期帶到嚟馬來西亞，喺1939年舉辦第一次比賽。馬來西亞壁球協會（SRAM）喺1972年6月25號成立，並喺亞洲壁球比賽中多次攞佳績。其中馬來西亞草地滾球協會（PLBM）喺1997年成立，並已經成為強大國際團隊領域，並取得好大進步[5]。
足球 編輯
足球亦係馬來西亞受歡迎運動之一，馬來西亞各個州屬都有自己嘅足球會，並喺2004年之後都會舉辦馬來西亞超級足球聯賽進行互相較量。馬來西亞亦係東南亞足球協會成員之一。
曲棍球 編輯
曲棍球喺馬來西亞好受歡迎，馬來西亞隊喺2010年世界排名係第14位。馬來西亞有自己一級方程式賽道；雪邦國際賽車場，喺2000年舉行咗第一屆世界摩托車錦標賽。
哥爾夫球 編輯
全國各地有好多哥爾夫球場，呢幾年愈嚟愈多人打。
水上運動 編輯
馬來西亞有好多海灘，其中浮羅交怡、波德申、東馬嘅沙巴等地係潛水、帆船、水上運動出名度假聖地。
自1950年以來，馬來西亞就以「馬來亞」名義參加英聯邦運動會，而1966年以馬來西亞名義參加英聯邦運動會，喺羽毛球運動中佔主導地位，並喺1998年喺吉隆坡舉辦了一次比賽。1998年英聯邦運動會，馬來西亞火炬手人數首次超過東道主英國。
馬來拳 編輯
馬來拳（Silat）係一種馬來武術，亦係一項國際運動同傳統舞蹈形式。呢種武術喺馬來群島已經有幾百年歷史，特點係用行雲流水般嘅步法，令對手暈頭轉向。據說，通過練習馬來拳，能增強伊斯蘭教所推崇嘅心靈力量。每逢婚禮同節慶活動，馬來人成日伴著鑼鼓表演呢種古老武術。
藤球 編輯
_(cropped).jpg)
藤球（Sepak Takraw）係一種傳統球類運動。藤球係用竹條編成，除咗前臂同手，比賽者可以用身體任何部位傳球。藤球有兩種玩法，可以圍成一圈（bulatan）或者踢過網（jaring）。最初嘅玩法係比賽者圍成一圈，確保唔畀藤球落地。今時今日嘅玩法係喺場地中間設有球網，雙方將球踢到另一方半場。
休閒 編輯
風箏 編輯
馬來風箏係一種傳統風箏，喺馬來西亞半島東海岸吉蘭丹州盛行。以前嘅人成日喺收割稻米之後放風箏。呢種巨型風箏高度可長達 3.5 米。五彩繽紛嘅風箏上畫滿當地動植物圖案，其中馬來西亞航空嘅logo都係根據呢個風箏嚟設計。呢個風箏可以達到接近500米（1,640英尺）嘅高度，由於有竹子附住，所以飛行時會發出聲音。
陀螺 編輯
Gasing係一種巨型陀螺，有5公斤（10磅）重，似一個盤子。以前嘅人成日喺收割稻田前玩陀螺，佢需要力量、協調性同高超技巧。先將一條繩繞喺陀螺上面，然後猛拉繩子，陀螺就開始旋轉。呢個時候用一條中間開叉嘅木棍將陀螺挑起嚟，送到一個帶金屬容器嘅矮樁上。如果拉繩動作熟練，陀螺可以一直旋轉 2個鐘。
打花桿 編輯
打花桿（Sepak Manggis）係沙巴州巴瑤族同依拉農族（Iranun）男子一種戶外遊戲。參賽者面對面圍成一圈，目標係擊打10米高桿上掛住嘅山竹花車。獲勝者將贏得花車中裝住嘅獎金、禮物或者食物。
鐘格 編輯
鐘格（Congkak）係古代女性一種數學遊戲，當時嘅道具好簡單，喺地上挖幾個窿，再揾一啲羅望子種子。依家就用一塊橢圓形木塊，上面有兩排窿，每排各有5個、7個或者9個窿，末端嘅窿叫做「家」。鐘格係一種兩人遊戲，可以用貝殼、彈珠、石仔或者羅望子種子嚟玩。
茶文化 編輯
馬來西亞自古就係世界交通樞紐，有頻繁東西文化交流。其中，華人帶嚟中國茶葉，亦喺呢度分發銷售中轉。之後英國殖民地年代，英國人喺馬來西亞開拓茶園，到依家仍然存在，例如金馬倫高原嘅茶山。馬來西亞華人亦係大中華地區以外，最大嘅中國茶葉消費群組。大馬人，茶文化（Teh）已經發展出自己一套。茶｜Dea，正係一個發掘走訪大馬喺地茶文化嘅平台。
