維基百科

仙子

(由妖精跳轉過嚟)

仙子sin1 zi2（英文：fairy，或者 faerie, faery, fae, fay 等[1]），又叫小仙子、小妖精、仙靈或者神仙，係一種傳說生物，常見於歐洲多地嘅民間故事－包括英格蘭、蓋爾特地區、法國以至斯拉夫地區等多地，都有民間故事講到仙子[2]。

1869 年英國一幅油畫；幅畫描繪畫家跟住一首詩想像出嚟嘅仙子形象－
"Take the Fair Face of Woman, and Gently Suspending, With Butterflies, Flowers, and Jewels Attending, Thus Your Fairy is Made of Most Beautiful Things."
英到粵翻譯：「攞一塊女人嘅白淨靚面，
溫和噉懸浮住（supsending），
有蝴蝶、花同珠寶睇住（attending），噉
你隻仙子就係用最靚嘅嘢（thing）造嘅。」
  提示：呢篇文講嘅唔係精靈。

仙子一詞嘅定義相當含糊，不過大致有以下呢啲詮釋[3]－

仙子相關嘅橋段具有相當嘅文化影響力：中世紀嘅歐洲人有好多關於仙子嘅迷信，例如佢哋信仙子怕凍鐵，所以會攞凍鐵造嘅物品嚟防仙子[6]；喺中世紀後，仙子都仲有出現喺文化產物裏面，例如莎翁名作《仲夏夜之夢》就有講到仙子[7]；到咗廿一世紀初，好少可會有人信仙子嘅存在，但仙子依然係成日出現喺奇幻故仔入面，當中小叮噹同神仙教母都係家傳戶曉嘅虛構角色[2]。

基礎

編輯
 
1897 年嘅一幅畫；幅畫描繪畫畫人想像中「神仙教母（左邊個老女人）幫佢個教女灰姑娘（右邊個後生女）準備南瓜馬車」嘅情境。
睇埋：鬼魂同奇幻

2022 年嘅不列顛百科全書係噉樣描述仙子嘅[1][8]：

粵文翻譯：仙子，（係）一種民俗同浪漫嘅神話中嘅存在體，通常有魔法力量，同埋會喺地上住同人類有緊密嘅關係。

例如著名童話故事《灰姑娘》入面嘅神仙教母[歐 2]就係一個好出名嘅仙子角色[註 1]：個故仔講到灰姑娘冇得去舞會，覺得好唔開心；喺佢最絕望之際，佢個神仙教母出場；神仙教母係灰姑娘嘅教母，想幫灰姑娘（同人類有緊密嘅關係），於是佢施展魔法，變條靚裙出嚟畀灰姑娘著，再變架南瓜馬車出嚟載灰姑娘去舞會（魔法力量），幫咗灰姑娘好大嘅忙[9]。

廣義仙子

編輯
睇埋：傳說生物

廿世紀嘅創作品，成日都會將仙子描繪成「望落似生得好細（得昆蟲咁大）嘅人類、用魔法幫人」嘅一種奇幻生物[1]，但喺最廣義上，仙子可以包嗮任何中世紀（大約 5 至 15 世紀期間）歐洲啲民間傳說入面嘅超自然生物，包括[1]：

  • 矮精靈[歐 3]：常見於愛爾蘭嘅民間傳說，形象通常係鬍鬚濃密、得大約 3 呎咁高嘅男人，多數著住綠色衫同戴住綠色帽（睇下面嘅圖）；性格上，矮精靈多數係聰明又古惑－啲故仔成日講到，有人類想捉住矮精靈搵出佢哋收埋嘅黃金，但矮精靈詭計多端，好多時人類望向第度再望返轉頭，矮精靈已經連影都冇埋[10]。
  • 鬼火[歐 4]：植物喺沼澤裏面腐爛嗰陣會釋放氣體，引致好似火噉嘅光，呢啲光就係鬼火；中世紀嘅歐洲有好多關於鬼火嘅傳說，例如有傳說話一笪位置有鬼火，表示有仙子喺嗰度埋咗堆黃金，又有講法話鬼火本身係種靈或者仙子，會引誘人跟佢入去（好多時充滿咗有毒嘢嘅）沼澤[11]。
  • 報喪女妖[歐 5]：愛爾蘭民間傳說入面嘅一種靈；根據傳說，當一個人就嚟要死嗰陣，報喪女妖可能會現身，報喪女妖會喺即將要死嗰個人屋企外尖叫或者喊，而佢嘅叫聲往往會令周圍嘅人不寒而慄；外形上，報喪女妖多數會係年老嘅女人、著住長同灰黑色嘅斗篷、而且對眼因為喊得多而紅嗮[12]。
  •  
    呢幅圖描繪廿世紀嘅典型矮精靈形象；
    矮精靈可以算係廣義上嘅仙子。
  •  
    1880 年一幅圖畫；
    幅畫描繪想像中「鬼火引誘人行入沼澤」嘅情境。
  •  
    1825 年一幅圖畫；
    幅畫描繪想像中「報喪女妖坐喺樖樹下面喊」嘅情境。

上述呢啲噉嘅傳說生物，都可以算係廣義上嘅仙子。喺廿世紀前，有好多歐洲人都信仙子真係存在，例如英格蘭嘅文獻起碼喺 13 世紀嗰陣經已提到講仙子嘅傳說[13]，信仙子存在嘅人會例如因為怕仙子而帶凍鐵喺身（因為佢哋認為凍鐵可以趕走仙子）；隨住科學進步，現代人好少可會信仙子存在，不過仙子嘅形象依然成日都會喺大眾媒體嘅創作品裏面出現，當中有奇幻性質嘅虛構故仔零舍興用仙子呢條橋kiu2[14]。

起源傳說

編輯
睇埋：寧芙同薩提洛斯

中世紀嘅歐洲廣泛噉流傳仙子相關嘅傳說。當時啲傳說對仙子嘅來源眾說紛紜[15]：

降級天使

編輯
 
1866 年嘅一幅畫；幅畫描繪想像中「天使長彌額爾（最上面）將作反嘅天使趕出天國」嘅情境。
睇埋：天國戰爭同墮天使

中世紀歐洲以基督教做主導嘅，而唔少當時嘅歐洲人都認為仙子係畀上帝「降咗級」嘅天使[15]。

事源係《啟示錄》裏面有天國戰爭嘅故仔：根據呢個故仔，上帝手下最靚最奪目嘅天使路西法[歐 6]自高自大，諗住自己好勁有能力做上帝，於是就帶領住一班天使作反，天使長彌額爾[歐 7]帶領效忠上帝嘅天使反擊，兩班天使喺天國打咗場大交之後路西法輸咗，最後佢畀上帝逐出天國，成為墮天使[註 2]；喺場仗當中，企上帝嗰邊嘅天使留喺天國，企路西法嗰邊嘅就跟路西法去地獄。而民間有傳說話，場仗當中冇企任何一邊嘅天使就唔夠良善（冇企上帝嗰邊，冇得留喺天國）又唔夠邪惡（冇企路西法嗰邊，未使要去地獄），呢啲天使就要落人間，變成仙子[16]。

呢啲傳說話，仙子未至於邪惡到係魔鬼，但唔夠良善所以會受撒旦影響，因而可能會捉人[17]，攞人嚟做貢獻畀撒旦嘅什一奉獻[18]。而根據文獻，「仙子係墮天使嘅一種」呢個諗法到咗 19 世紀都仲有人信緊[19]。

第啲起源

編輯
睇埋：基督教化同邪靈
  • 異教神祇[註 3]：公元前嘅歐洲以多神教做主導－例如古希臘嗰陣啲人會拜宙斯等嘅古希臘天神，或者會拜寧芙呀噉；不過由公元 1 世紀起，基督教開始喺羅馬帝國傳播，而據講到咗 5 世紀開頭，覆蓋當時半個歐洲咁滯嘅羅馬帝國，已經變咗以基督教做主流，就算西羅馬帝國冧咗（喺 470 年代發生），基督教仲會係歐洲嘅主流[20]；基督教其中一條核心教義係一神論，認為得上帝係有資格畀人拜嘅，一般唔俾信徒派第啲神，然後就有傳說講，仙子查實係基督教打前嗰啲教（所謂嘅異教）嘅神祇，仙子有超自然力量曾經畀人奉為神靈，但因為歐洲基督教化佢哋唔再畀人崇拜，搞到佢哋喪失神祇嘅地位[21]。
  • 邪靈：中世紀後曾經出現過「仙子係邪靈」噉嘅信念；根據紀錄，17 世紀有基督徒曾經宣稱「仙子冚唪唥都係邪靈」[22]，呢套諗法仲喺嗰個世紀風行一時；因為噉，當時有啲社群－尤其係出嗮名嚴嘅清教徒[歐 8]社群－會將「同仙子打交道」同「使用巫術等嘅邪術」兩者畫上等號，會當正聲稱自己有同仙子來往嘅人係巫術使用者，會用當時對付巫術使用者嘅方法（包括繯首同火刑呀噉）嚟對付呢啲人[23][24]。
  • 有傳說仲話仙子係元素精靈或者死者嘅靈魂[25]。

... 呀噉。

中世紀嘅描述

編輯
睇埋：魔法、仙子之地、精靈、高扁同矮人

"Up the airy mountain, Down the rushy glen, 'We daren't go a-hunting, For fear of little men;"

『爬上廣闊嘅高山，行落草多嘅溪谷（rushy glen），我哋唔敢去打獵，因為怕咗細細人（little men）。』當中細細人係指仙子。

－取自 19 世紀愛爾蘭詩人威廉亞靈咸[歐 9]嘅作品《The Fairies》[26]

中世紀嘅仙子形象同現代嘅好唔同：根據中世紀嘅傳說，仙子有好多怪異力量、往往望落似人但唔係人[註 4]、可以似大人咁大隻又可以似蝴蝶咁細隻[27]，而且唔會跟人嘅道理諗嘢，更加唔會跟人嘅道德行事－呢點有別於廿世紀嘅虛構故仔成日將仙子描繪成可愛同友善嘅形象[28][29]。事實係有學者睇返中世紀對仙子嘅描述，指出啲描述聽落似瘦長男多過似神仙教母[30]:Ch. 1。

拐帶人類

編輯
 
中世紀一幅畫；幅畫描繪「魔鬼趁父母睇唔到偷走個臊孲仔，留低個調換兒頂替」嘅情境。
内文：調換兒

中世紀嘅歐洲廣泛噉流傳住調換兒[歐 10]嘅傳說：

  • 根據呢啲傳說，仙子好鍾意拐帶人類嘅臊孲仔，將呢啲臊孲帶返去仙子之地[歐 11]度做奴僕或者貢獻畀撒旦嘅什一奉獻[17]：當一隻仙子捉走一個臊孲仔嗰陣，好多時會同時擺低佢自己嘅細路－呢啲「由仙子所生、同一個人類臊孲仔調換咗」嘅細路就係所謂嘅調換兒；傳說講，調換兒個樣望落同正常人類冇乜大分別，但行為古怪或者異常咁古惑，而且佢哋仲好大食，會食窮自己嘅養父母[31]。
  • 中世紀歐洲嘅民間有好多關於調換兒嘅迷信－有父母驚自己嘅臊孲仔畀仙子調換，所以會喺個臊孲仔床頭擺低嚿凍鐵（當時嘅傳說話仙子驚凍鐵），或者要個細路一出世就有咁快得咁快受洗（受洗被認為能夠驅除邪惡力量）；又有傳說話「如果有方法引個調換兒大笑，自己個親生細路就會返嚟」... 呀噉[32]。

除咗臊孲仔之外，有傳說話仙子仲有可能會拐帶青少年甚至大人：例如有啲傳說話仙子零舍鍾意拐走金頭髮同生得靚嘅後生女[33]，又有傳說講仙子拐走個啱啱生咗細路冇耐嘅成年女人，迫個女人餵奶畀仙子嘅臊孲仔飲[34]；又例如愛爾蘭嘅 púca（類似粵拼：put1 kaa4）噉－púca 係種曉變身嘅仙子，成日會用各種方法誘拐後生男女，例如係變身扮成一隻又靚又友好嘅俊馬，引誘後生男女騎上去，隻 púca 跟住就會帶佢走，畀佢哋帶走嘅後生仔女下場不明[35]。