服裝 編輯
2013年開始，大多數馬來西亞馬來人女性都戴頭巾。喺1979年伊朗革命之前，使用呢種頭巾並唔罕見[6]，戴住頭巾嘅婦女通常住喺內陸地區。1970年代後，當馬來西亞同新加坡嘅馬來人之間對宗教保守主義興起時，頭巾使用有所增加[6] [7]。
1960年代，有一啲學者同宗教人士認為，笠頭唔係強制性[6]。到2015年，有馬來西亞學者覺得以前嘅觀點並唔係伊斯蘭教特徵[8]。馬來西亞嘅馬來人普遍對唔戴頭巾嘅穆斯林婦女產生負面反應。
音樂同舞蹈 編輯
.jpg)
最能展現馬來西亞多元文化同多種族傳統嘅，莫過於音樂同舞蹈。無論係本地馬來人、原居民定係沙巴同沙撈越各個族群嘅舞蹈都各有獨特特色。華人、印度人同葡萄牙人遷居馬來西亞後，佢哋家鄉嘅傳統舞蹈亦隨即融入馬來西亞文化同傳統。
馬來西亞嘅音樂好多元，融合咗馬來、華人、印度等不同族裔嘅音樂元素，展現豐富嘅音樂風貌。比·南利（1929—1973）作為馬來西亞音樂界最有影響力嘅人物之一，佢嘅音樂作品不止在馬來西亞好受歡迎，而且喺整個馬來文化圈都備受推崇，對馬來西亞音樂產業產生咗深遠嘅影響。
- 管弦樂隊
馬來西亞有兩支傳統管弦樂隊：gamelan 同 nobat。源自印尼嘅 gamelan 係一支傳統管弦樂隊，使用鑼同弦樂器，演奏嘅旋律歡快飄渺。nobat 係皇家管弦樂隊，使用 serunai 同 nafiri 管樂器，係皇室演奏較為莊重嘅音樂。
- 熱巴那大鼓（Rebana Ubi）
熱巴那大鼓體型巨大，喺古代嘅馬來王國，響亮而富有節奏嘅鼓聲用嚟傳遞各種信息，例如報警同宣佈婚禮。後嚟，呢種鼓作為樂器，出現喺各種節慶表演入面。
- 馬來手鼓（Kompang）
馬來手鼓係最流行嘅馬來傳統樂器，喺各種節慶活動中廣泛使用，例如國慶遊行、各種公務活動同婚禮中。佢有啲似鈴鼓（tambourine），只係無叮當作響嘅金屬圓片。馬來手鼓最常用於大型樂隊，通過重疊多個層次節奏，產生富於變化嘅節奏組合。
- 甘布思（Gambus）
甘布思又叫做阿拉伯烏得琴，由波斯同中東商人傳入馬來西亞。佢可以演奏唔同風格嘅馬來民間音樂，主要喺 Ghazal 音樂中擔任主樂器。甘布思嘅制作工藝考究，採用多種木料，聲音柔和，有啲似大鍵琴。
- 沙辟（Sape）
沙辟係Orang Ulu族（沙越上遊部族）嘅傳統長笛，由用一段木料掏空而成，再繪上彩色花紋，堪稱木雕精品。過去佢用於長屋內嘅治病儀式，而且係獨奏，之後逐漸用喺各種娛樂表演。佢奏出嘅主題音樂通常用於伴舞，例如英雄舞同犀鳥舞。
- 馬來瑪蓉舞（Mak Yong）
瑪蓉舞源於泰國南部北大年（Patani）。據說當年每逢打仗，皇室女子、皇后同公主嘅丈夫出征在外，佢哋就以瑪蓉舞作為消遣。瑪蓉舞係一種極具感染力嘅戲劇形式，通過浪漫劇情、舞蹈同詠唱，講述馬來王國鼎盛時期嘅故事。
- 騎馬舞（Kuda Kepang）
騎馬舞係爪哇移民傳到柔佛州嘅一種傳統舞蹈。舞蹈生動表現咗伊斯蘭聖戰嘅凱旋場景，舞者騎喺道具馬上，踏住打擊樂（通常包括鼓、鑼同竹琴）嘅節拍翩翩起舞。
- 雜賓舞（Zapin）
伊斯蘭文化對馬來西亞傳統舞蹈影響好大，最明顯嘅例子係喺柔佛州流行嘅雜賓舞。呢種舞蹈最初係由中東嘅穆斯林傳教士傳入，表演時伴以伊斯蘭聖歌，旨在普及伊斯蘭文明嘅歷史知識。
- 久賈舞（Joget）
久賈舞係一種活潑熱烈嘅舞蹈，係馬來西亞最盛行嘅傳統舞蹈之一。久賈舞係葡萄牙民間舞蹈，於香料貿易時期傳入馬六甲。佢係一種雙人舞，舞步優雅輕快，又不乏俏皮同幽默。
- 燭光舞（Tarian Lilin）
燭光舞係一種女子舞蹈，跳舞同時要保持小盤中嘅蠟燭不倒。