畀仙子拐走嘅細路同大人，下場好多時都係「不明」，有傳說話呢啲人會畀仙子食落肚，又有講法係佢哋要永遠做仙子嘅奴隸[4]。

其他惡行

編輯
睇埋：仙子環

除咗拐帶大人細路之外，中世紀傳說裏面嘅仙子仲有做出種種害人嘅行為：

  • 德國嘅童話故事《個名怪嘅小妖》[歐 12]有提到，有隻仙子幫一個後生女將禾稈草變成金，代價係「想要得到嗰個後生女嘅第一個親生細路」，打後過咗好多年，個女仔做埋皇后仲生咗個細路，隻仙子再現身想要帶個細路走，個女人唔肯隻仙子就發爛渣，想用法力夾硬搶走個細路[36]。
  • 喺英格蘭同愛爾蘭等地嘅民間傳說有講到所謂嘅仙子環[歐 13]：仙子環係種自然現象，指一拃菇生埋一齊，而且啲菇排到成一個圈噉嘅樣（好似下圖噉）；根據歐洲多地嘅民間傳說，仙子環源自有一班仙子喺個位度成羣噉跳舞，而如果有人類行咗入個仙子環裏面，就會中仙子嘅咒語，仙子嘅咒語會迷惑嗰個人嘅心智，令嗰個人成為仙子嘅奴僕，或者會令個人唔受控制係噉跳舞，一路跳到冇嗮力攰死為止[37]。
 
2004 年比利時一角有個仙子環－啲菇圍埋一個圈噉生。中世紀嘅歐洲人似乎覺得呢種現象有啲恐怖，係仙子喺度作怪。
  • 愛爾蘭民間傳說有提到餓草[歐 14]：相傳仙子有陣時會周圍去種低啲餓草，餓草係種受詛咒嘅草；如果有人踩咗上去餓草上面，就會受詛咒，詛咒會令佢永遠都覺得肚餓，而且無論點食嘢都唔會再覺得飽[38]。
  • 有故仔仲話仙子會殺人同好似吸血鬼噉飲人血：喺愛爾蘭同蘇格蘭等地流傳住呢類嘅傳說，話仙子口渴起上嚟會想飲水，但飲人血對佢哋嚟講都解到渴；所以傳說就勸人，夜晚要喺屋企擺定桶水，噉仙子口渴起上嚟就會攞水飲，而唔係想搵人血飲；呢啲地區有傳說直頭話，某啲仙子（好似現代嘅吸血鬼形象噉）需要定時定候飲人血維生[4]。

... 等等。

防治方法

編輯
 
歐洲多地都有傳統迷信話「凍鐵可以趕走超自然力量」，所以啲人好興掛嚿馬蹄鐵喺屋企門口。
内文：凍鐵

中世紀歐洲人有好多防治仙子嘅方法：當時啲人好多都好怕仙子，自然想知有乜方法可以（例如）整護身符防仙子；而對於「仙子要點防」呢條問題，歐洲唔同地區嘅人嘅答案唔同，而且根據啲傳說，仙子又分好多種，唔同種嘅仙子嘅防治方法都可能唔同；喺蓋爾特地區，就有傳統做法係「要隨身帶住麵包、忌廉或者牛油」，根據呢種做法，人一旦撞到隻仙子就要送呢啲嘢畀佢，噉做可以討好隻仙子，令隻仙子唔會害佢[19]；亦有部份嘅傳說話仙子會好似邪靈噉，怕十字架等嘅神聖物品。

喺咁多種仙子防治方法當中，最出名嘅要數凍鐵（凍嘅熟鐵）：中世紀嘅歐洲人相信凍鐵能夠壓制（甚至消滅）邪派嘅超自然力量，包括仙子、鬼魂同埋巫術使用者都會怕凍鐵；當中中世紀嘅英格蘭就有種迷信，話仙子最驚用凍鐵造嘅馬蹄鐵，於是啲人好多時會喺屋企門口或者牆上面掛返嚿馬蹄鐵，仲諗住噉做會帶嚟好運[39][40]；有啲傳說仲話，要殺死一隻仙子，唯一嘅方法係攞把凍鐵刀一嘢捅佢[6]；因為噉，啲人會（例如）喺啱啱出世嘅仔女嘅床頭擺嚿凍鐵，防範仔女畀仙子拐走（睇返上面調換兒）。

「仙子驚凍鐵」呢條橋喺現代創作品度都有出現。例如 2014 年出嘅迪士尼黑暗奇幻電影《黑魔后：沉睡魔咒》[歐 15]就有做出「一隻仙子一掂到凍鐵造嘅物件，就會畀嚿鐵燒親」噉嘅設定[註 5]。

16 至 18 世紀

編輯
睇埋：仲夏夜之夢、莎士比亞、童話故事同神仙教母

喺中世紀過後，仙子嘅形象開始變到比較「似人」，當中莎士比亞名作《仲夏夜之夢》[歐 16]（1590 年）可以話係呢個時期最出名嘅仙子相關作品[41][42]。

《仲夏夜之夢》嘅情節大致係噉嘅[註 6][7][41][43]：

  • 後生女何密雅[歐 17]愛上咗後生仔賴山德[歐 18]，但何密雅阿爸想佢嫁畀德米曲斯[歐 19]；何密雅阿爸帶佢個女去見雅典嘅公爵，公爵下令要何密雅聽佢阿爸話；當晚，何密雅同賴山德決定要私奔，而且兩個人仲將佢哋嘅私奔大計話咗畀佢哋好朋友海倫娜[歐 20]知；不過原來海倫娜暗戀德米曲斯，仲因為想贏取德米曲斯好感而將單嘢爆畀德米曲斯知，然後德米曲斯同海倫娜就緊隨喺何密雅同賴山德後面，四個人走咗入座樹林度。
  • 喺樹林深處，仙子之王奧伯朗[歐 21]同仙子女王泰妲妮亞[歐 22]兩公婆嗌緊交。事源係泰妲妮亞有個好得意嘅調換兒僕人，奧伯朗好鍾意，想收個調換兒做自己僕人，但泰妲妮亞唔肯。於是奧伯朗就諗詭計，想引泰妲妮亞送個調換兒畀佢，奧伯朗命令佢手下柏克[歐 23]去搵一隻植物，向泰妲妮亞落咒－原來嗰隻植物有魔法，當隻植物嘅汁液滴咗入一個瞓緊覺嘅人嘅眼度，就會令個人愛上佢瞓醒之後第一眼見到嘅生靈。柏克搵咗隻植物返嚟，跟手奧伯朗就靜靜雞趁泰妲妮亞瞓覺，對泰妲妮亞落咒。
  • 同時，有班雅典嘅後生仔因為要喺公爵嘅婚禮度表演，所以喺樹林裏面做綵排。柏克見到，就向其中一個後生仔－逼迫桶[歐 24]－落咒，將逼迫桶個頭變成好似驢頭噉嘅樣，逼迫桶班同伴見到就嚇到冚唪唥走嗮；冇幾耐，泰妲妮亞瞓醒，佢第一眼見到嘅，就係個頭變咗驢頭嘅逼迫桶，於是佢喺咒語影響下即刻愛上咗逼迫桶。


 
19 世紀中一幅油畫；幅畫描繪《仲夏夜之夢》當中「泰妲妮亞受咒語影響，攬住驢頭逼迫桶」嘅情境。中世紀後嘅故仔，成日都講仙子做埋嗮啲噉嘅惡作劇。


  • 與此同時，海倫娜追住德米曲斯，兩個人行入樹林。奧伯朗聽到兩個人嘅聲，睇得出海倫娜單戀德米曲斯，於是就叫柏克對德米曲斯落咒，令佢愛上海倫娜；不過柏克搞錯咗，個咒落咗去賴山德身上；跟住就變成四角戀嘅狀態－何密雅鍾意賴山德，賴山德受咒語影響變咗鍾意海倫娜，海倫娜鍾意德米曲斯，而德米曲斯鍾意何密雅；喺混亂當中，何密雅好嬲，唔知點解自己伴侶突然鍾意咗第個女人，而賴山德同德米曲斯仲開始想打交。
  • 一輪混亂後，奧伯朗施咒令四個人瞓著，郁手更正返個咒語。過咗一陣，泰妲妮亞清醒返，見到自己攬住隻驢頭怪物，覺得又驚又冇面，跟住佢見到笑笑口嘅奧伯朗，就出於羞愧應承奧伯朗嘅要求，將個調換兒僕人送畀奧伯朗－奧伯朗詭計得逞。
  • 冇幾耐，四個迷迷糊糊嘅後生男女醒返，諗住打前發生嘅一切都係場夢。何密雅同賴山德恢復正常，而德米曲斯鍾意咗海倫娜。同時逼迫桶個頭變返原狀，都係信自己發咗場怪夢。最後就到公爵嘅婚禮－公爵結婚，何密雅嫁到畀賴山德，德米曲斯同海倫娜又成婚，場婚禮就喺逼迫桶同佢班同伴嘅表演下歡樂收場。
  • 成齣戲嘅最後一景，奧伯朗、泰妲妮亞同佢哋手下嘅眾仙子一齊施咒，祝福在場嘅人類。大團圓結局。

有學者指出，《仲夏夜之夢》描繪嘅仙子同中世紀嘅民間傳說有顯著差異：响中世紀嘅故仔當中，仙子往往係好似外星人噉唔跟人類法則嘅－望落似人，但同人有某啲根本上嘅差異[註 4]；而响莎翁筆下，仙子就比較似人類－佢哋有陣時會惡作劇同埋做壞事，例如齣劇就有提到調換兒，但係佢哋又有善良嘅一面，有可能會想幫人，例如齣劇講到奧伯朗對海倫娜產生同情，又講到班仙子响結局度祝福在場嘅人類[44][45]；除此之外，據講某啲版本嘅《仲夏夜之夢》仲有提到「奧伯朗同佢啲手下唔怕教堂鐘嘅聲」－廿世紀前嘅歐洲人廣泛噉相信，教堂鐘同十字架等嘅神聖物品會壓制啲邪嘢，例如吸血鬼就成日畀人描繪成「怕十字架」，而仙子唔怕呢啲神聖物品，就表示佢哋唔係邪嘢[46]。

值得一提嘅係，啲人就係喺呢個時期開始嗌童話故事做仙子故事（英文 fairy tale）嘅：當時法國嘅童話故事成日都提起仙子－包括 1697 年版嘅《灰姑娘》提到嘅神仙教母；當中著名法國童話作家道羅夫人[歐 25]採用咗法文詞 contes de fées－即係仙子故事噉嘅意思－嚟稱呼童話，令到唔少歐洲語言都跟住採用同一種嗌法[47]。

浪漫主義影響

編輯
睇埋：仙子畫、糖梅仙子、紫丁香仙子同牙仙
睇埋：藍仙子、小飛俠同溫蒂、小叮噹同迪士尼

喺浪漫主義[歐 26]盛行嘅維多利亞時代（包括大半個 19 世紀），而且仙子嘅形象開始畀人美化咗。喺不列顛群島，司各特[歐 27]同埋吉百齡[歐 28]等嘅出名作家，都有喺佢哋嘅作品裏面提到仙子，而且呢啲作品好多都係原創嘅虛構故仔[48]。

呢個時期最出名嘅仙子相關作品，要數 1904 年劇作（兼 1911 年長篇小說）《小飛俠同溫蒂》[歐 29]－呢份作品入面有提到小叮噹[歐 30]呢個角色，小叮噹佢係隻仙子，得蝴蝶咁大隻，有翼識飛，而且仲喺故仔途中多次幫主角－例如喺主角溫蒂畀鐵鈎船長捉走咗嗰陣，就係小叮噹通知小飛俠嘅[49][50]，而 1953 年嘅迪士尼電影版就有講到小飛俠將小叮噹啲仙子塵（一種金光閃閃、輕飄飄噉嘅粉）糝sam2落主角溫蒂同佢細佬身上，令佢哋暫時識飛；《小飛俠同溫蒂》可以話係確立咗「迪士尼化嘅仙子」嘅形象－部劇作同本小說都大受歡迎，係維多利亞時代英倫最出名嘅文學作品之一；而且打後迪士尼仲喺 1953 年發行動畫電影《小飛俠》，令到個故仔得到國際性嘅知名度，而「細細隻、會幫人嘅得意小仙子」呢個概念就自然變到深入民心[4]。