- 馬來拳（Silat）
馬來拳係最古老嘅馬來傳統之一，既係一種能致人死地嘅武術，亦係一種舞蹈藝術。
- 舞獅
舞獅表演一般喺華人農曆新年期間進行，特點係虎虎生風、威風八面。舞獅者需要有極高嘅協調性、優雅嘅氣質同鋼鐵般嘅意志，表演時一定踏住響亮嘅鼓點同銅鈸聲。
- 舞龍
舞龍表演一般喺華人農曆新年時進行，據說能為來年帶嚟好運同興隆。一支舞龍隊通常有60多人，表演展示完美嘅協調性、高超技藝同優雅氣質。
- 印度婆羅多舞（Bharata Natyam）
印度婆羅多舞係印度一種經典舞蹈，堪稱係流動嘅詩歌。舞蹈取材於古印度史詩，有百幾種舞步同舞姿，顯得張力十足、生動熱烈。
- 邦拉舞（Bhangra）
邦拉舞係錫克教一種民間音樂同舞蹈。最初係一種豐收舞，不過時至今日，好多節慶活動中都可以見到佢，例如婚禮同新年。邦拉舞圍繞住浪漫主題展開，表演者踏著朵爾鼓（dhol，一種雙桶鼓）嘅隆隆鼓聲載歌載舞。
- 英雄舞（Ngajat）
英雄舞係沙巴同沙撈越伊班族嘅傳統舞蹈。佢通常出現喺鳥神慶典（Gawai Kenyalang）。伊班族曾經係沙撈越最得人驚嘅獵頭者，佢哋戴住精美頭飾，手持華麗長盾，威風凜凜地來回跳躍，令人為之陶醉。呢種舞蹈就係獻給凱旋歸來嘅部落勇士，英雄舞表演者都係男性。
- 犀鳥舞（Datun Julud）
犀鳥舞係沙撈越肯雅族（Kenyah）女性嘅傳統舞蹈。舞蹈主題係歡樂同感恩，創作者係肯雅族王子 Nyik Selong。過去，每逢部落勇士獵頭歸來或者每年豐收慶典，族人都會跳起犀鳥舞以示慶賀。係一種用沙辟（sape）伴奏嘅單人舞，舞者手持犀鳥翎毛做成嘅靚羽扇，象徵呢種神鳥隻翼。
- 蘇馬紹舞（Sumazau）
蘇馬紹舞係沙巴州卡達山族嘅傳統舞蹈。呢種舞蹈一般喺宗教儀式同平時生活中表演，用嚟慶祝水稻豐收、驅趕邪靈同醫病。佢係一種男女合舞，以輕柔舒緩嘅舞姿模仿鳥兒飛翔。
.jpg)
- 竹竿舞（Bamboo Dance）
竹竿舞亦係一種好盛行且頗具觀賞性嘅傳統舞蹈。人們手持兩支長竹竿，喺腳踝高度平行於地面。隨住快節奏嘅鼓點，竹竿相互拍擊。跳舞嘅人要越過竹竿或者跳入竹竿之間，佢哋需要身手矯捷，否則腳會被夾住。
- 原居民（Orang Asli）
馬來西亞半島原居民嘅傳統舞蹈深深紮根於佢哋嘅信仰。巫醫成日通過舞蹈儀式同魂靈溝通。呢類舞蹈有瑪美里族嘅Genggulang、Jah-Hut族嘅Berjerom 同埋 Semai族同Temiar 族嘅 Sewang。
- 法拉佩拉舞（Farapeira）
法拉佩拉舞係馬六甲葡萄牙人流傳落嚟嘅一種歡快雙人舞蹈，舞者着住葡萄牙傳統服裝，通常以結他同鈴鼓伴奏。
- 布蘭樂舞（Branyo）
布蘭樂舞同樣係葡萄牙人流傳落嚟嘅一種舞蹈，同法拉佩拉舞相比，布蘭樂舞顯得較為沉穩。男性舞者着住牛仔裝，女性舞者着住傳統卡巴雅（baju kebaya），配以蠟染布裁成嘅紗籠，隨住鼓同小提琴嘅沈穩節奏左右搖擺。
中文流行曲 編輯
馬來西亞有完善嘅華文教育體系以及獲得龐大華人社團支持，所以保留咗大量蘊含中華文化嘅音樂傳統。另外，馬來西亞亦有好多出名華裔音樂人同歌手，好似巫啟賢、黃明志、梁靜茹、王光良、品冠、張智成、宇恆、曹格等。
媒體 編輯
馬來西亞報紙主要用馬來語、中文、英文、同泰米爾語文字出版。主要報紙有：馬來文嘅《Berita Harian每日新聞》、《Utusan馬來前鋒報》；英文嘅《The Star星報》、《New Strait Times新海峽時報》、《Malay Mail馬來郵報》；華文嘅《星洲日報》、《中國報》、《馬來西亞東方日報》、《南洋商報》等。