順帶一提，仙子畫呢家嘢就係喺 19 世紀興起嘅－仙子畫顧名思義泛指畫仙子嘅畫[51]，到咗廿一世紀都仲有好多人畫。

 
2008 年一幅畫；幅畫描繪想像中嘅「得意小仙子」。

到咗廿世紀，仙子嘅形象基本上完全「迪士尼化」[註 7]：喺廿世紀嘅奇幻作品－例如《薩爾達傳說系列》同《咕嚕咕嚕魔法陣》等嘅日本作品－當中，仙子畀人描繪成比較細粒（好多時得昆蟲咁大隻）、有好似蝴蝶噉嘅翼、仲會施展魔法幫主角。呢種仙子角色多數係女嘅，當中有啲作品仲可能作出「仙子族成個族冚唪唥都係女嘅」噉嘅設定[1]。

浪漫主義影響後嘅仙子形象，同中世紀嘅仙子形象爭好遠：有唔少人睇完《小飛俠》等嘅作品，覺得仙子係得意嘅；跟住佢哋再睇返中世紀嗰啲講仙子嘅民間故事，覺得好詫異，因為兩者爭好遠－中世紀啲故仔成日講仙子好似瘦長男噉會令人失蹤，甚至話仙子好似吸血鬼噉飲人血[4]；有作家同相關嘅工作者指出，仙子嘅形象喺歷史上出現巨變[註 8]，因為好多原因－一方面係因為《小飛俠》等嘅作品，另一方面係廿世紀嘅人成日諗住仙子（同埋好多傳說生物）有怪異力量得意，冇留意到中世紀嘅人查實好驚仙子，例如有作家就噉講[52]－

「
取自 1992 年英格蘭奇幻長篇小說《Lords and Ladies》[歐 35]，簡化粵文翻譯：

精靈激發稱奇感、
引致奇蹟、
創造幻想、
投射魅力、
編織咒語、
帶嚟驚懼。
字（呢樣嘢）特別在於意思可以好似條蛇噉扭曲，而如果你想搵蛇就要去意思改變咗嘅字背後（嗰度搵）。
從來冇人話過精靈友好善良。

」

到咗 2000 年代，經已有好多人留意到「中世紀式仙子同迪士尼式仙子好唔同」呢點，當中有啲人仲打算喺創作品裏面結合兩種仙子形象，務求作出橋段上嘅創新[4]。

仙子分類

編輯
睇埋：美人魚、獨角獸、元素精靈同耶加婆婆

有歷史同文學領域嘅學者研究中世紀嘅文獻，發覺有好多種傳說生物都有畀人當做仙子，種種特性都唔同。以下係比較出名嘅廣義仙子，按英文名最頭嗰個字母排先後：

  • 亦可以睇返上面提咗嘅矮精靈、鬼火同報喪女妖。
  • 血骨精[歐 36]：源於 16 世紀英格蘭嘅怪獸；根據傳說，血骨精外形好恐怖，佢哋塊面永遠都係血淋淋噉嘅，而且仲會坐喺一大堆骨頭上面，鍾意住喺深嘅水池或者樓梯底等黑暗嘅地方，等住將講大話嘅細路拉入去黑暗當中－血骨精類似 boogeyman，主要係由啲父母講嚟嚇到啲細路聽話嘅[53]。
  • 藍帽精[歐 37]：一種英蘇邊界嗰頭嘅仙子；藍帽精係種住喺礦場等地嘅仙子，相傳外形似一團細細哋、藍色嘅火；廿世紀前唔少礦工都相信，如果佢哋尊重藍帽精，藍帽精會對返佢哋好－例如係會帶佢哋去礦藏豐富嘅地方，或者喺塌陷等危險嘢就嚟發生嗰陣警告佢哋... 呀噉[54]。
  • 博格[歐 38]：英格蘭民間傳說提到；一隻博格會係隻屋內神或者股邪惡嘅場所精神（即係話每隻博格都會掕住笪特定嘅地），住喺平原或者沼澤；屋內神型嘅博格鍾意惡作劇，會特登偷走啲小物品或者搞到啲牛奶變酸，而住喺沼澤入面嘅博格更加邪惡，時不時會拐帶細路[55]。


 
呢幅圖畫描繪想像中「半夜三更，有班棕精靈喺度幫手執嘢」嘅情境。


  • 棕精靈[歐 39]：英格蘭同蘇格蘭嘅民間傳說都有提到；棕精靈係一種勤奮做嘢嘅仙子，據講佢哋會喺夜晚－趁啲人類冚唪唥瞓嗮覺－嗰陣入屋，並且幫間屋嘅主人打掃或者做第啲家務，亦有傳說話棕精靈會做惡作劇而且專整蠱懶人；如果有隻棕精靈入咗屋，住間屋嘅人需要臨瞓前擺低一碗牛奶、忌廉或者第啲好味嘅嘢，報答隻棕精靈；如果唔報答棕精靈，棕精靈可能會發嬲走人，而且走咗唔會返嚟[56]。
  • Dullahan（粵拼：du1 laa4 han4）：Dullahan 係種近似邪靈嘅仙子；佢最重要嘅特徵係個頭甩咗落嚟，而且佢仲會一手攞住佢自己個頭、一路騎住隻黑色馬，喺最黑暗嘅夜晚現身；佢可能會攞住條人類嘅脊骨當鞭噉用，或者佢隻馬會拉住架用人嘅骨同皮膚造嘅馬車；有傳說話，一旦 dullahan 嗌某個人嘅名，嗰個人就會即刻當場暴斃[57]。
  • 精靈[歐 40]：源自日耳曼人嘅民俗嘅傳說生物；原先嘅精靈形象最大特徵係惡作劇同埋難預測，據講會向人同牲畜落咒令佢哋患病，又會拐帶細路留低調換兒，而且仲有傳說講精靈趁人瞓覺嗰時坐落人嘅心口度，令畀佢坐嘅人發惡夢－例如德文入面就有隻古字 Alpdrücken 指惡夢，而隻字字面解係 Alp（精靈）Druck（壓力）噉嘅意思[58]；廿世紀嘅虛構作品將精靈嘅形象大幅美化咗[註 9]－廿世紀嘅精靈形象同中世紀嘅好唔同，廿世紀嘅精靈通常係長耳、身體修長、愛好大自然同埋異常咁長命（啲故仔仲好興講人同精靈相戀，但因為精靈壽命長過人好多，所以段戀情多數悲劇收場），佢哋好多時直頭會散發住貴族噉嘅氣質[59]。


 
廿世紀典型嘅精靈形象－長耳、身體修長、愛好自然


  • 僻時[歐 41]：英格蘭民間傳說提到；根據傳說，僻時係細細隻、鍾意整蠱人嘅仙子，通常著綠色衫、夜行、會「喺月光下跟住青蛙同蟋蟀嘅音樂跳舞」；據講僻時好鍾意用咒語迷魂人，搞到佢哋行錯路然後喺森林入面蘯失路，而且佢哋零舍鍾意騷擾後生未婚嘅女仔；順帶一提，呢啲傳說令廿世紀嘅英文裏面有咗 pixie-led 呢隻詞，隻詞係個形容詞，可以攞嚟形容人，字面上係畀僻時引導嘅噉解－暗指個人失魂或者成日蘯失路[60]。
  • 紅帽精[歐 42]：一種極危險嘅仙子；傳說話紅帽精會喺英蘇邊界嗰頭啲城堡度活動，畀人描述為得人驚嘅怪獸－據講紅帽精外形似隻矮嘅年老精靈、啲牙好長、手指又幼又尖、對眼好大而且火紅噉色、頭上戴住頂紅色嘅帽；紅帽精頂帽之所以紅色係有原因嘅－據講，一隻紅帽精對任何闖入佢嘅地頭嘅人類都係一律殺無赦，殺完人就會將自己頂帽浸喺受害人嘅血度，令頂帽愈嚟愈紅，紅帽精體形唔高大但好捱得打，無論人類點樣用拳腳或者武器毆一隻紅帽精，佢都唔會受傷[61]，而對付佢哋嘅唯一方法據講係用十字架等嘅神聖物品，用呢啲神聖物品嘅神力消滅充滿邪力嘅紅帽精[62]。
  • 海豹妖[歐 43]：蘇格蘭民間傳說提到；根據傳說，一隻海豹妖有兩個型態－佢本來係隻海豹，不過佢上岸除咗塊海豹皮就可以變成人形，而且人形好多時會係靚女；講海豹妖嘅民間傳說好多時係講有隻女嘅海豹妖上岸玩或者游近岸，途中有個人類男人偷走咗佢塊海豹皮，搞到隻海豹女焗住要留喺陸地上面，做個男人嘅老婆[63]。

... 呀噉。

 
1894 年一幅圖畫；幅畫描述想像中「有班僻時喺度攞一隻野生動物嘅骨頭嚟玩」噉嘅情境。

「白靚一族」

編輯
 
1827 年一幅畫；幅畫描繪想像中嘅白雪公主（右下角瞓緊覺嗰個女仔）。
睇埋：白雪公主

「佢哋（仙子）偷走牛同臊孲仔... 佢哋偷走牛奶... 佢哋鍾意音樂，就拐走音樂人... 事實係佢哋乜都偷。我哋（人類）永遠都唔會好似佢哋咁自由、好似佢哋咁靚、好似佢哋咁聰明、好似佢哋咁輕盈；我哋係畜牲。」－《Lords and Ladies》[64]

現代英文會用 fairy 等嘅字詞嚟指仙子。呢啲字詞據講同 the fair folk 呢隻詞有啦掕。The fair folk 嘅意思如下[65]：

  • 喺古英文當中，fæger（現代英文字詞 fair 嘅前身）係一隻形容詞，用嚟形容人嗰陣通常係指「靚，尤其係指靚得嚟皮膚白淨嗰種靚」噉嘅意思[66]；呢點喺打後嘅英文度都見得到，例如著名童話故事《白雪公主》嘅英文版噉，就有用
    The fairest of them all
    • 呢句短語嚟描述出嗮名「生得靚、皮膚好似雪咁白」嘅白雪公主－呢句短語意思係話，白雪公主係「佢哋當中最白淨最靚嘅」噉解[67]；
  • 而 folk 嚟自古英文 folc [68]，係一隻名詞，意思係指平民或者族群噉解，例如英文 folk music 係指一個族群之間嘅民間音樂嘅意思，英文 xx folk 可以攞嚟指 xx 嘅人群噉嘅意思；

結合上述兩點，the fair folk 可以理解做又白淨又靚嗰個族群或者白靚一族噉嘅意思[28]。至於啲人點解會噉樣稱呼仙子，有種講法係噉嘅：中世紀嘅歐洲人相信仙子會拐帶細路同埋捉人做奴僕，所以普遍都怕咗仙子，於是就嗌仙子做白靚一族－佢哋就係驚如果唔用返個好聽嘅名稱呼仙子，就會激嬲仙子惹禍上身[註 10]。

睇埋

編輯
  • 瘦長男[歐 44]：瘦長男係廿一世紀初恐怖意式麪嘅代表角色；瘦長男係一隻神秘嘅生物，就噉睇似人形，著住西裝，生得異常咁高咁瘦，手腳比例明顯唔似人（似人非人），傳說話瘦長男會喺森林等多種地方出現，會跟蹤佢嘅目標人物，跟蹤到咁上下佢會突然出現喺目標人物後面，而畀瘦長男跟蹤嗰個人事後就會失蹤[69]；有學者指出，瘦長男查實好似中世紀嗰啲仙子傳說－兩者都係似人非人、有超自然力量、會拐帶大人細路，而且畀佢哋拐走嘅人下場不明[30]:Ch. 1。
  • Boogeyman
  • 魅魔同男夢魔
  • 妖怪
  • 魔神
  • 惡龍
  • 仙子類

參考

編輯

註釋：

  1. ↑ 《灰姑娘》都有多個唔同版本。格林童話個版本完全冇提過神仙教母。
  2. ↑ 有種講法仲話，路西法打後成為撒旦。
  3. ↑ 可以睇 TV Tropes 嘅 Death of the Old Gods。
  4. ↑ 4.0 4.1 可以睇埋恐怖谷理論。
  5. ↑ 可以睇 TV Tropes 嘅 Cold Iron。
  6. ↑ 以下內容有劇透。
  7. ↑ 可以睇 TV Tropes 嘅 Disneyfication。
  8. ↑ 可以睇吓文化進化嘅概念。
  9. ↑ 有人話主要係多得《魔戒》作者托爾金。
  10. ↑ 可以睇 TV Tropes 嘅 The Fair Folk。