- 馬來西亞國家新聞社，簡稱Bernama、馬新社，半官方通訊社，喺1968年成立，亞太地區設有33間分社。
- 馬來西亞廣播電視：官辦，簡稱RTM。
- 馬來西亞廣播台：擁有Radio Klasik、Nasional FM、TraXX FM、Ai FM、Minnal FM、Asyik FM 6個國家電台頻道、17個州電台頻道，用馬來語、英語、華語、泰米爾語同其他土著語言廣播。私營廣播台有Fly FM、Hot FM、One FM等。
- 馬來西亞電視台喺1963年起。包括第一電視台（TV1）、第二電視台（TV2）同TV Okey，用馬來語、英語、華語等播放。私營電視台有第三電視台（TV3）、NTV7、八度空間（8TV）同TV9。
馬來西亞執政聯盟巫統通過投資臂膀嘅首要媒體集團設有四個頻道，即：TV3、NTV7、八度空間（8TV）同TV9。1996年成立嘅Astro集團係國內主要嘅收費衛星電視頻道。
相 編輯
-
-
馬拉小朋友着特色衫褲過哈芝節。
參考 編輯
- ↑ Eckhardt, Robyn (2008). Kuala Lumpur Melaka & Penang. Lonely Planet. p. 42. ISBN 9781741044850.
- ↑ "Far Eastern cuisine: Fancy a Malaysian? – Features, Food & Drink". 獨立報. 2010-10-13. 喺2010-11-03搵到.
- ↑ Richmond, Simon (2010). Malaysia, Singapore & Brunei. Lonely Planet. pp. 70, 72. ISBN 9781741048872.
- ↑ West, Barbara A. (2009). Encyclopedia of the Peoples of Asia and Oceania, Volume 1. New York: Facts on File inc. p. 486. ISBN 0-8160-7109-8.
- ↑ "MALAYSIA LAWN BOWLS FEDERATION |Country Clubs, Sports Council, Athletic Association, Sports Foundation | Ad | 88DB Malaysia". web.archive.org. 2011-07-07. 歸檔時間2011-07-07. 喺2019-12-16搵到.
{{cite web}}: CS1 maint: bot: original URL status unknown (link) - ↑ 6.0 6.1 6.2 Boo, Su-lyn. "Tudung industry in Malaysia: Cashing in on conservative Islam" (). The Malay Mail. May 9, 2015. Retrieved on August 28, 2015. See version at 互聯網檔案館嘅歸檔，歸檔日期2019年3月31號，. Yahoo! News.
- ↑ Fernandez, Celine. "Why Some Women Wear a Hijab and Some Don’t" (). The Wall Street Journal. April 18, 2011. Retrieved on August 28, 2015.
- ↑ 引用錯誤 無效嘅
<ref>標籤；無文字提供畀叫做Leongfashion嘅參照