外語詞彙（預設係英文）：

  1. ↑ Peter Pan
  2. ↑ Fairy Godmother
  3. ↑ leprechaun
  4. ↑ will-o-the-wisp
  5. ↑ banshee
  6. ↑ 拉：Lucifer
  7. ↑ 希：מיכאל；拉：Michael
  8. ↑ Puritan
  9. ↑ William Allingham
  10. ↑ changeling
  11. ↑ Fairyland
  12. ↑ Rumpelstiltskin
  13. ↑ fairy ring
  14. ↑ 愛爾蘭蓋爾文：féar gortach
  15. ↑ Maleficent
  16. ↑ A Midsummer Night's Dream
  17. ↑ Hermia
  18. ↑ Lysander
  19. ↑ Demetrius
  20. ↑ Helena
  21. ↑ Oberon
  22. ↑ Titania
  23. ↑ Puck
  24. ↑ Bottom
  25. ↑ Madame d'Aulnoy
  26. ↑ romanticism
  27. ↑ Walter Scott
  28. ↑ Rudyard Kipling
  29. ↑ Peter and Wendy
  30. ↑ Tinker Bell，粵拼：ting1 kaa1 beu1
  31. ↑ 瑞典文：Älvalek
  32. ↑ 西班牙文：El Hada del Lirio
  33. ↑ Femme Papillon
  34. ↑ Fairy and Griffon
  35. ↑ Lord 簡化講係對男性貴族嘅專稱，而 lady 簡化講就係 lord 嘅女版。
  36. ↑ Bloody Bones
  37. ↑ bluecap
  38. ↑ boggart / bugbear
  39. ↑ brownie
  40. ↑ elf，眾數係 elves
  41. ↑ pixie / pixy
  42. ↑ redcap
  43. ↑ selkie
  44. ↑ The Slender Man

引述咗嘅文獻同網頁：

  1. ↑ 1.0 1.1 1.2 1.3 1.4 1.5 Fairy. Encyclopedia Britannica.
  2. ↑ 2.0 2.1 Ashliman, D. L. (2004). Folk and fairy tales: A handbook. Greenwood Publishing Group.
  3. ↑ Clinton, G. (2015). Fairies. Cavendish Square Publishing, LLC.
  4. ↑ 4.0 4.1 4.2 4.3 4.4 4.5 仙子曾經唔係咁可愛－佢哋曾經飲人血同拐帶細路 （英文），The Conversation。
  5. ↑ Sikes, Wirt (1880). British Goblins: Welsh Folk-Lore, Fairy Mythology. Legends and Traditions. J.R. Osgood and Company. p. 11.
  6. ↑ 6.0 6.1 Fhloinn, Bairbre Ni (2018). Cold Iron: Aspects of the Occupational Lore of Irish Fishermen. University College Dublin.
  7. ↑ 7.0 7.1 Hunt, Maurice (1986). "Individuation in "A Midsummer Night's Dream"". South Central Review. The South Central Modern Language Association. 3 (2): 1-13.
  8. ↑ 下面引咗嘅原句："Fairy, ..., a mythical being of folklore and romance usually having magic powers and dwelling on earth in close relationship with humans."
  9. ↑ Briggs, Katharine (1976). An Encyclopedia of Fairies. Pantheon Books. "Fairy godmother", pp. 147.
  10. ↑ Diane Negra, ed. (22 February 2006). The Irish in Us: Irishness, Performativity, and Popular Culture. Duke University Press.
  11. ↑ Will-o'-the-wisp. mythology.net.
  12. ↑ Briggs, Katharine (1976). An Encyclopedia of Fairies. Pantheon Books. pp. 14-16.
  13. ↑ The Origins of Fairies. Historic UK.
  14. ↑ Bown, N. (2001). Fairies in nineteenth-century art and literature (Vol. 33). Cambridge University Press.
  15. ↑ 15.0 15.1 Lewis, C. S. (1994). The Discarded Image: An Introduction to Medieval and Renaissance Literature. Cambridge University Press. p. 135-136.
  16. ↑ Briggs (1976) p. 319.
  17. ↑ 17.0 17.1 Lyle, E. B. (1970). The Teind to Hell in Tam Lin. Folklore, 81(3), 177-181.
  18. ↑ Briggs (1967) p. 9.
  19. ↑ 19.0 19.1 Evans-Wentz, W. Y. (1990) [1966]. The Fairy-Faith in Celtic Countries. New York: Citadel. pp. 167, 243, 457.
  20. ↑ Stark, Rodney (1996). The Rise of Christianity: A Sociologist Reconsiders History. Princeton, NJ: Princeton University Press. p. 3.
  21. ↑ Fairies and pagan mythologies in the medieval Spanish ballad. David A. Wacks.
  22. ↑ Lewis (1994) p. 137.
  23. ↑ Briggs (1976) "Origins of fairies" p. 320.
  24. ↑ Briggs (1976). "Traffic with fairies" and "Trooping fairies" pp. 409-12.
  25. ↑ Briggs (1976) p. 15.
  26. ↑ The Fairies. - by William Allingham.
  27. ↑ Briggs (1976) p. 98.
  28. ↑ 28.0 28.1 Briggs, Katharine Mary (1976). "Euphemistic names for fairies". An Encyclopedia of Fairies. New York: Pantheon Books. pp. 335,36.
  29. ↑ Lewis, C. S. (1994). The Discarded Image: An Introduction to Medieval and Renaissance Literature. Cambridge University Press. p. 122.
  30. ↑ 30.0 30.1 Chess, S., & Newsom, E. (2014). Folklore, Horror Stories, and the Slender Man: The Development of an Internet Mythology. Springer.
  31. ↑ Ashliman, D. L., "Changelings", 1997. Frenken shows historical pictures of the topic (newborn and the devil): Frenken, Ralph, 2011, Gefesselte Kinder: Geschichte und Psychologie des Wickelns. Wissenschaftlicher Verlag Bachmann. Badenweiler. pp. 146, 218 f, 266, 293.
  32. ↑ Katharine Briggs, An Encyclopedia of Fairies, Hobgoblins, Brownies, Boogies, and Other Supernatural Creatures "Changelings" (Pantheon Books, 1976) p. 71.
  33. ↑ Briggs (1976) "Golden Hair", p. 194.
  34. ↑ Francis James Child, The English and Scottish Popular Ballads, v 1, pp. 358-359, Dover Publications, New York 1965.
  35. ↑ Katharine Briggs, An Encyclopedia of Fairies, Hobgoblins, Brownies, Boogies, and Other Supernatural Creatures, "Pwca", p 337.
  36. ↑ "Rumpelstiltskin". Encyclopedia Britannica. Retrieved 2020-11-12.
  37. ↑ Keightley, Thomas (1850) [1828]. The Fairy Mythology: Illustrative of the Romance and Superstition of Various Countries. London: H.G. Bohn. p. 81.
  38. ↑ Carleton, William. Phelim O'toole's Courtship and Other Stories.
  39. ↑ VI. IRON AS A PROTECTIVE CHARM.
  40. ↑ Iron in Folklore - Superstitions Explained..
  41. ↑ 41.0 41.1 Brooks, H. F. (1979). The Arden Shakespeare: A Midsummer Night's Dream. New York: Methuen.
  42. ↑ Hunt, M. (1986). Individuation in" A Midsummer Night's Dream". South Central Review, 3(2), 1-13.
  43. ↑ A Midsummer Night's Dream - the plot Royal Shakespeare Company.
  44. ↑ WELL-MEANING FAIRIES?. York Notes.
  45. ↑ Characteristics Of Fairy In A Midsummer Night's Dream. Cram.
  46. ↑ Lewis (1994) p. 138.
  47. ↑ Zipes, Jack (2000) The Great Fairy Tale Tradition: From Straparola and Basile to the Brothers Grimm. W.W. Norton. p. 858.
  48. ↑ Briggs, (1967) pp. 165-67.
  49. ↑ Birkin, A. (2002). JM Barrie and the Lost Boys: the real story behind Peter Pan. Yale University Press.
  50. ↑ Rose, J. (1993). The case of Peter Pan, or the impossibility of children's fiction. University of Pennsylvania Press.
  51. ↑ Maas, Jeremy (1997). Victorian Fairy Painting. Merrell Holberton.
  52. ↑ Terry Pratchett > Quotes > Quotable Quote. Goodreads，段原文如下：
    "Elves are wonderful. They provoke wonder.
    Elves are marvellous. They cause marvels.
    Elves are fantastic. They create fantasies.
    Elves are glamorous. They project glamour.
    Elves are enchanting. They weave enchantment.
    Elves are terrific. They beget terror.
    The thing about words is that meanings can twist just like a snake, and if you want to find snakes look for them behind words that have changed their meaning.
    No one ever said elves are nice."
  53. ↑ Bloody Bones, n.. OED.
  54. ↑ Allen, J. (2005), Fantasy Encyclopedia, Kingfisher Publications. p. 24.
  55. ↑ Harland, J; Wilkinson, T. T. (1857). Lancashire Folk-lore. Warne & Co. p. 55.
  56. ↑ Ashley, Mike (1999) [1997], "Elves", The Encyclopedia of Fantasy, New York City, New York: St. Martin's Griffin, p. 316。
  57. ↑ Croker, Thomas Croften (1834). Fairy legends and traditions of the south of Ireland. pp. 209-286.
  58. ↑ elf. Encyclopedia Britannica.
  59. ↑ Davidsen, M. A., & Milon, A. (2019, February). Honouring the Valar, finding the Elf within: The curious history of Tolkien spirituality and the religious affordance of Tolkien's literary mythology. In Tolkien the Pagan? Reading Middle-earth through a Spiritual Lens: Proceedings of Tolkien Society Seminar 2018 (pp. 31-45). Luna Press Publishing.
  60. ↑ pixie. Encyclopedia Britannica.
  61. ↑ Briggs, Katharine (1976). An Encyclopedia of Fairies. Pantheon Books. p. 339.
  62. ↑ Henderson, William (1879). Folklore of the Northern Counties of England and the Borders (2nd ed.) W. Satchell, Peyton & Co. p. 253.
  63. ↑ Hiestand (1992), p. 331: "Those are always the basic ingredients: an unmarried farmer, a seal-skin, a naked woman in the waves".
  64. ↑ 英文原文：
    "They steal cattle and babies...
    They steal milk...
     They love music, and steal away musicians...
     In fact they steal everything.
     We'll never be as free as them, as beautiful as them, as clever as them, as light as them; we are animals."
  65. ↑ Briggs, Katharine Mary (1976). "Euphemistic names for fairies". An Encyclopedia of Fairies. New York: Pantheon Books. p. 127.
  66. ↑ fair (adj.). Online Etymology Dictionary.
  67. ↑ Mirror, Mirror: Does 'Fairest' Mean Most Beautiful Or Most White?. npr.
  68. ↑ folk (n.). Online Etymology Dictionary.
  69. ↑ Dewey, Caitlin; Dewey, Caitlin (2014-06-03). "The complete history of 'Slender Man,' the meme that compelled two girls to stab a friend". The Washington Post.

文獻

編輯

英文文獻：

  • Ashliman, D. L. (2004). Folk and fairy tales: A handbook. Greenwood Publishing Group.
  • Briggs, K. M. (1977). A Dictionary of Fairies: Hobgoblings, Brownies, Bogies, and other Supernatural Creatures. Bungay: Penguin.
  • Briggs, K. M. (1957). The English Fairies. Folklore, 68(1), 270-287.
  • Henderson, L., & Cowan, E. J. (2001). Scottish fairy belief: A history. Dundurn.
  • Hutton, R. (2014). The making of the early modern British fairy tradition. The Historical Journal, 57(4), 1135-1156.
  • Lewis, C. S. (1994). The discarded image: An introduction to medieval and renaissance literature. Cambridge University Press.
  • Purkiss, D. (2000). Troublesome Things: a history of fairies and fairy stories (p. 175). London: Allen Lane.
  • Silver, C. G. (1999). Strange and secret peoples: Fairies and Victorian consciousness. Oxford University Press on Demand.

拎

編輯
 
維基同享有多媒體嘅嘢：
仙子
由「https://zh-yue.wikipedia.org/w/index.php?title=仙子&oldid=2185652」收